1. Omo lia vika tua pande ku liviukisila ku tu luisa?

MU KUA lisupile vutsiki vumo lika tele kanda va mu tsihe, Yesu ua handekele ngecize vose va hangula ku pua vandongesi veni, va ka va zinda ku vantu. (Yoa. 17:14) Na lelo lino, Vakaleho va Yehova ve ku va yandesa kuli vakua ku luisa vusunga. (2 Tim. 3:12) Kaha omo ku kotoka ca mavu ci ya na ku suena, ku tu luisa naco ci ya na ku livuezelela.—Mat. 24:9.

2-3. (a) Vika tua pande ku tantekeya ku tuala ha liova? (b) Vika tu lilongesa lelo?

² Vati tu hasa ku liviukisila linga tu ka kolese mu ntsimbu i va ka tu luisa? Ka ci tondeka ku seteka ku singanieka mapakeso ose a tu ka lihita nao. Ku lingamo, ci ka tu umisa ngoco mutima na ku tu vuisa liova. Ci hasa ku tu lingisa naua tu ecelele vieseko vi tu na singanieka lika vi tu vule, ntsimbu vieseko mpundu kanda vi hete. (Visi. 12:25; 17:22) Liova lia pua cimo citua ca kama ce ku pangesa ‘citozi cetu, Satana’ mu ku tu luisa. (1 Pet. 5:8, 9) Vika tu hasa ku linga tu likaniamese etu vavene mu ntsimbu ino?

³ Mu cilongesa cino, tu lilongesa vati tu hasa ku kaniamesa ku likata cetu na Yehova kaha na seho ya kala ha ku lingamo mu ntsimbu ino vene. Tu simutuila naua vi tu hasa ku linga mangana tu kaniamese ku simpa cetu. Kaha mu ku manusuila tu hilula vi tua pande ku linga nga va tu luisa.

4. Kuliya na VaHevelu 13:5, 6, vusunga vuka tua pande ku kala navuo, kaha omo lia vika?

⁴ Kalenu na vusunga ngecize Yehova ua mi lema kaha na limo litangua liahi a ka mi seza. (Tandenu VaHevelu 13:5, 6.) Miaka ya yingi ku nima, vumo Vutala vua handekele nguavuo: “Muntu  a tantekeya vuino Njambi, ue ku kulahela cikuma muli Njambi mu ntsimbu ya vieseko.” Cili vene, linga tu hase ku kolesa nga va tu luisa, tua pande ku lema Yehova na ku kulahela mu vutuntu muli ikeye kaha na ku kala na vusunga ngecize Yehova ua tu lema.—Mat. 22:36-38; Tia. 5:11.

5. Vika vi ka mi kuasa ku ivua cilemo ca Yehova?

⁵ Puenu na ku tanda Mbimbiliya nkala litangua na vutumbe vua ku kaniamesa vusamba vuenu na Yehova. (Tia. 4:8) Omo mu tanda Mbimbiliya, puenu na ku tuala mana ku vifua via Yehova. Setekenu ku ivua cilemo ceni mu viuma vie ku handeka na ku linga. (Ezu. 34:6) Vamo ce ku va kaluuila ku tava ngecize Njambi ua va lema, muomu kanda va ci va muese cilemo ku muntu na umo uahi. Nga nenu ce ku mi kaluuila, nkala litangua puenu na ku seteka ku tanda viuma viose vie ku linga Yehova mu ku muesa cikeketima na ngozi yeni kuli enu. (Visa. 78:38, 39; Loma 8:32) Mu ku hituluka mu viuma vi mue ku limuena na ku hilula ha vize vi mue ku tanda mu Lizi lia Njambi, citava mu ka hasa ku tanda viuma via vingi via mi lingila Yehova. Omo mu tualelelaho ku mona vie ku linga Yehova, vusamba vuenu neni vu ka kola cikuma.—Visa. 116:1, 2.

6. Kuliya na Visamo 94:17-19, vati ku vundila na mutima uose ci hasa ku mi kuasa?

⁶ Puenu na ku vundila ku sua kumo. Aci singaniekenu kanike ali ha mavoko a va ise. Kanike ue ku ivua ku zituka ca ku linga ue ku handeka viose via mu solokela mu litangua lize cipue via cili ni via ku vihia. Nenu mu ka likata na Yehova mu njila eyi, nga mu tualelelaho ku vundila kuli ikeye nkala litangua. (Tandenu Visamo 94:17-19.) Omo mu vundila, puenu na ku ‘muania mutima uenu ngue mema’ kuli Isuenu ua muilu na ku mu leka viose vie ku mi umisa mutima na ku mi vuisa liova. (Vinie. 2:19) Vika vi kezamo? Mu kevua vi ya luka Mbimbiliya nguayo “ciyulo ca Njambi cize ca hiana mana ose.” (Filp. 4:6, 7) Omo mu tualelelaho ku vundila mu cifua eci, mu kevua ngecize vusamba vuenu na Yehova vuli na ku kaniama.—Loma 8:38, 39.

7. Omo lia vika tua pande ku kala na vusunga ngecize vikulaheso via Njambi tangua vi ka lipuisamo?

⁷ Kalenu na vusunga ngecize vivezikiso via Vuangana vua Njambi vi ka lipuisamo. (Num. 23:19) Nga lukulahelo luenu mu vikulaheso via Njambi lu na zeye, ci ka pua ca casi kuli Satana na vantu veni ku mi vuisa liova. (Visi. 24:10; VaHe. 2:15) Vati mu hasa ku kaniamesa lukulahelo luenu mu Vuangana vua Njambi? Mu ku lilongesa mu vulika ni mu ku lemesa mu vusoko, hangulenu limo litangua lia ku lilongesa vikulaheso via Njambi, na viuma vi mi hana vusunga ngecize tangua vikulaheso viaco vi ka lipuisamo. Vati vi ka mi kuasa? Tu hilulenu via muanetu Stanley Jones, va mu sokele mu kamenga omo lia lutsilielo lueni. * Vika via mu kuasele ku kolesa? Ivene ngueni: “Lutsilielo luange lua kaniamene muomu nja kulahelele mu vivezikiso via vuangana vua Njambi, ka nja  kele na vimpata na vimo viahi, ngeci na umo uahi ua hasele ku nji tundisa kuli Yehova.” Nga mu kala na lutsilielo lua kama mu vikulaheso via Njambi, vusamba vuenu na Yehova vu ka kaniama kaha ka mu ka hilukila mu nima omo lia liova.—Visi. 3:25, 26.

8. Cifua ci tue ku muenamo viuano ca pua citantekeyeso ca vika? Lombololenu.

⁸ Puenu na ku kunguluka ntsimbu yose. Viuano vie ku tu kuasa ku kaniamesa vusamba vuetu na Yehova. Cifua ci tue ku muenamo viuano, ca pua citantekeyeso ci tu kuasa ku mona nga ku lutue tu ka hasa ku kolesa omo va ka tu luisa ni kuahi. (VaHe. 10:24, 25) Omo lia vika? Nga tu tavesa nkala koma kandende ka tu tangule kuya mu ku kunguluka mu ntsimbu ino, vuno tu ka hasa kuyako mu ntsimbu i ci ka pua vusonde ku likungulula ni? Vunoni nga tu linga litavasiano na mutima uetu, lia ku pua na ku kunguluka ntsimbu yose, ka tu ka likela cipue nga vakua ku tu luisa va ka tu vindika ku likungulula. Mua vusunga ino ikeyo ntsimbu ya ku lilongesa ku lema viuano vietu. Muomu nga tu lema ku likungulula, na cimo ku-luisa cahi, cipue vene ca nguvulu, ci ka hasa ku tu lingisa ku likela ku ononoka Njambi ha katete.—Vilinga 5:29.

9. Omo lia vika ku patekela vimo vinimbu ca pua njila ya cili ya ku liviukisila ku tu luisa?

⁹ Patekeyenu vinimbu vi mua lema cikuma. (Mat. 13:52) Vutuhu vuongo vuetu ka vua tantulukile, vunoni Yehova a hasa ku pangesa sipilitu santu yeni mu ku tu kuasa ku vuluka vinimbu via mu Mbimbiliya vi tua patekeyele. (Yoa. 14:26) Umo muanetu va mu sokele mu kamenga ku Alemanha Oriental, kaha mu ntsimbu imo va mu hakele mu kaliavuoso, ua handekele ngueni: “Nja viukilile cikuma muomu tele nja lilongesa na ku patekela vinimbu vi tuvakana 200 via mu Mbimbiliya!” Mu ku linga nja kele ngoco nevi via ku linga viahi, nja kele na ku singanieka ha vimpande via vingi via mu Mbimbiliya.” Vinimbu viaco via kuasele uze muanetu a kakatele kuli Yehova na ku kolesa mu ceseko cize.

10. Omo lia vika tua pande ku patekeya miaso?

¹⁰ Lihakelenu kapandi ka ku patekeya na ku imba miaso yetu. Omo Paulu na Silase, va va hakele mu kamenga ku mbonge ya Filipu, vembile miaso i va patekeyele. (Vilinga 16:25) Kaha vati vamuanetu va ku União Sovietika ya laza va likaniamesele umo na mukuavo mu va va tualele ku Siberia? Ndokazi Mariya Fedun a vuluka ngueni: “Tuembile miaso i tua patekeyele, ya mu mukanda ua miaso. Miaso yaco ya  tu kaniamesele na ku tu vuisa ngecize Yehova ali netu.” Nenu ce ku mi kaniamesa ku imba miaso ya mu lutsilielo i mua lema cikuma ni? Nga mukemuo, kaha patekeyenu miaso yaco mu ntsimbu ino vene!—Talenu mu cikasa “ Nji Hane ku Simpa.”

11-12. (a) Kuliya na 1 Samuele 17:37, 45-47, vika via kuasele Ndaviti ku simpa? (b) Cuma cika ca seho tu lilongesa kuli Ndaviti?

¹¹ Linga mu hase ku kolesa nga va mi luisa, mua tondeka ku simpa. Vatico nga mu livua ngecize ka mua puile va ku simpa, vati mu linga? Vulukenu nguenu ku simpa ca vusunga ka ca hitukilile ha ku tuntuka ni ku keha ca muvila uenu, cipue ha ngolo yenu ni vutongue vuenu, houe. Aci singaniekenu ha lungano lua Ndaviti omo ua luile na Ngoliata. Ndaviti nga tu mu setekesa na Ngoliata, ku laako laako. Ndaviti ua puile ua mundende, ka kele na ngolo ya kama, kaha naua ka kele na vitua via kama, cipue vene mukuale ka kele nauo. Mua vusunga Ngoliata ua mu hianene mu viose. Vunoni Ndaviti ua puile ua ku simpa. Ua tuntilile kuli Ngoliata na ku simpa cose mu ku mu luisa.

¹² Vika via simpisile Ndaviti ngecize? Muomu ua kele na vusunga mpundu ngueni Yehova ali neni. (Tandenu 1 Samuele 17:37, 45-47.) Ndaviti ka tualele mana ku vukama vua Ngoliata mu ku lisetekesa neni, vunoni ua tualele mana ku vundende vua Ngoliata mu ku mu setekesa na Yehova. Vika tu lilongesaho? Tu pua va ku simpa, nga tu kala na vusunga ngecize Yehova ali netu kaha vakua ku tu luisa ka vesi na ndzili ku hiana ikeye muomu ua pua Mukua Ngolo Yose. (2 Miz. 20:15; Visa. 16:8) Vati tu hasa ku pua va ku simpa mu ntsimbu ino vene, omo kanda va putuke ku tu luisa?

13. Vati tu hasa ku kaniamesa ku simpa cetu? Lombololenu.

¹³ Tu hasa ku simpa mu ntsimbu ino mu ku ambuluila ku mbunga muzimbu ua cili vua Vuangana vua Njambi. Omo lia vika? Muomu ku ambulula ce ku tu longesa ku kulahela muli Yehova na ku vula nkala liova lia vantu. (Visi. 29:25) Ku linga vueho vua ku lihondolola ce ku kaniamesa muvila, na vuno vene ku ambulula mu vifua viose, ngeci mua, ku ambulula ca ku tulukua, ku ndzivo na ndzivo, ku vihela via mbunga, na ku vihela via mingoso, ce ku kaniamesa ku simpa cetu. Nga tu kaniamesa ku simpa cetu mu ntsimbu ino, ku hitila mu cipanga ca ku ambulula, tu ka hasa ku tualelelaho ku ambulula cipue mu ntsimbu i va ka vindika vipanga vietu.—1 Tes. 2:1, 2.

14-15. Vika tu lilongesa kuli vandumbuetu Nancy na Valentina?

 ¹⁴ Tu hasa ku lilongesa via vingi kuli vamo vandumbuetu vavali va muesele ku simpa ca ku lifuila. Ndumbuetu Nancy Yuen ua puile ua muihi (1,5 m), vunoni ua puile ua ku kaluka. * Ua vianene ku mu vindika ku ambulula muzimbu ua cili ua Vuangana vua Njambi. Ngeci va mu kuatele na ku mu tomena miaka 20 mu kamenga ku China. Vakua nguvulu va mu sompesele va handekele nguavo “mpuevo uaco ikeye mukua vimpata cikuma” mu cifuti cose.

¹⁵ Ndumbuetu Valentina Garnovskaya neni ua hitile mu ceseko ca cifua eci. Va mu tualele mu kamenga lutatu luose kuli vakua Uniao Sovietika ya laza. Ku pandakana miaka yose ya kele mu kamenga, i heta ku miaka 21. * Omo lia vika? Vutuhu tele cipanga cetu va ci vindika, ndumbuetu Valentina ua lihakelele kapandi ka kama ka ku ambulula ngeci vakua masiko va mu lukile nguavo “citozi ua vusonde vua kama.” Kulihi ava vandumbuetu va uanene ku simpa ca kama ngecize? Va simpile muomu va kele na vusunga ngecize Yehova ali navo.

16. Lihungu lika tua pande ku kava linga tu kale na ku simpa ca vusunga?

¹⁶ Ngue mu tua simutuila, linga tu kaniamese ku simpa cetu, ka tua pandele ku tuala mana ku ngolo yetu na vutongue vuetu. Vunoni, tua pande ku tsiliela ngecize Yehova ali netu kaha ikeye ue ku tu luila. (Ndeu. 1:29, 30; Zak. 4:6) Eli likelio lihungu li tu kuasa ku kala na ku simpa ca vusunga.

17-18. Ngue mu ya muesa Yoano 15:18-21, cimamuna cika ua tu hanene Yesu? Lombololenu

¹⁷ Muntu uose ua lema ku mu singimika ku vakuavo. Vunoni etu va tu zinda. Vutuhu ngoco, ka tua pandele ku uila mu ngandzo ya ku limona vulinge vua ngoco omo lia ku tu zinda ku vantu, houe. Yesu ua handekele ngueni: “Yenu mua vezika, omo vantu va ka mi zinda, nomo va ka mi hangununa ha kati kavo, na ku mi sahula, na ku mbila kuti lizina lienu ngue lia lipi, muomu Muana muntu.” (Luka 6:22) Vika a lomboloka aa mezi a Yesu?

 ¹⁸ Yesu ka handekele ngueni Vakua Kilistu va ka lema ku va zinda ku vantu houe. Vunoni ua kele na ku tu lomboluela viuma vi ka tu solokela. Mu ku linga, ka tua puile vakua mavu kaha tue ku ononoka vilongesa via Yesu mu muono na ku ambulula muzimbu ua ambuluile ikeye, ngeci vakua mavu va tu zinda. (Tandenu Yoano 15:18-21.) Tua tonda kuya Yehova ku mutima. Kaha nga vantu va tu zinda omo lia ku lema Tatetu ua muilu, ovio viavo.

19. Vati tu hasa ku tambuluisa lungano lua vapostolo?

¹⁹ Kati mu tavese nkala vilinga ni vihandeka via vantu vi mi vuise ntsuama ya ku pua Mukaleho ua Yehova. (Mika 4:5) Tu hasa ku lilongesa mua ku lingila liova lia vantu mu ku hilula ha viuma vi va lingile vapostolo mu Yelusalema, mu nima ya matangua a andende tunde ha ku-tsa ca Yesu. Vapostolo va tantekeyele ngecize va va zindile cikuma kuli vakuluntu va vulombelo vua vaYundeya. (Vilinga 5:17, 18, 27, 28) Vunoni matangua ose va kele na kuya ku tembele na ku lisolola ku mbunga ngecize va pua vandongesi va Yesu. (Vilinga 5:42) Ka va tavele ku hilukila mu nima omo lia liova. Netu tu hasa ku vula liova lia vantu mu ku lisolola ntsimbu yose nguetu tu Vakaleho va Yehova, cipue ku vipanga, ni ku sikola ni ku vantu va tua tunga navo.—Vilinga 4:29; Loma 1:16.

20. Omo lia vika vapostolo va vuile ndzolela vutuhu vantu va va zindile?

²⁰ Vika via lingisile vapostolo ku ivua ndzolela? Va tantekeyele ngecize va va zindile omo lia ku linga cizango ca Yehova kaha kuli vakevo ca puile kavumbi ka kama ku va zinda omo lievi. (Luka 6:23; Vilinga 5:41) Mu nima ya ntsimbu kapostolo Petulu ua sonekele ngueni: “Cipue nga mu ka yanda omo vuviuke, mu na vezika.” (1 Pet. 2:19-21; 3:14) Nga tu ivuisisa ngecize vantu va tu zinda omo lia ku linga via cili, ka tu ka tavesa vizindo via vantu vi tu vuise liova ni ku tu hiluisila mu nima.

21-22. (a) Vika mu hasa ku linga vuovuno mangana mu liviukisile omo ku-luisa kanda ci ize? (b) Vika tu ka lilongesa mu cilongesa ci na hatako?

²¹ Ka tu tantekeya tangua lika ku tu luisa ci keza ni tangua lika nguvulu i ka vindika vipanga vietu. Vunoni tu tantekeya ngecize tua pande ku kaniamesa vusamba vuetu na Yehova mu ntsimbu ino, mu ku lilongesa ku simpa, kaha na ku lilongesa mua ku vulila liova lia vantu. Mua vusunga ku liviukisila vuovuno ci ka tu kuasa ku takama ku lutue.

²² Vati co nga nguvulu i tu vindika ku lemesa Yehova? Mu cilongesa ci na hatako, tu ka lilongesa vitume vi ka tu kuasa ku tualelelaho ku pangela Yehova ambe nga vipanga vietu va na vi vindika.