1. Vati tua pande ku livua omo lia lutsilielo luetu?

KATI vose va kala na lutsilielo. (2 Tesalonika 3:2) Vunoni Yehova ue ku hana lutsilielo ku vose ve ku mu lemesa. (Loma 12:3; Ngalata 5:22) Ca pua ku vezika ca kama ku kala na lutsilielo lue ku tu hana Yehova!

2, 3. (a) Ku vezika cika tu uana mu ku muesa lutsilielo? (b) Vihula vika tu ka lilongesa hano?

² Yehova ua tu hele Muaneni Yesu linga uose a mu tsiliela va mu ecele ku vipi vieni. Eci ci na asiuisa viuma linga vantu va hase ku pua vavusamba va Njambi na ku ka yoya miaka yose. (Yoano 6:44, 65; Loma 6:23) Yehova ua tu muesele ngozi ya kama! Vutuhu tu vakua vupi kaha tua fuila ku-tsa, Yehova ua muene ngecize tu hasa ku linga viuma via cili. (Visamo 103:10) Ngeci ua tu kuasele ku tantekeya muzimbu ua cili ku tuala hali Yesu na cikombelo. Omo tua putuka ku muesa lutsilielo muli Yesu na ku mu kava, tua lavelela muono ka ue ku hua!—Tandenu 1 Yoano 4:9, 10.

³ Vunoni viuma vika vikuavo tu hasa ku lilongesa ku tuala ha lutsilielo? Vuno ku tantekeya via tu pangela Njambi na vize via ka tu pangela ku lutue, ca lomboloka ngecize tua kala na  lutsilielo ni? Tu ci talenu vikuavo vi tua pande ku linga.

4. Nga tua kala na lutsilielo vika tu ka linga?

⁴ Ku tsiliela muli Yehova na Yesu ka ca lengelele lika ha ku tantekeya viuma vi va tu pangela na vize vi va ka tu lingila ku lutue. Tua pande naua ku muesa cizango ca kama ca ku yoya mu cifua ci va tu longesa. Kaha tua pande ku muesa ntsintsa ya ku kuasa vakuetu va tantekeye Yehova na Yesu. Kapostolo Paulu ngueni: “Muomu nga u litava na kanua kove ngecize Yesu ikeye Muangana, na ku tsiliela na mutima uove ngecize Njambi ua mu sanguile ku vatsi, u kovoka: muomu muntu a tsiliela na mutima linga a uane vuviuke; a tava na kanua linga a uane vuovoke.”—Loma 10:9, 10; 2 Kolintu 4:13.

5. Omo lia vika lutsilielo lua pua lua seho ya kama cikuma? Hanenu cimueso.

⁵ Nga tu tonda ku ka yoya miaka yose mu ndzolela mu mavu a aha a kulahesa Njambi, tua pande ku kala na lutsilielo lua ku kaniama. Lutsilielo lua pua ngue muti ua undende. Tua pande ku u tukumuina mema linga u kole vuino. Vunoni nga ka tu hakako mema a ku puamo, u hasa ku uma na ku-tsa. Na vuno vene, tua pande ku linga cose tu kaniamese lutsilielo luetu linga lu kole.—Tito 2:2; 2 Tesalonika 1:3; Luka 22:32; VaHevelu 3:12.

6. Mu vinjila vika vivali VaHevelu 11:1 ya lombolola lutsilielo?

⁶ Mbimbiliya ya lombolola lutsilielo ku VaHevelu 11:1 (Tandenu.) (1) Lutsilielo lua pua “ciye ca viuma via ku lavelela.” Viuma vi tua “lavelela” via ambatela kumo na vikulaheso via Njambi via ku lutue. Ca ku muenako, yetu tua kala na vusunga ngecize vupi tangua vu ka hua kaha ku ka kala mavu a aha. (2) Lutsilielo lua pua “ku tava,” ni ku kala na vusunga vua “vize vintsa kanda tu mona.” Tua tantekeya nguetu Yehova Njambi, Yesu Kilistu, tungelo na Vuangana ku via kala mpundu vutuhu ka tu hasa ku vi mona. (VaHevelu 11:3) Vati tu hasa ku muesa ngecize tua tsiliela mpundu mu vikulaheso via Njambi vutuhu ka tuesi na ku vi mona? Tu hasa ku muesa ngoco mu cifua ca muono uetu, na viuma vi tue ku handeka na mu vilinga vietu.

7. Vati lungano lua Noa lue ku tu kuasa ku ivuisisa vi ca lomboloka ku kala na lutsilielo? (Talenu cikupulo ca ku vuputukilo.)

⁷ Vika tu lilongesa ha lutsilielo lua Noa? Kapostolo Paulu ua handekele via Noa ngueni, “omo Njambi ua mu nanguile vize vintsa kanda a mona, na vuoma vua Njambi ua tungile vuato.” (VaHevelu 11:7) Mu ku linga Noa ua tsilielele mu viuma via mu lekele Yehova, ua tungile vuato vua kama. Halumo vandambo va kele na ku mu ihula omo lia vika ua tungile vuze vuato. Mua vusunga Noa ka holokele. Mbimbiliya nguayo Noa ua puile “mukua ku ambulula vuviuke.” (2 Petulu 2:5) Ua mamuine vantu ngueni Njambi tangua a ka neha livazi lia ku nongese vakua vupi. Citava ua va lekele aa mezi a Yehova ngueni: “Nji na zange ku manesa ntsitu yose; muomu mavu a na sulu na luozi omo vakevo,” kaha “Nji ci ku neha livazi lia mema ha mavu, ku enieka ntsitu yose, muose mua kala muku ua muono, muintsi lia lilu; viose vi li ha mavu vi ka  tsa.” Mua vusunga Noa ua lekele vantu vi va pandele ku linga mangana vovoke ku livazi lia kama. Yehova ua mu sikile ngueni: “Nove u ka kovela mu vuato.”—Njenisisi 6:13, 17, 18.

8. Vika ua handekele Tiango ku tuala ha lutsilielo?

⁸ Tiango neni ua sonekele via lutsilielo. Ci moneka ngue ua sonekele aa mezi aco mu nima ya kapostolo Paulu ku sonekela VaHevelu. Tiango ua sonekele ngueni: “Nji muese ku tsiliela cove nga ka cesi na vilinga, kaha nange nji ka ku muesa ku tsiliela cange na vilinga viange.” (Tiango 2:18) Tiango ua muesele ngecize ku kala na lutsilielo, ka ca puile lika ku tsiliela. Omo lia vika? Muomu vandemone navo va tsiliela nguavo Njambi kua kala, vunoni ka ve ku tsiliela muli Yehova. Muomu va mu alulukila. (Tiango 2:19, 20) Cikuavo naua, nga muntu a li na lutsilielo, a ka tualelelaho ku ya Njambi ku mutima mu ku linga vipanga via cili. Evi vikevio via lingile Avilahama. Tiango ua sonekele ngueni: “Avilahama tatetu kati ikeye ua sambuele na vilinga muze mua kombeleyele muaneni Isake ku mutula, ni? U na mono ngecize ku-tsiliela ca pangele hamo na vilinga vieni, kaha ku-tsiliela ca tantulukile na vilinga.” Tiango ua muesele ngecize lutsilielo lua ku hona vilinga ka luesi na seho mua handekele ngueni: “Muvila nga ka uesi na cimbembesi u na tsi, mukemuo na ku-tsiliela nga ka cesi na vilinga ci na tsi.”—Tiango 2:21-23, 26.

9, 10. Vika ca lomboloka ku tsiliela muli Muana?

⁹ Mu nima ya miaka 30, Yoano ua sonekele Zimpande zieni zia cili na mikanda ikuavo itatu. Ngeci mua vakuavo vakua ku soneka Mbimbiliya, Yoano neni uevuisisile vika lutsilielo. Ku viuma via sonekele, Yoano ua pangesele lua luingi lizi limo lia mu ciNgelengu vintsimbu vimo mu Ngangela li hasa ku lomboloka “ku-tsiliela.”

¹⁰ Ca ku muenako, Yoano ua lomboluele ngueni: “Uze a tsiliela Muana, a li na muono ka ue ku hua ua ya-ye; vunoni uze kononoka kuli Muana ka ka mono muono, vunoni vutenu vua Njambi vu ka kala hali ikeye.” (Yoano 3:36) Linga tu tsiliele muli Muana, tua pande ku tava via tu tuma Yesu. Mua vusunga, mu visoneka via Yoano tu hasa ku monamo ngecize, Yesu kasi ua handekele ngueni nga tu tonda ku ka uana muono ka ue ku hua ua ya-ye, tua pande ku mu tsiliela na ku tsiliela Ise.—Yoano 3:16; 6:29, 40; 11:25, 26; 14:1, 12.

11. Vati tu hasa ku muesa ku santsela cetu mu ku tantekeya vusunga?

¹¹ Yehova ua tu kuasele ku ivuisisa vusunga ku tuala hali ikeye na Muaneni ku hitila mu sipilitu santu. Eci ca tu kuasa ku tsiliela muli vakevo. (Tandenu Luka 10:21.) Vati tu hasa ku muesa ku santsela cetu ku viose via tu pangela Yehova? Ka tua pandele ku likela ku mu santsela omo lia ku tu tavesa ku pua vavusamba veni ku hitila muli Yesu, “mukua ku sangumuka na ku tantuluisa ku tsiliela cetu.” (VaHevelu 12:2) Kaha tua pande ku lihakela kapandi ka ku kolesa lutsilielo luetu mu ku vundila kuli  Yehova na ku lilongesa Lizi lieni.—Efeso 6:18; 1 Petulu 2:2.

12. Vika tu ka linga nga tua kala na lutsilielo?

¹² Tua pande ku tualelelaho ku muesa mu vilinga ngecize tua tsiliela mu vikulaheso via Yehova. Ca ku muenako, tua pande ku tualelelaho ku ambuluila vantu via Vuangana vua Njambi na ku va kuasa va pue vandongesi va Yesu. Tu ka tualelelaho ku panga “vize via viuka kuli vantu vose, kaha cikuma vene kuli vaze va na pandama ku vusoko vua ku tsiliela.” (Ngalata 6:10) Tu lihakelenu kapandi ka ku “zula vuntu vuze vua laza na vilinga viavuo” muomu ka tu tondo nkala cuma ci pihise vusamba vuetu na Yehova.—Kolose 3:5, 8-10.

13. Omo lia vika “ku tsiliela Njambi” ca pua ca seho ya kama? Vati va ci lombolola mu Mbimbiliya kaha omo lia vika?

¹³ Mbimbiliya nguayo: “Nga ku tsiliela cahi ka tu hasa ku mu ya ku mutima; muomu uze eza kuli Njambi na pande ku tsiliela ngecize ikeye ku a li, kaha ngecize ikeye mukua ku lunguisa vaze ve ku mu lengeya.” (VaHevelu 11:6) Mbimbiliya ya muesa naua ngecize “ku tsiliela Njambi” ca pande ku pua cuma ca katete ci va pande ku muesa Vakua Kilistu va vusunga. Ca pua mutamba ua luvula luetu. (VaHevelu 6:1) Vunoni ku lutsilielo luetu tua pande ku vuezako naua vifua vikuavo via seho linga tu kale na vusamba vua ntsimbu yose na Yehova.— Tandenu 2 Petulu 1:5-7; Yunda 20, 21.

14, 15. Seho ika lutsilielo lua kala naluo nga tu lu setekesa ku cilemo?

¹⁴ Vakua ku soneka Mbimbiliya va handekele cikuma via lutsilielo ku hiana nkala cifua. Vuno eci ca lomboloka ngecize lutsilielo lua hiana nkala vifua vikuavo ni?

¹⁵ Paulu ua setekesele lutsilielo na cilemo. Ua sonekele ngueni: “Nga nji li na ku-tsiliela cose ngecize nji hasa ku sosolola mincinda, vunoni cilemo nga ka njesi naco, nji cinanta ca ngoco.” (1 Kolintu 13:2) Yesu ua handekele ngueni “lizi lia Lisiko lia kama” lia pua ku lema Njambi. (Mateo 22:35-40) Cilemo ce ku tu kuasa ku muesa vifua vikuavo via cili via lema Njambi. Ca ku muenako, Mbimbiliya nguayo cilemo “ci tsiliela  ku viuma viose.” Ngeci mukemuo cilemo ci ka tu kuasa ku tsiliela mu viose via tu leka Njambi mu Mbimbiliya.—1 Kolintu 13:4, 7.

16, 17. Vika Mbimbiliya ya handeka ku tuala ha cilemo na lutsilielo? Cifua cika ca hiana seho ha vivali, kaha omo lia vika?

¹⁶ Lutsilielo na cilemo via pua via seho ya kama cikuma, kaha vakua ku soneka Mbimbiliya hahengi va vi tumbuila hamo. Paulu ua nanguile vamuanaye ngueni “zalienu ntelo ya ku-tsiliela neyi ya cilemo.” (1 Tesalonika 5:8) Petulu ua sonekele via Yesu ngueni: “Cipue ikeye intsa ka mua muene, i mu lema; cipue intsa ka mu mono, kasi mua mu tsiliela.” (1 Petulu 1:8) Tiango uehuile vamuanaye va ku vuavesa ngueni: “Njambi ka hanguile vahutu va ha mavu va pue vandzunda [ni vampite] mu ku tsiliela na vakua ku suana vuangana vuze vua na sikile kuli vaze va mu lema, ni?” (Tiango 2:5) Yoano ua sonekele via masiko a Njambi ngueni “tu tsiliele lizina lia Muaneni Yesu Kilistu na ku lilema umo na mukuavo.”—1 Yoano 3:23.

¹⁷ Vunoni Paulu ua sonekele ngueni: “Vuovuno kua litulu ku-tsiliela, ku-lavelela, cilemo, evi vitatu; kaha ca hiana ku evi, cilemo.” (1 Kolintu 13:13) Ku lutue, ka ci ka tondeka ku tsiliela mu vikulaheso via Njambi via mavu a aha muomu viose vi ka lipuisamo. Tu ka yoya muono ua cili ngue mu va u soneka mu Mbimbiliya. Vunoni tu ka tondeka ku lema Njambi na vakuetu vantu ntsimbu yose. Mua vusunga cilemo cetu kuli vakevo ci ka tualelelaho ku likolesa.

18, 19. Vika vieza mu ku tsiliela ca vantu va Njambi matangua ano, kaha iya na fuila ku tambula ku sangaziala?

¹⁸ Vangamba va Yehova va ku matangua ano va tsiliela mu Vuangana vua Njambi na ku vu hakuila. Kaha va lilema umo na mukuavo. Mu njila ika? Muomu ve ku tavesa sipilitu ya Njambi i va tuamenene mu muono uavo. (Ngalata 5:22, 23) Vamuanetu na vandumbuetu va tuvakana 8 milliões mu mavu ose va kala mu ciyulo na ku litavasiana mu vikungulukilo viavo. Mua vusunga, lutsilielo na cilemo via tondeka cikuma.

¹⁹ Eci ku litavasiana na ku litombola caco ca kalako omo lia vukuasi vua Yehova. Tua pande ku mu sangaziala ku viose. (Isaya 55:13) Tue ku viukilila cikuma ku tantekeya ngecize Njambi na asiuisa viuma linga a tu ovole ku hitila “ha ku tsiliela.” (Efeso 2:8) Yehova a ka tualelelaho ku kuasa vantu vavengi va muese lutsilielo muli ikeye. Kaha mu ku sulumuina, mavu ose a ka sula na vantu va vakua vuviuke va pangela Yehova na ndzolela miaka yose!