KU MATANGUA a Paulu, ka kua kele vimbapolo via ku ambata vantu lika. Linga muntu aye vungendzi, ua pandele ku ihula vakuavo nga va vuile imo mbapolo ya vitenga ya kele na ku talekesa kuze kua tondele kuya ikeye, kaha na ku tantekeya nga vakua ku yendesa va tondele ku ambata vantu ni kuahi. (Vili. 21:2, 3) Cipue nga mbapolo ka ya kele na ku talekesa mpundu kuze kua tondele kuya ikeye, ua londele, kaha omo a ka heta ku cihela caco a tonda naua mbapolo ikuavo i mu tuala kuze kua tondele kuya mpundu.—Vili. 27:1-6.

Vakua ku endesa vimbapolo va kele na ku kuta mangendzi avo kuliya na ntsimbu ya muaka. Cikuavo naua, va kele na ku simbuisa mangendzi avo nga va na mono vimo viyovo ni vitantekeyeso via ku pihia, ngeci mua ku mona likololo ali na ku ohiela ha ngundzi ya mbapolo ni nga va na mono visupo via imo mbapolo ya ku vombela ku mukulo ua kalunga ndonga. Kaha mu ku enda mangendzi aco va kele na ku lavelela luhundzi lu talekese kuze ku va tonda kuya, amba vuose va sunune mbapolo. Kaha nga muntu na uana mbapolo ya tavele ku mu ambata, ua tutile vitenga vieni na ku vi neha ku cikuma ca vimbapolo, mu ku vandamena noho kapitau ua mbapolo ua tambekele ngecize mbapolo vuovuno i sunuka.

Umo mukua mizimbu Lionel Casson ngueni “Mbonge ya Loma ya kuasele vantu ku uana vimbapolo ca ku hona ku ndundangela ku vikuma via ku liseza-seza. Muomu cikuma ca ku Loma ca kele ku ya uila ndonga ya Tiber. Kaha ku hiehi na cikuma caco kua kele mbonge ya Ostia, mua kele citanda ca kama ca viseketa. Viseketa viaco via puile via vivunga via vakua mingoso ya ku endesa vimbapolo via ku vikuma via ku liseza-seza: mua kele civunga ca vakua Narbonne [lelo lino nguavo França], civunga ca vakua Carthage [lelo lino nguavo Tunisia], . . . na vivunga vikuavo. Ngeci mukemuo, uose ua tondele kuya vungendzi ua ile lika ku seketa ya vimbapolo via ku mbonge yaco.”

Vimbapolo via kuasele vakua ku enda mangendzi ku enda muvatu, ku tina ku likonda, vunoni naco ca kele na vimo visoti. Ca ku muenako, vimo vimbapolo via kele na ku endela Paulu mu mangendzi eni a vumisionaliu via kele na ku vombela.—2 Kol. 11:25.