1, 2. Vusunga vuka tua pande ku kala navuo muntu ku muntu? (Talenu cikupulo ca ku vuputukilo.)

NGUE mu tua lilongesele mu cilongesa ci na hiti, Satana ua ambele ngueni Yehova ka fuilile ku sika vantu. Ngueni Yehova ke ku sika na ngozi kaha vantu ve ku vuile ndzolela ya kama nga va lisika vakevo vavene. Vuno Satana a li na vusunga? Aci singaniekenu mu ce ku fuile nga vantu va lisikile vakevo vavene mu miaka ya ya ye. Vuno nga ve ku vuile ndzolela nga ca ku hona ku va sika kuli Njambi ni? Nga mua vuile ndzolela mpundu ku yoya miaka yose vunoni ca ku hona ku talela kuli Njambi ni?

² Na umo uahi na pande ku mi kumbuluilako evi vihula. Tu vose muntu ku muntu na pande ku vi hilula vuino. Tua pande ku kala na vusunga ngecize cifua ca ku sika ca Yehova cikeco ca pua ca cili kaha ikeye ua fuila ku mu hakuila ku fuminina ku mutima. Tu hasa ku kala na vusunga vuaco omo lia viuma vi tue ku tanda mu Mbimbiliya. Tu ci talenu vi ya handeka Mbimbiliya ku tuala ha mpoko ya kala nayo Yehova mu ku sika melu na mavu ose.

3. Omo lia vika Yehova ali na mpoko ya ku pua Muangana?

³ Yehova ikeye lika ua pua Muangana ua melu na mavu muomu ikeye ua hiana ngolo na Sakatanga. (1 Mizimbu 29:11; Vilinga 4:24) Mu cimona ca muilu, vamiangana va ku pua 144.000 va handekele nguavo: “Yove ua viuka, Muangana uetu na Njambi yetu, Ku tambula ku-sangaziala na kasingimiko na ngolo: Muomu yove ua tangele viuma viose, Nomo cizango cove via puile, va vi tangele.” (Ku-Solola 4:11) Yehova ua tangele viuma viose, ngeci mukemuo ikeye a li na mpoko ya ku sika vose, cipue nga va ha mavu ni muilu.

4. Omo lia vika vuana vua ku lihanguila ka vue ku tu hana mpoko ya ku muesa lisino kuli Njambi?

⁴ Satana ka tangele na vimo viahi. Ngeci mukemuo ka kele na mpoko na imo yahi ya ku sika melu na mavu. Satana, kaha na va yala na mpuevo va katete va muesele lisino mu ku alulukila mpoko ya Yehova ya ku sika. (Yelemiya 10:23) Vuno vuana vuavo vua ku lihanguila vua va hanene mpoko ya ku viana ku sika ca Yehova ni? Houe. Vuana vua ku lihanguila viuma vue ku kuasa muntu ku hangula na ku linga matumbe, vunoni ka vue ku mu hana mpoko ya ku muesa lisino kuli Sakatanga, Yehova. Mua vusunga, ku muesa lisino kuli Njambi ca pua ku pangesa mua ku pihia ovu vuana vua ku lihanguila viuma. Mu ku linga tua pua tu vantu, tua tondeka ku sika na ku tuamenena ca Yehova.

5. Omo lia vika vie ku hangula Njambi via pua via vuoloke ntsimbu yose?

⁵ Aci singaniekenu ha vusunga vukuavo vu muesa ngecize Yehova a li na mpoko ya ku sika. Ikeye ue ku pangesa mpoko yeni mu vuoloke. Ua tu leka ngueni: “Ange nji Yehova mukua ku linga-linga ngozi, vuoloke, na vuviuke, ha mavu: muomu mu viuma evi nji viukilila.” (Yelemiya 9:24) Yehova ke ku tonda masiko a vantu linga a mu kuase ku linga via cili. Vunoni ikeye ue ku tumbika masiko a viuma via cili. Kaha emana ha vitume vieni via vuviuke, Yehova ua hana masiko ku vantu. Mukua visamo ua handekele ngueni: “Vuviuke na vuoloke vikevio luvula lua citumamo cove.” Ngeci nkala lisiko, nkala citume, ni cihangula ca ku tunda kuli Yehova ca pua ca vusunga. (Visamo 89:14; 119:128) Satana ue ku vangeya ngecize Yehova ka puile Muangana ua cili. Vunoni Satana ka hasa ku neha ciyulo mu mavu.

6. Omo lia vika Yehova ua kala na mpoko ya ku sika?

⁶ Vusunga vukuavo vu muesa ngecize Yehova a li na mpoko ya ku sika vua pua muomu ikeye ua kala na mangana na mana a ku niunga melu na mavu. Tu hasa ku vi muena ku vuana vua hanene Muaneni vua ku kanguisa mavezi ngecize ka kua kele ndotolo na umo uahi ua hasele ku lingamo. (Mateo 4:23, 24; Mako 5:25-29) Vutuhu evi via pua vikomoueso kuli etu, vunoni ka via komouesele Yehova. Muomu Ikeye a tantekeya vati ue ku panga muvila uetu kaha a hasa  ku vuahesa hose ha na pihia. kaha a hasa naua ku sangula vatsi na ku fumisako viyovo via mavu viose.

7. Vati Yehova ua kala na mangana ku hiana vose mu mavu a Satana?

⁷ Mavu a ku sika kuli Satana ka a hasa ku kala na ciyulo, cipue mu cifuti ni ha kati ka vifuti. Yehova lika a li na mana a ku neha ciyulo ha mavu. (Isaya 2:3, 4; 54:13) Tue ku livua ngue mua kapostolo Paulu ua handekele ngueni: “Ntu! vu na lovo ngue vati vufuko vua mangana novu vua mana a Njambi! ku-sompela ceni ka ci tava ku tantekeya, na zinjila zieni ka zi tava ku zi kavangeya!”​—Loma 11:33.

8. Vati mue ku livua ku tuala ha cifua ce ku sikilamo Yehova?

⁸ Ngue mu tu na limuena, Mbimbiliya ya muesa ngecize Yehova ua kala na mpoko ya ku sika. Ya muesa naua omo lia vika ua puila Muangana ua cili. Vusunga vumo vua pua ikeye ue ku sika na cilemo. Tue ku livua mu hiehi neni nga tu singanieka ngecize Yehova ua pua “mukua cikeketima na mukua kavumbi, a livandeka ku vutenu, ua lana na ngozi na vusunga.” (Ezundu 34:6) Njambi ue ku tu tala mu cifua ca tu pande na kasingimiko. Ue ku tu niunga mua cili ku tuvakana ngue muze mu tue ku liniunga etu vavene. Satana ue ku handeka ngueni Yehova ue ku vindika viuma via cili ku vangamba Veni, vunoni evi via pua visaki. Muomu ua hele Muaneni ya lema cikuma mu ku tu hana lulavelelo lua ku ka yoya miaka yose.​—Tandenu Visamo 84:11; Loma 8:32.

9. Vati tua tantekeya nguetu Njambi ua tu haka seho muntu ku muntu?

⁹ Yehova ua lema vangamba veni vose mu ku pua civunga. Vunoni ikeye ua haka naua seho ku muntu ku muntu. Aci singaniekenu ku vintsimbu via ku laza. Mu miaka ya ku pua 300, Yehova ua pangesele vangazi mu ku tuamenena vangamba veni na ku va kuasa ku vula vitozi vavo. Vunoni mu ntsimbu yose eyi, Yehova kasi ua tualele mana ku muntu ku muntu. Umo uavo ua puile Lute. Ka puile kaIsaleli, kaha ua sezele viuma via vingi mu ku pua mukua ku lemesa Yehova. Yehova ua mu lunguisile mu ku mu hana yala na muana. Cikuavo naua, muneni ua puile mutamba ua cikota ca ka hetele na kuli Mesiya. Yehova ua tavesa muzimbu ua Lute va u soneke mu Mbimbiliya, kaha mukanda uaco ua ambata lizina lieni. Singaniekenu vati Lute a ka livua omo a ka sanguka na ku lilongesa viuma evi!​—Lute 4:13; Mateo 1:5, 16.

10. Omo lia vika tu hasa handeka nguetu ku sika ca Yehova ca sungama?

¹⁰ Ku sika ca Yehova ca sungama. Ngeci vaze ve ku mu ononoka ve ku ivua ku zituka na ndzolela. (2 Kolintu 3:17) Ndaviti ua handekele ngueni: “Kasingimiko na vukama vi li ku meso eni: ngolo na ndzolela vi li ku muhela ueni.” (1 Mizimbu 16:7, 27) Etane mukua visamo ua sonekele ngueni: “Va vezika vantu vaze va tantekeya muyoyo ua ndzolela: Venda, A Yehova, mu ceke ca cihanga cove. Mu lizina liove va viukilila  litangua liose; na mu vuviuke vuove va mona vukama.”​—Visamo 89:15, 16.

11. Vati tu hasa ku kala na vusunga ngecize mpoko ya Yehova ya ku sika ikeyo ya pua ya cili?

¹¹ Omo tu ka pua na ku hilula ha ngozi ya Yehova, tu ka kala na vusunga nguetu ku sika ceni cikeco ca cili. Tue ku livua ngeci mua mukua visamo ua lekele Njambi nguen: “Litangua limo lika ku vitungu viove lia hiana likulukazi.” (Visamo 84:10) Yehova ikeye ua tu tangele, ngeci a tantekeya vika mpundu vi ka tu vuisa ndzolela. Ku ngozi yeni ua tu hana viuma via vingi-vingi. Yetu tu ka kala mua cili nga tu ononoka ku viose via tu tuma Yehova. Ambe nga ci ka tu kaluuila, tu kevua ndzolela nga tu ononoka Yehova.​—Tandenu Isaya 48:17.

12. Vusunga vuka vue ku tu lingisa ku hakuila mpoko ya Yehova ya ku sika?

¹² Tua lilongesa mu Mbimbiliya ngecize mu nima ya Likulukazi lia Miaka ya ku Sika ca Kilistu, ku ka kala vamo va ka alulukila mpoko ya Yehova ya ku sika. (Ku-Solola 20:7, 8) Vuno vika vi ka va lingisamo? Ku ntsimbu yaco ize, halumo Ndiavu a ka seteka ku lingisa vantu va ka lihake seho vakevo vavene. Muomu ue ku lingamo ntsimbu yose. Halumo a ka seteka ku onga vantu va ka tsiliele ngecize va ka hasa ku yoya miaka yose ca ku hona ku ononoka Njambi. Ovuo ni kati vusunga. Vunoni tua pande ku lihula etu vavene, ‘Nange nji ka tava ku makuli a cifua eci ni?’ Nga tua lema mpundu Yehova kaha tua kala na vusunga nguetu ikeye ua pua ua cili kaha a li na mpoko ya ku sika melu na mavu, ka tu ka tava makuli aco. Tu ka tonda lika ku ka yoya mu ku hakuila mpoko ya Yehova ya ku sika, muomu ue ku sika na cilemo.

13. Vati tu ka hakuila mpoko ya Njambi ya ku sika omo tu mu tambuluisa?

¹³ Ngue mu tua lilongesa, Yehova a li na mpoko ya ku sika, kaha cifua ceni ca ku sika ca cili. Ku sika ceni ca fuila ku hakuila cetu mu vutuntu. Tu ka i hakuila nga tu pua vakua vusunga kuli Yehova na ku mu tambuluisa. Nga tu linga cose mu ku kala na vilinga via tonda ikeye kuli etu, tu ka muesa ngecize tua lema cifua ceni ca ku sika kaha tue ku ci hakuila.​—Tandenu Efeso 5:1, 2.

14. Vati vakuluntu va cikungulukilo na mitue ya ndzivo va hasa ku tambuluisa Yehova?

¹⁴ Tua lilongesa mu Mbimbiliya ngecize Yehova kasi ue ku pangesa ngolo yeni mu cilemo. Mitue ya vindzivo na vakuluntu va cikungulukilo va lema ku sika ca Yehova va ka mu tambuluisa na ku hona ku pua va mitima ya ku kaluua ni ku vingiliya. Kapostolo Paulu ua lihakelele kapandi ka ku tambuluisa Njambi na Muaneni. (1 Kolintu 11:1) Ka sahuisile vakuavo ni ku va kakateya ku linga viuma via cili. Vunoni, ua va mamuine na ngozi ku linga viuma via cili.(Loma 12:1; Efeso 4:1; Filemone 8-10) Mu ku lingamo, Paulu ua tambuluisile Yehova. Nga tu talelamo vakuetu na cilemo, tu li na ku hakuila mpoko ya Yehova ya ku sika.

15. Vati tue ku hakuila ku sika ca Yehova omo tu singimika vaze va kala na mpoko ya ku tuamenena?

¹⁵ Tue ku hakuila mpoko ya Yehova ya ku sika mu ku singimika na ku panga hamo na vaze va a hana mpoko ya ku tuamenena. Ambe nga cimo cihangula ci va na lingi ka ca tu lombolokele mua cili ni ka ca tu ile ku mutima, kasi tue ku va kuatesa. Evi kati vikevio vi ve ku linga vakua mavu. Vunoni etu tue ku vi linga muomu tua tava Yehova ku  pua Muangana uetu. (Efeso 5:22, 23; 6:1-3; VaHevelu 13:17) Kaha tu ka yoya mu ndzolela nga tu lingamo, muomu Yehova ua tonda tu kale mua cili.

16. Vati vihangula vietu vi hasa ku muesa ngecize tua hakuila mpoko ya Yehova ya ku sika?

¹⁶ Tu hasa naua ku hakuila mpoko ya Yehova ya ku sika ku hitila mu vihangula vi tue ku linga. Yehova ue ku tu leka vi tua pande ku linga mu nkala cisoti mu muono. Vunoni, ue ku tu leka vati ue ku singanieka ikeye. Eci ci tu kuasa ku ivuisisisa vika tua pande ku linga. Ca ku muenako, Yehova ke ku hana Vakua Kilistu mukana ua viuma vi va pande ku zala nevi ka va pandele. Vunoni, ua lombolola ngueni etu tua pande ku soloka mu cifua cize ca tu pande kaha ca tu fuila mu ku pua Vakaleho veni. (1 Timoteo 2:9, 10) Ikeye ua tonda tu singanieke vati vakuetu va ka livua omo lia vihangula vietu. (1 Kolintu 10:31-33) Nga tu linga vihangula vize via kundama ha vati Yehova ue ku singanieka, tu ka muesa ngecize tua lema na ku hakuila cifua ceni ca ku sika.

17, 18. Vati vaze va liambata va hasa ku muesa ngecize ve ku hakuila mpoko ya Yehova ya ku sika?

¹⁷ Tu ci lilongesenu vati Vakua Kilistu va liambata va hasa ku hakuila mpoko ya Yehova ya ku sika. Va yala na mpuevo va liambata halumo ve ku singanieka nguavo vizango vi va lavelelele mu vulo ka viesi na ku lipuisamo. Halumo ve ku hita mu vitanga via  kama. Nga mukemuo, va ka uana vukuasi mu ku singanieka ha vati Yehova ua talele valsaleli ya ku laza. Yehova ua setekesele vaIsaleli mu ku pua mpuevo yeni. (Isaya 54:5; 62:4) Lua luingi va vuisile Yehova vusiua. Kaha vusamba vuaco vua puile ngeci mua vulo vua sula visoti. Vunoni Yehova ka kele na vuasi vua ku seza vaIsaleli. Vunoni, ua puile na ku vecela ku milonga yavo vintsimbu via vingi.​—Tandenu Visamo 106:43-45.

¹⁸ Vakua Kilistu va liambata va lema Yehova ve ku linga cose mu ku mu tambuluisa. Ambe nga va lihita mu visoti via vingi mu vulo, ka ve ku tonda ku vi manusula mu njila ka ya litombuele na visoneka. Va tantekeya ngecize nkuminio yavo kuli Yehova ya kala na seho ya kama ngeci ua tonda va yala na mpuevo va ‘lipandakane’ ku umo na mukuavo. Ku liya na Visoneka vupangala vukevuo lika vua pande ku lingisa muntu ku tsiha vulo na ku somboka ni ku ambata lueka. (Mateo 19:5, 6, 9) Nga Vakua Kilistu va liambata va linga cose mu ku tuala ku lutue vulo vuavo, va li na ku hakuila mpoko ya Yehova ya ku sika.

19. Vika tua pande ku linga nga tu sevuka?

¹⁹ Tu vose ka tua tantulukile, ngeci mu vintsimbu via vingi tu ka pua na ku luvalesa Yehova. Ikeye a tantekeyamo, ngeci ua hele Kilistu mu ku pua nkombelo. Ngeci mukemuo nga tu sevuka, tua pande ku vundila Yehova a tu ecele. (1 Yoano 2:1, 2) Mu cihela ca ku singanieka lika ha ku sevuka cetu, tua pande ku lilongeselaho vimo. Tu tonda ku suena mu hiehi na Yehova muomu a ka tu ecela na ku tu kuasa ku katuka na ku tualelelaho ku mu pangela.​—Visamo 103:3.

20. Omo lia vika tua pande ku hakuila mpoko ya Yehova ya ku sika?

²⁰ Mu mavu a aha, Yehova a ka sika vantu vose kaha na ku lilongesa vinjila vieni via vuoloke. (Isaya 11:9) Vunoni na lelo lino tu hasa ku lilongesa via vingi tu tuala ha vati Yehova ue ku singanieka na vati ua tonda tu linge viuma. Vuovuno, na umo uahi a alulukila ku sika ca Yehova. Tu lihakelienu kapandi ka ku hakuila mpoko ya Yehova ya ku sika mu ku mu ononoka, mu ku mu pangela na vusunga, na ku linga cose tu mu tambuluise mu viose vi tu linga.