“Vaze Vakaleho ka va kele na ku muesa lika ngozi ku vantu, vunoni na ku tutali vange. Tangua limo, umo ua Vakaleho vaco ua lizina Elaine, ua nonene vibolacha via tutali na ku hana ku tutali vange vavali. Tunde tangua olio, ntsimbu yose i nja kele na kuendesa tutali vange, va kele na ku nji kokangeya ku mikole yavo linga tuye kuze ku va va hanene vibolacha.

“Mua hitile vingonde via vingi. Tutali va lemene vibolacha, ange co nja lemene ku simutuila-simutuila na Vakaleho va Yehova mu vuihi. Vunoni ka nja tondele ku likata navo cikuma. Muomu ka nja tantekeyele vi va tsiliela, ange naua tele nji na tuvakana miaka 70. Kaha mu ku linga vilinga via vakua malombelo a engi via nji futuile ku mutima, nja muene ngecize cili ku lutue nji lilongese Mbimbiliya lika liange.

“Mu ntsimbu yaco, nja kele na ku mona-mona Vakaleho va Yehova vavengi ha vihela via ku liseza-seza via mbonge yetu, va nemana na tuntsandia tua mikanda. Navo va kele na ku muesa ndzandzu ntsimbu yose. Mu ku linga, va lihakelele kapandi ka ku kumbulula vihula viose na Mbimbiliya, kamandende-kamandende nja putukile ku va kulahela.

“Tangua limo, Elaine ua nji huile ngueni: ‘Mu tantekeya ngecize tusitu vua pua vuana vua tu hana Njambi ni?’ Nja mu kumbuluile nguange, ‘Eyo nji tantekeyamo vuino-vuino!’ Kaha ua nji tandelele Isaya 11:6-9. Tunde tangua lize, nja tondele ku lilongesa Mbimbiliya, vutuhu nja kele na ku likanuuela ku tava mikanda yavo.

“Mu matangua a hateleko, nja lemene ku simutuila na Elaine na yalieni Brent. Kaha va nji kaniamesele ku ka tanda Mateo ku tuala Vilinga linga nji tantekeye vi ca lomboloka ku pua Mukua Kilistu ua vusunga. Ngeci nja ka lingilemo. Mu nima yaco, nja tavele ku lilongesa Mbimbiliya na Brent na mpueyeni Elaine. Oho honi, tele tu endela ha kati ka muaka ua 2016.

“Mu nkala simano, nja kele na ku lavelela na ndzolela matangua a cilongesa cange ca Mbimbiliya na a viuano. Nja livuile ku vezika na ndzolela mu ku lilongesa vi ya longesa mpundu Mbimbiliya. Mu nima ya muaka, va nji mbatizile. Njili na miaka 79, nje ku livua ngecize nji na uana njila yaya ku muono. Yehova ua nji vezikisa mu ku nji puisa mutamba ua vusoko vueni vua mu lutsilielo.”