1-3. (a) Ntsimbu ika halumo va sonekele Samo 147? (b) Vika tu hasa ku lilongesa mu Samo 147?

TUE KU sangala muntu nga tu na komoka vimo vi a na handeka ni vi a na lingi. Ngeci mukemuo, Yehova Njambi ua tondeka ku mu sangala cikumakuma! Tue ku mu sangala omo lia ngolo yeni ya ku hiana i tue ku mona mu viuma via tangele, kaha naua tue ku mu sangala omo lia cilemo ca kama ca tu muesa, mu ku tu hana nkombelo ya Muaneni umo lika.

² Nga tu tanda Samo 147, tu mona mpundu ngecize muntu ua i sonekele ua kele na cizango ca kama ca ku sangala Yehova. Ua kaniamesele naua vakuavo va sangale Njambi hamo neni.—Tandenu Visamo 147:1, 7, 12.

³ Ka tu tantekeya iya ua sonekele Samo 147. Vunoni muntu uaco halumo ua yoyele ku ntsimbu i va hilukile vaIsaleli ku Yelusalema mua va patuile Yehova ku Mbambilone. (Visamo 147:2) Ou mukua visamo ua sangalele Yehova muomu vaIsaleli va hasele ku Mu lemesa lueka ku cifuti cavo mpundu. Kaha mukua visamo ua vuezeleko naua vusunga vukuavo vua pandele ku lingisa vantu ku sangala Yehova. Vusunga vuka? Vusunga vuka vue ku mi lingisa ku handeka nguenu “Aleluya!,”  ni nguetu “Sangalenu Yehova”?​—Visamo 147:1.

4. Vati va livuile vaIsaleli omo Muangana Silu ua ka va patuile, kaha omo lia vika?

⁴ Aci singaniekenu mu va kele na ku livua vaIsaleli omo va kele ku vundzinda ku Mbambilone. Vaze va va tualeleko va kele na ku va pakesa na ku handeka nguavo: “Tu imbilienu umo ua miaso ya ku Siono.” Vunoni vaYudeya ka va kele na ndzolela ya ku imba. Cuma ca va vuisile ndzolela ya kama ca puile Yelusalema, vunoni ya nongele. (Visamo 137:1-3, 6) Va vuile ku vavala ku mitima, ngeci ca tondekele ku va lembezieka. Vunoni ngue mu lia polofetelele lizi lia Njambi, Yehova ua kuasele vantu veni. Mu njila ika? Muangana ua Pelesia Silu ua ka vulile Mbambilone na ku handeka via Yehova ngueni: “Na nji sika ku mu tungila ndzivo mu Yelusalema.” Silu ua lekele naua vaIsaleli ngueni: “Uose uze a liho ha kati kenu va ku vantu veni vose, Yehova Njambi yeni a kale neni, kaha a kandukeko.”(2 Mizimbu 36:23) Mua vusunga aa mezi a lembeziekelele vaIsaleli va kele ku Mbambilone!

5. Vika ua handekele mukua visamo ku tuala ha ngolo ya Yehova ya ku tu kanguisa?

⁵ Yehova ka lembeziekele lika cifuti ca Isaleli vunoni ua lingilemo na nkala kaIsaleli. Mukemuo naua mue ku linga Yehova netu lelo lino. Mukua visamo ua sonekele ngueni Njambi “a kanguisa vaze va na vatuka ku mutima, kaha a kuta ku zimbandu ziavo.” (Visamo 147:3) Nga tu vavala ni tu na luvala, tu hasa ku kala na vusunga nguetu Yehova a ka tu niunga. Yehova a li na cizango ca ku tu lembezieka na ku manusula visoti via mu visinganieka vietu. (Visamo 34:18; Isaya 57:15) Ikeye ue ku tu hana mangana na ndzili linga tu hase ku lua na nkala visoti.​—Tiango 1:5.

6. Civezikiso cika tu hasa ku uana ku mezi a mukua visamo ku Samo 147:4? (Talenu cikupulo ca ku vuputukilo.)

⁶ Mu ntsimbu ikuavo mukua visamo ua anduile meso eni muilu na ku handeka ngueni Yehova “a tanda ku-lana ca zintangantanga” kaha “a zi sana ziose ku mazina azio.” (Visamo 147:4) Mukua visamo ua hasele ku mona zintangantanga, vunoni ka tantekeyele nga kua kala zingahi mpundu. Matangua ano, vakua siensia va tantekeya nguavo ha mulalavizi uetu ha kala makulukazi na makulukazi a zintangantanga. Kaha mu melu ose mua kala makulukazi a makulukazi a milalavizi! Vantu ka va hasa ku tanda zintangantanga ziose, vunoni Sakatanga a hasa. Mua vusunga, ikeye ua tantekeya mua cili-cili nkala ntangantanga ngeci ue ku zi sana ku mazina azio. (1 Kolintu 15:41) Nga Njambi a tantekeya cihela ca nkala ntangantanga, cili vene nenu a mi tantekeya. A tantekeya cihela ci mua kala, vati mu li na ku livua, kaha na viuma via mi kambela!

7, 8. (a) Vika Yehova a tantekeya ku tuala hali etu? (b) Hanenu lungano lua muesa ngozi ya Yehova.

⁷ Yehova ue ku ivuisisa viose vi mu li na ku  lihita navio, kaha a li na ngolo ya ku mi kuasa ku lua na visoti vienu. (Tandenu Visamo 147:5.) Halumo mue ku singanieka nguenu visoti vienu via vikalu cikuma kaha ka muesi nomu mua ku vi manusuila. Njambi a tantekeya ha lenga ngolo yetu, “a vuluka ngecize etu tu mpumputa.” (Visamo 103:14) Etu ka tua tantulukile, ngeci vintsimbu viose tue ku sevuka, halumo na ku livua vungoco. Ce ku tu luvalesa cikuma nga tu hilula ha viuma vi tua handeka laza, vizango via vipi vi tua kele navio, ni visinganieka via indzi vi tua kele navio! Yehova ke ku sevuka, vunoni ue ku ivuisisa mu vuntuntu vati tue ku livua.—Isaya 40:28.

⁸ Mua vuileho laza livoko lia ngolo lia Yehova mu ku mi kuasa ku hita mu vieseko ni? (Isaya 41:10, 13) Vikevio via lihitile navio umo pioneiro ua lizina Kyoko. Mu nima ya ku mu hana citeli cikuavo mu lukungulukilo, ua luvalele. Vuno vati Kyoko ua tantekeyele ngecize Yehova a tantekeya vitanga vieni? Mu cikungulukilo ca ciha, mua kele vantu va vengi va hasele ku ivuisisa visinganieka vieni. Ua livuile ngue Yehova ua mu lekele ngueni: “Nja ku lema, kati lika omo lia ku pua pioneiro, vunoni muomu u munange ua mpuevo kaha ua lihana kuli ange. Nji tonda u ivue ndzolela mu muono mu ku pua umo ua Vakaleho vange!” Vati Yehova ue ku mi muesa ngecize “mana eni ka a lengele”?

9, 10. Mu njila ika ya seho ya kama ya ka tu kuaselamo Yehova? Hanenu cimueso.

⁹ Tu vose tua tondeka ku kala na viuma ngeci mua via-ku-lia, vuzalo, na cihela ca ku kala. Hamo mue ku lisosomua nguenu ka mu ka kala na via-ku-lia via ku puamo. Vunoni Yehova ua tangele mavu linga ha soke via-ku-lia via vingi vi va hasa ku puisamo vose, cipue “ku vana va makololo omo va tambeka.” (Tandenu Visamo 147:8, 9.) Nga Yehova ue ku lisa makololo, tu hasa ku kala na vusunga nguetu netu a ka tu hana vi ka tu kambela.—Visamo 37:25.

¹⁰ Ca seho ya kama, Yehova ue ku tu hana via tu kambela linga tu kaniamese lutsilielo luetu, na ku tu hana “ciyulo [Ceni] cize ca hiana mana ose.” (Filipu 4:6, 7) Muanetu Mutsuo na mpueyeni va muene vati Yehova ua va kuasele. Omo linkimba lia kama lia kupuile Japão mu 2011, vakevo vovokelele ha handendendende mu ku londa helu lia ndzivo yavo. Mu litangua lize, viose vi va kele navio via nongele. Va hitile vutsiki vuose mu hondo ya kuilu lia ndzivo yavo, ya milima na ku tontola cikuma. Ku cimene, va tondele vimo vie ku va kaniamesele. Kaha va uanene lika? Livulu lia Muaka lia Vakaleho va Yehova lia 2006 (Anuário). Omo Mutsuo ua kele na ku fukuola ha mafo, ua uanene mutue ua cimo cimpande, “Os maiores tsunamis já registrados.” Cimpande caco ca handekele via lindunduma lia hitile ku Sumatra mu 2004 likelio lia nongesele viuma via vingi ku hiana mandunduma akuavo. Mutsuo na mpuevo yeni va lilile cikuma omo va tandele mizimbu ya vamuanaye. Va livuile ngue Yehova mpundu a li na ku va hana ku kaniamesa ci va lambelelele. Yehova ua va niungile naua mu vinjila vikuavo. Vamuanaye ku mitamba ikuavo ya Japão va va hanene via-ku-lia na vizalo. Vunoni via va kaniamesele cikuma via puile ku va meneka kuli vamuanaye mu cikungulukilo vaze va va kele na ku tuma ku lukungulukilo lua Njambi, Mutsuo  ngueni: “Nja vuile ngue Yehova mpundu ua kele ku mukulo uetu na ku tu niunga muntu ku muntu. Ca puile ku lembezieka ca kama mpundu!” Ha katete Njambi ue ku tu hana vi tua tondeka linga tu kaniamese lutsilielo luetu, mu nima yaco ue ku tu hana viuma vi tua tondeka ku muvila.

11. Vika tua pande ku linga mangana tu uane ku vezika mu vukuasi vua Njambi?

¹¹ Yehova ue ku “kuatesa vakua ku konkama.” Ua tu lema kaha a li na vuasi vua ku tu kuasa. (Visamo 147:6a) Vati tu hasa ku vezika omo lia vukuasi vueni? Tua pande ku kaniamesa vusamba vuetu neni. Tu ka hasa ku lingamo nga tu pua va ku konkama. (Zefania 2:3) Vakua ku konkama ve ku tsiliela muli Yehova linga a sungamese vuhenge vuose na ku manusulako lamba yavo. Kaha Yehova ue ku va tava.

12, 13. (a) Vika tua pande ku viana linga tu uane ku vezika ku vukuasi vua Njambi? (b) Na veya Yehova ue ku zolela?

¹² Cikuavo naua, Njambi ue ku “hetesa vakua  vipi na ha mavu.” (Visamo 147:6b) Ka tu tondo evi vi lingike netu! Tu tonda Njambi a tu muese cilemo ceni ca vusunga. Ngeci mukemuo tua pande ku zinda via zinda ikeye. (Visamo 97:10) Ca ku muenako, tua pande ku zinda vupangala. Eci ca lomboloka ngecize tua pande ku viana nkala cuma ci hasa ku tu kokueya ku vukevuo, ngeci mua via vuntselentsele. (Visamo 119:37; Mateo 5:28) Eci halumo ci hasa ku kaluua, vunoni Yehova a ka vezikisa kapandi ka tu ka lihakela mu ku vu viana.

¹³ Lika lietu ka tu ku hasa ku vula eyi ndzita yaco. Tua pande ku tsiliela muli Yehova. Vuno a ka viukilila nga tu tsiliela mu viuma vi ve ku tsiliela vantu? Houe, Yehova “ka viukilila ngolo ya kavalu.” Tua pande ku tsiliela mu ndzili yetu vavene ni ku vakuetu? Yehova “ka zolela mikono ya yala.” (Visamo 147:10) Vunoni, yetu tua pande ku tualelelelaho ku vundila Yehova a tu kuase kaha na ku mu lambelelela linga a tu ohiele ku vuzeye vuetu. Yehova kali ka katala ku ivua vivundilo via cifua eci. “Yehova a zolela vaze va mu vuila vuoma, vaze va lavelela ku ngozi yeni.” (Visamo 147:11) Mu ku linga ikeye ua pua mukua vusunga kaha ua tu lema, tua tantekeya ngecize a ka tualelelaho ku tu kuasa ku lua na vizango via vipi.

14. Vusunga vuka ua kele navuo mukua visamo?

¹⁴ Yehova na likuminia ku tu kuasa nga tu kala na vitanga. Omo vaIsaleli va hilukile ku Yelusalema, mukua visamo ua hiluile vati Yehova ua kele na ku va kuasa. Ngeci uembile ngueni: “Ikeye na kolesa mivelenge ya zimbelo ziove; na vezikisa vana vove ha kati kove. A lingisa ciyulo ha kati ka mikuakua yove.” (Visamo 147:13, 14) Mukua visamo ua vuile ngecize a li mu cihela ca cili mua tantekeyele ngecize Yehova a ka kolesa mivelenge ya zimbelo zia mbonge. Ca mu hanene vusunga ngecize Yehova a ka niunga vantu veni.

15-17. (a) Vati tu hasa ku livua omo lia visoti vietu vintsimbu vimo, vunoni vati Yehova ue ku pangesa Lizi lieni mu ku tu kuasa? (b) Vati lizi lia Njambi lie ku “tunta lusi” mu ku tu kuasa? Hanenu cimueso.

¹⁵ Mu hasa ku lisosomua omo lia visoti vienu, vunoni Yehova a hasa ku mi hana mana a ku lua navio. Mukua visamo ua handekele ngueni “a tuma lisiko lieni  ha mavu; lizi lieni li tunta lusi cikuma.” Kaha ua tumbuile naua mema a ku konda, mume, na mema a civue, na ku hula ngueni: “Iya a hasa ku mena masika eni?” Mu nima yaco ua handekele naua ngueni Yehova “a tuma lizi lieni, na ku a sangununa.” (Visamo 147:15-18) Mua vusunga, Njambi yetu uze a tantekeya viose, kaha a hasa ku linga viose, uze ue ku nokesa niondzi na mume, a hasa ku mi kuasa ku vula nkala cisoti cenu.

¹⁶ Lelo lino, Yehova ue ku tu tuamenena na Lizi lieni, Mbimbiliya. Mukua visamo ua handekele ngueni lizi lia Yehova lie ku “tunta lusi” mu ku tu kuasa. Njambi ue ku tu tuamenena mu njila ya cili, na ha ntsimbu ya cili. Aci singaniekenu ha vukuasi vu mue ku uana mu Mbimbiliya, mu mikanda ya “mukuamanda ua cili,” mu JW Broadcasting, mu saiti jw.org, ku vakuluntu, na ku vamuanoko mu cikungulukilo. (Mateo 24:45) Vuno nenu mue ku mona ngecize Yehova ua kala na vuasi mu ku tuamenena muono uenu ni?

¹⁷ Ndumbuetu Simone ua muene vati Lizi lia Njambi lia mu kuasele. Ua livuile vungoco, kaha ua singanikele ngecize Yehova ka mu lemene. Vunoni mu ntsimbu eyi ya ku zeya ceni, ua tualeleho ku vundila kuli Yehova linga a mu kuase. Kaha ua tualeleleho naua ku lilongesa Mbimbiliya. Simone ua handekele ngueni: “Kanda nji ci hite imo ntsimbu i nja vuile ngecize Yehova kesi na ku nji kuasa ni ku nji tuamenena.” Eci ca mu kuasele ku limona ikeye ivene mu njila ya cili.

18. Omo lia vika mue ku ivua ngecize Yehova ua kala ha hiehi nenu, kaha vusunga vuka mu li navuo vua ku ‘sangala Yehova’?

¹⁸ Mukua visamo ua tantekeyele ngecize Yehova ua hanguile Isaleli ya laza ku pua vantu veni ha kati ka vifuti viose via ha mavu. Cifuti cavo cikeco lika ca tambuile “lizi” lia Njambi na “vitume” vieni. (Tandenu Visamo 147:19, 20.) Lelo lino, tua kala na ku vezika ca ku tu sanesa lizina lia Njambi. Tue ku santsela cikuma mu ku mu tantekeya, mu ku kala na Lizi lieni, kaha nomo lia ku hasa ku likuata vusamba vua cili neni. Ngeci mua mukua ku soneka Samo 147, nenu mu li na vusunga vua vuingi vua ku ‘sangala Yehova’ na ku kaniamesa vakuenu va lingemo.