1, 2. (a) Mu njila ika ano mavu a ku pihia a lifua na muhuza u va na hana cihiso ca ku tsa? (Talenu cikupulo ca ku vuputukilo.) (b) Vati va kevua vuose va kala muilu na ha mavu omo mavu a Satana va ka a nongesa?

ACI SINGANIEKENU nga umo mbanditu ni muhuza ali na ku enda mu kamenga, kaha omo tuniungi va kamenga va mu mona va tambakana nguavo “Talenu civimbi!” Omo lia vika? Vutuhu muhuza uaco ali na muono na cihindu, va na mu hana cihiso ca ku-tsa, kaha vuovuno va mu tsiha. Kuli vaze tuniungi ngue natsi laza. *​—Talenu litota.

² Ano mavu a ku pihia a lifua na muhuza u va na hana cihiso ca ku tsa. Mbimbiliya nguayo: “Mavu a hita.” (1 Yoano 2:17) Yehova ngueni ano mavu vuovuno ha hua, ngeci mukemuo tuli na vusunga nguetu vuovuno mpundu a hua. Vutuhu ngoco ku kotoka ca ano mavu ca litepela hamo ha kama na ku-tsa ca uze muhuza. Muomu ku tuala hali uze muhuza, vamo va hasa ku handeka nguavo ka va mu sompesele mu vuoloke, kaha va linga cose linga muntu kati va mu  tsihe. Vunoni, Yehova ua pua ngazi ua ku tantuluka, cihiso ceni ca ku nongesa ano mavu ca tantuluka. (Ndeutelonomi 32:4) Ku nonga cao ci li ha hiehi-hiehi. Mu nima ya ku nonga ca ano mavu, vose vakua muilu na ha mavu va ka tava ngecize cihiso ca Yehova ca puile ca vuoloke. Ku ntsimbu yaco tu kevua ngue va na tu tulu citeli ca kama!

3. Visoti vika viuana vi ka hua omo Vuangana vua Njambi vu keza?

³ Vuno “mavu” a li na ku “hita” aka? A pua viuma via ku pihia vi na pu honi mutamba ua muono lelo lino. Viuma viaco viose vuovuno vi ka nonga. Aa mezi a pua ‘muzimbu ua cili ua Vuangana.’ (Mateo 24:14) Mu cilongesa cino, tu simutuila visoti viuana vi ka hita mu vu keza Vuangana vua Njambi: Vantu va vapi, vikota via vipi, vilinga via ku henga, na lamba. Tu hilula (1) vati vie ku tu linga lelo, (2) Vati a ka vi linga Yehova, na (3) Vika a ka sintsisa mu cihela cavio.

4. Vati ku kala ha kati ka vakua vupi ce ku tu yandesa?

⁴ Vati ku yoyela ha kati ka vakua vupi ce ku tu yandesa? Kapostolo Paulu ua handekele ngueni ku matangua a ku kotokela ku ka kala “zintsimbu zia ku kaluua.” Kaha ua vuezeleko ngueni: “Vantu va vapi na vakua kafumbiliko [ni vakua lizangamena]” va ka “hiana vupi.” (2 Timoteo 3:1-5, 13) Mue ku mona viuma viaco lelo ni? Cingi cetu va tu yandesaho laza ku vantu va vapi ngeci mua, vakua ku pakesa na vukenia, vakua kahangu, na mihuza va ku zikua mitima. Vamo ka ve ku seteka cipue ku sueka vilinga viavo via ku pihia. Vakuavo ve ku seteka ku kuasa vantu, vunoni vakua lizangamena. Vunoni ambe nga kanda va tu linge via kama, kasi tue ku yanda omo lia vantu va vapi. Tue ku ivua vusiua vua kama mu tue ku ivua ngecize va na yandesa vanike, tusinakazi na vakuavo vaze ka va hasa ku liohela vavene. Vantu vakua vupi ve ku linga viuma ngue tusitu ni vene vandemone. (Tiango 3:15) Vunoni ce ku tu vuisa ndzolela ku tantekeya ngecize Lizi lia Njambi lia tu hana lulavelelo.

5. (a) Vukovelelo vuka va ci li navuo vakua vupi? (b) Vika vi ka solokela vaze va viana ku aluluka?

⁵ Vati a ka va linga Yehova? Mu ntsimbu ino Yehova ali na ku hana vantu ntsimbu linga va aluluke. (Isaya 55:7) Vutuhu ano mavu vuovuno a nonga, vantu vaco kanda va ci va sompese mu vutuntu. Vunoni vika vi ka solokela vaze ve ku viana ku aluluka kaha va kava ano mavu na ku lamba ya kama? Yehova ngueni a ka nongesa vose vakua vupi ha mavu. (Tanda Visamo 37:10.) Matangua ano cingi ca vantu va na lilongesa ku sueka vupi vu ve ku linga, kaha vintsimbu via vingi ka ve ku tambula kasitiku. (Yombi 21:7, 9) Vunoni Mbimbiliya ya tu vuluisa nguayo: “Meso eni ali ku zinjila zia muntu, kaha a mona ku-enda ceni cose. Ka kuesi milima, cipue miziviliko ku va ka vanda vakua ku panga via vipi.” (Yombi 34:21, 22) Ngeci mukemuo na umo uahi a hasa ku vanda ku meso a Yehova. Ikeye ue ku mona viose vi ve ku linga vakua vupi. Mu nima ya Alemangendo halumo tu ka tala ha vihela viavo, vunoni ka va ka kalaho. Va ka nonga ku miaka yose!​—Visamo 37:12-15.

6. Omo vakua vupi va ka nonga veya va ka lisupaho, kaha omo lia vika muzimbu uaco ua cili?

 ⁶ Omo vantu va vapi va ka nonga, veya va kovoka? Yehova ua kulahesa ngueni: “Vakua ku konkama va ka suana cifuti, kaha va ka viukilila mu ku-lana ca ciyulo.” Kaha samo yaco naua nguayo: “Vakua vuviuke va ka suana cifuti kaha va ka kalamo ku miaka na miaka ya ya-ye.” (Visamo 37:11, 29) Vuno “Vakua ku konkama” na “vakua vuviuke” veya? Vakua ku konkama va pua vantu va ku likehesa ve ku lilongesa via Yehova na ku mu ononoka. Vakua vuviuke va pua vaze va lema ku linga vize via muesa Njambi ngueni via cili. Lelo lino, ha mavu ha na sulu vantu va vapi ku hiana vakua vuviuke. Vunoni mu mavu a aha mu ka kala lika vakua ku konkama na vakua vuviuke, kaha va ka puisa mavu citungu!

7. Vati vikota via ku pihia vie ku tu yandesa?

⁷ Vati vikota via ku pihia vie ku tu yandesa lelo lino? Cingi ca vupi vua lana ha mavu, kati vantu va ngoco ve ku vu koka vunoni vikota via vantu. Vikota via vulombelo vie ku onga vantu va vavengi. Ca ku muenako, ve ku longesa makuli ku tuala hali Njambi, ve ku handeka nguavo ka citava ku tsiliela Mbimbiliya, kaha ve ku onga vantu ku tuala ha viuma vi ka solokela mavu na vantu ku lutue. Vanguvulu va ku pihia ve ku kuasa vindzita na ku sambeya vizindo ha kati ka visemua, kaha ve ku yandesa vihutu na vaze ka vesi na vukuasi. Vanguvulu vaco ve ku pua vampite omo lia ku muesa kahangu na ku tava ntsambuelo. Vikota via mingoso vie ku pihisa luhundzi, na vupite vua mavu, kaha na ku zangamena vantu linga vupite vu kale kuli va vandende lika. Mua vusunga, vikota via ku pihia vie ku koka lamba ya kama lelo lino.

8. Vika ya handeka Mbimbiliya ngecize vi ka solokela vikota vie ku soloka ngue via ku kaniama lelo lino?

⁸ Vati a ka vi linga Yehova? Lamba ya kama i ka putuka omo vakua pulitika va ka luisa na ku soka vikota via vulombelo vua makuli, vize vi ya tumbula Mbimbiliya nguayo lipangala, Mbambilone ua Kama. (Ku-Solola 17:1, 2, 16; 18:1-4) Vikota via vulombelo viose vi ka nonga. Vunoni vika vi ka solokela vikota vikuavo via ku pihia? Mbimbiliya ya setekesa vikota viaco ku mincinda na vinkundu muomu vie ku soloka ku kaniama. (Tandenu Ku-Solola 6:14.) Vunoni ya vuezako nguayo vanguvulu na vikota vikuavo viose vize ka vie ku kuasa Vuangana vua Njambi vi ka nonga. Eci cikeco ci ka pua mutamba ua ku manusuila ua lamba ya kama. (Yelemiya 25:31-33) Mu nima yaco, ka ku ka kala naua na cimo cikota ca ku pihia cahi.

9. Omo lia vika tu hasa ku kala na vusunga ngecize liuayanga li ka hua ha mavu?

⁹ Vika vi ka sintsa mu cihela ca vikota via ku pihia? Mu nima ya Alemangendo, ha mavu ha ka sala cimo cikota cipue lukungulukilo ni? Mbimbiliya nguayo: “Ngue omo ku litavasiano lieni, tu lavelela melu a aha na mavu a aha, hakeho ha ka kala vuviuke.” (2 Petulu 3:13) Melu a laza na mavu a laza a pua vanguvulu va vapi na vantu va ve ku suana. Nga a na nongo, vika vi ka sintsa mu vihela viao? “Melu a aha na mavu a aha.” A melu a aha a pua  nguvulu ya iha, ni nguetu vuangana vua ka sika Yesu Kilistu na vasuana veni 144.000. Mavu a aha a pua vantu va vuli na ku sika Vuangana vua Njambi. Yesu na vakua ku sika neni va ka tambuluisa mu vutantuluke Yehova, Njambi mukua vutongue. (1 Kolintu 14:33) Ngeci mukemuo mu “mavu a aha” ka mu ka kala liuayanga. Ku ka kala vantu va cili va ka niunga viuma na vutongue. (Visamo 45:16) Vantu vaco va ka va tuamenena kuli Kilistu na va 144.000. Aci singaniekenu vati vi ka fua viuma omo vikota via ku pihia viose va ka vi sintsa kuli lukungulukilo lumo lika lua ku tantuluka, ka lue ku pihia!

10. Vilinga vika via ku pihia via lana ku cihela ci mua kala, kaha vati vie ku mi yandesa na vusoko vuenu?

¹⁰ Vati vilinga via vipi vie ku tu yandesa lelo? Tuli na ku yoyela mu mavu a ku sula a vupangala, makuli, na luozi. Vueho vua vakua mavu vue ku muesa viuma viaco ngue via cili na ku muesa vitume via Yehova ngue via vipi. (Isaya 5:20) Ngeci mukemuo, visemi va pande ku lihakela kapandi ka ku niunga vana vavo ku viuma evi. Mua vusunga, Vakua Kilistu va pande ku fuitangana mu ku niunga vusamba vuavo na Yehova mu mavu ano ka eku singimika vitume Vieni.

11. Vika tu lilongesa ku cihiso ca Yehova ku Sondoma na Ngomola?

¹¹ Vika a ka linga Yehova ku tuala ha vilinga via ku pihia? Tu talenu via lingile Yehova ha vilinga via ku pihia via kele na ku hita mu Sondoma na Ngomola. (Tandenu 2 Petulu 2:6-8.) Lote ua puile mukua vuviuke, kaha neni na vusoko vueni va yandele cikuma omo lia vupi vu va kele na ku linga vantu va va tungile navo. Yehova ua nongesele cize cihela cose linga a manusule vupi vua keleko. Vunoni ua kele naua na ku hana “cimueso” ku vantu va vapi lelo. Muomu ngue mua nongesele vilinga via ku pihia ku ntsimbu ize, na ku ntsimbu ino Yehova a ka nongesa vantu vakua ku linga viuma via ku pihia vose.

12. Vipanga vika mua lavelela ku ka linga mu nima ya ku nonga ca ano mavu?

¹² Vika vi ka sintsa mu cihela ca vilinga via ku pihia? Mu mavu a aha, tu ka kala na vipanga via vingi via cili. Ca ku muenako, tu puisa mavu citungu na ku tunga vindzivo vietu na via vavusoko vuetu. Kaha tu ka tambula makulukazi a makulukazi a vantu va ka sanguka na ku va longesa via Yehova na viose via lingila vantu. (Isaya 65:21, 22; Vilinga 24:15) Mu ntsimbu yaco yose, tu ka kala na vipanga via vingi vi ka tu vuisa ndzolela na ku sangaziala Yehova!

13. Vika vieza mu lisino li va muesele Satana, Andama na Eva kuli Yehova mu Endene?

¹³ Vati visoti vie ku tu yandesa lelo lino? Mavu a na sulu na vantu va vapi, vikota via ku pihia, na vilinga via ku pihia, ngeci vi li na ku koka lamba ya kama. Tu vose tue ku yanda omo lia viuma ngeci mua, vindzita, vuhutu, kahangu, mavezi na ku-tsa. Evi visoti via soloka muomu Satana, Andama na Eva va alulukilile Yehova. Kaha lisino liavo lia tu kokela luvinda tu vose.

14. Vika Yehova a ka linga ku tuala ha visoti?

¹⁴ Vika Yehova a ka linga ku tuala  ha visoti? Tu talenu vimo via ka linga. Yehova na kulahesa ngecize a ka nongesa vindzita viose. (Tandenu Visamo 46:8, 9.) A ka nongesa mavezi. (Isaya 33:24) A ka minisa ni nguetu ku nongesa ku-tsa ku miaka yose. (Isaya 25:8) A ka manusula vuhutu. (Visamo 72:12-16) Mua vusunga Yehova a ka tundisako visoti vikuavo viose vie ku kaluuisa miono ya vantu matangua ano. Kaha a ka tundisako Satana na vandemone veni ve ku hungumuna vantu.​—Efeso 2:2.

15. Viuma vika ka vi ka kalako naua mu nima ya Alemangendo?

¹⁵ A ci singaniekenu vati ci ka fua omo tu ka yoyela mu mavu ka muesi ndzita, mavezi na ku-tsa! Ka mu ka kala vivunga via masualale, mata, ni vitantekeyeso via ndzita. Ka mu ka tondeka visipitali, vandotolo, vindzivo via ku tulikila vivimbi na vihilo. Ka mu ka kala vumbanditu, vapulisia, vingunga via ku niungisa vitenga, cipue vipateso ni visapi! Viose evi visoti vie ku tu umisa mutima, ka vi ka kalako naua.

16, 17. (a) Vati va kevua vaze va kovoka ku Alemangendo? Hanenu cimueso. (b) Vika tua pande ku linga, tu kovoke ku ku-nonga ca ano mavu?

¹⁶ Vati u ka fua muono mu vi ka hua visoti viose? Kati ca casi ku singanieka muono uaco. Muomu tu na yoyo tunda ya kama mu visoti, ngeci vintsimbu vimo ka tue ku hasa ku mona lamba yose i vie ku tu kokela. Ca ku muenako, vantu va tunga ku hiehi na vututikilo vua kumboyo, ka ve ku tuala naua mana ku kalua kayo. Kaha vantu va tunga ku hiehi na cina ca ku mbila mazilo, ve ku izilila lizimba lia ku pihia. Vunoni omo Yehova a ka tundisako visoti viose, tu kevua ku zituka ca kama!

¹⁷ Vika vi ka sintsa mu cihela ca cikela ca mutima na cisulila vi tue ku ivua? Visamo 37:11 nguayo: “Va ka viukilila mu ku-lana ca ciyulo.” Ce ku tu lembezieka ku tantekeya ngecize evi vikevio via tonda ku tu lingila Yehova! Mu vintsimbu vino via ku kaluua, lingenu cose mu kale ku hiehi na Yehova na ku likata na lukungulukilo lueni. Lulavelelo luenu lua kala na seho ya kama, ngeci mukemuo puenu na ku singanieka cikuma, linga lu pue lua vusunga kuli enu, kaha na ku lekako vakuenu. (1 Timoteo 4:15, 16; 1 Petulu 3:15) Nga mu lingamo, mu hasa ku kala na vusunga ngecize mu a ka nonga ano mavu, enu mu kovoka na ku yoya mu ndzolela ku miaka yose ya ya-ye!