1. Vika Isaya ua polofetele ku tuala hali Yesu, kaha omo lia vika vupolofeto vuaco vue ku tu kaniamesa?

VUPOLOFETO vua Isaya ku tuala hali Yesu Kilistu vue ku tu kaniamesa na ku tu hana lulavelelo. Isaya ua polofetele ngueni Yesu “ka li ka sompa mu ku kava via ku mona na meso, cipue ka li ka teta lizi mu ku kava via ku ivua na matuitui eni; Vunoni a ka sompela vahutu na vuviuke.” (Isaya 11:3, 4) Omo lia vika aa mezi eku tu kaniamesa? Muomu tuli mu mavu a ku sula na kahangu, kaha vantu ve ku lihisa umo na mukuavo kuliya na vize vi ve ku mona. Ngeci tua tondeka ngazi ua ku tantuluka, Yesu, muomu ka ka tu sompesa ku liya na cifua cetu!

2. Vika Yesu ua sikile ku linga, kaha vika tu lilongesa mu cilongesa cino?

² Nkala litangua tue ku singaniekela vakuetu viuma. Vunoni mu ku linga ka tua tantulukile, visinganieka vietu ka via puile via ku tantuluka ngue via Yesu. Ca pua ca casi ku tanguka na vize vi tue ku mona. Vunoni Yesu ua tu hele lisiko, ngueni: “Kati mu hise ku cifua, vunoni hisenu na cihiso ca vuviuke.” (Yoano 7:24) Yesu ua tonda tu mu tambuluise kaha kati  ku hisa vakuetu omo lia cifua cavo. Ngeci mukemuo, mu cilongesa cino tu ka simutuila ha viuma 3 vie ku kuata ku cifua ci tue ku muenamo vakuetu: cifuti ni cisemua ca muntu, vupite vueni, na miaka yeni. Omo tu vi konka cimo ku cimo, tu ka lilongesa naua vati tu hasa ku ononoka Yesu na ku viana ku hisa vantu omo lia cifua cavo.

3, 4. (a) Omo lia vika Petulu ua aluluile cifua ca kele na ku muenamo vaze ka va puile vaYundeya? (Talenu cikupulo ca ku vuputukilo.) (b) Cilongesa cika ca ciha Yehova ua longesele Petulu?

³ Aci singaniekenu vati ua livuile kapostolo Petulu mu va mu tumine ku Sesaliya, ku ndzivo ya umo kati kaYundeya ua lizina Koloneliu! (Vilinga 10:17-29) Petulu tunde ku vunike va mu longesele ngecize vose kati vaYundeya va puile va ku zuala. Vunoni kuli vimo via mu lingisile ku alulula visinganieka vieni. Njambi ua mu tumine cimo cimona. (Vilinga 10:9-16) Mu cimona caco, Petulu ua muene ntanga i suluka muilu ya ku sula ya tusitu va ku zuala. Kaha ua vuile lizi ngualio: “Petulu; tsiha kaha lia.” Vunoni Petulu ua vianene. Kaha lizi ngualio: “Cize ca na vukisa Njambi, kati u ci ambe ca ngoco.” Mu nima ya cimona, Petulu kevuisisile vi lia handekele lizi liaco. Ha ntsimbu ize vene kuezile tunganda va tumine Koloneliu. Kaha sipilitu santu ya tumine Petulu ku ya na vaze tunganda ku ndzivo ya Koloneliu, ngeci ua ile.

⁴ Nga Petulu ua puile mukua ku hisa vakuavo omo lia cifua cavo, nga ka ile ku ndzivo ya Koloneliu. Muomu vaYundeya ka va kele na ku liendela na vaze ka puile vaYundeya. Kaha vika honi Petulu ua ilileko? Vutuhu ua kele na kahangu ku tuala ha va vaze ka va puile vaYundeya, cimona ca muene na cimamuna ca sipilitu santu via aluluile visinganieka vieni. Kaha mu nima ya ku halakana Koloneliu, Petulu ua handekele ngueni: “Mua vusunga nja mono ngecize Njambi ka hangula ku vantu: Vunoni ku miyati yose, ou uose a mu vuila vuoma, kaha a linga vuviuke, ikeye ya na tava.” (Vilinga 10:34, 35) Eci cilongesa ca ciha ca mu tovalele Petulu, kaha ce ku kuatele na kuli Vakua Kilistu vose. Mu njila ika?

5. (a) Yehova a tonda Vakua Kilistu vose vevuisise vika? (b) Vutuhu tu tantekeya vusunga, vika tu hasa ku kala navio na ntsimbu ino?

⁵ Yehova ua pangesele Petulu mu ku kuasa Vakua Kilistu vose vevuisise ngecize ikeye ka puile mukua kahangu. Yehova ke ku tala ku muyati, cifuti, cisemua ni lilimi, houe. Vunoni ue ku tava uose-ouo, ca kama lika nga a mu vuila vuoma na ku linga via cili. (Ngalata 3:26-28; Ku-Solola 7:9, 10) Halumo evi mu vi tantekeya laza. Vatico nga mua kolela mu cifuti ni vusoko vua kahangu? Ambe nga mue ku singanieka nguenu ka mua kele na kahangu, halumo kasi mua kalako na kamo? Petulu neni ambe mu nima ya ku kuasa vakuavo va tantekeye ngecize Njambi ka kele na kahangu, ikeye kasi ua kele nako. (Ngalata 2:11-14) Vati tu hasa  ku ononoka Yesu na ku likela ku hisa vakuetu omo lia ku cifua cavo?

6. (a) Vika vi hasa ku tu kuasa ku litundisa kahangu? (b) Vika muzimbu ua umo muanetu ua muesele ku tuala hali ikeye?

⁶ Linga tu mone nga tua kala na kahangu ni kuahi, tua pande ku lihilula etu vavene. Tua pande ku setekesa cifua ci tue ku muenamo vantu na vize vi tue ku tanda mu Lizi lia Njambi. (Visamo 119:105) Tu hasa naua ku hula umo kavusamba ketu linga a tu leke nga ue ku mona kamo kahangu muli etu, kaze ka tue ku hasa ku mona etu vavene. (Ngalata 2:11, 14) Halumo visinganieka viaco via tu izilila cikuma mu njila ya ku linga na ku tantekeya ngecize tua kala na kahungu kuahi! Evi vikevio via solokelele umo muanetu ua kala na viteli mu cikungulukilo. Mua sonekele umo muzimbu ua tumine ku mbetele ku tuala hali umo muanetu na mpueyeni va kele mu cipanga ca ntsimbu yose. Vutuhu ua va sangalele, vunoni mu ku linga yala ua puile mukua cisemua ci va sembuluile cikuma vantu, uze muanetu ua vuezele ku muzimbu ngueni: “Vutuhu muanetu ua tunda ku [cifuti ca cingandi], vilinga vieni na cifua ca muono ueni ce ku kuasa vantu ku tantekeya ngecize [ku pua mukua cisemua ca cingandi] ka ca lombolokele ngecize muntu uaco ua kala na vilinga via ku pihia, vi va kala navio cingi ca vantu va ku cisemua [caco].” Vika tu lilongesaho? Ambe nga tua tambula citeli ca kama mu lukungulukilo lua Yehova, tua pande ku lihilula na ku tava na mutima uose vukuasi vua ku litundisa nkala kahangu ka lusupa muli etu. Vika vikuavo tu hasa ku linga?

7. Vati tu hasa ku muesa ngecize tua ‘hamesa mitima yetu’?

⁷ Nga “mitima yetu i na likamesa,” tu ka sintsisa kahangu na cilemo. (2 Kolintu 6:11-13) Mua lema lika ku sikama na vakua muyati, cifuti, cisemua, ni lilimi lienu ni? Nga mukemuo, lihakelenu kapandi ka ku sikama-sikama na vakua visemua vieka. Halumo mu ku va lania va pange nenu mu lihia. Mu hasa naua ku va lania va ka hitiseko vimo mukanua ku ndzivo yenu. (Vilinga 16:14, 15) Mua tantekeya vi kezamo? Cilemo ci ka sula mu mutima uenu na ku zimamo kahangu kose. Hano honi tu simutuilenu njila ikuavo i tu hasa ku hisilamo vakuetu omo lia ‘cifua cavo.’

8. Vika tu hasa ku lilongesa ku Levitiku 19:15 ku tuala ha vati vupite na vuhutu vu hasa ku kuata ku cifua ci tue ku muenamo vakuetu?

⁸ Vupite ni vuhutu vua muntu vu hasa ku kuata ku cifua ci tue ku mu muenamo. Levitiku 19:15 nguayo: “Kati mu ka linge vuhenge na vumo vuahi mu ku sompela: kati u ka singimike muvila ua muhutu, cipue ku lemesa muvila ua mukua vukama; vunoni mu vuviuke u ka sompela mukuenu.” Vati vupite ni vuhutu vua muntu vu hasa ku kuata ku cifua ci tue ku mu muenamo?

9. Vusunga vuka ua sonekele Solomone, kaha vika tu lilongesaho?

 ⁹ Solomone va mu huiminine ku soneka ovu vusunga vue ku vuisa vusiua: ‘Visimo 14:20 Muhutu va mu zinda, ku mukua ku lihata neni vene; vunoni ndzunda [ni mpite] a li na vavusamba va vengi.’ Vika tu lilongesa ku cisimo eci? Nga ka tua zangamene, tu hasa ku kala na cizango ca ku likuata lika vusamba na vamuanetu va vampite. Vusonde vuka vua kala ha ku pua kavinga mu sukuma ni nguetu ku vinga muntu omo lia vize vi ali navio?

10. Citanga cika Tiango ua mamuine Vakua Kilistu?

¹⁰ Nga tu tepesa vamuanetu omo lia vuhutu ni vupite vuavo tu hasa ku neha matepeso mu cikungulukilo. Evi via solokele ku vimo vikungulukilo via ku sekulu ya ku livanga, ngeci Tiango ua va mamuine. (Tandenu Tiango 2:1-4.) Ka tua pandele ku tavesa matepeso mu cikungulukilo. Vati honi tu hasa ku litenga ku ku likata na vantu omo lia vize vi va li navio?

11. Vuno ku pua cihutu ni mpite ca likuata na vusamba vuetu na Yehova ni? Lombololenu.

¹¹ Tua pande ku mona vamuanetu ngue mue ku va muenamo Yehova. Omo lia vika? Muomu Ikeye ke ku haka seho ku muntu kuliya na vize via vi ali navio. Vusamba vuetu na Yehova ka vua likuatele cipue kamandende na viuma vi tua kala navio. Vutuhu Yesu ua handekele ngueni, “Mua mukalu kuli fumbelo  [ni mpite] ku kovela mu Vuangana vua muilu,” vunoni ka handekele ngueni ka citava mpite ku kovela mu Vuangana vua Njambi. (Mateo 19:23) Yesu ua handekele naua ngueni: “Mua vezika enu vakua ku hutua: muomu vuangana vua Njambi vu na pu vuenu.” (Luka 6:20) Vuno aa mezi a Yesu a muesele ngecize vihutu vose va kononoka Yesu na ku tambula vivezikiso via ku lifuila ni? Houe. Muomu kua kele vihutu vavengi ka va tavele ku kava Yesu. Mua vusunga, vusamba vua muntu na Yehova ka vua hitukilile ha viuma via kala navio.

12. Vimamuna vika Mbimbiliya ya hana ku vihutu na vampite?

¹² Ha kati ka vangamba va Yehova ha kala vamuanetu va pua vihutu vamo co vampite. Vunoni vose va lema Yehova kaha ve ku mu pangela na mutima uose. Mbimbiliya ya mamuna vampite “kati va lavelele ku vupite vuze vue ku nonga, vunoni [kuli] Njambi.” (Tandenu 1 Timoteo 6:17-19.) Kaha Mbimbiliya ya tu mamuna etu vangamba va Yehova cipue nga tua pita ni kuahi via vusonde vua ku lema vimbongo. (1 Timoteo 6:9, 10) Ku mona vamuanetu ngue mue ku va muena Yehova, ci ka tu kuasa linga kati tu va hake seho kuliya na vize vi va kala navio. Amba miaka ya muntu co? Vuno tua pande ku haka seho ku vamuanetu kuliya na miaka yavo ni?

13. Vika ya longesa Mbimbiliya ku tuala ha ku muesa kasingimiko?

¹³ Mbimbiliya nguayo tua pande ku singimika vakuluntu. Levitiku 19:32 nguayo: “U ka katuka ku meso a mukua vuele, na ku singimika cihanga ca mukuluntu, kaha u ka mu vuila vuoma Njambi yove.” Kaha Visimo 16:31 nguayo “Mutue ua vuele ukeuo cilongo ca vumpahu; [nga va] u uana mu njila ya vuviuke.” Kapostolo Paulu ua lekele Timoteo kati a paye vakuluntu vunoni a va singimike ngue va Ise. (1 Timoteo 5:1, 2) Vutuhu ua kele na imo mpoko ha vakuluntu vunoni ua pandele ku va muesa cikeketima na kasingimiko.

14. Ntsimbu ika ci hasa ku tondeka ku sungamesa muntu na kolo ku hiana yetu?

¹⁴ Vatico nga umo muntu ua ku kola a vulumuna ku cizango kaha a hungumuina vakuavo ku vize via zinda Yehova? Yehova ke ku tetela mukua ku vulumuna ku cizango, ambe nga muntu uaco na kolo kaha ua tsimana. Talenu vi ya handeka Isaya 65:20 ‘Mukua vupi ambe nga na puisa cihita ca miaka va ka mu singa.’ Kaha mu cimona ca Ezekiele mua kala naua mezi ngeci mua aa. (Ezekiele 9:5-7) Ngeci mukemuo, ku singimika Uze ua kalako tunde ku ntsenkulu Yehova, cikeco ca hiana seho. (Ndaniele 7:9, 10, 13, 14) Ku singimika Yehova ci ka tu hana ku simpa ca tondeka mu ku sungamesa nkala muntu a tondeka vukuasi, ca ku hona ku tala ku miaka yeni.​—Ngalata 6:1.

15. Vika tu lilongesa kuli kapostolo Paulu ku tuala ha ku singimika vamuanetu va vakuendze?

¹⁵ Amba vamuanetu va vakuendze co? Navo tua pande ku va singimika ni? Eyo. Muomu Paulu ua lekele Timoteo ngueni: “Na umo uahi a yengule vukuendze vuove; vunoni pua cimueso kuli vaze va tsiliela, mu lizi, mu ku-linga cove, mu cilemo, mu ku tsiliela, mu ku lela.” (1 Timoteo 4:12) Omo Paulu ua sonekele evi, Timoteo tele ali na miaka 30. Vunoni Paulu ua mu kundikile viteli via seho. Vika tu lilongesaho? Ka tua  pandele ku sembulula vamuanetu va vakuendze omo lia miaka yavo. Aci singaniekenu viuma via puisilemo Yesu tunde ku vunike na ha miaka 33 lika!

16, 17. (a) Vati vakuluntu ve ku hangula muntu a pue mukua ku kuasa vipanga ni mukuluntu? (b) Vati visinganieka vietu ni via muimbo vi hasa ku liluisa na Mbimbiliya?

¹⁶ Ku visemua vimo vantu ka ve ku singimika vaze va pua vanike kuli vakevo. Omo liaco, vamo vakuluntu ka ve ku hangula vakuendze linga va tambule viteli ngeci mua ku pua vakua ku kuasa vipanga ni vakuluntu, cipue nga va na puisamo vi tondeka. Vunoni Mbimbiliya ka ya tumbuile mpundu miaka ya na pande ku kala nayo muntu linga va mu hangule ku pua mukua ku kuasa vipanga ni mukuluntu. (1 Timoteo 3:1-10, 12, 13; Tito 1:5-9) Nga mukuluntu a tumbika lisiko ku tuala ha cimpande caco omo lia cisemua ceni, kaha kesi na ku kava Lizi lia Njambi.​—2 Timoteo 3:16, 17.

¹⁷ Nga vakuluntu ka va kava vitume via Mbimbiliya mu ku hangula vakua ku kuasa vipanga ni vakuluntu, va hasa ku imika vaze va na puisamo ku tambula viteli. Mu cifuti cimo, umo mukua ku kuasa vipanga ua kele na ku puisamo vuino viteli vieni, kaha vakuluntu va muene ngecize na puisamo vitume via Mbimbiliya a pue mukuluntu. Vunoni, vamo vakuluntu va ku kola nguavo ua solokele vunike cikuma, ngeci ka va mu hanguile. Ca vusiua, uze muanetu ka va mu hanguile omo lia cifua ca solokelelemo lika. Vunoni evi visinganieka vi li na ku lisanduoka mu mavu ose. Ngeci mukemuo tua pande ku tsiliela mu Mbimbiliya ku hiana mu visinganieka vietu ni ku kava viuma vi ve ku linga vantu muimbo li tua kala. Kaha tu kononoka Yesu na ku likela ku hisa vakuetu omo lia cifua cavo.

18, 19. Vika vi hasa ku tu kuasa ku mona vamuanetu ngue mue ku va muenamo Yehova?

¹⁸ Vutuhu ka tua tantulukile, kasi tu hasa ku lilongesa ku mona vakuetu ca ku hona kahangu ngue mue ku va mona Yehova. (Vilinga 10:34, 35) Ngeci mukemuo, tua pande ku haka seho ku vimamuna via mu Lizi lia Njambi. Nga tu vi niunga, tuli na ku ononoka eli lisiko lia Yesu: “Kati mu hise ku cifua.”—Yoano 7:24.

¹⁹ Vuovuno Muangana uetu, Yesu Kilistu, a ka sompesa vantu vose. Ku sompesa ceni ci kemana ha vitume via Njambi, kati ha viuma via ka mona ni ku ivua. (Isaya 11:3, 4) Mua vusunga tua lavelela na ndzolela ntsimbu yaco!