1, 2. Vika ua nongonuene umo muanetu ku tuala hali ikeye ivene, kaha vika ua lingile?

ROBERT va mu mbatizile tele a ci li kankavala, vunoni ka hakele seho ku vusunga. Ua handekele ngueni: “Ka nja kele na ku linga na vimo viahi via ku pihia, vunoni vusunga ka vua puile cuma ca seho ya kama mu muono uange. Nja solokele ku vakuetu ngue nji ua ku kaniama mu lutsilielo, muomu nja kele na ku kunguluka kaha na ku linga vupioneiro vua ku kuasa vintsimbu vimo mu muaka. Vunoni kuli vimo via nji kambelele.”

² Robert ka tantekeyele mpundu vika via mu kambelele noho ua ambatele. Neni na mpueyeni va kele na ku linga vueho vua ku li linga vihula via Mbimbiliya. Mu ku linga mpueyeni ua tantekeyele vuino Mbimbiliya, ua kele na ku vi kumbulula vuasi. Vunoni Robert ka kele na ku hasa ku kumbulula vihula viose kaha ua vuile ntsoni. Ngeci ua handekele ngueni: “Ca puile vene ngue ka nji tantekeya na vimo viahi. Kaha nja singaniekele nguange, ‘Nga nji tonda ku pua mutue ua mpueyange mu lutsilielo, nja pande ku lingako mumo.’” Kaha mukemuo mua lingile. Ngueni: “Nja putukile ku lilongesa Mbimbiliya ku sua kumo, kaha kavundende-kavundende nja putukile ku hia. Muomu nja putukile honi ku ivuisisa viuma via  mu lutsilielo, kaha ca seho ya kama, nja kaniamesa vusamba vuange na Yehova.”

3. (a) Vika tu hasa ku lilongesa ku muzimbu ua Muanetu Robert? (b) Vintsina vika via seho tu lilongesa lelo?

³ Muzimbu ua Muanetu Robert u tu longesa viuma via seho. Muomu tu hasa ku tantekeya vimo vilongesa via mu Mbimbiliya kaha na ku kunguluka ntsimbu yose, vunoni eci ka ca lombolokele ngecize tua hia mu lutsilielo houe. Ni halumo tua lihakelele laza kapandi ka ku hia mu lutsilielo, vunoni nga tu lihilula vuino, tu mona ngecize kasi kuli hamo ha tua pande ku pangela. (Filipu 3:16) Mu cilongesa cino, tu ka kumbulula vihula vitatu via seho: (1) Vika vi ka tu kuasa ku tantekeya nga tue ku tuala mana ku via mu lutsilielo? (2) Vati tu hasa ku pua va ku kaniama mu lutsilielo? (3) Vati ku kaniama mu lutsilielo ci hasa ku tu kuasa mu muono uetu ua tangua na tangua?

4. Iya ca kuata cimamuna ca ku Efeso 4:23, 24?

⁴ Mu tua putukile ku pangela Njambi, tua aluluile viuma vize via kuata ku muono uetu uose. Kaha ku aluluka caco ka ca lengelele ha litangua li va tu mbatizile. Muomu Mbimbiliya nguayo: “Puenu vantu va vaha mu cimbembesi ca mitima yenu.” (Efeso 4:23, 24) Eci cimamuna ca tu kuata tu vose. Mu ku linga ka tua tantulukile, tua pande ku tualelelaho ku sungamesa cifua ca muono uetu. Ambe tu li na ku pangela Yehova miaka ya yingi, kasi tua pande ku kaniamesa vusamba vuetu neni.—Filipu 3:12, 13.

5. Vihula vika vi hasa ku tu kuasa ku tantekeya nga tu va ku hia mu lutsilielo?

⁵ Ambe nga tu vanike ni vakuluntu, tua pande ku lihilula etu vavene mu vusunga. Mu ku lihula nguetu: ‘Vuno nji li na ku hia mu lutsilielo ni? Nji li na ku tualelelaho ku tambuluisa Kilistu ni? Vilinga viange ku viuano na cifua ci nje ku muenamo viuano, via muesa vika ku tuala hali ange? Vihandeka viange vie ku solola vika ku tuala ha viuma vi nji tonda mpundu mu muono? Vuno cifua cange ca ku lilongesa Mbimbiliya, zalesi yange, kaha na cifua ci nje ku muesa nga va nji mamuna, vie ku solola vika ku tuala hali yange? Vati nje ku linga nga nji hita mu ceseko ca ku linga viuma via ku pihia? Vuno nja pua Mukua Kilistu ua ku hia mu lutsilielo ni?’ (Efeso 4:13) Evi vihula vi hasa ku tu kuasa ku tantekeya haka ci li na ku endela ku kola cetu ca mu lutsilielo.

6. Vika vi hasa ku tu kuasa ku tantekeya nga tu va ku hia mu lutsilielo?

⁶ Vintsimbu vimo tua tondeka vukuasi vua vakuetu linga va tu kuase ku mona nga tu va ku hia mu lutsilielo ni kuahi. Kapostolo Paulu ua lomboluele ngueni muntu mukua vusitu ke ku ivuisisa ngecize cifua ca muono ueni ka ce ku vuisa Njambi ndzolela. Vunoni muntu ua ku hia mu lutsilielo ue ku ivuisisa cifua ce ku muenamo Njambi viuma. A tantekeya ngecize ku yoya mu ku tuameka vizango via vusitu ka ce ku ya Yehova ku mutima. (1 Kolintu 2:14-16; 3:1-3) Vakuluntu mu ku linga va kala na visinganieka via Kilistu, ve ku mona vuasi nga muntu  na putuka ku muesa vilinga via vusitu, kaha ve ku lihakela kapandi ka ku mu kuasa. Ngeci mukemuo nga vakuluntu va seteka ku tu kuasa, tu puenu na ku tava vukuasi vuavo na ku sungamesa hose ha tondeka mu muono uetu! Nga tu lingamo, tu ka muesa ngecize tua tonda mpundu ku pua Mukua Kilistu ua ku hia mu lutsilielo.—Ekelesiaste 7:5, 9.

7. Vati tua tantekeya nguetu ku pua muntu ua ku hia mu lutsilielo ka ca puile lika ku tantekeya vi ya longesa Mbimbiliya?

⁷ Ku tantekeya lika Mbimbiliya ka ca puilemo mu ku tu kuasa ku pua muntu ua ku hia mu lutsilielo. Ca ku muenako, Muangana Solomone ua tantekeyele vuino Yehova, kaha amo mezi eni a mana a kala mu Mbimbiliya. Vutuhu ngoco mu ku hita ca ntsimbu, vusamba vueni na Yehova vua pihile. (1 Vamiangana 4:29, 30; 11:4-6) Etu co, ambe nga tu tantekeya vilongesa via mu Mbimbiliya, vika vikuavo tua pande ku vuezako? Tua pande naua ku tualelelaho ku kaniamesa lutsilielo luetu. (Kolose 2:6, 7) Vati tue ku lingamo?

8, 9. (a) Vika vi ka tu kuasa ku kolesa lutsilielo luetu? (b) Omo tu lilongesa na ku hilula, vutumbe vuetu vua pande ku pua vuka? (Talenu cikupulo ca ku vuputukilo.)

⁸ Ku sekulu ya ku livanga, Paulu ua kaniamesele Vakua Kilistu va pue na ku ‘suena ku ku-tantuluka,’ ni nguetu va tualeleleho ku hia mu lutsilielo. (VaHevelu 6:1) Vati netu tu hasa ku kava cimamuna caco lelo lino? Njila imo ya pua mu ku lilongesa livulu Kalenu mu Cilemo ca Njambi. Ku lingamo ci ka mi kuasa ku ivuisisa vati mua ku pangesela vitume via mu Mbimbiliya mu muono. Nga mua lilongesa laza livulu liaco, kasi ku li mavulu akuavo a mu hasa ku lilongesa mu kolese lutsilielo luenu. (Kolose 1:23) Tua pande naua ku hilula ha viuma vi tue ku lilongesa na ku vundila Yehova a tu kuase ku vi pangesa mu muono.

⁹ Nkala ntsimbu i tu lilongesa na ku hilula, vutumbe vuetu vua pande ku pua ku vueza ku cizango cetu ca ku ya Yehova ku mutima na ku mu ononoka. (Visamo 40:8; 119:97) Tua pande naua ku lilongesa ku viana viose-ovio vi hasa ku tu vindika ku kola mu lutsilielo.—Tito 2:11, 12.

10. Vika vakuendze na vahumbe va hasa ku linga mangana va pue va ku kaniama mu lutsilielo?

¹⁰ Nga ua pua u mukuendze ni muhumbe, vuno ua kala na vizango via mu lutsilielo ni?  Umo muanetu ua pangela ha Mbetele, vintsimbu via vingi ue ku simutuila na vakuendze na vahumbe va ve ku mbatiza ku viuano vietu, na ku va hula via vizango viavo via mu lutsilielo. Kaha ue ku mona ngecize cingi cavo va singanieka vuino ha vati va tonda ku pangela Yehova tunde ha litangua liaco. Vamo va linga matumbe a ku pua vakua ku ambulula va ntsimbu yose ni ku nungulukila ku vihela via tondeka vukuasi vua vakua ku ambulula. Vakuavo co ka ve ku hasa ku kumbulula cihula ceni. Vuno eci ca lomboloka ngecize vamuanetu vaco ve ku singanieka nguavo ka ci tondeka va kale na vizango via mu lutsilielo ni? Nga nove ua pua u mukuendze ni u muhumbe, lihule nguove: ‘Vuno nje ku ya mu ku kunguluka na mu ku ambulula muomu visemi vange va tonda nji lingemo ni? Ni nje ku lingilamo omo lia vusamba vu nja likuata ange ivene na Yehova?’ Mua vusunga, tu vose tua pande ku kala na vizango via mu lutsilielo, ambe nga tu vanike ni tu vakuluntu. Muomu vizango viaco vi ka tu puisa va ku kaniama mu lutsilielo.—Ekelesiaste 12:1, 13.

11. (a) Vika tua pande ku linga mangana tu pue va ku hia mu lutsilielo? (b) Lungano lueya tua pande ku tambuluisa?

¹¹ Mu nima ya ku mona nguetu tu li na hamo ha tondeka ku sungamesaho, tua pande ku putuka ku lingamo vene. Eci ca pua ca seho ya kama muomu cikeco ci ka lingisa tu ka uane muono ni tu ka nonge. (Loma 8:6-8) Yehova ke ku tu kakateya tu pue va ku tantuluka, ngeci ue ku tu hana sipilitu santu yeni mu ku tu kuasa. Vunoni netu vavene tua pande ku lingako mutamba uetu. Tangua limo, Muanenu John Barr, uze ua puile mukua Civunga ca  Vantuamena, ua handekele via tondeka mu ku niunga cimamuna ca ku Luka 13:24, ngueni: “Va vengi ve ku honoua ku kovela mu mbelo ya indende muomu ka ve ku lihakela kapandi ka ku pua va ku kaniama mu lutsilielo.” Tua pande ku tambuluisa Yakomba, uze ua luile na kangelo kaha ka honene noho ua tambuile civezikiso. (Njenisisi 32:26-28) Cili vene, ku lilongesa Mbimbiliya ce ku tovala, vunoni ka tua pandele ku lavelela Mbimbiliya i pue ngue livulu lia cilemo ni lia senga. Vunoni tua pande ku lilongesayo na ntsintsa yose linga tu uane vusunga vuze vu ka tu kuasa.

12, 13. (a) Vika vi tu kuasa ku niunga cimamuna ca ku Loma 15:5? (b) Vati lungano lua Petulu na cimamuna ca hele vi hasa ku tu kuasa? (c) Vika mu hasa ku linga mu kole na ku kaniama mu lutsilielo? (Talenu mu cikasa “ Vi mu Hasa ku Linga mu Kole mu Lutsilielo.”)

¹² Nga tu lihakela kapandi ka ku kola mu lutsilielo, sipilitu santu i ka tu kuasa ku alulula cifua ci tue ku singaniekelamo. Kaha kavundende-kavundende tu ka putuka ku singanieka ngeci mua Kilistu. (Loma 15:5) Sipilitu santu i hasa ku tu kuasa ku litundisa vilinga via vusitu na ku tu kuasa ku kala na vifua vie ku ya Njambi ku mutima. (Ngalata 5:16, 22, 23) Nga tu mona ngecize visinganieka vietu vi na tala cikuma ku vupite ni senga, kati tu likele ku lihakela kapandi. Tua pande ku tualelelaho ku vundila sipilitu santu ya Yehova i tu kuase ku tuala visinganieka vietu ku viuma via mu lutsilielo. (Luka 11:13) Vulukenu ngecize kapostolo Petulu neni ka kele na ku singanieka ntsimbu yose ngeci mua Kilistu. (Mateo 16:22, 23; Luka 22:34, 54-62; Ngalata 2:11-14) Vunoni ka likelele ku lihakela kapandi kaha Yehova ua mu kuasele. Kavundende-kavundende Petulu ua putukile ku singanieka ngeci mua Kilistu. Netu tu hasamo.

¹³ Mu nima ya ntsimbu, Petulu ua tumbuile vimo vifua vi hasa ku tu kuasa ku lingamo. (Tandenu 2 Petulu 1:5-8.) Tua pande ku lihakela kapandi ka ku pua va ku lipokuesa, vakua lukakatela, vakua cilemo ku vamuanetu na vifua vikuavo via cili. Nkala litangua tua pande ku lihula etu vavene nguetu, ‘Ha cifua cika ci nji kuasa ku pua ua ku kaniama mu lutsilielo nji tonda ku pangela lelo?’

14. Vati ku pua va ku hia mu lutsilielo ca pande ku kuata ku muono uetu?

¹⁴ Nga tu pua na ku singanieka ngeci mua Kilistu, cifua caco ci ka kuata ku vilinga vietu ambe nga tu li ku vipanga ni ku sikola, na ku handekesi yetu kaha na ku cifua ci tu ka lingilamo vihangula nkala litangua. Vihangula vietu vi ka muesa ngecize tue ku lihakela kapandi ka ku tambuluisa Kilistu. Mu ku linga tua tuameka via mu lutsilielo, ka tu tondo na vimo viahi vi pihise vusamba vuetu na Yehova. Nga tu hita mu ceseko ca ku linga vumo vupi, lutsilielo luetu lu ka tu kuasa ku viana ceseko caco. Ntsimbu kanda tu linge nkala cihangula, tu ci kemana na ku lihula nguetu: ‘Vitume vika via mu Mbimbiliya vi hasa ku nji kuasa? Nga Kilistu na kele mu cisoti caco, vati ne ku lingile? Cihangula cika ci ya Yehova ku mutima?’ Ku singanieka viuma mu cifua eci ca pande ku pua ciizilila kuli etu. Ngeci mukemuo tu ci simutuilenu ha vimo vihangula vi tu hasa ku lihita navio. Mu nkala cihangula, tu lilongesa citume cika ca mu Mbimbiliya ci hasa ku tu kuasa.

15, 16. Vati ku singanieka ngeci mua Kilistu ci hasa ku tu kuasa ku linga vihangula via cili ku tuala ha (a) ku hangula muntu ua ku liambata neni? (b) ku hangula vavusamba?

¹⁵ Ku hangula muntu ua ku liambata neni. Citume ca cihangula eci tu ci uana ku 2 Kolintu 6:14, 15. (Tandenu.) Paulu ua muesele ha toma ngecize vantu va ku hia mu lutsilielo ka ve ku mona viuma ngue mu ve ku vimona vakua vusitu. Vati citume ci li helu ci hasa ku mi  kuasa ku hangula muntu u mu ka ambata ni ku somboka?

¹⁶ Ku hangula vavusamba. Citume ca cihangula eci ci li ku 1 Kolintu 15:33. (Tandenu.) Muntu ua ku hia mu lutsilielo ke ku likuata vusamba na muntu uze a hasa ku zeyesa lutsilielo lueni. Singaniekenu ha vati mu hasa ku pangesa eci citume mu vinjila via ku liseza-seza. Ca ku muenako, vati ci hasa ku mi kuasa mu ku pangesa viprograma via ku simutuila navio mu internete? Vati ci hasa ku mi kuasa ku hangula nga citava mu linge vueho vua mu internete na vantu vantsa ka mu tantekeya?

17-19. Vati ku pua muntu ua ku hia mu lutsilielo ci hasa ku mi kuasa (a) ku litenga ku vipanga via ngoco? (b) ku kala na vizango via mu lutsilielo? (c) ku linga ciyulo?

¹⁷ Vipanga vize vi pihisa lutsilielo luetu. Ku mukanda ua vaHevelu 6:1, va sonekako cimamuna ca seho ya kama. (Tandenu.) Vuno “vipanga via ku-tsa” vi tua pande ku likela via pua vika? Via pua vipanga via ku hona seho vize ka vie ku tu kuasa ku kola mu lutsilielo. Eci cimamuna ca ku tina ku vipanga via ku-tsa ci hasa ku tu kuasa ku kumbulula vihula ngeci mua: ‘Vuno eci cipanga ca kala na seho ni ca ngoco? Nja pande ku lihaka mu mingoso eyi ni? Omo lia vika ka nja pandele ku likovelesa mu civunga ca vantu va tonda ku alulula visoti via ha mavu?’

¹⁸ Vizango via mu lutsilielo. Mu Cimpande ceni ca ha Muncinda, Yesu ua hele cimamuna ca cili ku tuala ha vizango. (Mateo 6:33) Muntu ua ku hia mu lutsilielo ue ku tuameka vipanga via Vuangana mu muono. Eci citume ci ka tu kuasa ku kumbulula vihula ngeci mua: ‘Nja pande ku tualelelaho ku ya ku sikola ya kama, ni nja pande ku lengela lika mu 12 ni 13? Vuno nja pande ku tava eci cipanga ni?’

¹⁹ Ku hona ku litavasiana. Cimamuna ca hele Paulu ku Vakua Kilistu mu Loma ci hasa ku tu kuasa nga ka tuesi na ku litavasiana na vakuetu. (Loma 12:18) Tua pua tu vakua ku tambuluisa Kilistu, ngeci tue ku lihakela kapandi ka ku ‘kala mu ciyulo na vantu vose.’ Vati tue ku linga nga ka tuesi na ku litavasiana na vakuetu? Vuno ce ku tu puila ca cikalu ku tava vinguli via vakuetu ni? Va tu tantekeya ku pua muntu ue ku lihakela kapandi ka ku linga ciyulo na vakuavo ni?—Tiango 3:18.

20. Omo lia vika mu tonda ku lihakela kapandi ka ku kola mu lutsilielo?

²⁰ Evi vimueso via muesa vati ku pangesa vitume via mu Mbimbiliya ci hasa ku tu kuasa ku linga vihangula vietu vi muesa ngecize sipilitu ya Njambi ikeyo ye ku tu tuamenena. Nga tu pua va ku hia mu lutsilielo, tu ka yoya mu ndzolela. Robert u tu na tambuile ku vuputukilo, ua handekele ngueni: “Mu nima ya ku likuata vusamba vua vusunga na Yehova, nja puile yala na cisemi ua cili. Nja kele na ciyulo na ndzolela.” Nga netu tu lihakela kapandi ka ku pua muntu ua ku hia mu lutsilielo, tu ka tambula vivezikiso via vingi. Tu ka kala na muono ua ndzolela lelo, na ku lavelela ‘muono ua vusunga’ ku lutue.—1 Timoteo 6:19.