1. Cimamuna cika kapostolo Paulu ua tumine ku Vakua Kilistu va ku vuavesa?

“KATI mu lifuise na viuma via ntsimbu ino.” (Loma 12:2) Kapostolo Paulu ua sonekelele aa mezi kuli Vakua Kilistu va ku livanga. Vika honi ua tuminine cimamuna ca kama ngoco kuli vamuanaye va ku vuavesa?​—Loma 1:7.

2-3. Vati Satana ue ku seteka ku tu tundisa kuli Yehova, vunoni vati tu hasa ku vula vilinga cipue visinganieka via tu sata ngo mu mitima?

² Paulu ua lisosomuene cikuma, muomu vamo Vakua Kilistu va kele na ku tanguka na visinganieka na vilongesa via ku vihia vi va kele na ku sambeya vakua mavu. (Efe. 4:17-19) Evi vi hasa ku lingika kuli nkala muntu ha kati ketu. Mu ku tonda ku tu tundisa kuli Yehova, Satana uze ua pua njambi ua mavu ano, ue ku pangesa miheto ya ku liseza-seza. Ca ku muenako nga tua tonda ku tsimana, Satana a hasa ku tu kuatela ku cifua caco linga a tu tundise kuli Yehova. A hasa vene na ku pangesa viuma ngeci mua cifua ci tua kolelamo, cisemua cetu ni viuma vi tua lilongesa ku sikola linga a tu lingise ku kava visinganieka vieni.

³ Vuno citava tu litundise vilinga cipue visinganieka via tu sata ngo ku mitima ni? (2 Kol. 10:4) Paulu ua kumbuluile eci cihula ngueni tu hasa “ku zimangana matumbe na viose vimpaka via laha vi va tungila mu ku vindika ku tantekeya Njambi na ku [puisa] vindzinda visinganieka viose linga vi ononoke kuli Kilistu.” (2 Kol. 10:5) Na vukuasi vua Yehova tu hasa ku  vula visinganieka via ku vihia. Ngeci mua vihemba vize vi hasa ku tsiha ndzili ya vusungu, Lizi lia Njambi li hasa ku tu kuasa ku vula visinganieka via vusungu via mu mavu a Satana.

4. Vika tua aluluile mu muono uetu mu tua lilongesele vusunga?

⁴ Aci singaniekenu ha viuma vi mua pandele ku alulula mu muono mu mua lilongesele vusunga na ku hangula ku pangela Yehova. (1 Kol. 6:9-11) Tue ku santsela cikuma ku vukuasi vue ku tu hana Yehova mu ku vula vilinga via ku vihia!

5. Kuliya na Loma 12:2, viuma vika vivali tua pande ku linga?

⁵ Vunoni ka tua pandele ku singanieka ngecize tua aluluka laza mu vutuntu. Vutuhu tua likela ku linga vupi vu tua kele na ku linga tele kanda tu lilongese vusunga, kasi tua pande ku tualelelaho ku linga cose mu ku viana viose vize vi hasa ku tu hiluisila ku vilinga via laza. Vati tu hasa ku lingamo? Paulu ua kumbuluile naua ngueni: “Kati mu lifuise na viuma via ntsimbu ino: vunoni lialuluisienu na mitima ya iha.” (Loma 12:2) Ngeci mukemuo tua pande ku linga viuma vivali. Ha katete tua pande ku likela ku ‘lifuisa’ ku viuma via ntsimbu ino. Ca mu civali, tua pande ku ‘aluluisa mitima yetu.’

6. Vika tu lilongesa ku mezi a Yesu a ku Mateo 12:43-45?

⁶ Ku aluluka ca tumbuile Paulu kati ku aluluka ca helu-helu lika houe. Ca kuata ku mitamba yose ya muono uetu. (Talenu mu cikasa “ Ku Himpuka Mpundu ni ku Lialuluisa ca Helu-helu Lika?”) Tua pande ku alulula mutima uetu mu vutuntu. Mutima uemanena vika? Uemanena visinganieka vietu, cifua ci tue ku livuilamo na vizango vietu. Ngeci mukemuo, tu vose tua tondeka ku lihula nguetu, ‘Vuno ku aluluka ci nje ku linga mu ku pua Mukua Kilistu ca helu-helu lika, ni mu vutuntu mpundu?’ Muomu ha na pande ku kala ku litepa.  Yesu ua lomboluele vati tu hasa ku lingamo ku Mateo 12:43-45. (Tandenu.) Mezi a Yesu a tu longesa ovu vusunga vua seho ya kama: ku aluluka ka ca lengelele lika ha ku litundisa visinganieka via ku vihia; vunoni mupulungua uaco tua pande ku u sulisa na visinganieka vize vie kuya Njambi ku mutima.

7. Vati tu hasa ku alulula vuntu vuetu?

⁷ Vuno citava vene ku alulula vuntu vuetu mpundu ni? Lizi lia Njambi lia muesa ngecize citava, ngualio: “Puenu vantu va vaha mu cimbembesi ca mitima yenu, zalenu muntu uze ua muha, i va na tanga na cifua ca Njambi mu vuviuke na ku-lela ca vusunga.” (Efeso 4:23, 24) Eyo, citava ku alulula vuntu vuetu, vunoni ku lingamo kati ca casi. Ka tua pandele lika ku viana vizango via ku vihia na ku likela vilinga via ku vihia, kua tondeka vikuavo naua. Tua tondeka ku alulula “cimbembesi ca mitima yetu.” Eci ca lomboloka ku alulula vizango vietu, vilinga vietu, na matumbe etu. Ku puisamo evi ca tondeka ku tualelelaho ku lihakela kapandi.

8-9. Vati via lihitile navio umo muanetu via muesa seho ya ku alulula vuntu vuetu mpundu?

⁸ Tu hilulenu ha muzimbu ua umo muanetu ua puile mukua ku lema luozi. Muanetu uaco laza kati mbuanja ua kele nayo, kaha ua puile naua cipenda. Vunoni mua putukile ku lilongesa Mbimbiliya ua likelele viose evi kaha mu nima ya ntsimbu va mu mbatizile. Ku aluluka ceni ca hanene vukaleho vua kama muimbo liavo. Vunoni mu nima ya matangua a andende tunde ha mbatizimu yeni ua hitile mu ceseko ka lavelelele. Umo yala uezile ku ndzivo yeni mu ku mu sangumuka linga va litingule. Ha katete uze muanetu ua kuatele mutima, vunoni omo uze yala ua putukile ku sahula Yehova, muanetu uaco ua vuile honi ku mutima ngo. Ngeci ua tuhukile na ku tingula yala uaco. Vika via lingisile uze muanetu ku sevuka mu cifua eci? Ua sevukile muomu vutuhu ku lilongesa Mbimbiliya ca mu kuasele ku likela via luozi, vunoni ka aluluile cimbembesi ca mutima ueni. Ni nguetu ka aluluile vuntu vueni mpundu.

⁹ Vunoni muanetu uaco ka likelele ku lihakela kapandi ka ku aluluka. (Visi. 24:16) Na vukuasi vua vakuluntu mu cikungulukilo, ua hasele ku vula citanga ceni. Mu nima ya ntsimbu va mu hanguile ku pua mukuluntu. Kaha vutuhu tele mu na hiti miaka ya ingi, tangua limo ua hitile naua mu ceseko ca ku lifua na cize ci tua tumbula, tele vali ku Ndzivo ya Vuangana. Umo cipenda ueka naua uezile ku Ndzivo ya Vuangana kaha ua tondele ku tingula umo mukuluntu mu cikungulukilo. Vati ua lingile uze muanetu? Mu ku likehesa kaha na civuovuo, ua kandele uze yala na ku mu kuasa ku tula litoto, kaha ua mu sindikiyile na ku ndzivo yeni, oku aya na ku peliangela neni. Omo lia vika uze muanetu ua hasele ku kuata mutima? Muomu tele ua alulula honi cimbembesi ca mutima ueni. Ua himpukile mu vutuntu na ku pua mukua ciyulo na mukua ku likehesa. Mua vusunga kapandi ka lihakelele ka hana vumpahu kuli Yehova!

10. Ku alulula vuntu vuetu ca tondeka vika?

¹⁰ Ku aluluka ca cifua eci ka ce ku li izila civene ni ku lingika mu litangua lia ngongo, houe. Ci hasa ku ambata miaka ya ingi na ku tondeka ku ‘litakamesa cikuma.’ (2 Pet. 1:5) Kati nguavo ku kala mu vusunga miaka ya yingi cikeco ci alulula vuntu vuetu, houe. Yetu vavene tua pande ku lihakela kapandi kaco. Ku puisamo vimo vinanga ci hasa ku tu kuasa ku alulula vuntu vuetu. Tu hilulenu vimo vinanga viaco.

11. Vati Yehova ue ku tu kuasa ku alulula cifua ca mitima yetu?

¹¹ Cinanga ca katete ca seho ca pua ku vundila. Tua pande ku vundila ngue mua vundilile mukua visamo, ngueni: “Tanga muli ange mutima ua ku lela, A Njambi; Kaha haka naua cimbembesi ca ku sungama mu kati kange.” (Visa. 51:10) Tua pande ku tava ngecize tua tondeka ku alulula cimbembesi ca mutima uetu na ku vundila vukuasi kuli Yehova. Vati tu hasa ku kala na vusunga ngecize Yehova a ka tu kuasa ku aluluka? Cikulaheso ca hanene Yehova kuli vaIsaleli va ku kaluua mitima va ku matangua a Ezekiele, ca tu hana vusunga vuaco. Ngueni: “Kaha nji ka va hia mutima umo lika, kaha nji ka haka cimbembesi ca ciha muli enu . . . kaha nji ka va hia mutima ua ntsitu [ni nguetu, uze ue ku ononoka ku ku tuamenena ca Njambi].” (Ezek. 11:19) Yehova ua kuasele vaIsaleli linga va aluluke, ngeci tuli na vusunga ngecize netu lelo lino a ka tu kuasa.

12-13. (a) Kuliya na Visamo 119:59, tua pande ku hilula ha vika? (b) Vihula vika tua pande ku lilinga etu vavene?

¹² Ku hilula cikeco cinanga ca mu civali. Nkala ntsimbu i tu tanda lizi lia Njambi, tua pande ku tonda naua ntsimbu ya ku hilula, ni ku singanieka ha viuma vi tu na tanda, muomu ku lingamo ci ka tu kuasa ku nongonona haka tua pande ku pangela. (Tandenu Visamo 119:59; VaHe. 4:12; Tia. 1: 25) Nga tu nongonona ngecize visinganieka vietu vili na ku pikuka na visinganieka via vakua mavu, vika tua pande ku linga? Tua pande ku tava ngecize tuli na vumo vuzeye kaha na ku lihakela kapandi ka ku vu manusula.

¹³ Ca ku muenako, lihulenu nguenu: ‘Vuno mu mutima uange mua lisupa kamo ka cisuasua ka cipululu ni? (1 Pet. 2:1) ‘Nja kalako na cimo ku lihalesa omo lia cihela ci nja kolela, sikola i nja hita ni viuma vi nja kala navio ni? (Visi. 16:5) ‘Vuno nje ku sembulula vaze ka va kele na viuma vi nja kala navio ni vakua cisemua ceka ni?’ (Tia. 2:2-4) ‘Vuno nje ku ivua ku mutima luku-luku omo lia viuma vie ku tembesa mavu a Satana ni?’ (1 Yoa. 2:15-17) ‘Vuno nje ku ivua cizango ca ku lema vueho vua masungu ni vua vukenia ni?’ (Visa. 97:10; 101:3; Amose 5:15) Ku kumbulula evi vihula via muntu ku muntu, ci hasa ku tu kuasa ku nongonona haka mpundu tua pande ku pangela. Mu ku vula viuma via tu sata ngo, tue kuya Tatetu ua muilu ku mutima.—Visa. 19:14.

14. Vika ca puila ca seho ku hangula vavusamba va cili?

¹⁴ Cinanga ca mu citatu, ku hangula vavusamba va cili. Tu zange ka tua zangele, vantu va tue ku likata navo ve ku tu tengula ku vimo viuma. (Visi. 13:20) Vintsimbu vimo tue ku kala ha kati ka vantu ka ve ku tu kuasa ku linga via cili, ngeci mua ku vipanga ni ku sikola. Vunoni tu hasa ku uana vantu va cili va ku likuata navo vusamba ku viuano vietu. Muomu kukekuo kua kala vantu va ka tu kuasa ku muesa “cilemo na vipanga via ku viuka.”—VaHe. 10:24, 25.

15-16. Vati Satana ue ku seteka ku alulula ni nguetu ku sevuisa visinganieka vietu?

¹⁵ Vulukenu ngecize Satana na lihakela kapandi ka ku sevuisa visinganieka vietu. Ue ku pangesa nkala vilongesa via uana, mu ku popolola seho i tua haka ku vilongesa via mu Lizi lia Njambi.

¹⁶ Satana kasi ue ku tualelelaho ku tu linga cihula cimo lika. Cihula cika? Cize vene ca lingile kuli Eva, ngueni: “Cili, Njambi na handeka ngueni . . . ?” (Njen. 3:1) Lelo lino, mu mavu a Satana, vantu ve ku tu linga vihula vi hasa ku katula vimpata mu mitima yetu, ngeci  muevi: ‘Cili  vene Njambi ua vindika vulo vua vakua vilio vimo ni? Cili vene Njambi ua vindika ku linga cilika ca Natale, cipue ca litangua lia ku semuka ni? Cili vene Njambi yenu ua mi vindika ku mi haka maninga ni? Nga Yehova ua pua Njambi ua cilemo, cili vene nga ua mi vindika ku likata na vantu va mua lema, omo lia kuua lika mu cikungulukilo ni?’

17. Vika tua pande ku linga nga muntu a tu linga vihula vize vi hasa ku katula vimpata mu mitima yetu, kaha kuliya na Kolose 2:6, 7 vika vi hasa ku izamo nga tu linga ngoco?

¹⁷ Ngeci mukemuo tua tondeka ku kala mpundu na vusunga vua viuma vi tua tsiliela. Muomu nga tu ecelela vihula via vikalu vi kale mu mutima uetu, vi hasa ku soka mizi na ku pua vimpata. Kaha mu nima ya ntsimbu vimpata viaco vi hasa ku putuka ku tanganesa visinganieka vietu na ku zima lutsilielo luetu. Vika honi tua pande ku linga? Lizi lia Njambi lia tu leka ngecize tua pande ku alulula mitima yetu, linga tu lihane vusunga etu vavene ngecize “cizango ca Njambi, cikeco ca cili, ca mu leme, [kaha] ca ku tantuluka.” (Loma 12:2) Mu ku lilongesa ku sua kumo, tu ka lisuangeleya etu vavene na ku tava ngecize vize vi tua lilongesa mu Mbimbiliya via pua mpundu vusunga. Tu ka kala naua na vusunga ngecize vitume via Yehova via pua via cili. Kaha tu ka kola ngo “mu ku-tsiliela” cetu ngue muti ua mizi ya kola.—Tandenu Kolose 2:6, 7.

18. Vika vi hasa ku tu kuasa ku tsiha vusungu vua visinganieka via mu mavu a Satana?

¹⁸ Lutsilielo luenu lua hitukila hali enu vavene, na umo a hasa ku mi koleselaluo uahi. Ngeci mukemuo tualelenuho ku alulula cimbembesi ca mutima uenu. Puenu na ku vundila ntsimbu yose; na ku lambelela Yehova a mi hane sipilitu yeni. Puenu na ku lihilula enu vavene na civando; na ku tala vati vili visinganieka vienu na vizango vienu. Puenu na ku hangula vavusamba va cili; na ku kala ha kati ka vantu vaze va hasa ku mi kuasa ku alulula visinganieka vienu. Nga mu lingamo mu ka tsiha vusungu vua visinganieka via mu mavu a Satana, kaha naua mu ka hasa “ku zimangana matumbe na viose vimpaka via laha vi va tungila mu ku vindika ku tantekeya Njambi.”—2 Kol. 10:5.