VANTU va tonda ku yoya mu ndzolela. Vunoni tu li ku matangua a ku kotokela, kaha tu vose tue ku hita mu visoti via “ku kaluua.” (2 Timoteo 3:1) Vamo ve ku uila mu vusiua omo lia ku va yandesa, ku vavala, ku va tundisa ha vipanga, ni omo lia ku tsisa. Vamo co ve ku ivua vusiua omo lia visoti vieka vie ku va solokela. Cipue vangamba va Yehova navo va hasa ku zeya na ku zimbalesa ndzolela yavo. Nga visoti ngeci muevi via mi solokela, vati mu hasa ku hiluisa naua ndzolela yenu?

Linga tu kumbulule eci cihula, ha katete tua pande ku ivuisisa vika mpundu via pua ndzolela kaha vati vamo vantu ve ku hasa ku ivua ndzolela ambe nga va hita mu visoti. Kaha mu nima yaco, tu lilongesa vati tu hasa ku niunga ndzolela yetu na ku i vueza.

Ku kala na ndzolela ca litepa na ku zola-zola ngoco. Ca ku muenako: Muntu nga na penda a hasa ku zola cikuma. Vunoni nga na penduluka, kaha a vuluka visoti vieni, ke ku zola naua. Ku zola ceni ci na puile ca ntsimbu ya indende lika ngeci mukemuo ka ca puile ndzolela ya vusunga.—Visimo 14:13.

Vunoni, ndzolela ya vusunga ya pua ku viukilila ci tue ku ivua nga tua tambula ni ku lavelela viuma via cili. Ku pua mukua ndzolela ca lomboloka ku viukilila ntsimbu yose, cipue mu ntsimbu ya cili ni ya ipi. (1 Tesalonika 1:6) Mua vusunga, tu hasa ku luvala ni ku niengua omo lia vimo visoti vunoni kasi tu li na ndzolela. Ca ku muenako, vapostolo va va tinguile omo lia ku ambulula muzimbu ua Yesu. Vutuhu ngoco, “vakevo va fumine ku meso a vakua mpunga, na ku zolela muomu va na viukile ku yanda na ku sahuka omo lizina” lieni. (Vilinga 5:41) Ka vevuile ndzolela omo lia ku va tingula houe, vunoni muomu va hasele ku tualelelaho ku ononoka Njambi.

Ndzolela ka ve ku semuka nayo kaha naua ka ye ku li izila ivene. Omo lia vika? Muomu ndzolela ya vusunga ya pua mutamba ua mihako ya sipilitu santu ya Njambi. Ngeci mukemuo, sipilitu ya Njambi ikeyo ye ku tu kuasa ku zala ‘vuntu vua vuha’ vua ambatesela kumo na ndzolela. (Efeso 4:24; Ngalata 5:22) Kaha nga tu kala na ndzolela, ci ka tu asiuila ku lua na visoti.

Yehova ua tondele ngecize ha mavu ha kale viuma via cili, kati viuma via ku pihia vi tue ku mona lelo lino. Vutuhu vantu ve ku linga via vipi, Yehova ke ku zimbalesa ndzolela yeni. Mbimbiliya nguayo: “Ngolo na ndzolela vi li ku muhela ueni.” (1 Mizimbu 16:27) Cikuavo naua, viuma via cili vi ve ku linga vangamba veni vie ku mu vuisa ndzolela.—Visimo 27:11.

Tu hasa ku tambuluisa Yehova, mu ku linga cose linga kati tu zimbalese ndzolela yetu ambe nga viuma ka viendele ngue mu tu na tondele. Kaha ka tua pandele ku lisosomua, vunoni tua pande ku tuala mana ku viuma via cili vi tu li navio vuovuno na ku lavelela na lukakatela viuma via cili cikuma vi tua lavelela ku lutue. *—Talenu ha litota.

 Mu Mbimbiliya mua kala malungano a cili a vantu ka va zimbalesele ndzolela yavo vutuhu va hitile mu visoti via vingi. Avilahama ka zimbalesele ndzolela omo muono ueni ua kele mu vusonde nomo vakuavo va mu kokelele vitanga. (Njenisisi 12:10-20; 14:8-16; 16:4, 5; 20:1-18; 21:8, 9) Vati ua hasele ku lingamo? Mu ku singanieka ha lulavelelo lua ku yoyela mu mavu a aha mu vu ka sika Vuangana vua Mesiya. (Njenisisi 22:15-18; VaHevelu 11:10) Yesu uambele ngueni: “Avilahama kukuenu ua viukililile mu ku mona litangua liange.” (Yoano 8:56) Tu hasa ku tambuluisa Avilahama mu ku tualelelaho ku hilula ha ndzolela i tu ka kala nayo ku lutue.—Loma 8:21.

Paulu na Silase navo va puile vakua lutsilielo lua ku kaniama kaha ka va zimbalesele ndzolela yavo vutuhu va hitile mu lamba. Ca ku muenako, tangua limo, mu nima ya ku va tingula na ku va mbila mu kamenga, “va kele na ku vundila na ku imba miaso kuli Njambi.” (Vilinga 16:23-25) Va hasele ku kolesa mu tuyando tuavo muomu va tualeleleho ku singanieka ha vikulaheso via Njambi via ku lutue. Kaha ku tantekeya ngecize va va yandesele omo lia ku pua vakua ku kava Kilistu naco ca va hele ndzolela. Tu hasa naua ku tambuluisa Paulu na Silase mu ku vuluka vie ku izamo nga tu pangela Njambi na ku mu ononoka.—Filipu 1:12-14.

Na lelo lino, tuli na malungano a cili a vamuanetu na vandumbuetu ka ve ku zimbalesa ndzolela yavo ambe nga va hita mu visoti. Ca ku muenako, mu Novembro ya 2013, lindunduma lia puzuile vindzivo via Vakaleho va Yehova va tuvakana 1.000 ku cifuti ca Filipinas. Muanetu George, ndzivo yeni ya puzukile yose mu mbonge ya Tacloban. Kaha ua handekele ngueni: “Vutuhu tua hitile mu vukalu vua kama cikuma, vunoni vamuanetu va kele mu ndzolela. Ka njesi na mezi a ku lombolola ndzolela i tu li na ku ivua.” Netu nga tu hilula ha viuma via na tu lingila Yehova na ku tualelelaho ku mu santsela, ka tu ka zimbalesa ndzolela yetu ambe nga tu hita mu visoti via kama. Viuma vikuavo vika ue ku tu lingila Yehova vie ku tu vuisa ndzolela?

Cuma ca kama ce ku tu vuisa ndzolela ca pua vusamba vuetu na Yehova. Tua tantekeya Muangana ua Mavu ose. Ua pua Tatetu, Njambi, na Kavusamba ketu!—Visamo 71:17, 18.

Kaha tue ku santsela cikuma Yehova mu ku tu hana muono na vuhasi vua ku yoya na ndzolela. (Ekelesiaste 3:12, 13) Mu ku linga ua tu lania tuize kuli ikeye, tu hasa ku ivuisisa via tonda kuli yetu na ku tantekeya vi tua pande ku linga mu muono. (Kolose 1:9, 10) Vunoni, cingi ca vantu ka va tantekeya vutumbe vua muono. Mu ku muesa ku litepa ca kalaho, Paulu ua ambele ngueni: “Viuma liso kanda li vi mona, na lituitui kanda li vi ivua, nevi kanda vi kovela ku mutima ua muntu, viuma viose vene Njambi ua vi viukisilile vaze va mu lema. Vunoni yetu Njambi na tu sololuelavio hali sipilitu ueni.” (1 Kolintu 2:9, 10) Mua vusunga, ku ivuisisa via tonda Yehova na vutumbe vueni ce ku tu hana ndzolela.

Yehova ua tu lingila naua vikuavo via vingi. Ua sokolola njila linga va tu ecele ku vipi vietu. (1 Yoano 2:12) Ua tu hana naua lulavelelo lua ku ka yoyela mu mavu a aha, a li ha hiehi. (Loma 12:12) Cipue mu ntsimbu ino vene, Yehova ua tu hana vavusamba va vengi va tue ku lemesa navo. (Visamo 133:1) Kaha naua ue ku tu niunga omo lia Satana na vandemone. (Visamo 91:11) Nga tu tualelelaho ku hilula evi viuma via cili via na tu hana Yehova, ndzolela yetu i ka livuezelela.—Filipu 4:4.

Citava Mukua Kilistu uze a li laza na ndzolela, a vueze naua ku ndzolela yeni ni? Eyo. Yesu ngueni: “Evi vi nji na handeka nenu, linga ndzolela yange i kale muli enu, kaha linga ndzolela yenu i ka sule.” (Yoano 15:11) Aa mezi a muesa ngecize tu hasa ku vueza ku ndzolela yetu ntsimbu yose. Ndzolela ya fua ngue tuhia. Nga tu tonda tuhia va suame cikuma, tua pande ku va sambeya na vikuni. Na vuno vene, nga tu tonda ku vueza ku ndzolela yetu, tua pande ku vundila sipilitu ya Njambi  muomu ikeyo ye ku tu kuasa ku kala na ndzolela. Kaha tua pande naua ku tualelelaho ku hilula Mbimbiliya, muomu nayo va i huimina ku sipilitu santu.—Visamo 1:1, 2; Luka 11:13.

Cuma cikuavo ci ka vueza ku ndzolela yetu ca pua ku lihana mu ku linga viuma vie ku vuisa Yehova ndzolela. (Visamo 35:27; 112:1) Omo lia vika? Muomu Mbimbiliya nguayo va tu tangele na vutumbe vua ku vuila “Njambi vuoma, na ku niunga masiko eni; muomu eci cikeco kapandi kose ka muntu.” (Ekelesiaste 12:13) Mua vusunga va tu tangelele ku linga cizango ca Njambi. Ngeci mukemuo nga tu pangela Yehova, tu kevua ndzolela ya kama mu muono. *—Talenu ha litota.

Omo tu vuezela ku ndzolela yetu, tu ka tambula vivezikiso vikuavo. Ca ku livanga, Yehova a ka viukilila cikuma netu nga tu tualelelaho ku mu pangela na ndzolela ambe nga tu li na ku hita mu visoti. (Ndeutelonomi 16:15; 1 Tesalonika 5:16-18) Cikuavo naua, mu ku linga tua kala na ndzolela ya vusunga, ka tu ka singanieka ngecize ku kala na vupite cikeco ca seho ya kama mu muono uetu. Vunoni, tu ka lihakela kapandi ka ku pangesa nkala vikuata vietu cipue via kama, mu ku kuasa Vuangana vua Njambi. (Mateo 13:44) Omo tu mona viuma vie ku iza mu ku pangela Yehova na muono uetu uose, tu ka kala na ndzolela ya kama, tu ka livua mua cili cikuma, kaha tu ka vueza ku ndzolela ya vakuetu.—Vilinga 20:35; Filipu 1:3-5.

Cikuavo naua, nga tu vueza ku ndzolela yetu, citava cihindu cetu naco ci ka livuezelela. Muomu Mbimbiliya nguayo: “Mutima ua ku santsuka ukeuo cihemba ca ku viuka.” (Visimo 17:22) Umo mukua ku tondesesa ua lilongesele via cihindu ku Sikola ya kama ya ku Nebraska, ku Estados Unidos, ua handekele mezi a litombola neci cinimbu ca mu Mbimbiliya. Ngueni: “Nga muntu evua ndzolela na ku viukilila na vize via li navio ntsimbu ino, citava a ka kala na cihindu ca cili ku lutue.”

Ngeci mukemuo vutuhu tu li na ku yoyela mu ntsimbu ya ikalu, tu hasa ku kala na ndzolela ya vusunga omo tu tambula sipilitu ku hitila mu ku vundila, ku lilongesa, na ku hilula Lizi lia Njambi. Cikuavo naua ndzolela yetu i ka livuezelela nga tu hilula ha viuma via vingi via cili vie ku tu hana Yehova vuovuno, nga tu tambuluisa lutsilielo lua vakuetu, kaha na ku lihakela kapandi ka ku linga cizango ca Njambi. Kaha tu kevua ngue mu ya muesa Mbimbiliya ku Visamo 64:10, nguayo: “Mukua vuviuke a ka zolela muli Yehova, na ku tinina muli ikeye.”