1. Vutumbe vuka va pande ku linga vakuendze ku tuala ha muono uavo ua ku lutue? Vika vi hasa ku va kuasa linga kati va lisosomue cikuma? (Talenu cikupulo ca ku vuputukilo.)

ENU vakuendze nenu mu hasa ku tava ngecize linga muntu a ye vungendzi, na pande ku hangula vuino kulihi a tonda ku ya. Muono ua pua ngue vungendzi, kaha ntsimbu ya ku linga vutumbe vua cihela ci mu tonda ku ya, ya pua ku vukuendze. Mua vusunga, ku linga vutumbe vua cifua eci ca pua ca cikalu. Umo kanike ua mpuevo ua lizina Heather ua handekele ngueni: “Ce ku vuisa vuoma. Muomu ua pande ku hangula vika u linga mu muono uove uose.” Nga nenu mue ku ivua ngoco ku mutima, vulukenu cikulaheso ca Yehova, ngueni: “Kati u livete cikumba [ku lisosomua], muomu yange Njambi yove; Nji ka ku kolesa; cili, nji ka ku kuasa.”​—Isaya 41:10.

2. Vati mua tantekeya ngecize Yehova a tonda mu hangule muono ua ndzolela ku lutue?

² Yehova ua mi kaniamesa mu linge vutumbe vuenu vua ku lutue na mana. (Ekelesiaste 12:1; Mateo 6:20) Muomu ua tonda mu yoye mu ndzolela. Mu hasa ku mona eci cizango ceni, nga mu tala, ku halakana na ku makela ku viuma via tangele. Yehova  ue ku tu niunga naua mu vinjila vieka. Ua tu hana vimamuna via cili kaha ue ku tu longesa vati tu hasa ku yoya mu ndzolela. Ngeci mukemuo, omo vantu ve ku viana vimamuna vieni, ka ce ku mu ya ku mutima. Ue ku leka vaze ve ku viana vimamuna vieni, ngueni: “Mua hanguile vize vintsa ka nja viukililile . . . . Tenu, vangamba vange va ka viukilila, Vunoni enu ntsoni i ka mi kola; Tenu, vangamba vange va kemba omo ndzolela ya mutima.” (Isaya 65:12-14) Nga tu hangula viuma na mana mu muono, tu ka neha vumpahu kuli Yehova.—Visimo 27:11.

3. Vika Yehova ua mi kaniamesa ku linga?

³ Vutumbe vuka Yehova ua mi kaniamesa ku linga? Linga mu yoye mu ndzolela, mua pande ku tantekeya Yehova na ku mu pangela. Muomu cikeco cifua ca tangelelemo naco vantu Yehova. (Visamo 128:1; Mateo 5:3) Tusitu va zivuka lika ku lia, ku nua na ku lisemunuina. Vunoni Yehova a tonda mu linge vutumbe vua muono uenu mu cifua cize ci li na seho kaha ci ka mi nehela ndzolela. Sakatanga uenu ua pua “Njambi ua cilemo” na ‘Njambi ua ndzolela’ uze ua tangele vantu “mu ciseteko ceni.” (2 Kolintu 13:11; 1 Timoteo 1:11; Njenisisi 1:27) Mu ka yoya mu ndzolela nga mu tambuluisa Njambi yetu ua cilemo. Mbimbiliya nguayo: “Ku-hana ca hiana ku tambula mu ku vezika.” (Vilinga 20:35) Vuno vusunga vua aa mezi kanda vu ci mi solokeleho ni? Ovu vua pua vusunga ka vue ku aluluka. Ngeci mukemuo, Yehova a tonda mu linge vutumbe vuenu vua ku lutue omo lia cilemo cenu ku vakuenu na kuli ikeye.—Tandenu Mateo 22:36-39.

4, 5. Vika via vuisile Yesu ndzolela?

⁴ Enu vakuendze, Yesu ua mi sila lungano lua ku tantuluka. Mua puile kanike, citava ua kele na ku heha na vakuavo. Muomu Lizi lia Njambi ngualio kua kala “ntsimbu ya ku zola” na “ntsimbu ya ku cina.” (Ekelesiaste 3:4) Yesu naua ua kaniamesele vusamba vueni na Yehova mu ku lilongesa Visoneka. Mua kele na miaka 12, valongisi ku tembele “va komokele mana eni na ku-kuania ceni.”—Luka 2:42, 46, 47.

⁵ Mua kolele Yesu, ku linga via mu tumine Njambi ca mu vuisile ndzolela. Ca ku muenako, Njambi ua tondele Yesu ambulule “zimpande zia cili kuli vahutu” na “ku imuisa meso a tupuputa.” (Luka 4:18) Visamo 40:8 ya lombolola vati Yesu ua kele na ku livua ku mutima, nguayo: “Nji zolela ku linga cizango cove, A Njambi yange.” Cili vene, Yesu ua lemene ku longesa vantu muzimbu ua Ise. (Tandenu Luka 10:21.) Tangua limo, mu nima ya ku handeka na umo mpuevo ku tuala ha ku lemesa ca vusunga, Yesu ua lekele vandongesi veni ngueni: “Ku linga cizango ca uze ua nji tumine na ku manesa vipanga vieni, vikevio vene via-ku-lia viange.” (Yoano 4:31-34) Yesu ua vuile ndzolela muomu ua muesele cilemo kuli Njambi na ku vakuavo. Nga nove u lingamo, u ka yoya mu ndzolela.

6. Vika ca puila ca cili ku lekako vakuenu via vutumbe vuove vua ku lutue?

⁶ Cingi ca vamuanetu va putukile vupioneiro ku vukuendze, kaha eci ca va vuisile  ndzolela ya kama. Citava mu handeke navo via vutumbe vuenu ni? “Kuze ka kuesi zinguli, ku-likanuuela ci honoua; vunoni mu ku lana ca vakua zinguli ci kaniama.” (Visimo 15:22) Ava vamuanetu va ka mi leka nguavo vupioneiro vua pua ngue sikola i ka mi kuasa mu muono uenu uose. Yesu tele a ci li muilu, ua lilongesele viuma via vingi kuli Ise. Kaha mu vipanga vieni hano ha mavu, Yesu ua tualeleho ku lilongesa. Ua vuile ndzolela mua kele na ku lekako vantu muzimbu ua cili kaha ua kakateyele ku vuoloke vueni mua hitile mu visoti via kama. (Tandenu Isaya 50:4; VaHevelu 5:8; 12:2) Tu ci tale vati cipanga ca ntsimbu yose ci hasa ku ku nehela ndzolela.

7. Omo lia vika vakuendze vavengi va lema cipanga ca ku puisa vantu vandongesi?

⁷ Yesu ua tu lekele ngueni tu ye mu ku ‘puisa vantu vandongesi’ na ku va longesa. (Mateo 28:19, 20) Nga mu hangula eci cipanga mu muono, mu ka yoya muono ua ndzolela uze ue ku sangaziala Njambi. Vunoni ngeci mua nkala cipanga, muntu ue ku kala na vutongue mu ku hita ca ntsimbu. Umo muanetu ua lizina Timoteo ua putukile vupioneiro tele mukuendze, ngueni: “Nja lema ku pangela Yehova mu cipanga ca ntsimbu yose, muomu eyi ikeyo njila i nje ku mueselamo cilemo cange kuli ikeye. Ha katete, ka nja hasele ku putuka vilongesa via Mbimbiliya, vunoni mu nima ya ntsimbu nja ile ku cihela ceka, kaha mu ngonde imo nja putukile vilongesa via vingi. Umo ndongesi ua putukile ku iza ku Ndzivo ya Vuangana. Kaha mu nima ya ku hita mu Sikola ya Mbimbiliya ya Vamuanetu Vazike, ya vingonde vivali, va nji tumine ku cihela ceka kaha nja putukile vilongesa viuana. Nja lema ku longesa vantu, muomu nje ku mona vati sipilitu santu ye ku alulula miono yavo.” * (Talenu ha litota.)​—1 Tesalonika 2:19.

8. Vika va linga vamo vakuendze linga va hase ku ambuluila vantu va vengi?

⁸ Vamo vakuendze va lilongesa malimi eka. Ca ku muenako, Jacob, ua ku America do Norte, ngueni: “Mu nja kele na miaka 7, cingi ca vakuetu ku sikola va puile vakua Vietname. Nja tondele ku va leka via Yehova, ngeci mu nima ya ntsimbu nja lingile vutumbe vua ku lilongesa lilimi liavo. Vintsimbu via vingi, nja lilongesele mu ku setekesa Vutala vua Kaniungi vua Inglês na vua ciVietname. Kaha nja likuatele naua vusamba na vamuanetu va kele mu cikungulukilo ca ciVietname ca ha hiehi. Mu nja puisile miaka 18, nja putukile vupioneiro. Mu nima ya ntsimbu, nja ile ku Sikola ya Mbimbiliya ya Vamuanetu Vazike. Eci ca nji kuasa mu vupioneiro ku civunga ca mu ciVietname, ku nja pua mukuluntu lika liange. Vakua Vietname va vengi ve ku nji komoka muomu nja lilongesa lilimi liavo. Ve ku nji tambula mu vindzivo viavo kaha vintsimbu via vingi nje ku lilongesa navo Mbimbiliya. Vamo va va mbatiza.”—Setekesenu na Vilinga 2:7, 8.

9. Vika cipanga ca ku puisa vantu vandongesi ci hasa ku tu longesa?

⁹ Cipanga ca ku puisa vantu vandongesi ci hasa ku longesa muntu vifua via cili via tondeka mu nkala vipanga, ku tantekeya ku simutuila na vantu, ku simpa na ku kala na liano. (Visimo 21:5; 2 Timoteo 2:24) Eci cipanga ce ku vuisa ndzolela ya ku lifuila muomu  ci hasa ku ku longesa vati u hasa ku pangesa Visoneka mu ku hakuila vi ua tsiliela. Kaha na vati u hasa ku panga na Yehova.—1 Kolintu 3:9.

10. Vati u hasa ku uana ndzolela mu cipanga ca ku puisa vantu vandongesi ambe nga limbo lienu lia likalu ku ambuluilamo?

¹⁰ U hasa naua ku uana ndzolela mu cipanga ca ku puisa vantu vandongesi ambe nga vantu va vandende lika va tonda ku lilongesa Mbimbliya muimbo lienu. Linga vantu va pue vandongesi, cikungulukilo cose ce ku pangela hamo lika. Ambe nga muanetu umo lika ikeye na uana muntu na tava ku pua ndongesi, tu vose tue ku viukilila muomu netu tua kele mu cipanga ca ku lengeya. Ca ku muenako, Brandon, ua lingile vupioneiro miaka 9, ku cihela ca ku linga vantu va vandende lika ve ku tava ku lilongesa Mbimbiliya, ngueni: “Nja lema ku ambulula muzimbu ua cili. Muomu vikevio via tu tuma Yehova. Nja putukile vupioneiro mu nima ya ku manusula sikola. Nja lema ku kaniamesa vakuendze mu cikungulukilo cetu na ku mona ku kola cavo ca mu lutsilielo. Mu nima ya ku hita mu Sikola ya Mbimbiliya ya Vamuanetu Vazike, va nji tumine ku ka linga vupioneiro ku cihela ceka. Vutuhu kuno kanda nji ci uane muntu ua kola mu lutsilielo na ku heta ku mbatizimu, vunoni vakuetu va va uana. Nje ku viukilila cikuma omo lia ku hangula cipanga ca ntsimbu yose.”—Ekelesiaste 11:6.

11. Vifua vika via ku pangela Yehova ve ku linga vakuendze?

¹¹ Kua kala vinjila via vingi via ku pangelamo Yehova. Ca ku muenako, vakuendze va vengi ve ku kuasa mu cipanga ca ku tunga. Kua tondeka Vindzivo via Vuangana via vingi. Evi vihela vie ku hana vumpahu kuli Yehova, ngeci mukemuo nga nove u kuasa ku vi tunga u kevua ndzolela. Nove u hasa ku ivua ndzolela ya ku panga na vamuanoko. Kaha u hasa ku lilongesa viuma via vingi ngeci mua vati mua ku pangela viuma na vutongue oku u liniunga ku mponde na vati u hasa ku likuatasana na vantuamena vove.

12. Vati cipanga ca vupioneiro ci hasa ku tuala ku vukovelelo vukuavo?

¹² Umo muanetu ua lizina Kevin ngueni: “Tunde ku vunike, nja tonda ku pangela Yehova mu cipanga ca ntsimbu yose. Ngeci mu nja puisile miaka 19, nja putukile vupioneiro. Nja likuasele mu ku panga mutamba ua ntsimbu na umo muanetu mukua ku tunga. Nja lilongesele ku ambela vindzivo, ku haka vinjanena na vimbelo. Mu nima ya ntsimbu, nja pangele ku civunga ca vakua ku kuasa ku vimponde, ku tungulula Vindzivo via Vuangana na via vamuanetu. Mu nja vuile ngecize ku Africa do Sul ku tondeka vakua ku tunga, nja lisonekesele kaha va nji laniene. Muno mu Africa, nje ku kuasa ku tunga Vindzivo via Vuangana. Mu visimano via vindende tue ku manusula imo na ku ka kuata ikuavo. Civunga cetu ca ku tunga ca pua ngue vusoko. Tua yoya hamo, tue ku lilongesa  Mbimbiliya hamo, na ku panga hamo. Nja lema naua ku ambulula na vamuanetu va nkala cikungulukilo ci tue ku ya. Vutumbe vu nja lingile ku vunike vua nji nehela ndzolela ka nja singaniekele mu nja lingile vutumbe vuaco.”

13. Omo lia vika vakuendze va vengi va kala na ndzolela ya ku pangela Yehova ha Mbetele?

¹³ Vamo va puile vapioneiro ve ku pangela honi ha Mbetele. Ku pangelaho ce ku vuisa ndzolela muomu viose via linga muntu ue ku vi pangela Yehova. Vusoko vua Mbetele vue ku kuasa ku tuhula viMbimbiliya na mikanda ikuavo ye ku kuasa vantu ku lilongesa vusunga. Umo muanetu ua ha Mbetele ua lizina Dustin, ngueni: “Nja lingile vutumbe vua ku kovela mu cipanga ca ntsimbu yose tele nji li na miaka 9, kaha nja putukile vupioneiro mu nja manusuile sikola. Mu nima ya muaka na vimo vingonde, va nji laniene ha Mbetele, ha nja lilongesela ku pangesa makina a ku tuhula mikanda, kaha na ku panga viprograma via vikomputadore. Ha Mbetele nja lema ku ivua mizimbu ya ku kola ca vipanga via ku puisa vantu vandongesi mu mavu ose. Nja lema ku pangela hano muomu vi tue ku linga vie ku kuasa vantu ku pua vavusamba va Yehova.”

14. Viuma vika u hasa ku linga u liviukisile cipanga ca ntsimbu yose?

¹⁴ Vati u hasa ku liviukisila ku ka kovela mu  cipanga ca ntsimbu yose? Linga u hase ku pangela Yehova mu njila ya cili cikuma, ua pande ku pangela ha vifua via pande Vakua Kilistu. Pua na ku lilongesa Lizi lia Njambi ntsimbu yose, ku hilulaho vuino na ku handeka via lutsilielo luove ku viuano via cikungulukilo. Omo u ci li ku sikola u hasa ku vueza ku vutongue vuove vua ku ambuluila vakuenu muzimbu ua cili. Lilongese ku muesa kasingimiko ku vakuenu omo u handeka navo kaha ivua vikumbululo viavo. Cikuavo naua, u hasa ku lihana mu ku kuasa mu cikungulukilo, ngeci mua ku kuasa ku ku komba na ku vuahesa Ndzivo ya Vuangana. Yehova ua kala na cizango ca ku pangesa vaze ve ku likehesa, kaha va kala na cizango ca ku panga. (Tandenu Visamo 110:3; Vilinga 6:1-3) Timoteo va mu laniene kuli kapostolo Paulu mu cipanga ca vumisionaliu muomu ikeye “ua kele na lutsimo lua cili ha kati ka vana va naye.”​—Vilinga 16:1-5.

15. Vika u hasa ku linga mangana u uane cipanga ci ka ku kuasa mu vupioneiro?

¹⁵ Cingi ca vangamba va ntsimbu yose ve ku tondeka cipanga. (Vilinga 18:2, 3) Ngeci mukemuo, citava u lilongese kamo kacipanga ni kursu i ka ku asiuisa ku uana cipanga ca ntsimbu ya indende ku cihela ci ua kala. Aci handeke via visinganieka viove na kaniungi uenu ua ku zinguluka hamo na vapioneiro vakuavo, kaha ivua vimamuna viavo. Cikuavo naua, Mbimbiliya nguayo “kundika vipanga viove kuli Yehova, kaha ku-likanuuela cove ci ka kaniama.”​—Visimo 16:3; 20:18.

16. Vati cipanga ca ntsimbu yose ci hasa ku ku viukisila ku viteli vikuavo ku lutue?

¹⁶ U hasa ku kala na vusunga ngecize Yehova a tonda ngueni u ka “kuate” muono ua ndzolela ku lutue. (Tandenu 1 Timoteo 6:18, 19.) Cipanga ca ku ambulula ntsimbu yose ci ka ku kuasa ku pua Mukua Kilistu ua ku hia, omo u panga na vakuenu va kala mu cipanga ca ntsimbu yose. Va vengi va mona ngecize ku kovela mu cipanga ca ntsimbu yose mu vukuendze ca va kuasele ku lutue lua ntsimbu mu vulo vuavo. Kaha vaze va puile vapioneiro mu vuzike (ni mu vumbumba) kasi ve ku tualelelaho ku panga hamo na mukua ndzivo yavo mu vupioneiro.​—Loma 16:3, 4.

17, 18. Mu njila ika ku linga vutumbe ca likuata mutima uove?

¹⁷ Samo 20:4 ya handeka via Yehova nguayo: “A ku fungile cizango ca mutima uove kaha a puisemo zinguli ziove ziose.” Omo u linga vutumbe vuove vua ku lutue, singanieka ha vati u tonda mpundu ku pangesa muono uove. Singanieka ha viuma vi a li na ku linga Yehova matangua ano, kaha na vika viu hasa ku linga mu cipanga ceni. Mu nima yaco, linga vutumbe vu ka mu ya ku mutima.

¹⁸ Nga u pangesa muono uove mu ku pangela Yehova mu vutuntu na ku mu zumbangeya u kevua ndzolela ya kama. Cili vene, u ka “viukilila naua muli Yehova; kaha a ka ku hia vizango via mutima uove.”​—Visamo 37:4.