1-3. Tumbulenu vimo viuma vie ku lingisa vamuanetu va mu cipanga ca ntsimbu yose ku tunda mu cipanga caco.

MUANETU Robert na mpueyeni Mary Jo, va vuluka nguavo: “Mu nima ya ku kala miaka 21 mu cipanga ca vumisionaliu, visemi vetu vauana vose va putukile ku vavala. Vutuhu tua tondele cikuma ku ka va niunga, vunoni ku tunda ku cihela ci tua kele na ku pangela ca tu vavalele cikuma ha mitima.”

² Kaha muanetu William na mpueyeni Terrie nguavo: “Mu tua tantekeyele ngecize cihindu cetu ka ci tu tavesa naua ku hilukila mu cipanga ca ntsimbu yose, tua lilile. Ngue kueha, cihindu ca tetele cizango cetu ca ku ka pangela Yehova mu cifuti ceka.”

³ Muanetu Aleksey a vuluka ngueni: “Tua tantekeyele ngecize vakua ku tu luisa va tonda ku soka Mbetele yetu. Vunoni mu va tu tundisile ha Mbetele na ku i soka, ca tu vavalele cikuma ha mitima.”

4. Vihula vika tu simutuila mu cilongesa cino?

⁴ Kaha kati mu suve makulukazi a vamuanetu va pangelele ha viMbetele vunoni va va hana vipanga vieka. * Mua vusunga ava vamuanetu va ku lihana, ce ku va kaluuila cikuma ku seza vipanga vi va lema. Vika vi hasa ku kuasa ku litombuesa vuino na ku aluluka ca viuma? Vati mu hasa ku va kuasa? Vikumbululo vievi vihula, vi hasa ku tu kuasa tu vose ku litombuesa vuino ku ku aluluka ca viuma mu muono.

5. Ku aluluka ca vipanga ci hasa ku tu kaluuila mu vinjila vika?

⁵ Cipue vaze ve ku pangela mu lihia ni ha Mbetele, ve ku putuka ku lema cikuma vantu ni vene cihela ci ve ku pangela. Ngeci mukemuo nga ku soloka vimo vi va sezesa cipanga caco, ve ku ivua ku vavala ca kama ku mitima. Kaha ve ku ivua vusona vua vamuanetu va ve ku seza, kaha ve ku lisosomua navo naua, cikuma-kuma nga va tundako omo lia ku va luisa. (Mat. 10:23; 2 Kol. 11:28, 29) Cikuavo naua, ce ku pua ca cikalu ku ka pangela ku cihela ca ciha, muomu ce ku tondeka naua ku litombuesa ku cisemua ceka. Eci cihasa ku tu solokela cipue nga tu hiluka kuimbo. Muanetu Robert na mpueyeni Mary Jo nguavo: “Tua suvile cisemua cetu cipue vene ku ambulula mu lilimi lietu lia cisemua. Mu ku linga tua ka kele ku cihela ceka mu ntsimbu ya kama. Tua puile ngue tu vakua cifuti ceka mu cifuti cetu.” Vamo vamuanetu ve ku tambula vipanga vieka, halumo ve ku tondeka ku landa vimo ka via kele mu vutumbe vuavo. Ve ku ivua limo liova na vusiua. Vika vi hasa ku va kuasa?

6. Vati tu hasa ku likuata vusamba vua kama na Yehova?

⁶ Likuatenu vusamba vua kama na Yehova. (Tia. 4:8) Vati tu hasa ku lingamo? Mu ku kulahela kuli “mukua ku ivua vivundilo.” (Visa. 65:2) Mbimbiliya nguayo “muanienu mutima uenu ku meso eni.” (Visa. 62:8) Yehova “a hasa ku linga mua ku pulakana cikumakuma mu ku hiana viose vize vi tu ku vundila nevi vi tu ku singanieka.” (Efe. 3:20) Yehova ke ku tu hana vize lika vi tu na mu vundila houe. A hasa ku linga viuma ka tua lavelelele, linga a manusule citanga cetu.

7. (a) Vika vi ka tu kuasa ku tualelelaho ku likuata vusamba vua kama na Yehova? (b) Kuliya na VaHevelu 6:10-12, nga tu tualelelaho ku pangela Yehova vika vi kezamo?

⁷ Linga mu tualeleleho ku likuata vusamba vua kama na Yehova, puenu na ku tanda na ku hilula Mbimbiliya matangua ose. Umo muanetu ua puile misionaliu ngueni: “Tualelenuho ku pua na ku lemesa mu vusoko na ku liviukisila viuano, ngue mu mua kele na ku linga mu cipanga cenu ca laza.” Kaha naua tualelenuho ku lihakela kapandi ka ku ambulula muzimbu ua cili mu cikungulukilo ci muli. Yehova ke ku suva vaze ve ku tualelelaho ku mu pangela, cipue nga kavesi naua na ku linga vize vi va  kele na ku linga laza.—Tandenu VaHevelu 6:10-12.

8. Vati mezi a ku 1 Yoano 2:15-17 a hasa ku mi kuasa ku tualelelaho ku yoya muono ua uasi?

⁸ Asiuisenu muono uenu. Kati mu tavese ku lisosomua na visoti via muno mu mavu a Satana vi ‘tsihe’ lutsilielo luenu. (Mat. 13:22) Kati mu pue na ku halakana ku vantu ka ve ku pangela Yehova, ni vavusamba cipue vavusoko, vaze va seteka ku mi kuasa mu ku mi leka nguavo mua pande ku liviukisila muono ua ku lutue mu ku tonda vimbongo via vingi. (Tandenu 1 Yoano 2:15-17.) Kulahelenu muli Yehova, uze ua kulahesa ku tu hana viose vi tua tondeka mu lutsilielo, mu visinganieka na ku muvila ha “ntsimbu” i via tondeka mpundu.​—VaHe. 4:16; 13:5, 6.

9. (a) Kuliya na Visimo 22:3, 7, vika ca puila ca seho ku liniunga ku makongo? (b) Vika vi hasa ku tu kuasa ku linga vihangula na mana?

⁹ Kati mu lihake ngoco mu makongo. (Tandenu Visimo 22:3, 7.) Ku nunguluka ce ku tondeka vimbongo via vingi, kaha ca casi ku uila mu ngandzo ya makongo. Ngeci mukemuo, linga kati mu lilundikile makongo a engi, kati mu pue na ku kongola ni nguetu ku levala vimbongo, mu ku landa viuma vize ka vi tondeka mpundu kuli yenu. Nga tuli mu visoti via kama, ngeci mua ku vavalesa kavusoko, ce ku pua ca cikalu ku hangula cingahi mpundu tu levala. Vunoni kati mu suve ngecize mu visoti ngeci muevi “ku vundila na ku lambelela” vi hasa ku tu kuasa ku linga cihangula ca mana. Yehova a ka kumbulula vivundilo vienu, mu ku mi hana ciyulo cize “ci ka niunga mitima yenu na visinganieka vienu.” Kaha evi vi ka lembamesa mutima uenu linga mu hase ku hangula viuma na civando.—Filp. 4:6, 7; 1 Pet. 5:7.

10. Vati tu hasa ku likuata vusamba na muntu?

¹⁰ Tualelelenuho ku likata na vantu va cili. Puenu na ku leka vavusamba venu vati muli na ku livua na visoti vi muli navio, cikumakuma vaze va hita mu visoti ngeci mua vienu. Ku lingamo, ci hasa ku mi lembezieka. (Ekel. 4:9, 10) Vavusamba va mua kele navo mu cipanga cenu, va ka tualelelaho ku pua vavusamba vuenu. Vunoni mu cipanga cenu ca ciha mua pande ku likuata naua vusamba na vamuanetu veka. Vulukenu ngecize nga mu tonda kavusamba noho nenu mu pue kavusamba. Vati mu hasa ku likuata vusamba na muntu? Puenu na ku leka vakuenu via vivezikiso vi mua kele navio mu cipanga cenu, linga va mone ndzolela i mua kala nayo mu ku pangela Yehova. Vamo mu cikungulukilo ka va kevuisisa vika mua lemena cipanga ca ntsimbu yose, vunoni vakuavo va ka lema lungano luenu na ku pua vavusamba vuenu. Vutuhu ngoco, zangamenu linga kati mu litsimanese enu vavene omo lia viuma vi mua puisamo mu vipanga via Yehova, ni  ku handeka cikuma via visoti vi muli na ku hita.

11. Vati mu hasa ku niunga ndzolela ya mu vulo vuenu?

¹¹ Nga mua tundile mu cipanga ca ntsimbu yose omo lia cihindu ca mukua ndzivo yenu, kati mu mu tuike mulonga. Kaha naua, nga yenu mpundu mua vavalele, kati mu livue mulonga nguenu yenu mua tundisisa mukua ndzivo yenu mu cipanga ca ntsimbu yose, houe. Vulukenu ngecize mua pua “ntsitu imo lika” kaha mua likuminyine ku meso a Yehova ngecize mu ka liniunga umo na mukuavo mu visoti viose. (Mat. 19:5, 6) Mua sile cipanga ca ntsimbu yose omo lia ku kala na kakeke ni? Vutuhu ka kele mu vutumbe vuenu, lingenu cose mu mu muese ngecize ua kala na seho ku hiana cipanga ci mua lingile. Puenu na ku leka muanenu ku sua kumo nguenu ua pua “cilunguiso” ca mi hana Yehova. (Visa. 127:3-5) Kaha puenu naua na ku mu leka via vimona via cili vi mua kele navio mu cipanga ca ntsimbu yose. Ku lingamo, ci ka vuisa muanenu cizango ca ku pangesa muono ueni mu cipanga ca ntsimbu yose ngue mu mua lingile yenu.

12. (a) Vati tu hasa ku kuasa vaze vali mu cipanga ca ntsimbu yose va tualeleleho? (b) Vati tu hasa ku va kuasa kuli litundisa vulungi?

¹² Ce ku vuisa ndzolela, ku mona ngecize vikungulukilo via vingi na vamo vamuanetu ve ku linga cose, mu ku kuasa vaze va kala mu cipanga ca ntsimbu yose linga va tualeleleho. Ve ku lingamo mu ku va kaniamesa va tualeleho ku linga vipanga viavo, ku va hana vimbongo ni vumo vukuasi vueka vua ku muvila cipue ku va kuasa ku niunga vavusoko vuavo va sala kuimbo. (Ngal. 6:2) Nga vamo vamuanetu va kele mu cipanga ca ntsimbu yose va na va tumu mu cikungulukilo cenu, kati mu singanieke nguenu ka va hasele vipanga vi va va  kundikile ni va pihisile vimo, houe. * Vunoni va kuasenu linga vulungi vu va fume vuasi. Va tambulenu na mavoko avali, na ku va sangala ku vipanga viavo, cipue nga visoti via cihindu vili na ku va huluisila mu nima. Lihakelenu kapandi ka ku va tantekeya vuino. Lilongesenu ku mana avo, vutongue vuavo na ku-hia cavo.

13. Vukuasi vuka tu hasa ku hana kuli vaze va ve ku tuma ku vihela vieka?

¹³ Ku vuputukilo vaze va ve ku tuma ku vihela vieka, va hasa ku tondeka vukuasi vuenu mu ku uana ndzivo ya ku kala, mendelo, vipanga, na vikuavo. Va hasa naua ku tondeka mizimbu, ngeci mua ku fueta lisimu, seguro na vikuavo. Viuma vi ve ku tondeka cikuma kati ngozi yenu lika, vunoni ku ivuisisa visoti viavo. Halumo ve ku pinda na cihindu cavo vavene, ni vuvezi cipue ku-tsa ca kavusoko. * Kaha vutuhu halumo ka va hasa ku mi lekavio, vunoni citava ve ku linienga vavusamba vavo va va seza ku cihela ci va ka pangelele. Mua vusunga, ku lembamesa visinganieka via cifua eci, ca cikalu kaha ce ku ambata ntsimbu.

14. Vati vamo vamuanetu va kuasele umo ndumbuetu ku tepulula vulungi?

¹⁴ Mu ntsimbu yaco, vukuasi na lungano luenu vi hasa ku va kuasa ku tepulula vuasi vulungi. Umo ndokazi ua ka pangelele miaka ya yingi ku cifuti ceka, ngueni: “Ku cihela ci nja kele na ku pangela laza, nja kele na ku endesa vilongesa via Mbimbiliya matangua ose. Vunoni ku cihela ca ciha, ca puile ca cikalu cipue vene ku uana lika muntu a tava ku mu fukuila Mbimbiliya ni ku mu lekesa video. Vamuanetu va ku cihela caco va kele na ku nji lania tuye mumo ku mangendzi avo a ku hilukila na vilongesa via Mbimbiliya. Ku mona vaze vamuanetu vendesa vilongesa via Mbimbiliya, ca nji kuasele ku mona ku ambuluila ku cihela caco mu njila ya cili. Kaha nja lilongesele mua ku putukila ku simutuila na vantu ku cihela cize. Viose evi via nji kuasele ku ivua naua ndzolela.”

15. Vati mu hasa ku tovalesa cipanga cenu ca ciha?

¹⁵ Mu hasa ku tovalesa cipanga cenu ca ciha. Kati mu singanieke nguenu ka mua lingile vuino cipanga ca laza ni muli na ku hilukila mu nima, houe. Singaniekenu ha vinjila via vingi via ali na ku mi kuaselamo Yehova na ku tualelelaho ku ambulula. Tambuluisenu Vakua Kilistu va ku sekulu ya ku livanga. Kuose ku va kele, “va hitanganene na ku ambulula lizi.” (Vili. 8:1, 4) Mu kapandi kenu ka ku ambulula mu hasa ku iza via cili. Ca ku muenako, vamo vapioneiro va va shekele mu cimo cifuti kaha va ile mu cifuti ceka ca ha hiehi, kuze kua tondekele cikuma vukuasi mu lilimi liavo. Mu vingonde via vindende lika, kua sokolokele vivunga via vingi.

16. Vati mu hasa ku uana ndzolela mu cipanga cenu ca ciha?

¹⁶ “Ndzolela ya Yehova ikeyo ngolo yenu.” (Neh. 8:10) Ndzolela yetu ya kama ya pande ku hitukila ha vusamba vuetu na Yehova, kati ha cipanga cetu, cipue nga tua ci lema cikuma. Ngeci mukemuo, tualelelenuho ku enda na Yehova na ku kulahela mu mana, vukuasi na ku tuamenena ceni. Vulukenu ngecize mua putukile ku lema cipanga cenu ca laza, muomu mua hakele mutima uenu ku ku kuasa vantu va keleko. Na vuno vene, hakenu mutima uenu ku cipanga cenu ca ciha, na ku mona cifua ca mi kuaselamo Yehova linga naco mu ci leme.​—Ekel. 7:10.

17. Vika tua pande ku vuluka ku tuala ha cipanga cetu lelo lino?

¹⁷ Tua pande ku vuluka ngecize tu ka pangela Yehova ku miaka yose, kaha cipanga ca tu hana lelo, halumo kati cikeco ca ka tu hana mu mavu a aha. Muanetu Aleksey, u tu na tumbuile ku vuputukilo ngueni, ku aluluka ca cipanga ceni mu ntsimbu ino, ci li na ku mu vuahesela via ku lutue. Ivene ngueni: “Vutuhu Yehova na mavu a aha via puile via vusunga kuli yange, vunoni via solokele ngue via kala ku laako kamandende. Lelo lino nje ku mona Yehova na meso ange a mu lutsilielo. Na ku mona nguange mavu a aha ali ha hiehi cikuma. (Vili. 2:25) Ngeci mukemuo cipue nga cipanga ci tua tambula ca fua vati, tu tualelelenuho ku enda na Yehova. Muomu na limo litangua liahi a ka tu seza, kaha a ka tu kuasa ku uana ndzolela mu cipanga ci tu linga mu lukungulukilo lueni.—Isaya 41:13.