Vati mu Hasa ku Lilongesa Mbimbiliya mu Njila ya ku Tovala Kaha i mi Kuasa

ZIKULENU

YEHOSUA ua tambuile cipanga ca ku tuamenena cifuti ca Isaleli ku Cifuti ca Cikulaheso. Cipanga caco ca puile ca cikalu. Vunoni Yehova ua mu kaniamesele na ku mu kolesa ngueni: “Likolese na ku lisimpitika.” Kaha ua mu lekele naua ngueni nga a tanda livulu lia Masiko na ku a ononoka, kaha a ka linga vihangula via cili na ku vezika mu viose via ka linga.—Joshua 1:7, 8.

Mu ku linga tuli na ku yoyela ku “zintsimbu zia ku kaluua,” muono uetu nauo uli na ku kaluua. (2 Timoteo 3:1) Nga netu tu tonda ku vezika ngeci mua Yehosua, tua pande ku kava cimamuna ca mu hanene Yehova. Tua pande ku tanda Mbimbiliya ku sua kumo na ku pangesa viuma vi tue ku lilongesamo mu ku linga vihangula via cili.

Vunoni etu vamo halumo ka tu tantekeya vati ve ku lilongesa, ni halumo ku lilongesa cetu ka ce ku tu tovala. Vunoni ku lilongesa Mbimbiliya mu vulika ca kala na seho ya kama. Omo mu hituluka mu cikasa “ Setekenu ku Kava Evi Vimamuna” mu ka uanamo vinguli vi ka mi kuasa ku lilongesa via vingi mu cilongesa cenu ca mu vulika na ku ci tovalesa.

Umo mukua Visamo uembile ngueni: “Nji endese mu njila ya vizilika viove; Muomu mukemuo nji viukilila.” (Visamo 119:35) Nenu mu hasa ku ivua ndzolela mu ku lilongesa Lizi lia Njambi. Mu ka lilongesa viuma via ku tovala via vingi omo mu lilongesa Mbimbiliya.

Vutuhu ka mua tambuile cipanga ca ku tuamenena cifuti ngeci mua Yehosua, kasi mua kala na visoti vienu. Ngeci mukemuo, tambuluisenu lungano lua Yehosua, lilongesenu na ku ononoka Lizi lia Njambi. Nga mu lingamo kaha mu ka linga vihangula via cili na ku vezika mu viose vi mue ku linga.

SETEKENU KU KAVA EVI VIMAMUNA

Puenu na ku vundila ntsimbu kanda mu putuke ku lilongesa. Mu Mbimbiliya mua kala visinganieka via Yehova kaha va vi hakamo mu ku tu kuasa etu. Ngeci mukemuo omo mu tanda Mbimbiliya, puenu na ku vundila Yehova a mi kuase ku ivuisisa viuma vi mue ku tanda, ku vi vuluka na ku vi pangesa mu ku linga vihangula via cili mu muono.—Ezela 7:10.
Puenu na ku lilinga vihula enu vavene nga mu tanda Mbimbliiya ni mikanda yetu. Vihula ngeci mua ‘Vika nja lilongesa hali Yehova mu mutamba ou? Vati mutamba uaco ua likuata na mutue ua Mbimbiliya? Vati nji hasa ku pangesa vi nji na lilongesa mu ku kuasa vakuetu?’
Puenu na ku hilula ha viuma vi mue ku lilongesa. Puenu na ku mana kamandende linga mu singanieke ha viuma vi mu na tanda. Lihulenu nguenu: ‘Vati nji li na ku livua mu nima ya ku tanda evi? Omo lia vika nji li na ku livua ngoco? Vuno via likuata na viuma via nji solokelele ku nima, cipue vi li na ku nji soloka vuovuno, ni vi ka nji solokela ku lutue? Vati nji hasa ku pangesa evi vitume ni vimamuna via mu Mbimbiliya mu muono uange?’ (Yombi 23:5; Visamo 49:3) Omo mu hilula ha viuma vi mua lilongesa, setekenu ku mona nga mu hasa ku lilongesa omo lia vika Yehova ua vindika viuma viaco. Ni setekenu ku singanieka ha vika vie ku solokelele muntu u mu na tanda mu Mbimbiliya, nga muntu uaco ua lingile viuma mu njila yeka.—Ndeutelonomi 32:28, 29.
Puenu na ku tanda oku mu singanieka vize vi muli na ku tanda. Ca ku muenako a ci setekenu ku singanieka vati viendele omo Yosefe va mu landesele kuli vamuanaye kuli vaIsmaelita. (Njenisisi 37:18-28) Vika muli na ku mona na ku ivua? Lizimba lika muli na ku ivua? Setekenu ku lipuisa ngue yenu muntu u muli na ku tanda. Vika ua kele na ku singanieka? Vati ua livuile ku mutima? Mua vusunga, nga mu pua na ku tanda ngue muli na ku mona vize vi mu tanda, cilongesa cenu ci ka mi kuasa na ku mi tovala.
Puenu na ku pangesa vikuata via ku lilongesa navio vize vi tue ku tambula mu lukungulukilo linga mu tovalese ku tondesesa cenu. Lilongesenu vati ve ku pangesa vikuata via tuhuka mu lilimi lienu cipue via ku mavoko ni via mu internete. Kati mu likanuuele ku hula vakuenu va mi longese mua ku pangesela vikuata viaco. Ca ku muenako Índice das Publicações na Guia de Pesquisas vi hasa ku mi kuasa ku uana mizimbu ya ingi ku tuala ha vimo vimpande na vinimbu via vingi via mu Mbimbiliya. Puenu na ku pangesa viApendice via mu Mbimbiliya ya Tradução do Novo Mundo, nga ya tuhuka mu limo lilimi li mue ku ivuisisa. Mu ka uanamo mizimbu ya seho ku tuala ha vihela, ntsimbu, vulemu, vipeseleso na viuma vikuavo vi va pangesa mu Mbimbiliya.
Puenu na ku linga mpupulule ya vintsina via kama vi mua lilongesa. Ku lingamo ci ka mi kuasa ku vuluka vi mu na lilongesa. Na ku mi kuasa ku lekako vamuanoko mizimbu yaco. Kuli vimo vi mu na lilongesamo ku tuala ha ku ambulula ni? Nga mukemuo vi pangesenu. Ku linga evi, ci ka mi kuasa ku vuluka vintsina via kama vi mu na lilongesa, kaha na vakuenu va ka uana vukuasi vua kama ku viuma vi mu na lilongesa.