1. Vati Yehova ue ku ivua ku mutima nga umo mpanga yeni a hiluka kuli ikeye?

NGUE mu tua simutuilile mu cilongesa ci na hiti, Yehova ua lisetekesa na kaniungi ua cili, uze ue ku niunga vampanga veni na cilemo. Kaha ue ku lengeya nkala mpanga yeni ue ku tanguka kuli ikeye. Ntsimbu imo Yehova ua lekele vaIsaleli va mu sile ngueni: “Hilukenu kuli ange, kaha ange nji ka hiluka kuli enu.” Kaha tu tantekeya nguetu, na lelo kasi mukemuo mue ku livua ku mutima muomu ua handeka ngueni: “Ka nje ku aluluka.” (Mal. 3:6, 7) Yesu ua handekele ngueni Yehova na tungelo, ve ku ivua ndzolela ya kama nga cipue umo ua vangamba ua zimbalele a hiluka kuli Yehova.—Luka 15:10, 32.

2. Vika tu simutuila mu cilongesa cino?

² Tu hilulenu visimo vitatu via tele Yesu, via handeka ha ku kuasa vaze ve ku tanguka kuli Yehova. Tu simutuila vimo vifua vi tua tondeka ku kala navio linga tu kuase vampanga va ku zimbala va hiluke kuli Yehova. Kaha tu ka mona naua omo lia vika ku kuasa vakua ku zeya ka ca puile ku lipakesa ngoco.

3-4. Omo lia vika mpuevo u va tumbula ku Luka 15:8-10, ua tondesesele na civando mbongo yeni ya zimbalele?

³ Tua pande ku fuitangana linga tu hase ku uana vaze va tonda ku hiluka kuli Yehova. Ku mukanda ua Luka, Yesu ua tele cisimo ca umo mpuevo ua kele na ku tonda cuma ca seho ya kama ca zimbalesele, mbongo ya palata. Eci cisimo ca tsindika cikuma ha kapandi ka lihakelele uze mpuevo mu ku tonda.—Tandenu Luka 15:8-10.

⁴ Yesu ua lomboluele cifua ca livuililemo uze mpuevo mu nima ya ku uana mbongo yeni ya zimbalesele. Ku matangua a Yesu, ci soloka ngue vamo visemi va vampuevo mu Yundeya, va kele na ku hana vimbongo likumi via palata kuli vana vavo va vampuevo ha litangua lia vulo vuavo. Ngeci uze mpuevo ua fuitanganene mu ku tonda mbongo yaco, muomu halumo ya puile imo ya vimbongo likumi via mu hele naye. Mpuevo uaco halumo ua singaniekele  ngecize mbongo yeni i na uila ha mavu. Ngeci ua suamekele ndeya na ku tonda-tonda, vunoni ka i uanene. Halumo ndeya ka ya kele na ceke ca ku puamo, mu ku tonda mbongo imo lika. Ngeci ua nonele lukombo na ku komba ndzivo yose. Kaha a tale ha mpumputa ya na kundula hali na ku viakula kamo koma, omo lia ceke ca ndeya. A ka kuate, mbongo yeni, ngeci uevuile ndzolela ya kama! Kaha ua sanene vavusamba na vakuavo va lihatele navo linga a va leke ou muzimbu ua ndzolela.

5. Omo lia vika ci hasa ku pua ca cikalu ku uana vaze va seza cikungulukilo?

⁵ Ngue mu tu na mono mu cisimo eci ca Yesu, ku uana cuma ca ku zimbala ca tondeka ku lihakela kapandi. Na vuno vene halumo ci tondeka tu fuitangana cikuma mu ku uana vaze va seza cikungulukilo. Ca ku muenako, halumo vali honi miaka ya ingi ku mbandza. Kaha citava naua va nungulukila ku cihela ca ku linga vamuanetu va kalako ka va va tantekeya. Vunoni tuli na vusunga ngecize, mu ntsimbu ino vene va tonda ku hiluka kuli Yehova. Va tonda ku pangela Yehova hamo lika na vusoko vueni vuli na ku mu lemesa mu vusunga. Vunoni va tondeka vukuasi vuetu.

6. Vati tu vose mu cikungulukilo tu hasa ku kuasa ku cipanga ca ku tonda vaze va ku zeya?

⁶ Veya va hasa ku kuasa ku cipanga ca ku tonda vaze va ku zeya? Tu vose. Vakuluntu, vapioneiro, vavusoko na vakua ku ambulula. Vuno mua kala na umo kavusamba ni kavusoko ua zeya mu lutsilielo ni? Vuno mua liuanaho laza na umo ua zeya mu lutsilielo mu ku ambulula ku ndzivo na ndzivo ni ku mbunga ni? Nga mukemou, lomboluelenu muntu uaco nguenu nga a tonda ku mu endela, kaha mu hasa ku ka leka vakuluntu ha cihela ca kala ni ku va hana numelu yeni ya telefone.

7. Vika mua lilongesa ku mezi a handekele umo mukuluntu ua lizina Thomas?

⁷ Viuma vika va na pande ku linga cikumakuma vakuluntu mu vikungulukilo, linga va kuase vaze va tonda ku hiluka kuli Yehova? Halakanenu via handekele umo mukuluntu ua lizina Thomas, * ua kala ku Espanha kaha ua kuasa Vakaleho va ku pua 40 ku hiluka mu cikungulukilo. Muanetu Thomas ngueni: “Ha katete, nje ku hula kuli vamuanetu na vandumbuetu va ku liseza-seza, nga va tantekeya ha vindzivo vi va kala mu ntsimbu ino vamuanetu va ku zeya. Ni nje ku hula vakua ku ambulula nga va vuluka vamo vamuanetu va likela ku kunguluka. Vavengi mu cikungulukilo ve ku nji kuasa na ndzolela yose, muomu ve ku livua ngecize ku tonda vakua ku zeya navo ka pua kapandi kavo. Mu nje kuya na ku meneka vandumbuetu na vamuanetu va ku zeya, ha katete nje ku hula via vana vavo na vavusoko vakuavo. Vamo va zeya mu lutsilielo, laza va kele na ku kunguluka hamo na vana vavo, kaha cingi ca vana vavo halumo va hetele vene na ha ku pua vakua ku ambulula. Nga mukemuo, vana vavo navo va tondeka ku va lembezieka linga va hiluke kuli Yehova.”

8. Mu cisimo ca muana ua zimbalele ca ku Luka 15:17-24, vati Ise ua lingile uze muneni ua zimbalele?

⁸ Vifua vika tua pande ku kala navio linga tu kuase vaze va tonda ku hiluka kuli Yehova? Talenu viuma via seho vi tu hasa ku lilongesa ku cisimo ca Yesu ca muana ua zimbalele. (Tandenu Luka 15:17-24.) Yesu ua lomboluele vati uze muana ua pasulukile ku mutima na ku hangula ku hiluka ku ndzivo. Omo Ise ua mu muene ua tuntilile kuli ikeye na ku mu vumbatela, na ku mu muesa ngecize kasi ua mu lema. Uze muana ua livuile mulonga na ku limona ngue ka fuilile ku mu tumbula muana. Vunoni Ise ua mu vuilile ngozi omo ua kele na ku lombolola via kele ku mutima ueni. Mu nima yaco, Ise ua  lingile vimo viuma mu ku muesa ngecize ua kele na ndzolela ya ku tambula lueka naua muaneni, kati mu ku pua mukua vipanga vunoni mu ku pua muana ya lema cikuma. Kaha mu ku muesa ngecize ua lemene muaneni, uze Ise ua mu lingilile cilika kaha na ku mu tondela vizalo via cili via mu zikile.

9. Vifua vika tua pande ku kala navio linga tu hase ku kuasa vakua ku zeya va hiluke kuli Yehova? (Talenu cikasa “ Mua ku Kuasela Vaze va Tonda ku Hiluka.”)

⁹ Yehova ua pua ngeci ou cisemi ua mu cisimo. Ua lema vamuanetu na vandumbuetu va ku zeya kaha a tonda va hiluke kuli ikeye. Nga tu tambuluisa Yehova tu hasa ku va kuasa va hiluke. Eci ca tondeka tu pue vakua lukakatela, na vakua cilemo. Omo lia vika tua pande ku muesa evi vifua vitatu, kaha vati tu hasa ku vi muesa?

10. Omo lia vika ku kuasa muntu linga a kanguke mu lutsilielo ca tondeka lukakatela?

¹⁰ Tua pande ku pua vakua lukakatela muomu ce ku ambata Ntsimbu linga muntu a kanguke mu lutsilielo. Vakua ku zeya vavengi ve ku litavela nguavo ca tondekele ku va meneka vintsimbu via vingi ku vakuluntu na vamuanetu veka va mu cikungulukilo amba vuose va putuke naua ku pangela Yehova. Umo ndumbuetu Nancy ua ku Asia ua sonekele ngueni: “Kavusamba kange ua kama mu cikungulukilo ua nji kuasele cikuma, ua nji lema ngue nji yayeni, ua nji vuluisile vintsimbu via ndzolela via tua kele hamo lika ku nima. Kaha mu tua kele na ku handeka, ua nji halakanene na lukakatela. Ka kele na ku likanuuela mu ku nji hana vimamuna via cili. Cili vene, ua puile kavusamba ua vusunga, uze ua liviukisilile mu ku nji kuasa nkala ntsimbu i nja tondekele vukuasi.”

11. Omo lia vika tua tondeka cikeketima linga tu kuase muntu u va vulumuinine?

¹¹ Muntu u va linga vumo vupi ca pua ngue ua kala na mbandu ku mutima, kaha cikeketima ca  pua ngue vihemba via ndzili vize vi hasa ku mu kuasa ku kanguka. Vamo vakua ku zeya ve ku pinda na nkulundundu mu miaka ya ingi ku tuala hali umo muanetu mu cikungulukilo. Matoto aco akeo eku va vindika ku hiluka kuli Yehova. Halumo ve ku livua ngecize va va lingile vumo vuhenge. Ngeci ve ku tondeka muntu uze a va halakana na ku ivuisisa cifua ci va li na ku livuilamo ku mutima. (Tia. 1:19) Ndumbuetu María, ua zeyele imo ntsimbu ku nima, ngueni: “Nja tondekele lituitui li nji halakana, citsili ca ku lilila, kaha na livoko li nji kuasa na ku nji tuamena.”

12. Vati cilemo ca Yehova ce ku koka vakua ku zeya linga va hiluke mu cikungulukilo? Hanenu cimueso.

¹² Mbimbiliya ya muesa ngecize Yehova ue ku tu koka na cilemo ceni. Vati ue ku lingamo? Tu hilulenu ha cimueso eci: Aci singaniekenu nga muntu na uila mu lisima lia lova. Kaha kesi na ku hasa ku tuhukamo lika lieni. Linga uze muntu ovoke, noho ku kale umo mukua ngozi a hitilako linga a mu kuase. Halumo a hasa ku tonda mukole ua laha linga a hase ku mu kokamo. Eci cimueso cikeco ca pangesele Yehova mua handekele via vaIsaleli va tangukile kuli ikeye. Ngueni: “Nja va kokele na mikole ya cilemo.” (Hoz. 11:4) Na lelo lino, Njambi kasi ue ku livua ngue mua livuile ku tuala hali vaze vaIsaleli, nga muntu a uila mu visoti via kama mu muono kaha a likela ku mu pangela. Muomu ce ku pua ngue muntu uaco na uila mu cina ca lova. Ngeci Yehova a tonda muntu uaco a tantekeye ngecize ua mu lema, kaha a tonda ku mu koka a hiluke kuli ikeye. Kaha Yehova a hasa ku pangesa yenu mpundu, mu ku va muesa cilemo caco.

13. Tumbulenu cimo cimona ca muesa ndzili ya cilemo ca Vakua Kilistu.

¹³ Ca pua ca seho ku tualelelaho ku leka vaze va ku zeya ngecize, Yehova ua va lema kaha netu tua va lema. Muanetu Pablo, u tu na tumbuile mu cilongesa ci na citi, ua zeyele mu  miaka 30, ivene ngueni: “Tangua limo ku cimene, tele nji lingila ku tunda ha ndzivo umo ndumbuetu ua kasinakazi ua liuanene nange kaha ua handekele nange na cilemo. Ngeci nja putukile ku lila ngue kanike. Nja mu lekele nguange ca puile vene ngue Yehova ikeye ua mu tumine mu ku handeka nange. Ha tsimbu ize nja likuminyine ku hiluka kuli Yehova.”

14. Kuliya na cisimo ca ku Luka 15:4, 5, vika ua lingile kaniungi mu nima ya ku uana uze mpanga ua zimbalele?

¹⁴ Vakua ku zeya va tondeka ku va kaniamesa ku sua kumo. Ngeci mua uze muana ua zimbalele ua mu cisimo ca Yesu, halumo navo va hasa ku kala na vimo vimbandu ku mutima. Kaha citava naua lutsilielo luavo lua kokoloka omo lia visoti vi vali na ku lihita navio mu mavu a Satana. Ngeci mukemuo, tua pande ku va kuasa va kaniamese lutsilielo luavo muli Yehova. Mu cisimo ca mpanga ua zimbalele, Yesu ua muesele ngecize uze kaniungi mua uanene mpanga yeni, ua mu ambatele ha vitsili na ku mu hiluisa ku vutanga. Vutuhu tele kaniungi na pangesa laza ntsimbu ya kama na ndzili yeni mu ku tonda ou mpanga ua ku zimbala, vunoni kasi ua muene ngecize a ka tondeka ku mu kakula na ku mu hiluisa ku vutanga, muomu lika lieni ka hasa ku hilukako.—Tandenu Luka 15:4, 5.

15. Vati tu hasa ku kuasa vakua ku zeya vaze va tonda ku hiluka kuli Yehova? (Talenu cikasa “ Cikuata ca Seho ya Kama.”)

¹⁵ Ku kuasa mukua ku zeya a vule cisoti ce ku mu tangula ku hiluka kuli Yehova, ci hasa ku tondeka ntsimbu na ndzili ya kama kuli yetu. Vunoni na vukuasi vua sipilitu ya Yehova, Lizi Lieni, na mikanda yetu ikuavo, tu hasa ku va kuasa linga va kaniame naua mu lutsilielo. (Loma 15:1) Vati tu hasa ku lingamo? Umo mukuluntu ua vutongue ngueni: “Cingi ca vaze va ku zeya  nga va na likuminia mpundu ngecize va tonda ku hiluka kuli Yehova, ve ku tondeka ku vendesela cilongesa ca Mbimbiliya.” * Ngeci mukemuo, nga vakuluntu va mi vundila ku lilongesa na umo ua ku zeya, tambulenu civezikiso caco na mavoko avali. Uze mukuluntu ua handekele naua ngueni: “Mukua ku ambulula ue ku endesa cilongesa caco, ua tondeka naua ku pua kavusamba ua cili, ya hasa ku kulahela uze mukua ku zeya.”

16. Vati tua tantekeya ngecize tungelo ve ku tu kuasa?

¹⁶ Mizimbu ya vamuanetu vavengi ya muesa ngecize tungelo ve ku pangela hamo lika netu, mu ku tonda vaze va ku zeya na ku hiluka kuli Yehova. (Ku-So. 14:6) Ca ku muenako, halakanenu muzimbu ua umo muanetu Silvio ua ku Ecuador. Muanetu Silvio ua vundilile kuli Njambi linga a hiluke mu cikungulukilo. Kaha tele kanda a manusule ku vundila, ua vuile ngongongo ha mbelo. A sokololeko, vakuluntu vavali va neza mu ku mu meneka. Tangua lize vene, vaze vakuluntu, na ndzolela ya kama, va putukile ku mu kuasa mu lutsilielo.

17. Cilunguiso cika tue ku tambula mu ku kuasa vaze va zeya mu lutsilielo?

¹⁷ Tu kevua naua ndzolela ya kama mu ku kuasa vaze va zeya mu lutsilielo va hiluke kuli Yehova. Halakanenu via handekele Salvador, umo pioneiro ua haka seho ya kama kuli vaze va zeya, ngueni: “Nje ku ivua ndzolela ya kama mu ku mona ngecize Yehova na hasa ku ovola umo mpanga yeni mu mavu a Satana kaha nange nji na kala na mutamba mu civezikiso ca ku mu kuasa a hiluke kuli Yehova. Nje ku ivua na masozi ha meso.”—Vili. 20:35.

18. Nga nenu mua hilukila mu nima, vusunga vuka mu hasa ku kala navuo?

¹⁸ Nga mua likela ku likata na cikungulukilo ca Yehova kalenu na vusunga ngecize, Yehova kasi ua mi lema cikuma. Kaha a tonda linga mu hiluke kuli ikeye. Vutuhu mu ka tondeka ku puisamo vimo vinanga linga mu hiluke kuli ikeye, vunoni ngeci mua cisemi ua yala ua mu cisimo ca Yesu, Yehova a li na ku lavelela ku hiluka cenu, kaha a ka mi tambula na mavoko avali.