Ku lisinga ca pua “ku likunkula ni ku linga imo nkuminio ya ku lifuila ngecize muntu a ka linga vingandi ni kaka lingi vingandi, kaha ue ku tumbula Njambi ku pua mukaleho.” Citava ku lisinga na kanua ni ku soneka.

Vamo ve ku singanieka nguavo ku lisinga ca pua vupi, muomu Yesu ua handekele ngueni: “Kati mu ka lisinge . . . Vunoni vihandeka vienu vi pue ngecize, Eua, eua; Houe, houe: muomu viose via hiana evi, vi fuma ku vipi.” (Mat. 5:33-37) Yesu ua tantekeyele ngecize Masiko a Mosesa a muesele ngecize kua kele vimo vintsimbu via tondekele ku lisinga, kaha vamo vangamba va Njambi va ku ononoka, va lingilemo. (Njen. 14:22, 23; Ezu. 22:10, 11) Ua tantekeyele naua ngecize Yehova neni ua lisingile vintsimbu vimo. (VaHe. 6:13-17) Ngeci mukemuo, nga tu talaho vuino, Yesu ka vindikile ku lisinga mu vifua viose. Vunoni ua kele na ku mamuna vaze va kele na ku lisinga ngoco, ambe ha vimpande via ku hona seho. Tua pande ku lihakela kapandi ku puisamo vi tue ku handeka, muomu vikevio via tonda Yehova kuli yetu.

Vika mua pande ku linga nga vantu va tonda ku mi singisa? Ha katete, ivuisisenu vuino nga vize vi va tonda ku mi singisila mu hasa ku vi puisamo ni kuahi. Nga ka muesi na vusunga vua ku vi puisamo, kaha ca cili kati mu lisinge. Muomu Njambi ngueni: “Ci li ku lutue kati u lisinge, ku hiana u lisinge vunoni ka u vi puisamo.” (Ekel. 5:5, NWT) Mu nima yaco, hilulenu vitume via mu Mbimbiliya via likuata na cisingo caco, kaha mu nima yevi lingenu mu nayi mutima uenu ua ku longesa ku Mbimbiliya. Tu talenu vimo vitume viaco.

Vimo visingo via litombola na cizango ca Njambi. Ca ku muenako, Vakaleho va Yehova ve ku linga vimo vinkuminio ha litangua lia vulo vuavo. Kaha vinkuminio viaco via pua vene ku lisinga. Vasandungi na ntsombolua, ve ku linga nkuminio ku meso a Njambi na a vakaleho vavengi ngecize va ka lilema, ku lihaka seho, na ku lisingimika umo na mukuavo, noho ku-tsa ci ka va tepa. (Ku vihela vimo vakua ku liambata ka ve ku handeka mpundu aa mezi, vunoni navo kasi ve ku linga nkuminio ku meso a Njambi.) Kaha ve ku va tava ku pua yala na mpuevo. Mu nima yaco, vulo vuavo vua pande ku tualelelaho na ku ku-tsa. (Njen. 2:24; 1 Kol. 7:39) Evi vinkuminio via ha vulo via pua via cili, via tondeka, kaha naua via litombola na cizango ca Njambi.

Vimo visingo ka via litombuele na cizango ca Njambi. Mukua Kilistu ua vusunga ke ku lisinga visingo viaco, ngeci mua ku luila cifuti ca kala, ni ku viana ku tsiliela muli Njambi. Ku lingamo ca pua tsiha masiko a Njambi. Vakua Kilistu “kati vakua mavu,” ngeci mukemuo ka ve ku lihaka mu vihoi-hoi via vakua mavu ni mu vindzita.—Yoa. 15:19; Isaya 2:4; Tia. 1:27.

 Vimo visingo via hitukila ha mutima ua muntu ku muntu. Vintsimbu vimo, ce ku tondeka ku hilula vuino cisingo kuliya na citume ca handekele Yesu ngueni: “Hanienu Sezale viuma via Sezale, na Njambi viuma via Njambi.”—Luka 20:25.

Ca ku muenako, nga umo Mukua Kilistu a tonda ku tambula biliete ni passaporte, vunoni va mu leka nguavo, noho a lisinge. Nga mu cifuti caco, ku lisinga ca lomboloka ku tava ku linga viuma vi tsiha masiko a Njambi, mutima ueni ua ku longesa ku Mbimbiliya ka u ka mu tavesa ku lingamo. Vunoni nguvulu ya mu cifuti caco i hasa ku mu tavesa ku alulula mezi a ha cisingo, linga a litombole na mutima ueni.

Ku alulula vimo ha cisingo, ci hasa ku litombola na citume ca ku Loma 13:1 ca handeka nguaco: “Vantu vose, muntu ku muntu, vononoke ku vakua ku suana.” Ngeci mukemuo, Vakua Kilistu va hasa ku hangula ku linga cisingo caco mu ku tantekeya ngecize ka ca puile vupi ku linga viuma via tonda laza Njambi kuli vakevo.

Ca pua naua ca seho ku kava mutima uetu ua ku longesa ku Mbimbiliya, nga va tu vundila ku kuata cimo cuma, ni ku kala mu cimo cifua, ntsimbu kanda tu lisinge. Ku laza vakua Loma na vakua Sikitiya, va kele na ku lisingila ha mikuale yavo. Kaha eci ca lombolokele ngecize va na sana njambi ua ndzita mu ku pua mukaleho uavo. VaNgelengu, va kele na ku imika livoko muilu nga vali na ku lisinga. Muomu va tsilielele ngecize kuilu kua kala umo mukua ngolo ue ku tala mezi a ve ku handeka na vilinga viavo. Kaha tangua vantu vose va ka litavela kuli ikeye.

Mua vusunga, na umo ngamba ua Yehova uahi ue ku lisingila ku cimo citantekeyeso ca cifuti ni ku cuma ceka ca likuata na ku lemesa ca makuli. Vati co nga va na mi tuala ku vusompelo kaha va na mi vundila ku haka livoko lienu helu lia Mbimbiliya linga mu lisinge? Nga via cifua eci vi na mi solokela, mu hasa ku lisinga, muomu Mbimbiliya ya muesa ngecize ku laza vamo vangamba va Yehova va lisingile mu ku pangesa vilio via muvila. (Njen. 24:2, 3, 9; 47:29-31) Ca pua ca seho ku tantekeya ngecize nga mu tava ku lisinga, muli na ku likuminia ku meso a Njambi ngecize mu handeka vusunga. Kaha mu nima yaco, mua pande ku kumbulula mu vusunga nkala cihula ci va mi linga.

Mu ku linga tua haka seho ya kama ku vusamba vuetu na Yehova, tua pande ku vundila na ku hilula vuino ha nkala cisingo ci va tu vundila, linga tu mone nga ci litombola ni kuahi na vitume via mu Mbimbiliya kaha na mutima uetu. Nga mu hangula ku lisinga Kaha mua pande ku puisamo vi mua lisingi.—1 Pet. 2:12.