1. Ku-kula puisamo viuma vika via cili kuli yetu?

CIKOMBELO ca ku-kula ca Yesu ca lingisa vivezikiso via vingi ku lipuisamo. Ca ku muenako, cikombelo ca sokoluela mbelo ku vose vana va Andama va lema vuviuke va ka pue va ku vusoko vua Njambi ku lutue. Civezikiso cikuavo ca pua ku lavelela ku ka yoya miaka yose mu ndzolela. Vunoni ku vueza kuli evi viose, ku-kula ca kuata ku vimpande via seho ya kama ku vose va kala muilu na ha mavu.—VaHevelu. 1:8, 9.

2. (a) Yesu ua tumbuile viuma vika via hiana seho muilu na ha mavu mu civundilo ceni? (Talenu cikupulo ca ku vuputukilo.) (b) Vika tu ka lilongesa mu cimpande cino?

² Omo kua lisupile miaka ivali linga Yesu va mu tsihe, ua longesele vandongesi ku vundila ngecize: ‘Tatetu u li muilu va lelese lizina liove. Vuangana vuove vu ize. Cizango cove va ci linge, ngue muilu, ngecize ha mavu.’ (Mateo 6:9, 10) Tu ci hilulenu vati ku-kula ca kuata ku ku lelesa lizina lia Yehova, ku  sika ca Vuangana vua Njambi, na ku puisamo cizango ca Njambi.

3. Lizina lia Yehova liemanena vika? Vati Satana ua pihisile lizina lia Yehova?

³ Yesu ha katete ua vundilile lizina lia Yehova va lilelese, ni nguetu va li mone ku pua lia ku lela. Lizina lia Yehova liemanena ikeye mpundu. Ikeye lika ua hiana ndzili kaha naua ua pua Mukua vuviuke muilu na ha mavu hose. Yesu ua mu sanene ngueni “Tata Ua ku Lela.” (Yoano 17:11) Mu ku linga Yehova ua lela, viose vie ku linga na masiko ose e ku tumbika a ku lela. Vunoni mu citungu ca Endene, Satana mu lizangamena ua payele mpoko ya Njambi ya ku sika. Ua handekele makuli ku tuala hali Yehova na ku pihisa lizina lia Njambi.—Njenisisi 3:1-5.

4. Vati Yesu ua muesele lizina lia Njambi ku pua lia ku lela?

⁴ Yesu, ua lemene cikuma lizina lia Yehova kaha ua lingile cose mu ku lilelesa. (Yoano 17:25, 26) Mu njila ika? Ku hitila mu yoyesi yeni na vilongesa vieni, Yesu ua kuasele vantu va tantekeye ngecize vitume via Yehova via pua via ku sungama kaha viose vie ku tu tuma tu vi pange vie ku tu kuasa mpundu. (Tandenu Visamo 40:8-10.) Cipue omo Satana ua mu yandesele na ku mu tsiha, Yesu kasi uononokele Yehova. Ua muesele ngecize citava muntu ua ku tantuluka ononoke Yehova mu viose.

5. Vati tu hasa ku muesa lizina lia Yehova ku pua lia ku lela?

⁵ Vati tu hasa ku muesa nguetu tua lema lizina lia Yehova? Mu yoyesi yetu na vilinga vietu. Yehova ua tonda tu pue va ku lela. (Tandenu 1 Petulu 1:15, 16.) Eci ca lombolola ngecize tua pande ku lemesa lika ikeye na ku mu ononoka na mutima uose. Cipue nga va tu luisa, tue ku lihakela kapandi ka ku yoya mua ya vilongesa via Yehova. Mu ku yoya mua ya vitume via Yehova, tue ku hana vumpahu ku lizina lieni. (Mateo 5:14-16) Tu ka muesa ngecize masiko a Yehova a pua a cili, kaha Satana mukua makuli. Mu ku linga ka tua tantulukile, tu ka pua na ku sevuka. Vunoni nga tua sevuka, tua pande ku linga cose tu seze viuma vi hasa ku sahuisa lizina lia Yehova.—Visamo 79:9.

6. Omo lia vika tu hasa ku pua vakua vuviuke kuli Yehova, vutuhu ka tua tantulukile?

⁶ Yehova ue ku tu ecela ku vivulumuna vietu nga tua tsiliela mu cikombelo, cipue nga tu va ku vuavesa ni “vampanga veka.” Vaze ve ku lihana kuli ikeye vakevo ve ku tava Njambi ku pua vangamba veni. Ue ku mona Vakua Kilistu va ku vuavesa ngue vana veni kaha “vampanga veka” va vuviuke ku pua vavusamba veni. (Yoano 10:16; Loma 5:1, 2; Tiango 2:21-25) Ngeci mukemuo, cipue ntsimbu ino, ku-kula ca asiuisa viuma linga tu hase ku kala na vusamba vua cili na Tatetu na ku lelesa lizina lieni.

7. Vivezikiso vika vi ka lipuisamo omo lia ku-kula?

⁷ Mu civundilo ca longesele Yesu ua handekele ngueni: “Vuangana vuove vu ize.” Vati nkombelo ya kuata ku Vuangana vua Njambi? Vuangana vua Njambi ni nguvulu yeni, va i imanena kuli Yesu na va ku pua 144.000 va va hangula ha mavu. Ku-kula ca sokolola njila linga vantu vaco va ka sangukile muilu. (Ku-Solola 5:9, 10; 14:1) Va ka pua vamiangana na vasasendote kaha va ka sika hamo na Yesu mu likulukazi lia miaka. Ku ntsimbu yaco, Yehova a ka pangesa Vuangana  vuaco mu ku alulula ano mavu ku pua citungu na ku kuasa vantu va pue va ku tantuluka. Vangamba va Yehova muilu na ha mavu va ka pua vana va Njambi. (Ku-Solola 5:13; 20:6) Yesu a ka nongesa na ku manusula tuyando tuose tua neha Satana.—Njenisisi 3:15.

8. (a) Vati Yesu ua kuasele vandongesi ku ivuisisa seho ya Vuangana vua Njambi? (b) Vati tue ku kuatesa Vuangana matangua ano?

⁸ Yesu ua kuasele vandongesi veni ku ivuisisa seho ya Vuangana vua Njambi. Mu njila ika? Yesu mu nima ya mbatizimu yeni, ua putukile “ku ambulula muzimbu ua cili ua Vuangana vua Njambi” kuose kua ile. (Luka 4:43) Ua tumine naua vandongesi veni va pue vakaleho veni “na ku mutamba uze ha lenga mavu.” (Vilinga 1:6-8) Matangua ano, ku hitila mu cipanga ca ku ambulula Vuangana, vantu va li na ku uana vukovelelo vua ku lilongesa via ci nkombelo na ku lihanguila ku va sika ku Vuangana vua Njambi. Tu ka muesa ngecize tu vakua vusunga ku Vuangana vuaco mu ku kuasa va ku vuavesa mu ku ambulula muzimbu ua cili mu mavu ose.—Mateo 24:14; 25:40.

9. Omo lia vika tua pande ku kala na vusunga nguetu Yehova a ka puisamo vutumbe vueni ku vantu?

⁹ Vika a lomboloka mezi a handekele Yesu ngueni: “Cizango cove va ci linge”? Nga Yehova a handeka ngueni vimo vi ka lingika, ci ka lipuisamo vene. (Isaya 55:11) Lisino lia Satana ka lie ku hasele ku tangula Yehova. Cizango ca Yehova ku tuala ha mavu ca puile cika? Ua tondele linga mavu a sule na vana va ku tantuluka va Andama na Eva. (Njenisisi 1:28) Nga Andama na Eva va tsile ca ku hona ku kala na vana, vutumbe vua Njambi vua ku sulisa mavu na vana vavo nga ka vua lipuisilemo. Ngeci Yehova ua va tavesele va kale na vana. Ku-kula ce ku hana vukovelelo vua ku pua va ku tantuluka na ku yoya miaka yose ku vose ve ku tsilela. Yehova ua lema vantu kaha a tonda linga tu ka uane muono ua cili ngue mu ca puile cizango ceni kuli etu.

10. Vati ku-kula ci ka vezikisa vantu va tsa laza?

¹⁰ Amba co makulukazi na makulukazi a vantu va tsa laza ca ku hona ku tantekeya Yehova? Yehova ua tonda vantu va yoye. Ngeci tangua a ka sangula vatsi. Omo lia ku-kula va ka hasa naua ku sanguka na ku yoya. Kaha va ka va hana ntsimbu ya ku lilongesa via Yehova na ku yoya miaka yose. (Vilinga 24:15) Yehova ikeye Ndundzi ya muono. Nga Yehova a hana muono ku vatsi, a ka pua Iseavo. (Visamo 36:9) Mu civundilo ca longesele Yesu, ua handekele ngueni Yehova ua pua ‘Tatetu ua muilu.’ (Mateo 6:9) Yehova ua hana Yesu mutamba ua seho ya kama mu ku sangula vatsi. Yesu ua handekele ngueni: “Yange nji cisangukilo na muono.”—Yoano 6:40, 44; 11:25.

11. Vutumbe vuka Njambi ua kala navuo ku vakua “civunga ca kama”?

¹¹ Yesu ua handekele naua ngueni: “Uose a ka linga cizango ca Njambi, ikeye vene muanetu ua yala nou ua mpuevo, na nana.” (Mako 3:35) Njambi ua tonda ngueni vantu va ka tunda ku vifuti na miyati na malimi ose va ka pua mutamba ua vana veni. Va va tumbula ku pua “civunga ca kama, na umo uahi ua hasa ku va tanda.” Va tsiliela mu ci nkombelo kaha va tonda ku ononoka Njambi. Vali na ku mu lemesa mu ku handeka nguavo: “Vuovole vu li kuli Njambi yetu,  uze na tumama mu citumamo ca vuangana na kuli Muana mpanga.”—Ku-Solola 7:9, 10.

12. Vika tu lilongesa mu civundilo Yesu ku tuala ha vutumbe vua Yehova ku vantu?

¹² Tua lilongesa via vingi ku tuala hali Yehova na vutumbe vueni ha vantu mu civundilo ca longese Yesu. Ca ku livanga, tua pande ku linga cose tu lelese lizina lia Yehova na ku mu hana vumpahu. (Isaya 8:13) Cikombelo ca Yesu ca ku tu kula, ca tu sokoluela njila ya vuovoke, kaha ca hana lizina lia Njambi vumpahu. Mua vusunga, lizina lia Yesu nalio lia lomboloka “Yehova ikeye Muovole.” Ca mu civali, Yehova a ka pangesa Vuangana vueni vu ka neha vivezikiso via ku ku-kula ku vantu vose va ku ononoka. Kaha ca mu citatu, tu li na vusunga nguetu na vimo viahi vi hasa ku tangula Yehova ku puisamo vutumbe vueni.—Visamo 135:6; Isaya 46:9, 10.

13. Omo lia vika ve ku tu mbatiza?

¹³ Cifua ca seho ya kama ci tu hasa ku muesa nguetu tua tava cilanio caco mu tue ku lihana kuli Yehova na ku tu mbatiza. Mu cifua eci, tue ku muesa mpundu ngecize tua kala na lutsilielo mu cikombelo kaha “tu na pu va Muangana [Yehova].” (Loma 14:8) Mu ve ku tu mbatiza, tue ku vundila Yehova a tu hane “mutima ua ku tantuluka.” (1 Petulu 3:21) Kaha Yehova ue ku tu kumbulula ku hitila mu civezikiso ca cikombelo. Tuli na vusunga vua mutuntu nguetu a ka tu hana viose via tu kulahesa.—Loma 8:32.

14. Omo lia vika Yehova ua tu tuma ku lema vakuetu?

¹⁴ Viose vie ku linga Yehova, ue ku linga omo lia cilemo. Kaha ua tonda vangamba veni va mu tambuluise. (1 Yoano 4:8-11) Nga tu lema vantu, tu ka muesa ha toma ngecize tu tonda ku pua ‘ngue Tatetu ua muilu’. (Mateo 5:43-48) Masiko avali a seho ya kama a pua lia katete, ku lema Yehova, kaha lia mu civali ku lema vakuetu. (Mateo 22:37-40) Njila imo i tu hasa ku muesa ngecize tua lema vantu ya pua ku va longesa muzimbu ua cili ua Vuangana vua Njambi. Nga tu ononoka lisiko lia Yehova lia ku lema vakuetu, cikuma-kuma vamuanetu, cilemo cetu kuli ikeye ci ka “tantuluka.”—1 Yoano 4:12, 20.

15. (a) Vivezikiso vika tue ku tambula kuli Yehova ntsimbu ino? (b) Vivezikiso vika tu ka tambula ku lutue?

¹⁵ Yehova ua tu kulahesa ngueni nga tu muesa lutsilielo mu cikombelo, vupi vuetu va hasa ‘ku vu zimangana.’ A hasa ku suva vivulumuna vietu viose. (Tandenu Vilinga 3:19-21.) Ngue mu tua lilongesele ha katete, ku-kula ca asiuisa viuma linga Yehova a hangule vamo vantu va ka pue vana veni muilu. Ava vaco va pua va ku vuavesa. (Loma 8:15-17) Kaha ua lania vaze va kua civunga ca “vampanga veka” va pue mutamba ua vana veni va ha mavu. Omo vantu vose va ka heta ku vu tantuluke, ku ka kala ceseko ca ku manuisila. Nga va ka tualelelaho ku ononoka Yehova va ka pua vana veni. (Loma 8:20, 21; Ku-Solola 20:7-9) Yehova a ka lema vana veni vose ku miaka yose. Ku-kula ci ka neha vivezikiso via vingi miaka yose. (VaHevelu 9:12) Yehova na tu hana vuana vueni vua hiana seho, kaha uahi a hasa ku tu tambulavuo.

16. Vati cikombelo ca tu kuasa ku patuka?

¹⁶ Nga tu aluluka na ku seza vupi, Satana ka hasa ku linga na vimo viahi a tu tangule ku ka pua kovela ku kovela ku vusoko vua Yehova. Yesu ua tsile “lumo lika ha ku manusula zintsimbu.” Cikombelo va ci fueta lumo ca miaka yose. (VaHevelu 9:24-26) Andama ua tu nehela ku-tsa, vunoni cikombelo ca Yesu ca tu nehela muono ka ue ku hua. Cikombelo ci hasa ku tu patula ku mavu ano a Satana na ku vuoma vua ku-tsa.—VaHevelu 2:14, 15.

17. Cilemo ca Yehova ca lomboloka vika kuli yenu?

¹⁷ Vikulaheso via Njambi viose vi ka lipuisamo. Yehova ka ka aluluka na limo litangua liahi ngeci mua masiko a tumbika mu viuma via tanga kali ka aluluka. Ka ka tu payesa na limo litangua liahi. (Malakiya 3:6) Yehova a ka tu hana naua viuma vikuavo via vingi ku vueza ku vuana vua muono. Ue ku tu muesa cilemo ceni. “Kaha tua tuantekeya na ku tsiliela cilemo cize Njambi a li naco kuli etu.” (1 Yoano 4:16) Vikulaheso vieni vie ku lipuisamo ntsimbu yose. Vuovuno ano mavu a ka pua citungu. Vose va ka yoyelamo va ka tambuluisa Yehova na ku lilema umo na mukuavo. Kaha vangamba veni vose muilu na ha mavu va ka handeka nguavo: “Ku sangaziala, na vumpahu, na mangana, na ku santsela, na kasingimiko, na ngolo, na vukama, vi kale kuli Njambi yetu ku miaka na miaka ya ya-ye. Ame.”—Ku-Solola 7:12.