1, 2. (a) Haka va litepela Vakaleho va Yehova na vakua malombelo? (b) Vika tu ka lilongesa mu cimpande cino?

VANTU vamo va lema ku hula Vakaleho va Yehova nguavo, “Iya ntuamena yenu?” Ve ku tonda ku tantekeya muomu malombelo ose a kala na ntuamena uao halumo ua yala ni mpuevo. Vunoni, tua vezika ku tantekeya ngecize ntuamena yetu ka puile muntu ua ku hona ku tantuluka. Muomu, ntuamena yetu Yesu Kilistu! Ue ku ononoka Ise Ntuamena ua kama, Yehova.—Mateo 23:10.

² Kua kala naua civunga ca vamala, va va sana “mukuamanda ua cili mukua mana,” ve ku tuamenena vangamba va Njambi ha mavu matangua ano. (Mateo 24:45) Vuno vati tua tantekeya mpundu ngecize Yehova ali na ku tuamenena ku hitila muli Muneni? Tu ka tantekeya vusunga vutatu vu hasa ku tu lingisa ku kala na vusunga vuaco. Kaha vutuhu Yehova ua pangesele vamo vantu mu ku tuamenena vantu veni, tu ka limuena ngecize Yehova mpundu ikeye ua puile Ntumena ya vantu veni.—Isaya 58:11.

3. Vika via kuasele Mosesa ku tuamenena vaIsaleli?

³ Sipilitu santu yendesele vaze vemanene Njambi. Njambi  ua hanguile Mosesa ku pua ntuamena ua VaIsaleli. Vika via mu kuasele ku puisamo cipanga ceni? Yehova ua hele Mosesa “sipilitu santu yeni.” (Tandenu Isaya 63:11-14.) Mua vusunga Yehova ua kele na ku tuamena vantu veni, muomu sipilitu santu yeni ya kuasele Mosesa.

4. Vusunga vuka vua muesele ngecize Mosesa ua kele na sipilitu ya Njambi? (Talenu cikupulo ca ku vuputukilo.)

⁴ Vuno vantu va hasele ku mona ngecize Mosesa ua kele na sipilitu ya Njambi ni? Eyo! Muomu sipilitu santu ya Yehova ya mu kuasele ku linga vikomoueso na ku lingisa lizina lia Njambi va litantekeye kuli Falao, muangana ua ngolo ku Ingito. (Ezundu 7:1-3) Sipilitu santu ya kuasele naua Mosesa ku pua ntumena ua cilemo na lukakatela. Ua lisezele cikuma na va ntuamena va vifuti vikuavo va puile vikenia! (Ezundu 5:2, 6-9) Mua vusunga, Yehova ikeye ua hanguile Mosesa linga a pue ntuamena ya vantu veni.

5. Kuli veya naua Yehova ua hele sipilitu santu yeni mu ku tuamenena vantu veni?

⁵ Kuli veya naua vakuavo Yehova ua hele sipilitu santu linga va tuamenene vantu veni? Mbimbiliya nguayo: “Yehosua muana Nune ua sulile na cimbembesi ca mangana.” (Ndeutelonomi 34:9) “Sipilitu ya Yehova uezile hali Ngilione.” (Vangazi 6:34) Kaha “sipilitu ua Yehova uezile na zindzili hali Ndaviti.” (1 Samuele 16:13) Ava vamala vaco vose va tsilielele mu vukuasi vua sipilitu ya Njambi ya va lingisile viuma ka va hasele ku linga ku ndzili yavo. (Yehosua 11:16, 17; Vangazi 7:7, 22; 1 Samuele 17:37, 50) Mua vusunga, Yehova ikeye ua va hele ngolo ya ku linga viuma via ku komouesa, ngeci ikeye ua fuilile ku tambula ku sangaziala.

6. Omo lia vika Njambi ua tondele vantu veni va singimike vantuamena vaIsaleli?

⁶ Vika va pandele ku linga vaIsaleli mu va muene ngecize sipilitu santu ya Njambi ya hele ngolo Mosesa, Yehosua, Ngilione, na Ndaviti? Va pandele ku vononoka. Omo vantu va liniengele hali Mosesa, Yehova ua handekele ngueni: “Haliho vantu ava va ka nji yengula?” (Numelu 14:2, 11) Mua vusunga, Yehova ua hanguile vaze vamala linga va tuamenene vantu Veni. Omo vantu va va singimikile, va kele na ku kava mpundu Yehova a pue Ntuamena yavo.

7. Vati tungelo va kuasele Mosesa?

⁷ Tungelo va kuasele vaze miluua va Njambi. (Tandenu VaHevelu 1:7, 14.) Njambi ua pangesele mu ku kuasa Mosesa. Ha katete, kangelo “ua mu solokelele mu ciputa” ca tuhia na ku mu hana cipanga ca ku ka patula vaIsaleli na ku va tuamenena. (Vilinga 7:35) Ca mu civali, Njambi ua pangesele tungelo mu ku hana Mosesa masiko a pandele ku longesa vaIsaleli. (Ngalata 3:19) Ca mu citatu, Yehova ua mu lekele ngueni:  “Vuovuno hamoye, tuamena vantu ku muhela uze u nji na ku tumbuila: tala, kangelo kange a ka ya ku lutue luove.” (Ezundu 32:34) Mbimbiliya ka ya muesele ngecize vaIsaleli va muene kangelo a panga viuma. Vunoni, cifua ca kele na ku longeselamo Mosesa vantu na ku va tuamena ca muesele ngecize kangelo ua mu kuasele.

8. Vati tungelo va kuasele Yehosua na Hezekiya?

⁸ Iya naua mukuavo ua tambuile vukuasi vua tungelo? Mbimbiliya nguayo “muata uze ua civunga ca Yehova,” umo kangelo, ua kuasele Yehosua ku vula ndzita na vakua Kanana. (Yehosua 5:13-15; 6:2, 21) Kaha, omo Muangana Hezekiya ua puile ntuamena ua vantu va Njambi, kuezile civunga ca kama ca masualale vakua Asilia va tondele ku nongesa Yelusalema. Ngeci mu vutsiki vumo, “Kangelo ua Yehova ua tuhukile na ku veta mu cilombo ca vaAsilia 185. 000.”—2 Vamiangana 19:35.

9. Vutuhu miluua va Njambi ka va tantulukile, vika vaIsaleli pandele ku linga?

⁹ Tungelo va pua va ku tantuluka. Vunoni vamala va va kuasele ka va puile va ku tantuluka. Ca ku muenako, Mosesa ka hanene Yehova vumpahu ntsimbu imo. (Numelu 20:12) Yehosua kehuile Njambi a mu leke via pandele ku linga omo vakua Ngiveone va tondele ku linga litavasiano neni. (Yehosua 9:14, 15) Hezekiya neni ntsimbu imo ua lihalesele. (2 Mizimbu 32:25, 26) Vutuhu ava vamala tele ka va tantulukile, kasi vaIsaleli va pandele ku ononoka ku tuamenena cavo. VaIsaleli va kele na ku limuena ngecize Yehova ua kele na ku pangesa tungelo mu ku kuasa vaze vamala vaco. Mua vusunga Yehova vene ua kele na ku tuamenena vantu veni.

10. Vati Masiko a Njambi a tuamenene Mosesa?

¹⁰ Lizi lia Njambi lia tuamenene miluua veni. Mbimbiliya ye ku tumbula Masiko a va tambuile vaIsaleli nguayo “Mezi a lisiko a Mosesa.” (1 Vamiangana 2:3) Vunoni ye ku muesa naua ngecize Yehova ikeye ua hele Masiko aco. Kaha na Mosesa neni ua pandele ku ononoka. (2 Mizimbu 34:14) Ca ku muenako, omo Yehova ua lekele Mosesa vati na pande ku tunga tavenakulu, “Mukemuo mua lingile Mosesa: ngue ku viose Yehova ua mu sikile, mua lingile.”—Ezundu 40:1-16.

11, 12. (a) Viuma vika va pandele ku linga Yehosua na vamiangana va kele na ku tuamenena vantu va Njambi? (b) Vati Lizi lia Njambi lia tuamenene vantuamena?

¹¹ Yehosua ua kele na Lizi lia Njambi mua puile ntumena, kaha Yehova ua mu lekele ngueni: “Uka u yongola mutana na vutsiki linga u zangame ku linga ngue ku viose vi va na sonekamo.” (Yehosua 1:8) Vamiangana va sikile vantu va Njambi ku ntsimbu ize, navo va pandele ku tanda Mezi a lisiko matangua ose, na ku soneka kopia yauo, na ku niunga “mezi ose a lisiko eli na vitume evi, mu ku vi linga.”—Tandenu Ndeutelonomi 17:18-20.

¹² Vati Lizi lia Njambi lia tuamenene vamala va puile vantuamena? Aci singaniekenu ha lungano lua Muangana Yosiya. Omo va uanene mezi a Lisiko a Mosesa, mukua ku soneka ua mu tandeleleo. * (Talenu mezi a ku intsi.) “Omo Muangana nevu mezi a mukanda ua lisiko, ua tavuile vizalo vieni.” Kaha Lizi lia Njambi lia lingisile Yosiya ku  nongesa tumponia tuose tua kele mu cifuti na ku ku kungulula vantu ku Pasovala ya hiana viose via keleko. (2 Vamiangana 22:11; 23:1-23) Mu ku linga Yosiya na vakuavo vantuamena va vuoloke vononokele Lizi lia Njambi, va kele na cizango ca ku alulula vitume vi va hele ku vantu va Njambi. Kaha ku sungumesa caco ca kuasele vantu va Njambi ku mu ononoka.

13. Vati va litepele vantuamena va vantu va Njambi na vantuamena vakua vifuti?

¹³ Vantuamena vakua vifuti vieka va kele na ku lituamena ku mana avo lika. Ca ku muenako, vakua Kanana vantuamena vavo va kele na ku linga vupi vua kama cikuma, vua ambatelele kumo na ku liambata mu vusoko, ku limona ku mivila na vakua vilio vimo ni na tusitu, ku kombeleya vanike, na ku lemesa tumponia. (Levitiku 18:6, 21-25) Na vakua Mbambilone hamo na vakua Ingito vose vantuamena vavo ka va kele na masiko a ku lilelesa ngue a va kele nao vantu va Njambi. (Numelu 19:13) Cikuavo naua, vantu va Njambi va kele na ku limuena vati vantuamena vavo va vuoloke va va kaniamesele, linga va pue va ku lela mu ku lemesa cavo, ku muvila na ku viana mazilo ku via masungu a ku pihia. Mua vusunga Yehova ua tuamenene vantu veni.

14. Omo lia vika Yehova ua hele kasitiku ku vamo va puile vantuamena va vantu veni?

¹⁴ Cipue vantuamena va Njambi va vuoloke ka vononokele vitume vieni ntsimbu yose. Vamo vantuamena ka vononokele Njambi kaha va vianene ku tuamenena ca sipilitu santu ya Njambi, ca tungelo, hamo na Lizi lieni. Ngeci vintsimbu vimo, Yehova ua va hele kasitiku ni ku hingisa vantuamena veka. (1 Samuele 13:13, 14) Mu ku hita ca ntsimbu, Yehova ua hanguile umo ntuamena ua ku tantuluka.

15. (a) Vati vapolofeto va muesele ngecize tangua ku ka soloka ntuamena ua ku tantuluka? (b) Iya ntuamena ua ku tantuluka?

¹⁵ Mu vihita via miaka, Yehova ua kulahesele ngueni tangua a ka hangula ntuamena ua ku tantuluka a kendesa vantu veni. Ca ku muenako, Mosesa ua lekele vaIsaleli ngueni: “Yehova Njambi yove a ka ku katuila umo ua ha kati kove, ua kuli vana va noko, ua ku lifua nange, kuli ikeye muka halakana.” (Ndeutelonomi 18:15) Isaya ua handekele ngueni Ou uaco a ka pua “Mukua ku tuamenenena na mukua ku sika vantu.” (Isaya 55:4) Kaha Ndaniele ua sonekele via Mesiya uze a ka pua “muata.” (Ndaniele 9:25) Mu ku sulumuina, Yesu Kilistu ikeye ua litumbuile ngueni “mukua ku tuamena” vantu va Njambi. (Tandenu Mateo 23:10.) Vandongesi va Yesu va mu kavele ku cizango, kaha va tsilielele ngecize Yehova ikeye ua mu hanguile. (Yoano 6:68, 69) Vika via va hele vusunga ngecize Yesu Kilistu ikeye ya pangesa Yehova mu ku tuamenena vantu veni?

16. Vusunga vuka vu muesa ngecize Yesu ua tambuile ngolo ya sipilitu santu?

¹⁶ Sipilitu santu ya hele Yesu ngolo.  Omo Yesu va mu mbatizile Yoano ‘ua muene lilu lia tavukile, kaha sipilitu ya sulukile hali ikeye ngue livembe.’ Kaha mu nima yaco, ‘sipilitu ya mu tualele ku mpambo.’ (Mako 1:10-12) Yesu mua kele na ku ambulula ha mavu, sipilitu santu ya Njambi ya mu hele ngolo ya ku longesa na ku linga vikomoueso. (Vilinga 10:38) Cikuavo naua, sipilitu santu ya kuasele Yesu ku muesa vifua ngeci mua cilemo, ndzolela, na lutsilielo lua ku kaniama. (Yoano 15:9; VaHevelu 12:2) Ka kua kele naua ntuamena mukuavo ua lisoluele ku kala na sipilitu santu ku hiana Yesu. Mua vusunga, Yehova ua hanguile Yesu ku pua Ntuamena.

17. Vika va lingile tungelo mu ku kuasa Yesu?

¹⁷ Tungelo va kuasele Yesu. Yesu mua tundile ha ku mu mbatiza, “tungelo vezile na ku mu pangela.” (Mateo 4:11) Mu kua lisupile vi ola via vindende linga va mu tsihe, “kangelo ua muilu ua mu sololokelele, ua mu kolesele.” (Luka 22:43) Yesu ua tantekeyele ngecize Yehova a ka tuma tungelo va ku mu kuase hose oho ha ca tondelele vukuasi.—Mateo 26:53.

18, 19. Vati Lizi lia Njambi lia tuamenene Yesu mu muono ueni na mu vilongesa?

¹⁸ Lizi lia Njambi lia tuamenene Yesu. Yesu ua tavesele visoneka ku mu tuamenena, tunde mua putukile ku ambulula noho mu va ka mu sukikile ha citi. Cipue ha ku tsa ceni, ua tumbuile vumo vupolofeto vua handeka via Mesiya. (Mateo 4:4; 27:46; Luka 23:46) Vunoni vantuamena va malombelo va ku ntsimbu ize ka va lifuile na Yesu cipue kavundende. Va kele na ku hakela ku mukulo Lizi lia Njambi nga ka li litombola na vilongesa viavo. Yesu ua tsindikile mu Lizi lia Njambi mua handekele viavo ngueni: “Vantu ava va nji lemesa na milungu yavo; Vunoni mitima yavo ili ku laako nange. Va li na  ku nji lemesa ngoco, Ve ku longesa zimpande zia vizila via vantu.” (Mateo 15:7-9) Yehova ka tavele ku hangula vamala va sahuile Lizi lieni linga va tuamenene vantu veni.

¹⁹ Yesu ua pangesele naua Lizi lia Njambi mua longesele vantu. Omo vakuluntu va malombelo va mu esekele, ka va kumbuluile ku mana eni ni ku vize via tantekeya mu muono houe. Vunoni, ua longesele vantu vize via kele mu Visoneka. (Mateo 22:33-40) Cikuavo naua, Yesu nga ua komouesele vantu na mizimbu ya yingi ku tuala ha muono ueni tele a cili muilu ni ku tuala ha viuma via ku tanga. Vunoni mu ku linga ua lemene Lizi lia Njambi, ua kele na ntuima ya ku lekako vakuavo, kaha “ua sokoluele mana avo, linga va hase ku tantekeya visoneka.”—Luka 24:32, 45.

20. (a) Vati Yesu ua hele vumpahu kuli Yehova? (b) Ku litepa cika ca kele hali Yesu na Helonde Angilipa I?

²⁰ Vutuhu vaze va kele na ku halakana Yesu va komokele ku handeka ceni, kasi ikeye ua hele vumpahu kuli Mulongisi ueni Yehova. (Luka 4:22) Omo yala ua mpite ua tondele ku halesa Yesu mu ku mu sana ngueni “Mulongisi ua ku viuka,” Yesu ua likehesele na ku handeka ngueni: “Vikandzo ua nji tumbuila nji ua viuka? Na umo uahi ua viuka ku vanga umo lika Njambi.” (Mako 10:17, 18) Kaha mu nima ya miaka itanu na itatu, Helonde Angilipa I ua puile ntuamena mu Yundeya. Ka puile ua ku likehesa ngeci mua Yesu! Tangua limo kua kele ciuano ca ku lifuila, Helonde ua zalele vuzalo vua ndando ya kama vua vamiangana. Omo vantu va mu muene na ku mu ivua, va tambekele nguavo: “Lizi likelio lia njambi umo, kati lia muntu.” Mu ku linga Helonde ua lemene vumpahu “ka hele vumpahu kuli Njambi: kaha tulume va mu lile, kaha uecelele cimbembesi” ua tsile. (Vilinga 12:21-23) Mua vusunga Yehova ka hanguile Helonde ku pua ntuamena. Vunoni, Yesu ua lisoluele ngecize Njambi ikeye ua mu hanguile, kaha ua hele vumpahu kuli Yehova ntsimbu yose muomu ikeye Ntuamena ua Kama ua vantu Veni.

21. Vika tu ka lilongesa mu cimpande ci na hatako?

²¹ Yehova ua tondele Yesu a pue ntuamena vunoni kati mu miaka ya indende lika. Mu nima ya ku sanguka ceni, Yesu ua sikile vandongesi veni ngueni: “Ngolo yose ya muilu na hano ha mavu, va na nji hieyo.” Ua vuezeleko naua ngueni: “Kaha talenu, yange nji li nenu matangua ose, na ha ku-kotoka ca miaka.” (Mateo 28:18-20) Vunoni vati Yesu a hasa ku tuamenena vantu va Njambi ha mavu oku ali muilu? Iya Yehova ue ku hanguile linga a pue muluua ua Yesu ha mavu? Kaha vati Vakua Kilistu ve ku hasele ku nongonona miluua va Njambi? Tu ka tantekeya vikumbululo mu cilongesa ci na hatako.