Cikungulukilo ca pande ku mona ngecize vulo vua ku livanga vu natsi mpundu, kaha vua vuha co vu na kuata vene. Linga tu ivuisise vuino eci cikumbululo, tu hilulenu via handekele Yesu ku tuala ha ku tsiha vulo na ku liambata lueka.

Kuliya na Mateo 19:9, Yesu ua tumbuile vusunga vumo lika vu hasa ku tsihisa vulo. Ngueni: “Uose a ka kondola mpuevo yeni, nga kati na vupangala, kaha a ka ambata ueka, a linga vupangala.” Ku mezi a Yesu tu lilongesako ngecize (1) Mbimbiliya ya tavesa lika ku tsiha vulo omo lia vupangala, kaha (2) muntu ue ku tsiha vulo na mukua ndzivo yeni ca ku hona ovu vusunga vuaco, na ku liambata na ueka, ue ku linga vupangala. *

Vuno mezi a Yesu a muesa ngecize Mbimbiliya ya tavesa yala na lingi vupangala na ku kondola mpueyeni a liambate na ueka ni? Ambe houe. Nga yala na lingi vupangala, mpuevo mu ku pua uze kesi na mulonga, ikeye ali na mpoko ya ku hangula nga a mu konekela ni kuahi. Nga na mu viana na kuya ku masiko mu ku tsiha vulo, kaha vose vavali va na zituka mu ku liambata na muntu ueka, ca kama lika nga via ku tsiha vulo ku masiko vi nahuko.

Vunoni mpuevo, a hasa ku kala na cizango ca ku ohiela vulo vuavo, kaha evi vi mu lingisa ku muesa cizango ca ku ecela yalieni. Vati co nga yala a viana ku mu konekela kuli mpuevo, kaha a ka tsihisa vene vulo ku masiko? Mu ku linga mpuevo na kele na cizango ca ku mu ecela linga vulo vuavo vu tualeleleho, kuliya na Mbimbiliya yala ka zitukile mu ku ka liambata na muntu ueka. Kaha nga a ndungula mu ku liambata na muntu ueka vutuhu Mbimbiliya ka ya mu tavesele ku lingamo, ali na ku linga naua vupangala vukuavo. Ngeci mukemuo, vakuluntu va na pande ku mu pangela ndzango ya ku sompesa ikuavo naua mu ku tala ha cimpande caco.—1 Kol. 5:1, 2; 6:9, 10.

Nga yala a tsiha vulo mu cifua ka ca litombuele na Mbimbiliya na ku ambata mpuevo ueka, vati cikungulukilo ca pande ku mona vulo vueni vua katete na vua vuha? Vulo vueni vua katete kasi ku vuli ni? Vuno mpueyeni kasi citava a mu konekele cipue ku mu viana ni? Vuno cikungulukilo ca pande ku mona ngecize yala uaco ali na ku linga vupangala mu ku liambata na muntu ueka ni?

Ku laza, cikungulukilo ca kele na ku mona vulo vua vuha ku pua vupangala, nga mukua ndzivo yeni ua katete kasi a ci yoya, ka sombokele, ni ka lingile vupangala. Vunoni Yesu mua handekele ha cimpande ca ku tsiha vulo na ku liambata lueka, ka tumbuilemo via mukua ndzivo uze kesi na mulonga. Ikeye ua handekele ngueni yala a tsiha vulo mu cifua ka ca litombuele na Visoneka via ku Lela, na ku ambata ueka, a linga vupangala. Mu citanga ngeci mueci, ku tsiha vulo na ku liambata na muntu ueka, ce ku tsiha vulo vua katete.

Ngeci mukemuo, nga yala a tsiha vulo na ku liambata na muntu ueka, mpueyeni ua katete, ka citava naua a mu konekele ni ku mu viana. Omo liaco, ka ci tondeka naua mpuevo a lisosomue na citeli ca ku hangula nga a konekela yalieni ni kuahi. Cikuavo naua, cifua ci va muenamo vamuanetu vuze vulo vua vuha, ka ci hitukila naua nga mpueyeni ua katete ua toka, ua somboka kueka, ni ua linga vupangala, houe. *

Mu cimueso ci tua pangesa helu, yala ua lingile vupangala kaha eci ca koka ku-tsa ca vulo. Vati co nga yala ka lingile vupangala, vunoni ua tsihile lika vulo na ku liambata na muntu ueka? Ni vati co nga yala ka lingile vupangala ntsimbu kanda a tsihe vulo, vunoni ua vu lingile mu nima yaco, kaha vutuhu mpueyeni ua tondele ku mu konekela, kasi ua liambatele na muntu ueka? Mu vimueso viose evi, ku tsiha vulo na ku liambata na muntu ueka, ca pua vupangala. Ngeci mukemuo, ci manusula vulo vua katete. Kaha kuliya na masiko, vulo vua vuha vu na kuata vene. Vutala vua Kaniungi vua 1 ya Fevereiro ya 1980, mu putu, vua lomboluele eci cimpande ha lifo 32 nguavo, “yala na kovela mu vulo vua vuha, ngeci mukemuo ka citava ku vu manusula ngoco na ku hilukila viuma ngue mu via fuile laza. Muomu vulo vueni vua katete vua tsile, mua ka vu tsihile ku masiko, ku linga vupangala na ku liambata na muntu ueka.”

Eci ku ivuisisa ca ciha ka ca pandele ku lingisa Vakua Kilistu ku mona ngue vulo ka vua puile vua ku lela ni ngue vupangala ka vua puile vupi vua kama. Yala a kondola mpueyeni mu cifua ka ca litombuele na Mbimbiliya na ku liambata na muntu ueka mu cifua ci liluisa naua na Mbimbiliya, vakuluntu va na pande ku mu pangela ndzango ya ku sompesa. (Nga mpueyeni ua muha neni Mukua Kilistu, neni va na pande ku mu pangela ndzango ya ku sompesa.) Vutuhu ka ci tondeka ku mona vulo vueni vua vuha ku pua vupangala, vunoni yala uaco na pande ku kala miaka ya ingi ca ku hona ku tambula viteli via ku lifuila mu cikungulukilo, noho kasahuntu na lutsimo lua vupi vueni vi na vata mu vutuntu. Kaha ntsimbu kanda va mu kundike citeli ca ku lifuila, vakuluntu va na pande ku singanieka ha cifua ci alimo mpuevo yendele vungungu na vanike va sile, nga va semene vana.—Mal. 2:14-16.

Vakua Kilistu va pande ku singanieka ha luvinda lue ku iza omo lia ku tsiha vulo mu njila ka ya litombuele na Mbimbiliya na ku liambata na muntu ueka. Ku lingamo, ce ku va lingisa ku lihakela kapandi ka ku pua vakua mana na ku tambuluisa cifua ca ku lela ce ku muenamo Yehova vulo.—Ekel. 5:4, 5; VaHe. 13:4.