1. Omo lia vika tu hasa ku handeka nguetu viuma viose via pua via Yehova? (Talenu cikupulo ca ku vuputukilo.)

VIUMA viose via pua via Yehova! Ikeye ivene “lilu lia melu, mavu, na viose vi liho.” (Ndeutelonomi 10:14; Ku-Solola 4:11) Mu ku linga Yehova ikeye ua tangele vantu, tu vose tu vantu veni. (Visamo 100:3) Vutuhu vantu vose va pua veni, Njambi ua hangulaho vamo va kundame kuli ikeye mu njila ya ku lifuila.

2. Ku liya na Mbimbiliya, veya va pua vufuko vua ku lifuila vua Yehova?

² Ca ku muenako, Visamo 135 ya tumbula vangamba va Yehova va ku Isaleli ya laza nguayo “vupite vueni ivene.” (Visamo 135: 4) Kaha Hoziya ua polofetelele ngueni vamo ka va puile vaIsaleli navo va ka pua vangamba va Yehova. (Hoziya 2:23) Ovu vupolofeto vua lipuisilemo omo Yehova ua putukile ku hangula vantu ka va puile vaIsaleli va ka sike na Kilistu muilu. (Vilinga 10:45; Loma 9:23-26) Vaze va a vuavesa Yehova na sipilitu santu yeni va va luka nguavo “cikota ca ku lela.” Va pua “vantu va a na fuku” Yehova mu njila ya ku lifuila. (1 Petulu 2:9, 10) Ambaco vaze Vakua Kilistu va lavelela ku ka yoya miaka yose ha mavu? Navo Yehova ua va tumbula ngueni “vantu vange” na “vaze va nji na hangula.”—Isaya 65:22.

3. (a) Veya va kala na vusamba vua ku lifuila na Yehova lelo lino? (b) Vika tu lilongesa mu cilongesa cino?

³ Lelo lino, “kavutanga,” ka vaze va lavelela ku ka yoya miaka yose muilu, na “vampanga veka” vaze va lavelela ku ka yoya miaka yose ha mavu, ve ku pangela Yehova hamo lika ku pua “vutanga vumo lika.” (Luka 12:32; Yoano 10:16) Tua tonda cikuma ku muesa ku santsela cetu kuli Yehova omo lia ku vezika ca kama cikuma ci tua kala naco ca ku likuata vusamba vua ku lifuila neni. Ngeci mukemuo, mu cilongesa cino tu lilongesa vati tu hasa ku muesa ku santsela cetu kuli Yehova omo lia kavumbi ka ku lifuila ka tu muesa.

4. Vati tu hasa ku santsela Yehova mu ku tu tavesa tu likuate vusamba neni, kaha vati Yesu ua lingilemo?

⁴ Tue ku muesa ku santsela kuli Yehova mu ku lihana kuli ikeye na ku tu mbatiza. Muomu eci ce ku muesa ku vantu vose ngecize tua pua vantu va Yehova kaha tue ku mu ononoka ku cizango cetu. (VaHevelu 12:9) Yesu neni ua lingilemo mu va mu mbatizile. Yesu, vutuhu tele ua pua laza mukua cifuti ca hanguile Yehova ku pua ceni, kasi ua lihanene kuli Yehova. Ca puile ngue ali na ku handeka ngueni “nji zolela mu ku linga cizango cove, a Njambi yange.”—Visamo 40:7, 8.

5, 6. (a) Vika ua handekele Yehova mu va mbatizile Yesu? (b) Cimueso cika ci hasa ku tu kuasa ku ivuisisa vati Yehova ue ku livua nga tu lihana kuli ikeye?

⁵ Vati Yehova ua vuile ku mutima mu va mbatizile Yesu? Mbimbiliya nguayo: ‘Kaha Yesu omo va mu mbatizile, ua tuntukile mu mema: kaha, talenu, lilu lia sokolokele, kaha ua muene sipilitu ya Njambi ili na ku suluka hali ikeye ngue livembe; Kaha talenu, lizi lia muilu, ngualio: ‘Ou ikeye Muanange i nja lema, ikeye ua nji ya ku mutima.’ (Mateo 3:16, 17) Yesu tele ua kundama laza kuli Yehova. Ngeci Yehova ua viukilile mu ku mona Yesu na hana muono ueni ku cizango mu ku pangela lika Yehova. Na lelo lino, Yehova ue ku viukilila nga tu lihana kuli ikeye, kaha a ka tu vezikisa.—Visamo 149:4.

⁶ Vunoni na laza viuma viose via pua via Yehova! Kaha vi ka tu hasa ku mu hana? Aci singaniekenu ha cimueso eci: Nga umo yala ua lima lihia lia kama lia lipungu ni mundele. Kaha tangua limo muaneni a pokolamo limo na ku lihana kuli ikeye ku pua vuana. Vutuhu lipungu tele lieni na laza! Vunoni mua vusunga a ka santsela cikuma kuli muaneni omo lia ku mu hana lize lipungu. Kaha a ka haka seho ya kama ku lipungu liaco lia na mu hana muaneni ku hiana likuavo liose li ali nalio, ni vati? Na vuno vene Yehova ue ku ivua ndzolela ya kama nga tu hana miono yetu kuli ikeye.—Ezundu 34:14.

7. Vati Malakiya ua tu kuasa ku ivuisisa mue ku ivua Yehova ku mutima ku tuala hali vaze ve ku mu pangela ku cizango?

⁷ Tandenu Malakiya 3:16. Omo lia vika ku hana muono uenu kuli Yehova na ku mi mbatiza ca pua ca seho ya kama? Tunde ha litangua li mua putuka ku yoya, mua pua muntu ua Sakatanga uenu Yehova. Vunoni singaniekenu ha ndzolela ya kevua Yehova nga mu mu tava ku pua Muangana uenu na ku lihana kuli ikeye! (Visimo 23:15) Yehova a tantekeya vaze va lihana kuli ikeye mu ku mu pangela ku cizango cavo, kaha ue ku soneka mazina avo mu “livulu lia civuluiso.”

8, 9. Vika Yehova ua tonda kuli vaze ve ku soneka mazina mu “livulu lia civuluiso”?

 ⁸ Nga tu tonda lizina lietu li kale mu “livulu lia civuluiso” lia Yehova, tua pande ku lingako mumo. Malakiya ua handekele ngueni tua pande ku vuila Yehova vuoma na ku singanieka ha lizina lieni. Nga tu lemesa ueka ni cuma ceka, Yehova a ka zima lizina lietu mu livulu lieni!—Ezundu 32:33; Visamo 69:28.

⁹ Ngeci mukemuo ku lihana kuli Yehova na ku tu mbatiza, ka ca puilemo. Muomu evi tue ku vi linga lumo lika mu muono, vunoni ku lemesa Yehova tue ku ci linga mu muono uetu uose. Mu matangua ose a muono uetu, tua pande ku muesa mu vilinga vietu ngecize tue ku ononoka Yehova.—1 Petulu 4:1, 2.

10. Ku litepa cika ca pande ku kala ha kati ka vaze ve ku pangela Yehova na vaze ka ve ku mu pangela?

¹⁰ Mu cilongesa ci na hiti, tua lilongesele ngecize Kaini, Solomone na vaIsaleli va litumbuile nguavo vakua ku lemesa Yehova, vunoni ka va muesele lukakatela kuli ikeye. Malungano aco a tu longesa ngecize ku handeka lika nguetu tue ku lemesa Yehova ka ca puilemo. Tua pande ku zinda vupi na ku lema via cili. (Loma 12:9) Yehova ua handekele ngueni ha ka kala ku litepa ca kama “ha kati ka vakua vuviuke na vakua vipi, ha kati kou a pangela Njambi no uze ke ku mu pangela.”—Malakiya 3:18.

11. Omo lia vika ca pande ku pua ca casi kuli vakuetu ku mona ngecize tue ku lemesa lika Yehova?

¹¹ Tue ku santsela cikuma Yehova mu ku tu hangula ku pua vantu veni! Ca pande ku pua ca casi ku vantu vose ku mona ha toma ngecize tua kala ku mutamba ua Yehova. (Mateo 5:16; 1 Timoteo 4:15) Lihulenu nguenu: ‘Vuno vakuetu ve ku mona ngecize nja kakatela mu vutuntu kuli Yehova ni? Nja lema ku leka vakuetu ngecize nji Mukaleho ua Yehova ni?’ Aci singaniekenu vusiua vua kevua Yehova nga a mona ngecize tua kala na ntsoni ya ku litumbula nguetu tu vangamba veni.—Visamo 119:46; tandenu Mako 8:38.

12, 13. Vika ve ku linga vamo Vakaleho vie ku lingisa vantu ku hona ku va nongonona ngecize va pua Vakaleho?

¹² Vunoni ca vusiua ku mona ngecize, vamo Vakaleho ve ku tambuluisa ‘cimbembesi ca mavu.’ Ngeci ka ha kele ku litepa ca kama ha kati kavo na vaze ka ve ku lemesa Yehova. (1 Kolintu 2:12) ‘Cimbembesi ca mavu’ ce ku lingisa vantu ku tuala mana ku vizango viavo lika. (Efeso 2:3) Ca ku muenako, vutuhu tue ku tambula vimamuna via vingi ku tuala ha vuzalo, vamo kasi ve ku zala mua ku pihia. Ve ku zala vuzalo vua ku satula ha muvila na vua ku hulula, cipue nga vaya mu ku kunguluka. Ni ve ku livinda vifua via vinkambu via ku hianesamo. (1 Timoteo 2:9, 10) Kaha evi vie ku lingisa cingi ca vantu ci va kaluuile ku tantekeya nga vamuanetu vaco va pua Vakaleho va Yehova ni kuahi.—Tiango 4:4.

¹³ Vamo Vakaleho ka ve ku litepesa ha toma na vakua mavu mu vinjila vikuavo  naua. Ca ku muenako, ku vilika, vamo ve ku livuetula vumo vuino ka ci tava kuli Vakua Kilistu. Vakuavo ve ku haka vifoto na mezi mu internete aze e ku muesa visinganieka via vakua mavu. Vutuhu ka ve ku va sungamesa ku cikungulukilo muomu ka va lingile vupi vua kama, vunoni va hasa ku pikula vamuanetu vaze ve ku lihakela kapandi ka ku litepesa ku via mavu.—Tandenu 1 Petulu 2:11, 12.

14. Vika tua pande ku linga tu niunge vusamba vuetu na Yehova?

¹⁴ Viuma viose via ha mavu va na vi panga mu cifua ci tu lingisa ku tuala mana ku “lisungu lia ntsitu, na lisungu lia meso, na ku-lihalesa ca muono.” (1 Yoano 2:16) Vunoni etu tu vantu va Yehova, ngeci ka tua lifuile na vakua mavu. Tue ku “viana ku sahula Njambi na masungu a hano ha mavu,” vunoni tue ku yoya “na ku silikinia na mu vuviuke na mu ku lemesa Njambi” ha kati ka vakua mavu. (Tito 2:12) Cifua ca muono uetu uose, vihandeka vietu, ku-lia cetu, ku-nua cetu, ku zala cetu na ku panga cetu, via pande ku muesa ha toma ku vantu vose ngecize tu vangamba va Yehova.—Tandenu 1 Kolintu 10:31, 32.

15. Omo lia vika tua pande ku muesa cilemo ku vakua Kilistu vose?

¹⁵ Tue ku muesa nguetu tua haka seho ku vusamba vuetu na Yehova mu cifua ci tue ku yoyelamo na vamuanetu. Muomu navo va kundama kuli Yehova ngeci muetu. Nga tu vuluka evi, ntsimbu yose tu ka va muesa ngozi na cilemo. (1 Tesalonika 5:15) Omo lia vika ca pua ca seho? Yesu ua kumbuluile ngueni: “Hakeho vose va ka tantekeya ngecize  mu vandongesi vange, nga mu lilema umo na mukuavo.”—Yoano 13:35.

16. Vika tu lilongesa ku Masiko a Mosesa ku tuala ha cilemo ca Yehova ku vangamba veni?

¹⁶ Cimo cimueso ca ku Masiko a Mosesa ci hasa ku tu kuasa ku ivuisisa vati tua pande ku yoya na vamuanetu. Mu tembele ya Yehova, mua kele vitenga vi va kele na ku pangesa lika mu ku lemesa. Masiko a muesele a toma vati vaLevi va pandele ku niunga vitenga viaco, kaha uose ua vianene ku kava masiko aco va mu tsihile. (Numelu 1:50, 51) Nga Yehova ua hakele seho ya kama ku cifua ci va niungililemo vitenga via ku lemesa navio lika, mua vusunga ua haka seho ya kama ku viuma vi ve ku linga vantu ku vangamba veni, vaze va lihana kuli ikeye! Yehova ua tu leka seho ya tu haka mu ku handeka ngueni, uze a tu “saleka livoko na saleka livoko ku mukandi ua liso lieni.”—Zakaliya 2:8.

17. Vika Yehova ue ku ‘halakana na ku ivua’?

¹⁷ Malakiya ua handekele ngueni Yehova ue ku ‘halakana na ku ivua’ vati vantu ve ku yoyelamo na vangamba veni. (Malakiya 3:16) Mua vusunga “a tantekeya vaze va na pu veni.” (2 Timoteo 2:19) Ue ku mona viose vi tue ku linga na ku handeka. (VaHevelu 4:13) Ngeci mukemuo nga tu yoya mua ku pihia na vamuanetu Yehova ue ku tu mona. Vunoni ue ku ivua ndzolela nga a mona tu zumbula vamuanetu, tu va muesa vuhuanga, tu vecela nga va na tu vulumuina, na ku va vuila ngozi.—VaHevelu 13:16; 1 Petulu 4:8, 9.

18. Vati tu hasa ku santsela Yehova mu ku tu hangula tu pue vantu veni?

¹⁸ Tue ku tonda ku muesa ku santsela cetu mu ku kala ku mutamba ua Yehova. Tua  tantekeya ngecize ku lihana kuli ikeye, cikeco cihangula ca mana cikuma ku hiana vihangula viose mu muono. Vutuhu tua kala ha kati ka vantu va “ku henga na ku pihia,” kasi tu hasa ku pua “vakua ku zela cipenga” na ku tua “ngue vieke via hano ha mavu.” (Filipu 2:15) Ngeci mukemuo tua lihakela kapandi ka ku litenga ku viose via zinda Yehova. (Tiango 4:7) Kaha tua lema na ku singimika vamuanetu muomu navo va pua va Yehova.—Loma 12:10.

19. Vati Yehova ue ku lunguisa vaze va lihana kuli ikeye?

¹⁹ Mbimbiliya ya kulahesa nguayo: “Yehova ka li ka mbila vantu veni.” (Visamo 94:14) Eci cikulaheso ca vusunga. Ambe ku soloke viuma via ku fua vati, Yehova ka ka tu seza. Cipue vene nga tu tsa, ka ka tu suvu. (Loma 8:38, 39) “Muomu nga tu yoya, tu ci yoyela kuli Muangana; cipue nga tu tsa, tu tsila kuli Muangana: ngoco vene cipue tu yoya cipue tu tsa tu na pu tu va Muangana” uetu Yehova. (Loma 14:8) Tua lavelela cikuma ntsimbu ya ku lutue omo Yehova a ka sangula vavusamba veni vose va tsa. (Mateo 22:32) Vunoni ambe ntsimbu ino tue ku tambula vuana vua vuingi vua ku lifuila kuli Tatetu. Ngue mu ya handeka Mbimbiliya “ca vezika cifuti cize Njambi yaco Yehova, Vantu vaze va a na hangula ku pua vusuana vueni ivene.”—Visamo 33:12.