Evi vinimbu via tumbula vifua via ku pua 9 nguavio: “Muhako ua sipilitu ukeuo cilemo, ndzolela, ciyulo, lukakatela lua ngozi, ngozi, vuhuanga, vusunga, ku konkama, ku lipokuesa.” Vunoni ka tua pandela ku singanieka ngecize, evi vifua vikevio lika vi i hasa ku tuhula sipilitu santu muli etu. Vati tua tantekeyamo?

Tu tantekeyamo muomu ntsimbu tele kanda kapostolo Paulu a tumbule via muhako ua sipilitu ua sonekele ngueni: “Vilinga via vusitu via soloka, vikevio evi: Vupangala, mazilo, masungu a api, ku lemesa mahamba, vulozi, vizindo, ku zoza, mafuua, vutenu, ku litepesa, ku lihangunuka, luvundu, ku liveya, ku penda, muyoyo ua ku viuano, novio via ku lifua.” (Ngal. 5:19-21) Mu ku manusula, na mezi “novio via ku lifua”, Paulu ua muesele ngecize, “vilinga via vusitu” ka via puile lika vize via tumbuile, citava nga ue ku vuezeleko vikuavo (ngeci mua vize vi va tumbula ku Kolose 3:5) Na vuno vene, mu nima ya ku tumbula vifua 9 via cili, Paulu ua vuezeleko ngueni, “ka kuesi mezi a lisiko a ku vindika ovio.” * Eci ca muesa ha toma ngecize Paulu ka tumbuile vifua viose via cili vi ye ku tuhula sipilitu santu mu Vakua Kilistu.

Evi tu hasa naua ku vi muena ha viuma via tumbuile kapostolo Paulu mu mukanda ua sonekelele vakua cikungulukilo ca mu Efeso ngueni: “Muomu muhako ua mutana u li mu vuhuanga vuose, na vuviuke, na cili.” (Efe. 5:8, 9) Mua vusunga, “vuhuanga” hamo lika na vuviuke na cili, via pua “muhako ua mutana,” vunoni via pua naua mutamba ua “muhako ua sipilitu.”

Cikuavo naua, tu hasa ku ivuisisa evi nga tu setekesa muhako ua sipilitu na vifua 6 via mamuine kapostolo Paulu kuli Timoteo, ni nguetu, “Vuviuke, ku lemesa Njambi, ku tsiliela, cilemo, lukakatela, ku konkama.” (1 Tim. 6:11) Vunoni ha kati kevi vifua, vitatu lika (ku tsiliela, cilemo na lukakatela) vikevio via kala ha civunga ca vifua via muhako ua sipilitu. vati honi Timoteo ue ku hasele ku muesa vifua vikuavo via tumbule Paulu ngeci mua, vuviuke ku lemesa Njambi na ku konkama? Mua vusunga, noho vene na vukuasi vua sipilitu santu ya Njambi. Talenu naua vifua vikuavo ku—Kolose 3:12; 2 Petulu 1:5-7

Ku tsiha mpanga, Ngalata 5:22, 23 ka ya tumbuile vifua viose vi va pande ku muesa Vakua Kilistu. Vutuhu sipilitu ya Njambi i hasa ku tu kuasa ku muesa vifua 9 vi va tumbula “muhako ua sipilitu,” vunoni kua “kala vifua vikuavo vi tua pande ku muesa. Omo tu kola mu lutsilielo na ku zala vuntu vua vuha vuze vu va na tange na cifua ca Njambi mu vuviuke na ku lela ca vusunga.”—Efe. 4:24.