Vika va vindikila ku haka mikanda ya Vakaleho va Yehova mu visaiti vieka ni viAplikativu vieka?

Vamo ve ku singanieka nguavo mu ku linga mikanda yetu tue ku hana ya vuana, citava ku i tuma ni ku i haka mu visaiti ni viAplikativu vieka. Vunoni, ku lingamo ci hasa ku koka vitanga via kama kaha naua ka ca litombuele na Masiko a ku Pangesa visaiti vietu. * (talenu litota) Masiko aco a muesa ha toma ngecize va vindika “ku nona vifikula, mikanda ya mu internete, miaso, vikupulo, vivideo na mizimbu, ni nkala viuma vieka mu saiti ino linga mu vi hake mu internete (eci ca lomboloka kati ku vi haka mu viprograma via ku simutuila, visaiti via ku lituma viuma ngeci mua vivideo na viFicheiro vieka, ni nkala site yeka).” Seho ika ya kala ha masiko aa?

Vikuata viose via mu saiti yetu via kala na direitos autorais (mpoko ya vakua ku soneka), ni nguetu, va vi niunga ku masiko. Eci ca pua ca seho muomu ce ku niunga viose via kalamo linga vantu kati va vi pangese mua ku pihia. Vintsimbu vimo vakua ku alulukila vusunga na vantu veka va tonda ku tanganesa vipanga vietu, ve ku haka mikanda yetu mu visaiti viavo linga va kokueyelemo Vakaleho va Yehova na vantu veka. Mu visaiti viaco ve ku hakamo naua mizimbu yeka linga va kune vimpata mu mitima ya vantu. (Visamo 26:4; Visimo 22:5) Vakuavo ve ku pangesa vimpande via mu saiti yetu ni logotipo yetu mu ku tembesa viAplikativu na viuma vikuavo vi ve ku landesa. Vunoni mu ku linga vimpande vietu na logotipo yetu va vi niunga ku masiko, tu hasa ku vindika vantu vaco na ku va tuala ku vindzango via vusompelo. (Visimo 27:12) Vunoni vindzango via vusompelo ka vi ka tu hakuila nga tu tavesa vantu, ni vene vamuanetu, va hake mikanda yetu mu visaiti vieka ni va pangese logotipo yetu mu ku landesa viuma.

Ca pua vusonde vua kama ku tupulula mikanda yetu mu visaiti vieka, noho ku i tupuluila lika mu jw.org. Yehova ue ku tu hana via-ku-lia via mu lutsilielo ku hitila lika muli “mukuamanda ua cili mukua mana.” (Mateo 24:45) Kaha “mukuamanda” uaco ue ku pangesa lika visaiti vietu vi va sonekesa ku masiko​—www.pr418.com, tv.pr418.com, na wol.pr418.com. Kaha tua kala lika na viAplikativu vitatu​—JW Language^®, JW Library^®, na Library Sign Language^®. Muli evi visaiti na viAplikativu vietu, ka mua kele na cimo cuma ca mu mavu a Satana cahi. Vunoni nga tu uana mikanda yetu mu saiti yeka ni Aplikativu yeka, ka tua pandele ku i tala muomu halumo va na i alulula ni va na vuezamo vimo.—Visamo 18:26; 19:8.

Cikuavo naua, nga tu haka vikuata vietu mu visaiti vieka, vize via tavesa vantu ku hakamo vikomentário, vakua ku alulukila vusunga na veka va hasa ku tsopa lukungulukilo lua Yehova. Ku simutuila mu vifua evi mu Internete ka ca puile njila ya cili ya ku kuaselamo muntu ni ku mu ambuluila houe. (1 Timoteo 6:3-5; 2 Timoteo 2:23-25) Kaha vamo vantu ve ku panga visaiti na viprograma via ku simutuila mu internete mu cifua ca ku linga vi soloka ngue via mu lukungulukilo lua Yehova ni via Vakua Civunga ca Vantuamena. Vunoni via makuli. Na umo Mukua Civunga ca Vantuamena uahi ua kala na Saiti ni nkala programa yeka ya ku simutuila mu internete.

Nga tu leka vantu via jw.org tuli na ku ambulula ‘muzimbu ua cili.’ (Mateo 24:14) Visaiti na viAplikativu vietu vi na ku tualeleho ku vuaha. Kaha tu tonda vose va uanemo vukuasi. Ngeci mukemuo, citava tu tume umo muntu mukanda, video ni muaso uetu cipue ku mu tuma link ya mu saiti yetu. Nga tu lingamo, tuli na ku tuamenena vantu ku njila imo lika ye ku pangesa Yehova mu ku hana via-ku-lia via mu lutsilielo, “mukuamanda ua cili mukua mana.”