VUNO kuli cimo citeli ci mua lema ku linga mu cikungulukilo, vunoni mu ntsimbu ino ka citava ni? Halumo citeli caco ca kala ku muntu ueka. Ni halumo ca kele kuli yenu laza. Vunoni ka citava ku ci linga omo lia miaka yenu, cihindu cenu, visoti via mu muono, ni viteli via mu vusoko. Ni halumo mua likela ku linga cimo cipanga ci mua lingile mu miaka ya yingi, omo lia ku aluluka ca viuma mu lukungulukilo. Viose-ovio via mi kuika ku puisamo nkala citeli, mu hasa ku livua ngecize ka muesi naua na ku linga viose vi mu hasa mu vipanga via Njambi. Nga muli na ku hita mu viuma via cifua eci, mua vusunga, vintsimbu vimo mu hasa ku ivua vusiua. Vutuhu ngoco, vati mu hasa ku vindika visinganieka via ku pihia ngeci mua, vusiua, ku liveya ni nkulundundu, linga kati vi tande mizi mu mutima uenu? Kaha vati mu hasa ku niunga ndzolela yenu?

Tu hasa ku lilongesa mua ku niungila ndzolela yetu mu ku tala ku lungano lua Yoano Mukua ku Mbatiza. Ou Yoano ua kele na viteli via ku lifuila, kaha halumo ua lavelele ngecize muono ueni u kenda vuino mu vipanga via Yehova. Halumo ka singaniekele ngueni a ka kala mu kamenga ntsimbu ya ingi ku tuvakana mu cipanga ceni ca ku ambulula. Vutuhu ngoco, Yoano ua tualeleho ku muesa ndzolela, kaha ua muesele eci cifua mu muono ueni uose. Vika via mu kuasele? Kaha vati tu hasa ku niunga ndzolela yetu nga tu hita mu visoti vi lavesa ku mutima?

Mu Abril ya 29 T.K.N., Yoano ua putukile cipanga ca mu hanene Yehova, ca ku viukisila vantu via ku-iza ca Mesiya, ngueni: “Aluluisenu mitima; muomu vuli mu hiehi Vuangana vua muilu.” (Mat. 3:2; Luka 1:12-17) Kaha vavengi va tavele muzimbu ueni. Muomu kua kele viendo via vantu va kele na ku tunda ku vihela via ku laako, linga va ku halakane muzimbu ueni, kaha cingi cavo va tavele ku aluluka na ku va mbatiza. Yoano ua lunguile naua vakuluntu va malombelo, vaze va kele na ku limona ngue vakua vuviuke, ngueni, cihiso cavo ca kele ha hiehi. (Mat. 3:5-12) Cipanga ceni ca hetele ha ntuitui mu Outubro ya 29 T.K.N. mua mbatizile Yesu. Tunde haze, Yoano ua kele na ku leka vantu vose va kave Yesu, muomu ikeye Mesiya u va kulahesele.​—Yoa. 1:32-37.

Omo lia citeli ca ku lifuila ca tambuile Yoano, Yesu ua handekele ngueni: “Ha kati ka vaze va na semuua ku vampuevo, ka kua semukile umo ua ku hiana Yoano mukua ku mbatiza.” (Mat. 11:11) Mua vusunga, Yoano ua vuile ndzolela omo lia vivezikiso via tambuile. Kaha ngeci mua Yoano, vamuanetu  vavengi lelo ve ku tambula vivezikiso via kama kuli Njambi. Ca ku muenako, umo muanetu ua lizina Terry na mpueyeni Sandra va kala mu cipanga ca ntsimbu yose mu miaka i tuvakana 50. Muanetu Terry ngueni: “Nja tambula viteli via cili via vingi. Nja puile pioneiro, mukua Mbetele, pioneiro ua ku lifuila, kaniungi ua ku zinguluka, kaniungi ua muhato, kaha mu ntsimbu ino nja hilukila naua mu vupioneiro vua ku lifuila.” Ku tambula viteli mu lukungulukilo ce ku vuisa ndzolela ya kama. Vunoni ngue mu tu lilongesa ku lungano lua Yoano, ku tualelelaho ku muesa ndzolela ca tondeka ku lihakela kapandi, muono uetu u na aluluka.

Cuma ca kama ca kuasele Yoano mukua ku mbatiza ku niunga ndzolela yeni, ca puile ku tualelelaho ku muesa ku santsela ku viteli via tambuile. Ca ku muenako, mu nima ya ku mbatiza Yesu, cipanga ca ku ambulula ca Yoano ca putukile ku tepuluka kaha ca Yesu ca putukile ku livuezelela. Vandongesi va Yoano va lisosomuene nevi, ngeci va ile kuli Yoano nguavo: “Tala, [Yesu] a li na ku mbatieza, kaha vose va li na ku iza kuli ikeye.” (Yoa. 3:26) Kaha Yoano ua kumbuluile ngueni: “Uze a li na ntsombola ikeye ivene vulo: vunoni kavusamba ka ivene vulo, a mana na ku mu ivua, a zolela cikuma muomu lizi lia ivene vulo: ndzolela eyi yange i na pumo.” (Yoa. 3:29) Yoano ka kele na ku lituala ha matunta na Yesu. Kaha Yoano ka singaniekele ngecize cipanga ca Yesu ci na tepulula seho ya cipanga ceni, houe. Vunoni ua tualeleleho ku haka seho ku cipanga ceni ca ku pua “kavusamba ka ivene vulo.”

Cifua ca muenenemo viuma Yoano, ca mu kuasele ku tualelelaho ku kala na ndzolela vutuhu cipanga ceni ka ca puile ca casi. Ca ku muenako, Yoano ua puile kaNazileu tunde ha ku semuka ceni kaha ka pandele ku makela ku viniu. (Luka 1:15) Ku tuala ha ku asiua ca muono ua Yoano, Yesu ua handekele ngueni omo “Yoano uezile, ikeye ka lile ka nuine.” Vunoni Yesu na vandongesi veni ka va puile vaNazileu, ngeci ka va kele na vizila, kaha va yoyele ngeci mua mbunga yose. (Mat. 11:18, 19) Cikuavo naua, vutuhu Yoano ka lingile na cimo cikomoueso cahi, vunoni ua tantekeyele ngecize vaze va puile laza vandongesi veni hamo lika na vandongesi va Yesu, va tambuile ngolo ya ku linga vikomoueso. (Mat. 10:1; Yoa. 10:41) Vutuhu ngoco, Yoano ka tangukile na vize ka hasele ku linga, vunoni ua tualeleleho ku puisamo cipanga ca mu hanene Yehova.

Nga netu tu haka seho ku cipanga ci tuli naco vuovuno mu vipanga via Yehova, tu hasa ku niunga ndzolela yetu. Muanetu Terry ngueni: “Nja kele na ku tuala mana ku nkala cipanga ci nja tambuile.” Kaha ua handekele, naua ngueni, “mu nje ku singanieka ha muono uange, ka nje ku liveya, ndzolela lika nje ku ivua.”

Tu hasa ku vueza ku ndzolela yetu mu cipanga ca Yehova, nga tu hilula ha vika mpundu vie ku lingisa nkala cipanga mu lukungulukilo ku pua ca seho. Vie ku lingisa nkala cipanga mu lukungulukilo ku pua mpundu ca seho, via pua muomu ku ci linga ca pua ku pangela hamo na Yehova ni nguetu ku pua “vangamba kumo na Njambi.” (1 Kol. 3:9) Ca ku muenako, citenga ca ku viakula ce ku tualelelaho ku viakula nga tu ci niunga vuino. Na vuno vene ku hilula ha ku vezika ci tua kala naco mu ku panga na Yehova, ce ku tu kuasa ku tualelelaho ku kala na ndzolela. Kaha ka tu ka setekesa vize vi tue ku hasa ku linga na vize vi ve ku linga vakuetu. Cikuavo naua, ka tu ka singanieka nguetu vipanga vietu ka via puile via seho, omo lia cifua ca vipanga vi ve ku linga vakuetu.—Ngal. 6:4.

Vutuhu halumo Yoano ua tantekeyele ngecize cipanga ceni ka ci ka tualelelaho mu ntunda ya kama, vunoni halumo ka tantekeyele ngecize va ka mu vatuisilaco vene ku cavua-cavua. (Yoa. 3:30) Mu muaka ua 30 T.K.N, Yoano va mu sokele mu kamenga kuli Muangana Helonde, tele mu na hiti lika vingonde 6 tunde ha mbatizilile Yesu. Vutuhu ngoco, Yoano ua tualeleleho ku lingako vize via hasele, mu cipanga ceni. (Mako 6:17-20) Vika via mu kuasele ku niunga ndzolela yeni mu cisoti eci? Ua tualele mana ku viuma via mu lutsilielo.

Yoano mua kele mu kamenga, ua tambuile mizimbu ya ku livuezelela ca vipanga via Yesu. (Mat. 11:2; Luka 7:18) Kaha ua kele na vusunga ngecize Yesu ikeye vene Mesiya u va kulahesele, vunoni halumo ka tantekeyele vati Yesu a ka puisamo vupolofeto vuose vua handekele vieni mu Visoneka. Halumo ua kele na vihula ngeci mua: ‘Mu ku linga Mesiya a ka pua Muangana, vuno a putuka ku sika mu ntsimbu  ino vene ni? Nga mukemuo, vuno a ku nji patula mu kamenga ni?’ Mu ku linga ua tondele ku ivuisisa vuino vipanga via Yesu, Yoano ua tumine vandongesi veni vavali va kehule Yesu, nguavo: “Yove vene uze u li ku iza, ni tu ka lavelela ueka?” (Luka 7:19) Kaha Yesu ua va hiluisile ngueni: “Hamenu mu ka leke Yoano viuma evi mu na mono nevi vi mu nevu; tupuputa vemuka, vilema venda, vakua mbumba va lela, tusindamatuitui vevua, vatsi va sanguka, kaha vahutu va va zimbuila zimpande zia cili.” (Luka 7:20-22) Mua vusunga, mu va hilukile, citava Yoano ua va halakanene vuino mu va kele na ku mu lomboluela via vikomoueso via Yesu.

Cili vene muzimbu u va mu nehelele vandongesi veni, ua mu kaniamesele. Muomu ua mu hanene vusunga ngecize Yesu ali mpundu na ku puisamo vupolofeto vua handekele via Mesiya. Vutuhu ku soloka ca Yesu ka lingisile Yoano ku patuka mu kamenga, vunoni Yoano ua tantekeyele ngecize ku fuitangana ceni ka ca ile mu ngoco. Vutuhu ua kele mu visoti, vunoni ua kele na vusunga vua mu lingisile ku ivua ndzolela.

Ngeci mua Yoano, nga tu pua na ku tuala mana ku viuma via mu lutsilielo, tu hasa ku simpa na ku niunga ndzolela yetu, ambe nga tu hita mu visoti. (Kolo. 1:9-11) Kaha tu hasa ku lingamo, mu ku tanda Mbimbiliya na ku hilula ha vize vi tue ku tanda. Evi vi ka tu vuluisa ngecize vipanga vietu mu lukungulukilo lua Yehova ka vi ka ya mu ngoco. (1 Kol. 15:58) Ndumbuetu Sandra ngueni: “Ku tanda kapitulu kamo ka mu Mbimbiliya mu litangua, ca nji kuasa ku likuata vusamba vua kama na Yehova. Ce ku nji kuasa ku tuala mana kuli ikeye, kati kuli ange ivene.” Tu hasa naua ku tuala mana ku muzimbu ua vipanga vi luli na ku puisamo lukungulukilo. Ku lingamo, ci ka tu kuasa ku tundisa mana ku visoti vietu na ku a tuala ku viuma via li na ku linga Yehova. Ndumbuetu Sandra naua, ngueni: “Viprograma via nkala ngonde via mu JW Broadcasting^® vie ku tu kuasa ku livua ngue tuli ha hiehi na vamuanetu mu mavu ose. Ce ku tu kuasa naua ku tualelelaho ku kala na ndzolela mu cipanga cetu.”

Vutuhu Yoano Mukua ku Mbatiza ua ambuluile mu ntsimbu ya indende, vunoni ua ambuluile na “cimbembesi na ngolo via Eliya.” Kaha ngeci mua Eliya, Yoano “ua puile muntu mukua vifua ngue vietu.” (Luka 1:17; Tia. 5:17) Mua vusunga, nga tu tambuluisa lungano lueni lua ku muesa ku santsela na ku tuala mana ku viuma via mu lutsilielo, netu tu hasa ku tualelelaho ku kala na ndzolela mu nkala vipanga vi tue ku linga mu lukungulukilo. Ambe nga tu ka hita mu visoti via kama.