1, 2. (a) Vupite vuka vutatu ua tu hana Yehova? (b) Vika tu ka lilongesa mu cilongesa cino?

YEHOVA ikeye ua pua Mukua ku hiana ku vufuko mu viose. Viose via mu pande. (1 Mizimbu 29:11, 12) Vunoni Yehova ua kala na vuhuanga mu viose. Ce ku tu vuisa ndzolela ku mona ngecize ikeye ue ku tu hana vupite vua mu lutsilielo! Vupite vuaco vua pua vuka? Vua pua (1) Vuangana vua Njambi, (2) cipanga cetu ca ku ambulula, kaha (3) vusunga vu tue ku uana mu Lizi lieni. Vunoni nga ka tua zangamenene tu hasa ku suva seho ya vupite ovu. Tua pande ku tualelelaho ku livuluisa etu vavene seho yavuo na ku vu lema cikumakuma muomu, ngue mua handekele Yesu, ngueni, “kuze kua kala vufuko vuenu, ku-kekuo naua ku ka kala mitima yenu.”​—Luka 12:34.

² Tu ci talenu vati tu hasa ku kaniamesa cilemo na ku santsela cetu ku Vuangana, ku ku ambulula, na ku vusunga. Omo tu lingamo, tu hilulenu ha vati muntu ku muntu a hasa ku muesa cilemo ca ku lova ku vupite ovu vua mu lutsilielo.

3. Yala ua mu cisimo ca tele Yesu ua kele na cizango ca ku linga vika a lande livue limo lika? (Talenu cikupulo ca ku vuputukilo.)

³ Tandenu Mateo 13:45, 46. Yesu ua tele cisimo ca umo yala ua landele na ku landesa zimpota, ni nguetu, mavue a seho. Tangua limo, ua uanene limo livue lia seho ya kama ku hiana aze mavue akuavo. Uze yala ua tondele cikuma lize livue ngeci ua landesele viose via kele navio linga a li lande. Mua vusunga lia puile lia seho ya kama kuli ikeye!

4. Kapandi kaka tu ka lihakela omo lia Vuangana?

⁴ Vika tu hasa ku lilongesa ku cisimo ca tele Yesu? Vusunga vua Vuangana vua Njambi vua pua ngue lize livue lia seho. Nga tua lema cikuma Vuangana ngue uze yala mua lemene livue, tu ka seza viose linga tu pue vasuana va Vuangana. (Tandenu Mako 10:28-30.) Tu ci talenu vati vantu vavali va lingilemo.

5. Vika Sangeo ua tondele ku linga omo lia Vuangana?

⁵ Sangeo ua puile mukua ku tambula milambu. Ua fukile mu ku tambuola vimbongo via vakuavo. (Luka 19:1-9) Vunoni tangua limo, Sangeo ua vuile Yesu a handeka via Vuangana. Ua viukilile cikuma omo lia viuma via vuile ngeci ua tondele ku alulula cifua ca muono ueni. Ngeci ua handekele ngueni: “Tala, Muangana, nji ku hana mutamba ua ha kati ua vufuko vuange kuli vahutu; kaha nga nji na tambula cuma cimo ca milami kuli umosi, nji ku mu sintsilamo viuana.” Sangeo ua hiluisile vimbongo via tambuile ku vantu kaha ua likelele lizangamena.

6. Ku aluluka cika ua lingile umo mpuevo, kaha vika ua lingililemo?

⁶ Umo mpuevo ua liambatele na mukuavo mpuevo. Ua puile naua ntuamena ua civunga ca vakua ku hakuila malo a vantu va vilio vimo. Vunoni tangua limo ua vuile muzimbu ua Vuangana. Kaha omo ua lilongesele Mbimbiliya na seho ya Vuangana vua Njambi, ua muene ngecize ua pandele ku alulula cifua ca muono ueni. (1 Kolintu 6:9, 10) Omo lia cilemo ceni kuli Yehova, ua sezele civunga caco kaha na ku tsiha vulo na uze mpuevo ya liambatele neni. Va mu mbatizile mu 2009, kaha mu muaka ua hateleko ua puile pioneira ua ntsimbu yose. Uze mpuevo ua aluluile cifua ca muono ueni muomu cilemo ceni kuli Yehova ca hamene cikuma ku hiana nkala vizango via ku pihia via kele navio.​—Mako 12:29, 30.

7. Vati tu hasa ku tualelelaho ku kolesa cilemo cetu ku Vuangana vua Njambi?

⁷ Linga tu pue vakua ku ononoka ku Vuangana vua Njambi, cingi cetu tua tondekele ku alulula vifua via miono yetu mu vutuntu. (Loma 12:2) Vunoni ka tua pandele ku lengela lika oho. Ka tua pandele ku tavesa nkala cuma ci zeyese cilemo cetu ku Vuangana, ngeci mua, ku lema vupite ni nkala masungu a ku pihia. (Visimo 4:23; Mateo 5:27-29) Yehova ua tu hana vupite vukuavo vua seho,  mu ku tu kuasa linga cilemo cetu ku Vuangana vua Njambi ci tualeleleho ku kaniama.

8. (a) Omo lia vika kapostolo Paulu ua handekele ngueni cipanga ca ku ambulula ca pua ngue vupite vua kala “mu zindoho zia vuma”? (b) Vati Paulu ua muesele cilemo ku ku ambulula?

⁸ Yesu ua tu hana cipanga ca ku ambulula na ku longesa muzimbu ua Vuangana vua Njambi. (Mateo 28:19, 20) Kapostolo Paulu ua handekele ngueni ku ambulula ca pua ca seho ya kama ngeci mua vupite vua kala mu zindoho zia vuma, ni nguetu vinjava. (2 Kolintu 4:7; 1 Timoteo 1:12) Mu ku linga ka tua tantulukile, tua pua ngue vinjava viaco via vuma. Vunoni muzimbu u tue ku ambulula ua pua ngue vupite muomu u hasa ku tu kuasa ku ka tambula muono ka ue ku hua hamo lika na vaze ve ku tu halakana. Ngeci mukemuo Paulu ua handekele ngueni: “Viuma viose nje ku vi lingila muomu zimpande zia cili linga nji ka pue mukua ku lipandakana nazio,” ni nguetu mukua ku zi ambulula. (1 Kolintu 9:23) Paulu ua lingile cose mu ku ambuluilako vakuavo via Vuangana vua Njambi. (Tandenu Loma 1:14, 15; 2 Timoteo 4:2.) Ku lema muzimbu ua cili cikeco ca mu kuasele ku tualelelaho ku ambulula vutuhu va kele na ku mu luisa. (1 Tesalonika 2:2) Vati tu hasa ku tambuluisa cilemo ca muesele Paulu ku ku ambulula?

9. Mu vinjila vika tu hasa ku muesa nguetu tua lema ku ambulula?

⁹ Njila imo ya mueselelemo Paulu ngecize ua lemene ku ambulula ya puile mu ku uana nkala vukovelelo vua ku handeka na vantu. Ngeci mua Paulu na vakua Kilistu va ku livanga, netu tue ku ambulula muzimbu ua cili ku ndzivo na ndzivo, ku vihela via mbunnga, na kuose-oko ku tu hasa ku uana vantu. (Vilinga 5:42; 20:20) Tue ku tonda vinjila via ku ambuluila ku vantu vavengi. Nga tu hasa, halumo citava tu pue vapioneiro va ku kuasa ni va ntsimbu yose. Ni halumo tu hasa ku lilongesa lilimi lieka, ku nungulukila ku cihela ceka mu cifuti cetu vene, ni cifuti cikuavo.​—Vilinga 16:9, 10.

10. Vivezikiso vika va uanene va Irene omo lia ku lihakela kapandi ka ku ambulula muzimbu ua cili?

¹⁰ Umo ndumbuetu ua lizina Irene ua ku Estados Unidos, ua tondele ku ambuluila muzimbu ua cili ku vakua ku handeka ciRusu. Ngeci mu 1993, ua lipandakanene ku kamo kacivunga ka lilimi lia ciRusu mu Mbonge ya Nova Yorke. Ha ntsimbu ize tele kua kele lika vakua ku ambulula 20. Mu nima ya miaka 20, vaIrene va handekele nguavo, “Kasi ka nje ku handeka vuino ciRusu.” Vunoni, Yehova ue ku va kuasa hamo na vakua ku ambuluala vakuavo mu ku ambuluila vantu va lilimi lize. Ngeci lelo lino, kua kala vikungulukilo vitanu na cimo mu Mbonge ya Nova Yorke. VaIrene va longesele Mbimbiliya vantu vavengi, kaha ha kati kavo 15 va va mbatizile. Vamo ve ku pangela ku Mbetele, va pua vapioneiro, vakuavo  co vakuluntu mu cikungulukilo. VaIrene va handekele nguavo, “Nga nji singanieka ha vizango vi nje ku lengeyele, na cimo cahi ce ku nji vuisile ndzolela ya kama.” Cili vene vaIrene va lema mpundu ku ambulula!

11. Vika vie ku izamo nga tu tualelelaho ku ambulula ambe nga va tu yandesa?

¹¹ Nga tua lema ku ambulula, tu ka tualelelaho ku ambulula ngue mua lingile kapostolo Paulu ambe nga va tu yandesa. (Vilinga 14:19-22) Ca ku muenako, ha kati ka miaka 1930 na 1944, vamuanetu ku Estados Unidos va va luisile cikuma. Vunoni kasi va tualeleho ku ambulula. Omo vakua nguvulu va setekele ku vemika, vamuanetu va tualele vimpande viaco ku vindzango kaha va ka sambuele lua luingi. Mu 1943, Muanetu Knorr ua tumbuile cimo cimpande ci va vulile ku Ndzango ya Kama ya ku Estados Unidos. Ua handekele ngueni nga vamuanetu va tualeleleho ku ambulula nga na cimo cimpande ca ka hetele ku Ndzango cahi. Kaha ua vuezeleko naua ngueni mu ku linga vamuanetu mu mavu ose va tualeleleho ku ambulula, eci ca muesele ngecize ku yandesa ka ce ku enda vuino. Vamuanetu ku vifuti vikuavo navo va sambuele mu vindzango via vingi. Mua vusunga, omo lia ku lema cipanga ca ku ambulula ka tu ka tavesa lamba i tu vindike ku ambulula.

12. Kapandi kaka mua lihakela?

¹² Nga tua lema ku ambulula, ka tu ka lisosomua cikuma viola vingahi tu ka hana mu nkala ngonde ku muzimbu ua ngonde. Tu ka lihakela kapandi ka “ku ambulula vukaleho vua zimpande zia cili.” (Vilinga 20:24; 2 Timoteo 4:5) Vuno viuma vika tu ka longesa vakuetu? Tu lilongesenu vupite vukuavo vua ku tunda kuli Njambi.

13, 14. “Vufuko” vuka ua tumbuile Yesu ku Mateo 13:52, kaha vati tu hasa ku vu sulisa?

¹³ Vupite vua mu citatu vua tu hana Yehova  vua pua vusunga vuose vu tue ku lilongesa. Yehova ikeye Ndundzi ya vusunga. (2 Samuele 7:28; Visamo 31:5) Mu ku pua Tatetu ua ngozi, ua tonda ku tu hanako vusunga vuaco. Tue ku lilongesa vusunga vuaco ku hitila mu ku tanda Lizi lieni na mikanda kaha na mu ku kunguluka ku viuano vietu via muhato, viuano via limbo, na ku viuano via mu kati ka simano. Nga tu pua na likunguluila vusunga vua vuingi, tu ka kala na cisete ca “vufuko” vua “viuma via viha nevi via vikulu” ngue mua tumbuile Yesu. (Tandenu Mateo 13:52.) Yehova a ka Sulisa cisete ca “Vufuko” vuetu nga tu ka tondesesa vusunga ngue muntu a tonda vupite vua ku sueka. (Tandenu Visimo 2:4-7.) Vati tue ku lingamo?

¹⁴ Ca tondeka ku lilongesa Mbimbiliya na mikanda yetu ntsimbu yose na ku tondesesa ca vunongotima. Ku lingamo ci ka tu kuasa ku uana vusunga vua “vuha,” vuze vuntsa ka tua tantekeyele laza. (Yehosua 1:8, 9; Visamo 1:2, 3) Vutala vua Kaniungi vua ku livanga, vua Julho ya 1879, vua setekesele vusunga ku ntemo ili ha kati ka vindzata. Linga muntu a uane ntemo yaco na pande ku tondesesa vuino. Kaha nga na i uana, ka ka likela ku tonda vintemo vikuavo. Vunoni na pande ku tualelelaho ku tonda vintemo via vingi. Na vuno vene, netu ka tua pandele lika ku viukilila mu nima ya ku uana vusunga vumo. Tua pande ku kala na cizango ca ku tondesesa naua vusunga vukuavo vua vuingi.

15. Omo lia vika tu hasa ku sana vumo vusunga nguetu vua “vukulu,” kaha vusunga vuka mua lema cikuma?

¹⁵ Mu tua putukile ku lilongesa Mbimbiliya, tua tantekeyele vusunga vua ku cili cikuma. Tu hasa ku vu sana nguetu vusunga vua “vukulu” muomu vukevuo vu tua lilongesele ha katete. Vua pua vuka? Ha ku putuka, tua lilongesele nguetu Yehova ua pua Sakatanga uetu kaha ua kala na vumo vutumbe ku vantu. Tua lilongesele naua ngecize Njambi ua tumine Muaneni linga a ku tu tsile mu ku pua nkombelo linga tu patuke ku vupi na ku-tsa. Kaha tua lilongesele naua ngecize Vuangana vua Njambi vu ka manusulako tuyando tuose kaha tu ka yoya miaka yose ha mavu mu citungu mu ndzolela na ciyulo.​—Yoano 3:16; Ku-Solola 4:11; 21:3, 4.

16. Viuma vika tua pande ku linga nga kua soloka cimo ku ivuisisa ca ciha ku vusunga vua mu Mbimbiliya?

¹⁶ Mu ku hita ca ntsimbu, ku ivuisisa cetu ca vusunga ku tuala ha vumo vupolofeto vua mu Mbimbiliya ni cimo cinimbu ce ku aluluka. Nga evi vi soloka, ca pua ca seho ku uana ntsimbu ya ku lilongesa na ku hilula ha ku aluluka caco. (Vilinga 17:11; 1 Timoteo 4:15) Ka tua pandele lika ku ivuisisa ku litepa ca kala ha ku ivuisisa ca laza na ca ciha, vunoni tua pande naua ku nongonona mua cili nkala ku ivuisisa ca ciha ci va na lombolola. Ku lilongesa mu cifua eci ci ka tu hana vusunga ngecize ku ivuisisa ca ciha ca pua mutamba ua vufuko vuetu vua vusunga vua mu Mbimbiliya. Omo lia vika ca puila ca seho ku lihakela kapandi ka ku lingamo?

17, 18. Mu njila ika sipililtu santu i hasa ku tu kuasa?

¹⁷ Yesu ua longesele ngueni sipilitu ya Njambi i hasa ku tu kuasa ku vuluka viuma vi tua lilongesele laza. (Yoano 14:25, 26) Vati i hasa ku tu kuasa mu ku ambulula? Aci talenu cimona ca umo muanetu ua lizina Peter. Mu 1970, tele va li na miaka 19 kaha  va putukile ku pangela ha Mbetele ya ku Grã-Bretanha. VaPeter omo va kele na ku ambuluila ku ndzivo na ndzivo va uanene umo mukuluntu ua yala. Va mu hulile nga ua tondele ku lilongesa Mbimbiliya. Uze yala ua puile lambi ua vaYundeya, kaha ka livuile mua cili omo ua muene ngecize mukuendze ua tondele ku mu longesa Mbimbiliya. Uesekele vaPeter mu ku va hula ngecize, “Ove kanike, livulu lia Ndaniele va li sonekele mu lilimi lika?” Kaha muanetu Peter ua kumbuluile ngueni, “Imo mitamba va i sonekele mu ci Alamaiku.” VaPeter nguavo, “Lambi ua komokele cikuma omo lia cikumbululo cange​—vunoni yange nja komokele cikumakuma! Vati nja tantekeyele cikumbululo caco? Mu nja hilukile ku ndzivo nja ka tandele lueka Vutala vua Kaniungi na Despertai! ya vingonde vi na hiti, nja uanenemo cimpande ca muesele ngecize livulu lia Ndaniele va li sonekele mu ci Alamaiku.” (Ndaniele 2:4) Mua vusunga, sipilitu santu i hasa ku tu kuasa ku vuluka mizimbu i tua tandele na ku i tulika mu cisete ca vufuko vuetu.​—Luka 12:11, 12; 21:13-15.

¹⁸ Nga tua lema vusunga vu tue ku lilongesa hali Yehova na ku muesa ku santsela cetu ku vukevuo, tu ka kala na cizango ca ku vu tulika mu cisete ca vufuko vuetu vua vusunga. Nga tu tualelelaho ku lingamo, ci ka tu puila naua ca casi ku longesako vakuetu.

19. Omo lia vika tua pande ku niunga mua cili vupite vuetu vua mu lutsilielo?

¹⁹ Mu cilongesa cino, tu na lilongesa seho i tua pande ku haka ku vupite vua mu lutsilielo. Vunoni tua pande ku zangama linga kati tu tavese Satana na ano mavu ku zeyesa cilemo cetu ku vupite vuaco. Nga ka tua zangamene, tu hasa ku tanguka ku viuma ngeci mua ku tu kulahesa cipanga ci va ka tu fueta vimbongo via vingi, ku singanieka ku pua vampite, ni halumo ku lihalesa na viuma vi tua kala navio. Kapostolo Yoano ua tu nangula ngueni mavu ano na viuma viose via kalamo vuovuno vi hita. (1 Yoano 2:15-17) Ngeci mukemuo tua pande ku santsela na ku niunga vuino vupite vuetu vua mu lutsilielo vu tua kala navuo.

20. Kapandi kaka mu na lihakela linga mu niunge vupite vuenu vua mu lutsilielo?

²⁰ Lingenu cose mu seze nkala viuma vi hasa ku zeyesa cilemo cenu ku Vuangana vua Njambi. Lihakelenu kapandi ka ku ambulula na ntsintsa, kaha cilemo cenu ku ku ambulula kati ci hole. Tualelelenuho ku tondesesa vusunga vua mu Mbimbiliya. Nga mu lingamo, mu ka tulika “vufuko vuenu vua muilu ka vue ku hua, muze muhuza ke ku suenamo, cipue tuntembulu ka ve ku pihisa. Muomu kuze kua kala vufuko vuenu, ku-kekuo naua ku ka kala mitima yenu.”​—Luka 12:33, 34.