MUAKA uali, makulukazi a vamuanetu va vamala mu mavu ose va va hanguile ku pua vakuluntu na vakua ku kuasa vipanga. Nga mua pua umo uavo mua vusunga mua viukilila ku pangela Yehova na vamuanoko mu njila eyi.

Vunoni citava halumo mu na lisosomua na citeli caco. Nga mukemuo, kati yenu lika. Jason umo mukuendze ua pua mukuluntu, ngueni: “Mu va nji hanguile, ha katete nja lisosomuene na viteli viange.” Mosesa na Yelemiya navo va vuile nguavo ka vesi na vutongue vua ku puisamo vipanga via va hanene Yehova. (Ezundu 4:10; Yelemiya 1:6) Nga nenu mue ku ivua ngoco, vati mu hasa ku simpa na ku tualelelaho ku kola mu lutsilielo? Mu hasa ku lilongesa via vingi ku lungano lua Timoteo.​—Vilinga 16:1-3.

Citava Timoteo ua kele na miaka 20 mua putukile ku ya mangendzi na kapostolo Paulu. Ha katete mu va mu laniene, halumo Timoteo ua livuile ngueni kesi na vutongue vua ku longesa na ku mamuna, muomu tele a ci li kanike. (1 Timoteo 4:11, 12; 2 Timoteo 1:1, 2, 7) Vunoni ua tualeleho ku kola mu lutsilielo, kaha mu nima ya miaka 10, Paulu ua lekele Vakua Filipu ngueni: “Nji ku lavelela muli Muangana Yesu ku tuma Timoteo kuli enu vuovunovuno.” Vika Paulu ua handekelelemo? Ivene ngueni: “Muomu ka njesi na muntu ueka ua mutima umo nange.”​—Filipu 2:19, 20.

Omo lia vika Timoteo ua pua lungano lua cili ku vakuluntu? Omo lia vusunga 6.

1. Ua hakele seho ya kama ku vantu. Paulu ua lekele vamuanaye ku Filipu ngueni Timoteo ‘a koma mutima’ kuli vakevo. (Filipu 2:20) Timoteo ua tondele vamuanetu va tualeleho ku kala ku hiehi na Yehova, kaha ua pangesele ntsimbu na ngolo yeni mu ku va kuasa.

Muanetu William ua pua mukuluntu mu miaka i tuvakana 20, ntsimbu yose ue ku leka vakuluntu va vaha ngueni: “Lemenu vamuanetu. Puenu na ku tuala mana ku vize via tondeka kuli vakevo mpundu kati ku vipanga via mu cikungulukilo lika.” Kati mu pue ngue mukua ku endesa likalu ua tala lika ha ku heta ku vututikilo kati ku vantu va tonda ku londa.

2. Ua tuamekele vipanga via Yehova. Paulu ua handekele ngueni Timoteo ka lifuile na vaze vakua ku “lengeya viavo, kati evi via Yesu Kilistu.” (Filipu 2:21) Paulu ua muene ngecize vamo vamuanetu va kele na ku tuala cikuma mana ku miono yavo. Vintsimbu vimo va kele vene na ku tuameka vizango viavo ku lutue lua vipanga via Yehova. Vunoni Timoteo ka lingilemo! Mua uanene vukovelelo vua ku vueza ku vipanga vieni kuli Njambi, ua lingile ngeci mua Isaya ngueni: “Yange uno, nji tume ange.”​—Isaya 6:8.

Vati mu hasa ku puisamo viuma via tondeka mu muono uenu na vize via tondeka mu cikungulukilo? Ha katete, kavenu eci cimamuna ca Paulu: “Mu tantekeye viuma vize via hiana ku viuka” ni nguetu via hiana seho. (Filipu 1:10) Ca ku livanga, tuamekenu vipanga via Yehova. Ca mu civali, tinenu ku viuma vize vi hasa ku mi zeyesa cikuma na ku mi lia ntsimbu. Paulu ua lekele Timoteo ngueni: “Vunoni tina masungu a vukuendze, kaha kavangeya vuviuke, ku-tsiliela, cilemo, ciyulo.”​—2 Timoteo 2:22.

3. Ua fuitanganene mu vipanga via Yehova. Paulu ua handekele via Timoteo ngueni: “Ngue muana ue ku pangela ise, ngecize vene ikeye na pange nange mu ku  suenesa ku lutue zimpande zize zia cili.” (Filipu 2:22) Timoteo ka puile cilenda. Ua fuitanganene hamo na Paulu, kaha eci ca kaniamesele vusamba vuavo.

Mu lukungulukilo lua Yehova muli vipanga via vingi lelo lino. Vipanga viaco vie ku vuisa ndzolela ya vusunga kaha vi ka kaniamesa vusamba vuenu na vamuanetu. Ngeci mukemuo “lisalienu ntsimbu yose na vipanga via Muangana.”​—1 Kolintu 15:58.

4. Ua pangesele vize via kele na ku lilongesa. Paulu ua sonekelele Timoteo ngueni: “Ove ua kavele luhande luange, vilinga viange, cizango cange, ku-tsiliela cange, ntsintsa yange ya ngozi, cilemo cange, lukakatela luange.” (2 Timoteo 3:10) Mua vusunga, Timoteo ua kele na ku pangesa vize via lilongesele ngeci ua tambuile naua viteli vikuavo.​—1 Kolintu 4:17.

Nga citava hangulenu umo mukuluntu ua ku hia na ku mu puisa citambuluiso cenu. Muanetu Tom ua kele miaka ya yingi ha vukuluntu, ngueni, ku nima umo mukuluntu ua ku hia ua putukile ku likata neni kaha ua mu longesele viuma via vingi. Tom ua handekele ngueni: “Ku-sua kumo, nja kele na ku mu vundila vimamuna na ku vi kava. Ku lingamo, ca nji kuasele ku pua muntu ua ku simpa.”

5. Ua tualeleleho ku hotola vutongue vueni. Paulu ua mamuine Timoteo ngueni: “Likolese ove ivene mu ku lemesa Njambi.” (1 Timoteo 4:7) Vakua ku asa mbola ni vueho vukuavo, vutuhu va kala na mukua ku va longesa, kasi navo vavene ve ku lilongesela kua lika liavo. Paulu ua mamuine Timoteo ngueni: “Zangama na ku tanda, na ku mamuna, na ku longesa. . . . Takamesa mu viuma evi; lihake na vutuntu vuose ku vikevio; linga ku-suena cove ci soloke kuli vose.”​—1 Timoteo 4:13-15.

Nenu mua pande ku tualelelaho ku vueza ku vutongue vuenu. Kalenu na ntsintsa mu ku lilongesa Mbimbiliya na ku endela hamo lika na vimamuna via viha via mu lukungulukilo. Kati mu likulahele cikuma enu vavene. Ca pua vuhenge ku singanieka ngecize muahia cikuma, mu njila ya ku linga mu hasa ku pinda na nkala cisoti ca ku hona ku tondesesa mu mikanda yetu. Vunoni ngeci mua Timoteo Puenu na ku ‘litala vuino enu vavene, na ku-longesa cenu.’​—1 Timoteo 4:16.

6. Ua kulahelele mu sipilitu ya Yehova. Paulu mua kele na ku handeka via ku ambulula ca Timoteo, ua mu vuluisile ngueni: “Cuma cize ca ku viuka ci va ku kundikilile, niunga hali Sipilitu Santu uze a tumama muli etu.” (2 Timoteo 1:14) Timoteo ua pandele ku kulahela mu sipilitu ya Njambi.

Muanetu Donald ali ha vukuluntu miaka ya yingi ngueni: “Vamala va ku hangula va pande ku haka seho ya kama ku vusamba vuavo na Njambi. Vose vakua ku lingamo va ka ‘ya ku ngolo ku ngolo.’ Nga va vundila sipilitu ya Njambi na ku pangela ha mihako yayo, va ka pua civezikiso kuli vamuaneye.”​—Visamo 84:7; 1 Petulu 4:11.

Ce ku tu kaniamesa ku mona vakua ku kuasa vipanga na vakuluntu, ngeci muenu, vaze ve ku lihakela kapandi ka ku tualelelaho ku kola mu vipanga viavo kuli Yehova. Jason u tu na tumbuile laza, ngueni: “Mu miaka i nji li ha vukuluntu, nja lilongesa via vingi, kaha nja pua honi muntu ua ku simpa. Lelo lino nja lema citeli cange kaha kuli yange citeli caco ca pua civezikiso!”

Nenu mu tualelelaho ku kola mu lutsilielo ni? Nga mu tambuluisa lungano lua Timoteo, nenu mu ka pua civezikiso kuli vamuanoko.