Kapostolo Paulu ua tantekeyele ngecize mizimbu ya ku kokueya ca Satana ya kala na vusonde vua kama. Vunoni kati Vakua Kilistu vose va tantekeyele vusonde vuaco. Ci moneka ngecize vamo mu Kolintu va singaniekele nguavo va puile va ku kaniama cikuma mu lutsilielo, kaha Satana ka hasa ku vonga. (1 Kolintu 10:12) Ngeci Paulu ua hanene eci cimamuna: “Nji li na vuoma, nguange ngue omo linoka ua kokuele Eva na ku-zangama ceni, mpano visinganieka vienu vi ka mi hungumuna ku vuntavia [vusunga] na ku-lela vi li muli Kilistu.”​—2 Kolintu 11:3.

Aa mezi a Paulu a muesa seho ya ku tina ku likulahela cikuma etu vavene. Linga mu hase ku vula mizimbu ya ku kokueya ca Satana, mua pande ku tantekeya vusonde vuayo kaha na ku liniunga ku ikeyo.

Mu cimpande cino, mizimbu ya ku kokueya ya pua mizimbu ya visaki kaha ya ku hungumuisa, i ve ku pangesa mu kuonga vantu na ku pikula visinganieka na vilinga viavo. Limo livulu ngualio mizimbu ya ku kokueya ya pua ya “ku pihia, ya vusonde, kaha ya vuhenge.” Mu ku i tumbula, vantu ve ku pangesa mezi ngeci mua “makuli, malimbikila, manguavo, [na] ku tangula visinganieka via vantu.”

Mizimbu ya ku kokueya ya kala na vusonde vua kama muomu i hasa ku tengula visinganieka vietu, oku tu li ku ndzimba. Tu hasa ku i setekesa ku mpundzi ya ku liana ize ka tu hasa ku mona ni ku ivua lizimba liayo.  Umo mukua ku lilongesa via vilinga via vantu, ua lizina Vance Packard, ua handekele ngueni mizimbu yaco ye ku kokueya cikuma vilinga vietu “ku hiana na muze mu tua singanieka.” Mukuavo co ua handekele ngueni mizimbu yaco ye ku lingisa vantu ku linga viuma via vusonde na vukenia vua kama, ngeci mua ku litsihanga (ku tsiha vantu va cimo cisemua noho vose va nahu), ndzita, na ku yandesa vantu va umo muyati ni vulombelo.​—Easily Led—A History of Propaganda.

Nga vakuetu vantu va hasa ku tu onga na mizimbu ya ku kokueya, amba Satana co? Ua lilongesa vilinga via vantu tunde ha ku tanga cavo. Kaha ikeye a li na ku tuamenena “mavu ose,” ngeci mukemuo a hasa ku pangesa nkala mutamba ua mavu linga a sanduole makuli eni. (1 Yoano 5:19; Yoano 8:44) Satana na “puputiyisa visinganieka” via va vengi ngeci na pu honi “mukua ku onga mavu ose.” (2 Kolintu 4:4; Ku-Solola 12:9) Vati mu hasa ku viana ku kokueya ceni?

Yesu ua tu longesele njila ya yasi ya ku viana mizimbu ya ku kokueya, ngueni tantekeyenu “vusunga na vusunga vu ka mi patula.” (Yoano 8:31, 32) Mu ndzita, lisualale na pande ku kala na mizimbu ya vusunga, kati ngoco citozi ceni a ka hasa ku mu onga mu ku sanduola mizimbu ya makuli. Kulihi mu hasa ku uana mizimbu ya vusunga? Yehova ua tu hakelayo mu Lizi lieni, Mbimbiliya. Mukemuo mua kala viose vi mu tonda linga mu ka hase ku liyaka ni ku luisa mizimbu ya ku kokueya ca Satana.​—2 Timoteo 3:16, 17.

Satana a tantekeya muzimbu uaco ou. Ngeci ue ku pangesa mavu ano a li mu ngolo yeni mu ku tu tangula na ku tu zima cizango ca ku lilongesa Mbimbiliya. Kati mu tavese ku mi hungumuna ku “ku-kokola ca Satana”! (Efeso 6:11) Ka ca puile ca cili ku lengela lika ha ku tantekeya vilongesa via helu. Tua pande ku lihakela kapandi ka ku tantekeya vilongesa via ku lova via mu lutsilielo. (Efeso 3:18) Ngue mua handekele umo mukua ku soneka mavulu, Noam Chomsky ngueni, “Na umo uahi a ka ku muaniena vusunga mu vuongo vuove. Ove ivene ua pande ku vu tondesesa.” Ngeci mukemuo puenu na ku “tondesa vusunga enu vavene” mu ku hilula ha “visoneka ku litangua ku litangua.”​—Vilinga 17:11.

Satana ka tondo mu singanieke vuino na ku ivuisisa vusunga vua vize vi mue ku ivua. Omo lia vika? Muomu limo livulu ngualio mizimbu ya ku kokueya ye ku “tangula cikuma vantu” nga va va “tontuesa cizango ca ku singanieka vuino.” Kati mu pue na ku tava viose vi mu ivua ca ku hona ku hilulaho vuino. (Visimo 14:15) Njambi ua mi hana  “liano” ngeci mukemuo, li pangesenu mu kaniamese lutsilielo luenu.’​—Visimo 2:10-15; Loma 12:1, 2.

Masualale ve ku tanguka na mizimbu ya ku kokueya ve ku ivua vuoma kaha cizango ca ku ya ku ndzita ce ku tepuluka. Mizimbu yaco i hasa naua ku lingisa va liluise ha kati kavo ni va lihangunune ha kati ka masualale vakuavo. Umo mukuluntu ua masualale ku Alemanha ua handekele ngueni, ku kava mizimbu ya ku kokueya ca puile cimo ca miheto ya lingisile vakua Alemanha va va vule mu Ndzita ya Mavu Ose ya ku Livanga. Ua handekele naua ngueni vantu va tangukile cikuma na mizimbu ya ku kokueya, ngeci va puile ngue va na lepuka ku mizimbu yaco. Satana ue ku pangesa miheto ngeci mueyi mu ku tsiha ku likata ca kala ha kati ka Vakua Kilistu matangua ano. Ca ku muenako, ue ku koka hoi-hoi ha kati ka vamuanetu. Ni ue ku seteka ku va lingisa va tunde mu lukungulukilo lua Yehova mu ku va lingisa ku singanieka nguavo lu na sevuka vimo ni lua linga vumo vuhenge.

Kati va mionge! Kavenu vitume via mu Lizi lia Njambi na ku likuata kumo na vamuanoko. Ca ku muenako, Mbimbiliya ya tu mamuna ku tualelelaho ‘ku liecela ha kati ketu’ na ku manusula vimpande mu vuasi. (Kolose 3:13, 14; Mateo 5:23, 24) Ya tu mamuna naua nguayo ka tua pandele ku sondoloka ku cikungulukilo. (Visimo 18:1) Liviukisilenu ku viana mizimbu ya ku kokueya ca Satana. Lihulenu nguenu ‘Omo umo muanetu ua nji nienguesele, vi nja lingile via vuisile Njambi ndzolela ni Satana?’—Ngalata 5:16-26; Efeso 2:2, 3.

Lisualale nga kesi na cilemo ca lukakatela kuli ntuamena ueni, ke ku lua vuino. Ngeci vitozi ve ku pangesa mizimbu ya ku kokueya linga va pihise lukulahelo lua masualale muli ntuamena uavo. Nga vantuamena va sevuka vimo, vitozi va ka pangesa cipenga caco na ku leka masualale vavo nguavo: “Kati mu va kulahele!” na “Kati mu va tave va mi tuamenene ku ku nonga!” Satana neni ue ku lingamo. Ue ku seteka ku pihisa lukulahelo luenu muli vaze va hangula Yehova linga va tuamenene vangamba veni.

Vati mu hasa ku liniunga? Lihakelenu kapandi ka ku kala mu lungulukilo lua Yehova. Tualelenuho ku muesa cilemo ca lukakatela na ku kuasa vaze ve ku tuamenena vantu va Njambi, vutuhu ka va tantulukile. (1 Tesalonika 5:12, 13) Vakua ku alulukila vusunga na vakua ku onga ve ku luisa lukungulukilo. (Tito 1:10) Ambe nga vimo vi ve ku handeka vi moneka ngue via vusunga, “kati mu fumpuluke vuasi mu [tanguke] vinsinganieka  vienu.” (2 Tesalonika 2:2) Vunoni kavenu cimamuna ca hanene Paulu kuli Timoteo ngueni: “Kalamo mu viuma ovio viu na lilongesa” kaha kati u suve “kuli veya u na lilongesavio.” (2 Timoteo 3:14, 15) Hilulenu ha vukaleho vuose vua muesa ngecize mu hasa ku kulahela muli mukuamanda ua cili, uze yali na ku pangesa Yehova mu ku tu longesa vusunga mu cihita ca miaka.—Mateo 24:45-47; VaHevelu 13:7, 17.

Satana ue ku seteka naua ku mi tangula mu vinjila vikuavo via soloka ha toma. Vintsimbu vimo a hasa ku seteka ku mi vuisa vuoma. Livulu li tu na tumbula helu ngualio vuoma vua pua “cimo ca vifua via mizimbu ya ku kokueya tunde ku laza.” Umo mulongesi ua ku Grã-Bretanha, Philip M. Taylor, ua sonekele ngueni vakua Asilia va pangesele ku-zuzuisa na mizimbu ya ngoco linga va vule vitozi vavo. Na Satana neni a ka pangesa vuoma, ngeci mua ku vuila vantu vuoma, vuoma vua ku yandesa, kaha na liova lia ku-tsa, linga mu likele ku pangela Yehova.​—Isaya 8:12; Yelemiya 42:11; VaHevelu 2:15.

Kati mu tavese Satana a linge evi kuli yenu! Yesu ngueni: “Kati mu ivue vuoma vua ava va tsiha muvila, kaha fume oho ka vesi na vieka vi va ku hasa ku linga.” (Luka 12:4) Kalenu na vusunga vua vutuntu ngecize Yehova a ka puisamo cikulaheso ceni na ku mi niunga, ku mi hana “ngolo ya ku hiana cikumakuma” na ku mi kuasa ku vula vieseko via Satana.​—2 Kolintu 4:7-9; 1 Petulu 3:14.

Mua vusunga, vintsimbu vimo mu kevua ku zeya na vuoma. Vunoni vulukenu mezi a ku lembezieka a lekele Yehova kuli Yehosua ngueni: “Likolese na ku lisimpitika; kati u ivue vuoma, cipue kati u zuzuke: muomu Yehova Njambi yove a li nove kuose ku u ku ya.” (Yehosua 1:9) Nga mu putuka ku uma mutima, mu ntsimbu oyo vene vundilenu kuli Yehova na ku mu leka visoti vienu. Mu ku linga ngoco kalenu na vusunga ngecize “ciyulo ca Njambi cize ca hiana mana ose, ci ka niunga mitima yenu na visinganieka vienu.” Kaha mu ka kala na ngolo ya ku vula ku kokueya cose ca Satana.—Filipu 4:6, 7, 13.

Mu vuluka muzimbu ua nehele Lavesake, muluua ua vakua Asilia, mu ku zuzuisa vantu va Njambi ni? Ua tondele va tsiliele ngecize na umo uahi ue ku hasele ku vohiela kuli vakua Asilia, ambe Yehova. Ua lipambele ngecize Yehova na tumu vakua Asilia ku nongesa Yelusalema. Vati Yehova ua kumbuluile? “Kati u zuzukile mezi a u nevu, na akeo vangamba va muangana ua Asilia na nji sahula ange.” (2 Vamiangana 18:22-25; 19:6) Kaha Yehova ua tumine kangelo ua ku nongesele vakua Asilia va ku pua 185.000 mu vutsiki vumo!—2 Vamiangana 19:35.

Mua talaho laza imo filme i va muesele muntu u vongele vunoni ikeye co ua kele ku ndzimba ni? Halumo mua setekele ku tambakana nguenu: ‘Kati u tave! Makuli avo!’ Kaha singaniekenu, honi, tungelo va li na ku mi leka nguavo: “Kati u tave makuli a Satana!”

Ngeci mukemuo kati mu halakane ku kokueya ca Satana. (Visimo 26:24, 25) Halakanenu kuli Yehova na ku kulahela muli ikeye mu viose vi mu linga. (Visimo 3:5-7) Ua mi lema kaha ua mi mamuna ngueni: “Muanange, kuata mangana, na ku zolesa mutima uange.” (Visimo 27:11) Nga mu lingamo, mu ka vula ndzita ya visinganieka vienu!