Vakuendze na Vahumbe—Pangelenu “Vuovoke Vuenu”
“Ngue mu na tamunuka ntsimbu yose, . . . pangenu ku vuovoke vuenu na vuoma na ku zaza.”—FILIPU 2:12.
1. Omo lia vika mbatizimu ya pua cinanga ca seho? (Talenu cikupulo ca ku vuputukilo.)
MUAKA ku muaka ve ku mbatiza vihita via makulukazi a vandongisi va Mbimbiliya. Cingi cavo va pua vakuendze na vahumbe, na tunkavala na vanike. Vamo halumo va kolela mu vusunga. Nove ua pua umo uavo ni? Nga mukemuo, tu ku sangala. Mukua Kilistu ua tondeka ku mu mbatiza linga a kovoke na ku ka yoya miaka yose.—Mateo 28:19, 20; 1 Petulu 3:21.
2. Omo lia vika ka ua pandele ku ivua vuoma vua ku lihana kuli Yehova?
2 Mu va ku mbatizile, Yehova ua putukile ku ku vezikisa mu vinjila via vingi via viha. Vunoni mbatizimu ya ku nehelele naua viteli vieka. Mu njila ika? Ha litangua li va ku mbatizile, muanetu ua hanene cimpande ca mbatizimu ua hulile ngueni: “Ku hitila mu cikombelo ca Yesu Kilistu, mu na aluluka ku vipi vienu na ku lihana kuli Yehova mu ku panga cizango ceni ni?” Ua kumbuluile nguove eyo. Ua kulahesele nguove u ka lema Yehova na ku mu tuameka ku lutue lua viose vi u linga mu muono.
Vuno ua pande ku liveya mu ku linga eci cikulaheso ca seho ya kama ni? Na limo litangua liahi! Ka u ka liveya omo lia ku tuameka Yehova mu muono. Vaze ka va tantekeya Yehova va pua mutamba ua mavu a Satana. Kaha Satana ka va hakele seho cipue ku haka yove seho na limo litangua liahi. Mua vusunga, a ka viukilila cikuma nga u zimbalesa lulavelelo luove lua ku yoya miaka yose omo lia ku hangula mutamba ueni na ku viana Yehova.3. Vivezikiso vika ua tambula kuli Yehova omo lia ku lihana kuli Ikeye?
3 Aci singanieke ha vivezikiso vi ua tambula kuli Yehova omo lia ku lihana kuli ikeye na ku ku mbatiza. Mu ku linga ua hana muono uove kuli Yehova, u hasa ku handeka na vusunga vuose nguove: “Yehova a li hamo nange, ka nji kevua vuoma: Muntu a hasa ku nji linga vika?” (Visamo 118:6) Ka kuesi ku vezika ca hiana ku kala ku mutamba ua Njambi na ku tantekeya ngecize Ikeye ua ku lema.
CIHANGULA CA NA PANDE KU LINGA MUNTU KU MUNTU
4, 5. (a) Vika tu hasa ku handekela nguetu ku lihana kuli Yehova ca pua kapandi ka muntu ku muntu? (b) Visoti vika ve ku lihita navio Vakua Kilistu va vitso viose?
4 Ka ua pandele ku mona vusamba vuove na Yehova ngue ndzivo i va tunga laza visemi, kaha ove cove ku kalamo lika. Vutuhu ua kala mu ndzivo na visemi, nove ua pande ku likuata vusamba vua lika liove na Yehova muomu ca pua kapandi ka muntu ku muntu. Omo lia vika ca puila ca seho ku vuluka evi? Muomu na umo uahi a tantekeya mpundu vieseko vika via mu lutsilielo a ka hita navio ku lutue. Ca ku muenako, halumo va ku mbatizile tele u ci li u kanike. Vunoni mu ntsimbu ino u na kolo honi, visinganieka na visoti viove vi na aluluka. Umo muana mpuevo ua handekele ngueni: “Cingi ca vanike ka ve ku ivua matoto a ku pua Vakaleho va Yehova omo lia ku honoua ku linga cilika ca ku semuka cavo. Vunoni omo a putuka ku kola na ku putuka ku ivua masungu, a ka tondeka ku kala na vusunga vua ku sula ngandza ngecize ku ononoka masiko a Yehova kasi cikeco ca pua cihangula ca cili.”
5 Vakuendze na vahumbe kati vakevo lika ve ku hita mu vitanga via viha. Cipue vaze va ve ku mbatiza mu vukuluntu navo ve ku hita mu vieseko ka va lavelele. Halumo va hasa ku hita mu vieseko via mu vulo, cihindu, ni ku vipanga. Cipue tu vanike ni vakuluntu, tu vose tu ka hita mu vieseko via ku liseza-seza omo lia ku pangela Yehova.—Tiango 1:12-14.
6. (a) Vika ca lomboloka ku tava viose omo muntu a lihana kuli Yehova? (b) Vika u hasa ku lilongesa ku Filipu 4:11-13?
6 Linga u tualeleleho ku kakatela kuli Yehova, ntsimbu yose ua pande ku vuluka ngecize mu ua lihanene kuli Yehova ka ua hanguile ku lingako vimo vikuavo co kuahi, houe, ua tavele viose. Eci ca lomboloka ngecize ua kulahesele Mukua ku Hiana viose nguove u ka mu pangela ambe nga ku soloke vimo, viose-ovio vi soloka vi soloke ngano, cipue vene nga vavusamba ni visemi vove va likela ku mu pangela. (Visamo 27:10) Mu visoti viose vi u hita, kati u suve ku vundila vukuasi vua Yehova linga u puisemo cikulaheso cove.—Tandenu Filipu 4:11-13.
7. Vika ca lomboloka ku pangela vuovoke vuove “na vuoma na ku zaza”?
7 Yehova a tonda u pue kavusamba keni. Vunoni ku kaniamesa ovu vusamba vuaco na ku pangela vuovoke vuove ivene ca tondeka ku lihakela kapandi ka kama. Muomu Filipu 2:12 ya vuezako nguayo: “Pangenu ku vuovoke vuenu na vuoma na ku zaza.” Ngeci mukemuo tua pande ku singanieka vuino vati tu hasa ku tualelelaho ku likuata vusamba na Yehova na ku kakatela kuli ikeye ambe ku ize visoti via kama. Ka tua pandele lika ku singanieka nguetu via viasi ku vi puisamo. Vuluka ngecize ku li vamo, vutuhu va pangelele Yehova miaka ya yingi, va likela. Viuma vika vi hasa ku ku kuasa ku pangela vuovoke vuove ivene?
KU LILONGESA MBIMBILIYA CA PUA CA SEHO
8. Ku lilongesa mu vulika ca ambatela kumo na vika? Seho ika ya kalaho?
8 Nga tu tonda ku pua vavusamba va Yehova, tua pande ku mu ivuilila na ku handeka neni. Njila imo ya ku ivuilila Yehova ya pua ku lilongesa Mbimbiliya. Ca ambatesela kumo na ku hilula Lizi lia Njambi na mikanda ye ku li lombolola. Vunoni ku lilongesa Mbimbiliya ka ca lengelele lika ha ku patekeya imo mizimbu ngue muze mu ue ku linga ku sikola, houe. Ca pua ngeci mua ku ya vungendzi vua ndzolela vuze vu ka ku lingisa ku tondesesa na ku ka uana viuma via vingi ku tuala hali Yehova. Uka hasa ku suena kuli Njambi, kaha na ikeye a ka suena kuli ove.—Tiango 4:8.
Lungahi ue ku handeka na Yehova? (Talenu vinanga 8-11)
9. Vikuata vika via ku kuasele mu ku lilongesa cove mu vulika?
9 Lukungulukilo lua Yehova lua tu hana vikuata via vingi vize vi hasa ku ku kuasa ku programa yove ya ku lilongesa. Ca ku muenako, u hasa ku uana vimamuma via cili ku Vutala vua Kaniungi No. 1 ya 2017 ha mafo 3-7. Evi vikuata vi ka ku kuasa ku pangesa viuma vi u lilongesa mu mizimbu i u tanda mu Mbimbiliya. Cikuavo naua, evi vi hasa ku ku kuasa ku kaniamesa lutsilielo luove na ku vi lomboluelako vakuenu. Ku lilongesa na ku hilula via pua via seho nga u tonda ku pangela ha ku ovoka cove.—Tandenu Visamo 119:105.
tuala ha ku lilongesa cove, mu cimpande “Os Jovens Perguntam . . . Como tornar a leitura da Bíblia agradável?” ca mu Despertai! ya Abril ya 2009 na muKU VUNDILA CA PUA CA SEHO
10. Omo lia vika Mukua Kilistu ua ku mbatiza ua tondeka ku vundila?
Nga u uma mutima omo lia vimo, “mbila citeli cove hali Yehova”
10 Omo tu tanda Mbimibliliya, tu li na ku ivuilila Yehova, kaha omo tu vundila, tu li na ku handeka neni. Ka tua pandele ku singanieka lika nguetu civundilo ca pua ngue kapandi ketu ka tangua na tangua ni ku ci puisa ngue ngombo ni cimpa ci ka tu vezikisa mu viuma via vingi. Ku vundila ca pua ku handeka mpundu na Sakatanga uetu. Singaniekaho vuino: Yehova ua lema ku ivua vi u tonda ku mu lekako! (Tandenu Filipu 4:6.) Ngeci mukemuo nga u uma mutima omo lia vimo, Mbimbiliya nguayo u hasa ku ‘mbila citeli cove kuli Yehova.’ (Visamo 55:22) Nga u hula vamuanetu vati eci cimamuna ca va kuasele, va ka ku lekamo. Nove vene ci ka ku kuasa!
11. Omo lia vika ua pande ku santsela Yehova ntsimbu yose?
11 Mua vusunga, ka tua pandele ku vundila lika nga tu tonda vukuasi vua Yehova. Mbimbiliya i tu vuluisa nguayo: “Santselenuko.” (Kolose 3:15) Vintsimbu vimo tue ku lisosomua cikumakuma ha visoti vietu na ku suva viuma via cili vi tua kala navio. Ngeci mukemuo seteka ku linga evi: Nkala litangua, singanieka ha viuma vitatu vi ua viukilila navio, kaha santsela Yehova omo lia viuma viaco. Umo muana mpuevo ua lizina Abigail, u va mbatizilile tele a ci li na miaka 12, ua handekele ngueni: “Mu ku mona cange, Yehova ikeye muntu u tua pande ku muesa ku santsela cetu ku hiana nkala muntu mu mavu na mu melu ose. Tua pande ku mu santsela ha nkala ntsimbu i tu uana omo lia vuana vue ku tu hana.” Vintsimbu vimo Abigail ue ku lihula eci cihula ca vuile tangua limo: ‘Nga mu nji hinduka kaha Yehova a nji hana lika viuma vi nji na mu santsela mu litangua lia lelo, viuma vingahi mpundu nji ku kala navio?’ * (Talenu ha litota.)
SEHO YA VIZE VIA LIHITA NAVIO MUNTU MU MUONO
12, 13. Vika ua lihitile navio via muesa ngozi ya Yehova, kaha omo lia vika ca puila ca seho ku hilula ku tuala ha vati Yehova ue ku ku kuasa?
12 Yehova ua kuasele Muangana Ndaviti ku kolesa mu visoti via vingi via lihitile navio. Ngeci Ndaviti ua handekele na vusunga vuose ngueni: “Vuilenu [ni makelenu] na ku mona ngecize Yehova ua viuka: ua vezika uze a tinina kuli ikeye.” (Visamo 34:8) Eci cinimbu ca muesa ngecize yetu vavene tua pande ku limuena ngozi ya Yehova. Omo u tanda Mbimbiliya na mikanda yetu kaha na ku ya ku viuano vietu, u ka lilongesa vati Njambi ua kuasele vakuenu va pue va ku ononoka. Vunoni omo vusamba vuove na Yehova vu kaniama, limuene ove ivene vati Yehova a li na ku ku kuasa. Ua limuenaho laza ngecize Yehova mukua ngozi, ni?
Ntsimbu yose viukilila na cihela ca ku hana Yehova mu lukungulukilo lueni
13 Mukua Kilistu uose ua limueneneho laza vukuasi vua Yehova mu njila imo ni ikuavo. Ua tu lania tu vose tu suene mu hiehi neni na kuli Muaneni. Yesu ua ambele ngueni: “Na umo uahi a hasa ku iza kuli ange, ku vanga Tata uze ua nji tumine a mu koke.” (Yoano 6:44) Nove ua monaho laza ngecize Yehova ua ku kokela kuli ikeye ni? Ni ue ku singanieka nguove, ‘Yehova ua koka laza visemi vange kaha ange nji li lika na ku va kava’? Vuluka nguove ha litangua li ua lihanene kuli Yehova na ku ku mbatiza, yove mpundu ua putukile ku kala na vusamba neni vua ku lifuila. Mbimbiliya ya tu leka nguayo: “Vunoni umo nga a lema Njambi, ou neni na mu tantekekeya.” (1 Kolintu 8:3) Ntsimbu yose viukilila na cihela ca ku hana Yehova mu lukungulukilo lueni.
14, 15. Mu njila ika ku ambulula ci hasa ku kaniamesa lutsilielo luove?
14 Ua limuena naua ngozi ya Yehova mue ku ku kuasa linga u simpe omo u lekako vakuenu via muzimbu ua Mbimbiliya, mu ku ambuluila mu imbo ni ku sikola. Ci hasa ku pua ca cikalu ku ambuluila vaze va ue ku lilongesa navo ku sikola. Halumo u ka lisosomua nga va ka tava mpundu ni kuahi. Ci hasa ku ku vuisa vuoma ku handekela ku mbunga ku tuala ha viuma vi ua tsiliela. Vika vi hasa ku ku kuasa?
15 Aci singanieke ha vika via ku lingisa ku tava vize vi ua tsiliela. Nga vimamuna via mu jw.org ha mutamba “Adolescentes” ku via kala mu lilimi li ue ku handeka, linga cose u vi pangese. Vi hasa ku ku kuasa u ka singanieke ha viuma vi ua tsiliela, omo lia vika ua vi tsilielela, na vati u hasa ku vi lomboluelako vakuenu. Nga u tsiliela cili-cili na ku liviukisila mua cili, u ka tonda ku hana vukaleho vua Yehova.—Yelemiya 20:8, 9.
16. Vika vi hasa ku ku kuasa ku handeka via lutsilielo luove na ku simpa?
16 Ambe nga u na liviukisila mua cili, halumo kasi u kevua vuoma vua ku lombolola vi ua tsiliela. Umo ndumbuetu ua miaka 18, u va mbatizilile tele a li na miaka 13, ua handekele ngueni: “Vutuhu ange nja tantekeya vi nja tsiliela, vunoni vintsimbu vimo ce ku nji kaluuila ku vi lombolola.” Ngeci ue ku seteka ku handeka mu vundambo ca ku hona ntsoni. Ngueni: “Vakuetu ku sikola ve ku livua ku zituka mu ku handeka viose vi ve ku linga. Nange nja pande ku livua ngoco nga nji handeka via lutsilielo luange. Ngeci nje ku seteka lika ku vi tanga mu muzimbu, ngeci mua, ‘Tangua limo nja kele na ku longesa muntu via Mbimbiliya, kaha . . . ’ Mu nima yaco nje ku tualelelaho muzimbu. Vutuhu ka nje ku handeka mpundu vati viendele, vakuetu ve ku nji hula vati nje ku endesa vilongesa via Mbimbiliya. Ku tualelelaho ku pangesa aa mana ce ku nji asiuila. Kaha mu nima yaco nje ku ivua ndzolela ya kama!”
17. Viuma vika vikuavo vi ka ku kuasa ku simutuila na vakuenu?
17 Nga vakuenu va mona ngecize ua va haka seho na ku va singimika, ci ka va puila ca casi navo linga va ku singimike na ku singimika vi ua tsiliela. Ca ku muenako, umo muana mpuevo ua lizina Olivia, ua miaka 17 u va mbatizile mu vunike, ua handekele ngueni: “Ntsimbu yose nja kele na ku ivua vuoma nguange nga mu ku simutuila na vakuetu nji hakamo via Mbimbiliya, vakuetu va ka nji mona ngue nje ku lihalesa ngecize nja tantekeya cikuma via Njambi.” Vunoni ua putukile ku mona viuma mu cifua ceka. Mu cihela ca ku tuala mana cikuma ku vuoma vueni, ue ku handeka honi ngueni: “Cingi ca vakuendze na vahumbe ka va tantekeya Vakaleho va Yehova. Yetu tu va ku livanga va ve ku mona. Ngeci mukemuo vilinga vietu vikevio vi ka va lingisa nga va ka haka seho ku vusunga ni cahi. Vati co nga tu ivua vuoma ni ntsoni ya ku handeka? Kaha vakuetu va ka singanieka nguavo ka tua zangele vulombelo vuetu. Halumo va hasa vene ku tu kumbulula mua ku pihia muomu ka tuesi na ku muesa ngecize tua kulahela mu vize vi tu li na ku va longesa. Vunoni nga tu handeka mu vundambo ca ku hona vuoma ngue mu tue ku handeka viuma via tangua na tangua, citava vakuetu va ka tu singimika.”
TUALELENUHO KU PANGELA KU OVOKA CENU VAVENE
18. Vika ua pande ku linga mangana u pangele vuovoke vuove ivene?
18 Tua mono ngecize ca pua citeli cintsa ka ve ku ci hehesa ku pangela ku vuovoke vuove ivene. Linga u hase ku lingamo, ua pande ku tanda Lizi lia Njambi na ku lilongesalio, ku vundila kuli Yehova, na ku hilula vinjila vie ku ku kuaselamo. Ku lingamo ci ka ku kuasa ku kala na vusunga ngecize Yehova ikeye mpundu Kavusamba kove. Cikeco ci ka ku lingisa ku lekako vakuenu viuma vi ua tsiliela.—Tandenu Visamo 73:28.
19. Seho ika ya kala ha ku pangela ku ovoka cove ivene?
19 Yesu ua ambele ngueni: ‘Nga umosi na zange ku nji kava ange, a liviane ivene, a lituike citi ceni, kaha a nji kave.’ (Mateo 16:24) Mua vusunga, Mukua Kilistu linga a kave Yesu, na pande ku lihana ikeye ivene kuli Yehova na ku mu mbatiza. Vunoni ovu vua pua lika vuputukilo vua muono ua cili vuovuno, kaha ci hasa ku tu tuala ku ku ka uana muono ua ya ye mu mavu a aha a Njambi. Ngeci mukemuo, lihakele kapandi ka ku pangela ku ovoka cove ivene!
^ cin. 11 Nga mu tonda vimamuna vikuavo, kovelenu mu jw.org ha mutamba “Os Jovens Perguntam—Por quê devo orar?” na ku linga vipanga vi mu ka uana mu mapapelo aco.