1. Mu vinjila vika tue ku panga na Yehova?

OMO Yehova tangele vantu, ua tondele va pange hamo neni. Vutuhu vantu ka va tantulukile, vunoni vakua ku ononoka kasi va hasa ku panga na Yehova. Ca ku muenako, Mbimbiliya nguayo nga tu ambulula muzimbu ua Vuangana na ku puisa vantu vandongesi kaha tu pua “vangamba kumo na Njambi.” (1 Kolintu 3:5-9) Ca pua ku vezika ca kama ku tu hangula kuli Sakatanga Mukua Ngolo Yose linga tu pange neni mu cipanga eci ca hiana seho! Vutuhu ngoco, ku ambulula kati cikeco lika cipanga ci tue ku pangela hamo na Yehova. Mu cilongesa cino, tu lilongesa vati naua tue ku panga neni nga tu kuasa vavusoko vuetu na vamuanetu mu cikungulukilo, nga tu muesa vuhuanga, nga tu kuasa ku vipanga vi luli na ku linga lukungulukilo mu mavu ose, kaha nomo tu vueza ku vipanga vietu via mu lutsilielo.—Kolose 3:23.

2. Omo lia vika ka tua pandele ku setekesa vi tue ku lingila Yehova na vize vi ve ku mu lingila vakuetu?

² Omo tu simutuila ha cilongesa cino, ci ka pua ca seho ku  vuluka ngecize etu vantu tua liseza-seza, cipue ku miaka, ku cihindu, ni ku vuhasi vuetu vua ku linga viuma. Ngeci mukemuo, ka tua pandele ku setekesa vipanga vi tue ku lingila Yehova na vize vi ve ku mu lingila vamuanetu. Kapostolo Paulu neni ua handekele ngueni: “Muntu uose a hilule vilinga vieni, kaha a ka lipambe nevi via ivene, kati nevi via mukuavo.”​—Ngalata 6:4.

3. Omo lia vika tu hasa ku handekela nguetu uose ue ku niunga vusoko vueni ali na ku pangela hamo na Njambi?

³ Yehova ua tonda tu niunge vusoko vuetu. Ca ku muenako, visemi va vamala va kala na kapandi ka ku tonda vimbongo via ku lisuka na vavusoko vuavo. Va vampuevo co va tondeka ku kala ha ndzivo mu ku niunga vana vavo. Kaha nga visemi ka vesi na ku hasa ku liniunga vakevo vavene omo lia ku kulupa, vana ve ku linga cose mu ku va niunga. Mua vusunga evi via tondeka mua kama. Mbimbiliya nguayo: “Vunoni nga umosi ka lengeya via vusoko vueni, cikuma vene via vakua ndzivo yeni ivene, ikeye na viana ku-tsiliela cize, mu ku pihia na hiana uze ka tsililielele.” (1  Timoteo 5:8.) Nga mua kala na viteli mu vusoko, halumo ka mue ku hasa ku lingila Yehova viose vi mua tonda. Vunoni kati mu lave ku mutima! Yehova ue ku viukilila nga mu tondela vavusoko vuenu vize via va kambela.—1 Kolintu 10:31.

4. Vati visemi va hasa ku tuameka Vuangana, kaha vika vie ku izamo nga va lingamo?

⁴ Visemi Vakua Kilistu ve ku pangela hamo na Yehova mu ku kuasa vana vavo va kale na vizango mu vipanga via Yehova. Kaha visemi vavengi ve ku lingamo. Omo liaco, vana vavo va hangula ku pangela Yehova mu cipanga ca ntsimbu yose, vamo vaya vene na ku vihela via ku laako! Vamo va pua vamisionaliu, vakuavo ve ku linga vupioneiro ku vihela via tondeka cikuma vakua ku ambulula, kaha vakuavo ve ku pangela ku Mbetele. Tua tantekeya ngecize nga vana vali ku laako, visemi ka va hasa ku kala navo ntsimbu ya kama. Vunoni ve ku kaniamesa vana vavo va tualeleleho ku lemesa Yehova kuose-okuo ku vali. Omo lia vika? Muomu va viukilila ngecize vana vavo va li na ku tuameka Yehova mu muono. (3 Yoano 4) Cingi ca visemi vaco ve ku livua ngue mua livuile Hana, uze ua handekele via muaneni Samuele ngueni “nji na mu hie kuli Yehova.” Kuli vakevo, ca pua ku vezika ca kama ku panga na Yehova mu ku mu hana vana vavo.—1 Samuele 1:28.

5. Vati mu hasa ku kuasa vamuanoko mu cikungulukilo? (Talenu cikupulo ca ku vuputukilo.)

⁵ Nga ka muesi na viteli via mu vusoko vi tondeka mu vuasi-vuasi, citava mu kuase vamuanetu va li na ku vavala, vakulupe ni vaze vali na visoti vieka ni? Citava mu kuase vaze ve ku va niunga? Tondenu mu cikungulukilo cenu vaze va tondeka vukuasi vuaco. Ca ku muenako, halumo muli umo ndokazi ue ku niunga cisemi ceni ua ku kulupa lika lieni. Citava mu ka kale na cisemi ceni linga ikeye a uaneko kantsimbu ka ku linga vieka ni? Mu hasa naua ku kuasa umo muanetu mu ku mu tuala mu ku kunguluka, ku ka landa vimo, ni ku ka meneka umo ali mu sipitali. Nga mu lingamo, mu ka panga na Yehova mu ku kumbulula vivundilo via vamuanetu vaco.—Tandenu 1 Kolintu 10:24.

6. Vati tu hasa ku muesa vuhuanga?

⁶ Vakua ku panga na Njambi va tsimana mu ku muesa vuhuanga. (VaHevelu 13:2) Mu Lizi lia Njambi, mua kala malungano a tu longesa ku muesa ngozi. (Njenisisi 18:1-5) Tu hasa kaha tua pande ku kuasa vakuetu hose ha tu uanena vukovelelo, ambe nga vavusoko vuetu mu lutsilielo ni kuahi.​—Ngalata 6:10.

7. Vivezikiso vika vie ku iza mu ku tambula vamuanetu va kala mu cipanga ca ntsimbu yose ku ndzivo yetu?

⁷ Nenu citava mu pangele hamo na Yehova mu ku kuasa vamuanetu va kala mu cipanga ca ntsimbu yose, va uane cihela ca ku kala ni? (Tandenu 3 Yoano 5, 8.) Ku lingamo, ci ka va kuasa cikuma na ku mi kuasa nenu naua. Evi viaco Mbimbiliya ya vi luka nguayo ‘ku likolesa umo na mukuavo.’ (Loma 1:11, 12) Aci halakanenu via muanetu Olaf. Mua puile kanike umo kaniungi ua ku zinguluka ua muzike ua ka menekele cikungulukilo cavo kaha ua tondekele cihela ca ku kala, vunoni na umo uahi mu cikungulukilo ua hasele ku mu tambula. Ngeci Olaf ua handekele na visemi veni ka va puile Vakaleho, nga citava kaniungi ua ku zinguluka a ku tulile ku ndzivo yavo. Va tavele, vunoni va lekele Olaf nguavo noho a pue na ku kosa mu sofa. Olaf ua tavele ku kosa mu sofa kaha ka liveyele ku lingamo. Simano ya kele na kaniungi ua ku zinguluka ya mu tovalele cikuma! Cimene ku cimene nga va liaula va kele na ku simutuila vimpande via cili via vingi. Kaniungi ua ku zinguluka ua kaniamesele Olaf ku kovela mu cipanga ca ntsimbu yose. Olaf ua lingamo, kaha ua panga vumisionaliu mu vifuti via ku liseza-seza mu miaka 40.

8. Omo lia vika tua pande ku muesa vuhuanga ambe nga vakuetu ka va tu santsela? Hanenu cimueso.

⁸ Tu hasa ku muesa cilemo ku vangendzi mu vinjila via vingi, ambe ka va tu santsela. Ca ku muenako umo ndokazi ku Espanha ua kele na ku lilongesa Mbimbiliya na umo mpuevo ua ku Ekuador, lizina lieni Yesica. Tangua limo tele va li na ku lilongesa, Yesica ua kele na ku lila. Ngeci ndokazi ua mu hulile ngueni vika. Yesica ua kumbuluile ngueni tele kanda eze ku Espanha, ua puile cihutu cikuma. Tangua limo ka hasele ku uana via-ku-lia via ku hana kuli muaneni ua mpuevo, vunoni mema lika. Kaha mua kele na ku langeka muaneni, Yesica ua vundilile. Mu nima ya ntsimbu ya indende, Vakaleho vavali vezile ku ndzivo yeni kaha va mu hanene mukanda. Vunoni ua va vuilile matoto na ku tavula mukanda, ngueni: “Muanange ue ku lia mikanda ni?” Vandokazi va setekele ku mu lembezieka, vunoni ka va halakanene. Kaha mu nima ya ntsimbu, va sezele cikasa ca via-ku-lia ha mbelo yeni. Ngeci tangua lize ua kele na ku lila ngueni muomu ua sembuluile cikumbululo ca Njambi ku civundilo ceni. Vunoni Yesica ua lihakela kapandi ka ku pangela Yehova. Mua vusunga, mu vuhuanga vua vaze vandokazi mueza via cili.—Ekelesiaste 11:1, 6.

9, 10. (a) Vukovelelo vuka vua ku lihana va kele navuo vaIsaleli? (b) Mu vinjila vika vamuanetu va vamala va hasa ku kuasa mu cikungulukilo?

⁹ Ku laza, vaIsaleli va kele na vukovelelo vua vuingi vua ku lihana ku vipanga. (Ezundu 36:2; 1 Mizimbu 29:5; Nehemiya 11:2) Vunoni nenu muli na vukovelelo vua vuingi vua ku hana ntsimbu, vupite na vutongue vuenu mu ku kuasa vamuanoko. Ku lingamo ci ka mi nehela ndzolela kaha Yehova a ka mi vezikisa.

¹⁰ Mbimbiliya ya kaniamesa vamala mu cikungulukilo va pange na Yehova mu ku pua vakua ku kuasa vipanga na vakuluntu. (1 Timoteo 3:1, 8, 9; 1 Petulu 5:2, 3) Vaze ve ku lingamo, va tonda ku kuasa vakuavo ku muvila na mu lutsilielo. (Vilinga 6:1-4) Vuno vakuluntu va mi vundilaho laza ku pua mukua ku inikila, ku pangela ku mikanda, ku ku viukisa na ku tepela vihela via ku ambuluila, ku viukisa Ndzivo ya Vuangana, ambe ku vikuavo ni? Vamuanetu ve ku kuasa mu vinjila evi, nguavo vipanga viaco vie ku va ya cikuma ku mitima.

11. Vukuasi vuka ve ku uana vamo mu ku lihana mu vipanga via ku tunga?

¹¹ Vaze ve ku lihana ku vipanga via ku tunga ve ku uana vavusamba va vaha. Umo ndokazi ua lizina Margie ua panga ku ku tunga Vindzivo via Vuangana mu miaka 18. Mu vipanga viaco, ua kele na ku haka seho ku vandokazi va vanike na ku va longesa viuma. Margie ngueni vipanga viaco via pua vukovelelo vua cili vua ku likaniamesa umo na mukuavo. (Loma 1:12) Mua hitile mu vintsimbu via vikalu, vavusamba va a uana mu vipanga viaco va mu kaniamesele. Nenu mua lihanaho laza ku cimo cipanga ca ku tunga ni? Ambe nga ka muesi na vutongue na vumo vuahi, kasi mu hasa ku panga ku vipanga vietu via ku tunga..

12. Vati mu hasa ku kuasa nga kua soloka ciyovo?

¹² Tu hasa naua ku panga na Yehova mu ku kuasa vamuanetu nga kua soloka ciyovo. Ca ku muenako, tu hasa ku lambula vimbongo. (Yoano 13:34, 35; Vilinga 11:27-30) Njila ikuavo i tu hasa ku kuaselamo ya pua ku komba ni ku viukisa viuma mu nima ya ciyovo. Ndokazi Gabriela ua ku Polonia ndzivo yeni ya papuokele cikuma omo lia livazi, ua viukilile cikuma mu ku mona vamuanetu va mu vikungulukilo via ha hiehi va mu kuasa. Ndokazi Gabriela ngueni ke ku tuala cikuma mana ku viuma via zimbalesa vunoni ku vize via tambula. Ua handekele ngueni: “Cisoti caco ca nji hele vusunga ngecize ku pua mutamba ua lukungulukilo lua Yehova ca pua civezikiso kaha na ndundzi ya ndzolela ya kama cikuma.” Cingi ca vaze ve ku tambula vukuasi mu nima ya cimo ciyovo navo ve ku livua ngeci mueni. Kaha vaze ve ku panga na Yehova mu ku kuasa ava vamuanetu navo ve ku viukilila cikuma kaha va kala na ndzolela ya vusunga​—Tandenu Vilinga 20:35; 2 Kolintu 9:6, 7.

13. Nga tu linga vipanga via ku lihana vati cilemo cetu kuli Yehova ci hasa ku kola? Tumbulenu cimo cimona.

¹³ Umo ndokazi ua lizina Stephanie na vamuanetu vakuavo va pangele hamo na Njambi mu ku kuasa vamo vamuanetu va teuelele ku Estados Unidos muomu mu cifuti cavo mua kele ndzita. Stephanie ua kuasele vaze vamuanetu ku uana vindzivo na vimo vikuata. Kaha ua handekele ngueni: “Tua viukilile cikuma mu ku mona ndzolela na ku santsela cavo ku cilemo ci va va muesele vamuanetu mu mavu ose. Vakevo ve ku mona nguavo tua va kuasa, vunoni ku handeka vusunga vakevo va tu kuasa. Cilemo, ku likata, lutsilielo na lukakatela luavo kuli Yehova via kaniamesa cilemo cetu kuli Yehova. Kaha via vueza ku seho i tua haka ku viuma vi tue ku tambula mu lukungulukilo lueni.”

14, 15. (a) Cimbembesi cika ua kele naco Isaya? (b) Vati Vakua Kilistu va hasa ku tambuluisa Isaya?

¹⁴ Mu tonda ku panga na Yehova mu vipanga vikuavo naua ni? Muli na cizango ca ku nungulukila ku cihela ca tondeka cikuma vakua ku ambulula ni? Vutuhu tua tantekeya nguetu ku muesa vuhuanga ka ca tondekele kuya ku laako. Vunoni vamo vamuanetu va vamala na vampuevo ve ku lingamo. Va kala na cimbembesi ngue ca Isaya. Omo Yehova ua hulile ngueni: “Iya nji ka mu tuma, neya a tava ku tu endela?” Isaya ua kumbuluile ngueni: “Yange uno nji tume ange.” (Isaya 6:8) Nenu mua kala na ntsimbu kaha na cizango ca ku kuasa  lukungulukilo lua Yehova ni? Mu vinjila vika mu hasa ku kuasa?

¹⁵ Ku tuala ha cipanga ca ku ambulula na ku puisa vantu vandongesi, Yesu ua handekele ngueni: “Vimbuto vi na lana, vunoni vakua ku tia va vandende. Ngoco vene vundilenu kuli Muangana ua vimbuto, linga a tume vakua ku tia vimbuto.” (Mateo 9:37, 38) Citava mu ka pue vapioneiro ku vihela vi tondeka cikuma vakua ku ambulula ni? Ni citava mu kuase muanetu ueka ku lingamo ni? Cingi ca vamuanetu ve ku mona nguavo njila ya cili cikuma ya ku mueselamo cilemo cavo kuli Njambi na ku vantu ya pua ku linga vupioneiro ku cihela ci tondeka cikuma vakua ku ambulula. Vuno kasi kuli vinjila vikuavo vi mu hasa ku vuezelamo vipanga vienu kuli Yehova ni? Nga ku vili, lingenumo kaha mu kevua ndzolela ya kama.

16, 17. Mu vinjila vika mu hasa ku vueza ku vipanga vienu kuli Yehova?

¹⁶ Citava mu ka pangele ha mbetele ni ku kuasa ku vipanga via ku tunga mu ntsimbu ya indende ni? Ambe litangua limo ni avali mu simano? Lukungulukilo lua Yehova lua tonda vamuanetu va lihana ku pangela kuose ku tondeka vukuasi kaha ve ku tava ku panga nkala vipanga vi va tambula ambe nga va kala na vutongue ku vipanga vieka. Yehova ua haka seho ya kama kuli uose ue ku lihana na ku pangela kuose-okuo ku tondeka vukuasi.​—Visamo 110:3.

¹⁷ Mu tonda ku lilongesa vumo vutongue linga mu pangele Yehova mu vutuntu ni? Setekenu ku lisonekesa ku Sikola ya Vakua ku Ambulula Vuangana. Sikola yaco ye ku longesa vamuanetu va vamala na vampuevo va ku hia vaze va li laza mu cipanga ca ntsimbu yose, linga lukungulukilo lua Yehova lu va pangese mu vutuntu. Vose ve ku hita ku sikola yaco va na pandele ku kala na vukatuisi vua kuya kuose-okuo ku va va tuma mu nima ya sikola. Nenu muli na cizango ca ku pangela Yehova mu njila eyi ni?​—1 Kolintu 9:23.

18. Vivezikiso vika via kala ha ku panga na Yehova nkala litangua?

¹⁸ Tua pua vihuanga, vakua ngozi, na ku muesa cilemo muomu tu vantu va Yehova. Nkala litangua tue ku lisosomua na vakuetu. Eci ce ku tu nehela ndzolela na ciyulo. (Ngalata 5:22, 23) Muose-omuo mu u na fu muono uenu, mu kevua ndzolela nga mu tambuluisa vuhuanga vua Yehova na ku tualelelaho ku panga neni!—Visimo 3:9, 10.