Nga ca puile vusunga, singaniekenu vati ue ku fuile muono uetu. Ca ku muenako, umo muanetu ua vuile vusiua vua kama mua lisukikile muneni. Ci tava muanetu ua lihuile nga Yehova ua muene laza via ku lutue na ku mona ngecize ikeye na mpueyeni tangua va ka kolesa mu ceseko caco. Cingi cetu tue ku mona vieseko mu mavu ano. Vuno tua pande ku tsiliela nguetu Yehova ue ku endesa viose vie ku soloka mu muono uetu ni?

Nga tu hilula vuino ha 1 Kolintu 10:13, tu ka mona ngecize Mbimbiliya ka ya muesele ngecize Yehova ue ku muena vua lumo vieseko vi tu hasa ku kolesa na ku hanguila vieseko vi tu ka hita. Vika tu handekela ngoco? Tu talenu vusunga vu uana.

Ca katete, Yehova ua hana vantu vuana vua ku lihanguila, ku linga vi va tonda. Ikeye ua tonda tu pue na ku lihanguila viuma. (Ndeutelonomi 30:19, 20; Yehosua 24:15) Nga tu hangula ku linga viuma vi ya Yehova ku mutima, tu hasa ku tsiliela muli ikeye a tu tuamenene. (Visimo 16:9) Vunoni nga tu hangula viuma via ku pihia, kaha tu ka pinda na vize vi kezamo. (Ngalata 6:7) Kaha nga Yehova ue ku tu hanguila vieseko, vuno tu ka pangesa vuana vuetu vua ku lihanguila ni?

Ca mu civali, Yehova ke ku tu niunga ku ‘viuma vie ku lisolokela ngoco.’ (Ekelesiaste 9:11) Muntu a hasa ku hita mu mponde ya kama omo lia ku kala ku cihela ca ku pihia mu ntsimbu ya ku pihia. Yesu ua handekele via mponde ya tsihile vantu va ku pua 18 omo imo ndzivo ya laha ya va lundumukilile. Yesu ua muesele ngecize Njambi kati ikeye ua nehele ize mponde yaco. (Luka 13:1-5) Ka ca puile vusunga ku singanieka nguetu Njambi ue ku hangula iya a tsa ni ku ovoka ntsimbu kanda mponde i soloke.

Ca mu citatu, muntu ue ku hakuila vuoloke vueni kuli Yehova. Satana ngueni vangamba va Yehova ve ku mu pangela omo lia viuma vie ku va hana. Ua handekele naua ngueni ka tu ka tualelelaho ku pua vakua vusunga kuli Yehova nga tu hita mu vieseko. (Yombi 1:9-11; 2:4; Ku-Solola 12:10) Nga Yehova a tu ohiela ku vieseko vimo ci hasa ku muesa ngue Satana ua handekele via cili.

Ca mu ciuana, Yehova ke ku hangula ku tantekeya viose vi ka soloka ku lutue. Mua vusunga Yehova a hasa ku tantekeya vika vi ka soloka ku lutue nga a tonda. (Isaya 46:10) Vunoni Mbimbiliya ya muesa ngecize Njambi ke ku hangula ku tantekeya vua lumo viose vi ka soloka ku lutue. (Njenisisi 18:20, 21; 22:12) Yehova mukua cilemo na vuoloke, kaha ke ku lihaka mu vimpande vietu vi tua pande ku lihanguila etu vavene.—Ndeutelonomi 32:4; 2 Kolintu 3:17.

Vika honi ua lombuelele Paulu mua handekele ngueni Yehova “ka tava ngecize va mi esieke nevi via hiana ngolo yenu.”? Paulu ua kele na ku lombolola vie ku linga Yehova nga muntu a li mu vieseko, kati mu nima ya vieseko. * (Talenu mezi a ku ntsongo.) Nga tu tsiliela Yehova, a ka tu kuasa mu nkala vieseko vi tu hita mu muono. (Visamo 55:22) Tu hilulenu honi ha vusunga vukuavo vua muesa omo lia vika Paulu ua handekele aa mezi.

Vusunga vua ku livanga vua pua muomu tue ku hita mu ceseko “cize muntu a ci hasa.” Ntsimbu tu ci yoyela mu mavu ano a Satana, tu vose tu ka hita mu visoti via kama hamo na vimponde. Vunoni nga tu tsiliela muli Yehova, tu hasa ku kolesa mu  vieseko na ku tualelaho ku pua vakua vusunga. (1 Petulu 5:8, 9) Ha katete ku 1 Kolintu kapitulu 10, Paulu ua sonekele vimo via vieseko vi va hitile vaIsaleli mu vindinda. (1 Kolintu 10:6-11) Vaze va tsilielele muli Yehova va hasele ku kolesa mu vieseko. Vunoni vamo vaIsaleli va sahuile Yehova. Ka va puile vakua vusunga kuli ikeye muomu ka va mu tsilielele.

Vusunga vua mu civali vua pua muomu “Njambi mukua vusunga.” Vika a lomboloka aa mezi? Nga tu tala ha cifua ce ku niungilamo Yehova vangamba veni tunde ku laza, tu ka mona ngecize kasi ue ku muesa ngozi ku “vaze va mu lema na ku niunga masiko eni.” (Ndeutelonomi 7:9) Tu lilongesa ngecize Yehova a ka tualelelaho ku puisamo via likuminia. (Yehosua 23:14) Tu hasa ku kala na vusunga (1) Yehova ka ka tavesa nkala ceseko ku pua ca cikalu cikuma linga kati tu hase ku kolesa (2) Ikeye a ka tu kuasa mua ku “tuhukila” mu vieseko.

Vati Yehova ue ku solola mua ku “tuhukila” kuli vaze va mu tsiliela? Mua vusunga a hasa ku fumisa ceseko caco. Vunoni vulukenu, Paulu ua handekele ngueni Yehova a ka “a lingilako naua aha ha mu ka tuhukila, linga mu ka hase ku kolesa.” Ngeci, Yehova ue ku lingako mua ku tuhukila mu ku tu kaniamesa linga tu hase ku pua vakua vusunga. Tu ci talenu ha vinjila vimo vie ku lingilamo.

• Yehova ue ku “tu lembezieka ku lamba yetu yose.” (2 Kolintu 1:3, 4) A hasa ku simpisa mitima yetu na visinganieka ku hitila mu Mbimbiliya, sipilitu santu na mukua manda ua cili.—Mateo 24:45; Yoano 14:16; Loma 15:4.

• Yehova a hasa ku pangesa sipilitu santu yeni i tu tuamene. (Yoano 14:26) Sipilitu santu i hasa ku tu kuasa ku vuluka mizimbu ya mu Mbimbiliya na vitume viaco linga tu hase ku hangula viuma via cili.

• Yehova a hasa ku pangesa tungelo veni va tu kuase.—VaHevelu 1:14.

• Yehova a hasa ku pangesa vamuanetu va tu kuase. Va hasa ku tu kaniamesa mu mezi na vilinga.—Kolose 4:11.

Vika tua lilongesa ku mezi a kapostolo Paulu ku 1 Kolintu 10:13? Yehova ke ku tu hanguila vieseko vi tua pande ku hita. Vunoni tu hasa ku kala na vusunga nguetu nga tu tsiliela muli Yehova, tu hasa ku kolesa mu nkala ceseko. Tuli na vusunga vuaco muomu Yehova a ka tu hana vutuhukilo linga tu hase ku kolesa na ku pua vakua vusunga kuli ikeye.