1. Omo lia vika tua pande ku lemesa lika Yehova?

TUA PANDE ku lemesa lika Yehova muomu ikeye Sakatanga uetu. (Ku-So. 4:11) Vunoni, ha kala vumo vusonde. Vutuhu tua lema Yehova na ku mu singimika, tu hasa ku tavesa viuma vieka vi tu tangule ku mu lema na ku lemesa lika ikeye. Ngeci mukemuo ca pua ca seho kuli yetu ku ivuisisa vati evi vi hasa ku lingika. Vunoni, ha katete tu ci talenu vika ca lombolola ku lemesa lika Yehova.

2. Kuliya na Mateo 4:10, vika ue ku linga muntu ua lema Yehova mu vutuntu?

² Mu Mbimbiliya, ku lema Yehova na mutima uose ca lomboloka ku lemesa lika ikeye. Kati ku tavesa muntu ni nkala cuma ceka vi sintse mu cihela ca kala naco Yehova mu mutima uetu.​—Tandenu Mateo 4:10.

3. Vika tu hasa ku handekela nguetu ka tua lihanene kuli Yehova ku ndzimba?

³ Ka tua lihanene kuli Yehova ku ndzimba. Omo lia vika? Muomu ku lihana cetu cemana ha vusunga vu tua lilongesa ku tuala hali ikeye. Ca ku muenako, tua lilongesa viuma via lema na vize ka lemene, kaha tua tava cifua ce ku vi muenamo. Tuevuisisa naua vutumbe vueni ku vantu kaha tue ku vu hakuila. Mua vusunga, tua vezika cikuma ku tu tava ku pua vavusamba va Yehova. (Visa. 25:14) Ngeci mukemuo, viose vi tue ku lilongesa ku tuala hali Sakatanga uetu Yehova vie ku tu vuisa cizango ca ku suena mu hiehi neni.​—Tia. 4:8.

4. (a) Vika ue ku pangesa Satana, linga a tu puise vakua mitima ivali kuli Yehova? (b) Vika tu lilongesa mu cilongesa cino?

 ⁴ Satana ikeye ali na ku sika ano mavu. Kaha ue ku a pangesa mu ku tu lingisa tu tuameke vizango vietu na ku kaluuisa viuma linga kati tu hase ku vula vuzeye vuetu. (Efe. 2:1-3; 1 Yoa. 5:19) Omo lia vika? Vutumbe vueni ku tu lingisa tu pue vakua mitima ivali, linga kati ku lemese lika Yehova. Tu talenu vinjila vivali via hasa ku puisilamo ovu vutumbe vueni. Ya katete, ku tu lingisa tu leme vimbongo. Ya mu civali, ku tu lingisa tu hangule vueho vua ku vihia.

5. Omo lia vika tua pande ku zangama linga kati tu leme vimbongo?

⁵ Muntu uose ue ku semuka na cizango ca ku kala na via-ku-lia via ku puamo, vizalo via cili kaha na ndzivo ya cili. Vunoni tua pande ku zangama linga kati tu putuke ku lema vimbongo. Cingi ca vantu mu mavu ano a Satana va pua “vakua ku lema zimbongo” kaha na viuma vi vie ku landa vimbongo. (2 Tim. 3:2) Yesu ua tantekeyele ngecize vandongesi veni va ka hita mu ceseko ca ku lema vimbongo. Ngeci ua va mamuine ngueni: “Na umo uahi a hasa ku pangela vasukulu vavali: muomu a ka zinda umo na ku lema mukuavo; cipue a ka pandama ku umo na ku yengula mukuavo. Ka mu hasa ku pangela Njambi na vufuko.” (Mat. 6:24) Eci ci lekesa ngecize uose ue ku pangela Yehova vunoni a fuitangana naua mu ku tonda vupite, ali na ku seteka ku pangela vanjambi vavali. Muomu ka hasa ku lemesa Yehova na mutima uose.

6. Vika tu hasa ku lilongesa ku mezi a Yesu a lekele vakua Laondisiya?

⁶ Vakua Kilistu va kele mu cikungulukilo ca ku Laondisiya, va lihalesele nguavo: “Nji na fuku, nji na mono vufuko, na vimo vi nja zela viahi.” Vunoni kuli Yehova na Yesu vaze Vakua Kilistu va puile ‘vakua ku pihia, vakua ku vindama, vahutu, tupuputa, na vakua vuntselentsele.’ Yesu  ua va mamuine kati omo lia ku pua vampite houe, vunoni muomu ku lema vupite ca kele na ku vihisa vusamba vuavo na Yehova. (Ku-So. 3:14-17) Netu nga tu mona ngecize tuli na ku putuka ku lema vupite, tua pande ku sungamesa visinganieka vietu vuasi-vuasi. (1 Tim. 6:7, 8) Nga ka tu lingimo, tu ka pua vakua mitima ivali kaha Yehova ka ka tava ku lemesa cetu. Muomu ua pua “Njambi ua lifuua.” (Ndeu. 4:24) Vati honi tu hasa ku uila mu ceseko ca ku tuameka vimbongo mu muono?

7-9. Vika mua lilongesa ku viuma via lihitile navio muanetu David?

⁷ Tu hilulenu ha lungano lua muanetu David ua ku Estados Unidos, kaha ua pua mukuluntu mu cikungulukilo. Ua handekele ngueni ua puile mukua ku fuitangana ku vipanga vieni. Ngeci va mu puisile mukuluntu ku vipanga, kaha naua ua tsimanene mu cifuti cose omo lia vutongue vueni mu ku linga vipanga viaco. Kaha ngueni: “Ku ntsimbu ize, nja kele na ku singanieka nguange Yehova ua kele na ku vezikisa cipanga cange.” Vuno cili vene Yehova ua kele na ku vezikisa vipanga vieni ni?

⁸ Muanetu David ua putukile ku nongonona ngecize vipanga vieni vi li na ku tontuesa vusamba vueni na Yehova. Ivene ngueni: “Mu nima ya ntsimbu, nja kele lika na ku singanieka ha vipanga viange, cipue nga njili ku viuano ni mu ku ambulula. Vutuhu nja kele na ku tambula vimbongo via vingi, vunoni via kele na ku nji kokela cisoti ca mutima kaha na visoti mu vulo.”

⁹ Ngeci David ua muene ngecize ua tondekele ku hangula vuino vika a tuameka mu muono. Kaha ua handekele ngueni: “Nja lisumine ku mazo nguange noho nji alulule cifua ca muono uange.” Mu nima yaco ua ka lekele mukuluntu ueni ngecize a mu tepulule ku ntsimbu ya vipanga. Vika viezilemo? Va mu tundisile ha vipanga! Kaha vati ua lingile? Ivene ngueni: “Lia mukuavo, nja lisonekesele ku pua pioneiro ua ku  kuasa.” Kaha mu nima ya ntsimbu muanetu David ua putukile vupioneiro vua ntsimbu yose, kaha mpueyeni ua lipandakanene kuli ikeye mu cipanga caco. Vati honi ve ku uana via ku lisuka navio? Neni na mpueyeni va uana cipanga ca ku komba mu vindzivo via kama (vipredio). Ava vamuanetu va hangula cipanga ci ve ku sembulula vavengi. Vunoni kuli vakevo, ca seho ya kama kati cifua ca cipanga, vunoni ku tuameka via Yehova. Kambongo ka ve ku tambula ka kala ku laako-laako na vimbongo via kele na ku tambula yala ha katete. Vunoni ke ku puamo mu ku va kuasa ku vize vie ku va kambela. Lelo lino, ve ku limuena ngecize nkuma cili vene Yehova ue ku niunga vose ve ku tuameka Vuangana.​—Mat. 6:31-33.

10. Vati tu hasa ku niunga mutima uetu?

¹⁰ Mua vusunga, ambe nga tua kala na vimbongo via vingi ni kuahi, tu vose tua tondeka ku niunga mutima uetu. Vati tu hasa ku lingamo? Mu ku vindika cilemo ca vimbongo linga kati ci kovele mu mitima yetu. Kaha naua na ku linga cose linga vipanga vietu kati vi londe helu lia vusamba vuetu na Yehova. Vunoni vati mu hasa ku tantekeya nga evi viuma vi na putuka laza ku mi solokela? Mu ku lihula nguenu: ‘Vuno nje ku singanieka cikuma ha cipanga cange ca ku tonda mua ku lisukila, cipue nga njili mu ciuano ni mu ku ambulula ni? Vuno nje ku lisosomua cikuma-kuma na muono ua mene ni? Vuno vimbongo na vupite vili na ku koka visoti ha kati kange na mukua ndzivo yange ni? Vuno nji hasa ku tava cipanga ci ve ku sembulula vantu, nga cipanga caco ci nji sila ntsimbu ya ku tuameka via mu lutsilielo ni?’ (1 Tim. 6:9-12) Omo mu hilula ha vihula evi, kati mu suve ngecize Yehova ua mi lema cikuma, kaha ua mi kulahesa ngueni: “Na hamo hahi ha nji ka ku ecelela, cipue na hamo hahi ha nji ka ku sila.” Evi vikevio via lingisile kapostolo Paulu ku soneka ngueni: “Sambuenu ku cilemo ca zimbongo.”​—VaHe. 13:5, 6.

11. Vati vueho vu hasa ku kuata ku muntu?

¹¹ Yehova ua tonda tu yoye muono ua ndzolela, kaha vueho vu hasa ku tu kuasa ku puisamo vutumbe vuaco. Ngeci Mbimbiliya nguayo: “Ka kuesi vieka ku muntu via ku hiana eci, a lie, a nue, na ku zolela muono ueni na vize via ku viuka mu vipanga vieni.” (Ekel. 2:24) Vunoni cingi ca vueho vuliko matangua ano ka vua puile vua cili kuli yetu. Muomu vue ku sambeya vilinga via mazilo na ku lingisa vantu va tave ni vene va leme viuma vi ya vindika Mbimbiliya.

12. Kuliya na 1 Kolintu 10:21, 22, omo lia vika tua pande ku hangula vueho na mana?

¹² Mu ku linga tua tonda ku lemesa lika Yehova, ka citava tu pue na ku lia “ku mesa” ya  Yehova na “ku mesa ya vandemone.” (Tandenu 1 Kolintu 10:21, 22.) Vintsimbu via vingi, vantu nga va lia hamo lika ca pua citantekeyeso ci muesa ngecize va pua vavusamba. Ngeci mukemuo, ku hangula vueho vua likuata na luozi, vulozi, vupangala, ni masungu eka eku sambeya Satana na vandemone veni, ca pua vene ku likuata navo vusamba. Kaha ngue mu tua tantekeya vakevo va pua vitozi va Njambi. Ngeci mukemuo, ku hangula vueho vu ve ku teleka ni nguetu ku panga vakevo, ka ce ku tu vulumuna lika yetu vavene, vunoni ce ku tsiha naua vusamba vuetu na Yehova.

13-14. Kuliya na Tiango 1:14, 15, omo lia vika tua pande ku zangama ha ku hangula vueho? Hanenu cimueso.

¹³ Tu ci setekesenu vueho na via-ku-lia, tu mone vika tu lilongesaho. Mu tue ku lia tue ku hangula vika tu haka mu kanua. Vunoni mu tue ku vi lehula, ka tue ku hasa naua ku hangula vati via-ku-lia viaco vi panga mu muvila uetu. Ngeci mukemuo, nga tu lia via-ku-lia via cili tu ka kala na cihindu ca cili, vunoni nga tu lia ngoco, tu ka tundisaho visoti via cihindu. Kaha evi ka vie ku tu solokela mu litangua lia ngongo vunoni mue ku hita ntsimbu.

¹⁴ Na vuno vene, nga tu hangula vueho, tuli na ku hangula vika vi tu kovelesa mu vuongo vuetu. Kaha mu vie ku kovela, ka tue ku hasa naua ku hangula vati viuma viaco vi ka kuata ku visinganieka ni ku mitima yetu. Vueho vua cili vu hasa ku tu kaniamesa, vunoni vueho vua ku vihia vu hasa ku tu kokela visoti. (Tandenu Tiango 1:14, 15.) Visoti vie ku iza mu ku hangula vueho vua ku vihia ka vie ku soloka mu litangua lia ngongo, mue ku hita ntsimbu. Ngeci Mbimbiliya ya tu lungula nguayo: “Kati mu lionge; Njambi ka ci tava ku mu tsopa: viose vize vie ku kuna muntu, vikevio via li ka tia naua, muomu uze a kuna ku vusitu vueni, ku vusitu a ka tia ku-nonga.” (Ngal. 6:7, 8) Mua vusunga, ca pua ca seho cikuma ku lihakela kapandi ka ku viana vueho vuose vue ku sambeya viuma via zinda Yehova.​—Visa. 97:10.

15. Vuana vuka ua tu hana Yehova?

¹⁵ Cingi ca vamuanetu va lema ku tala televizau yetu ya mu internete, JW Broadcasting^®. Umo ndumbuetu ua lizina Marilyn ua handekele ngueni: “TV JW ye ku nji kuasa ku pua muntu ua ndzolela, kaha naua nje ku i tala na mutima umo lika, ka nje ku lisosomua nguange halumo heza via mazilo houe. Kaha nga nji nevu vulika ni vusiua nje ku tondamo cimo cimpande ni ku Lemesa ca Cimene, linga ci nji kaniamese cikuma. Evi vie ku nji lingisa ku livua mu hiehi na Yehova na vamuanetu mu mavu ose. JW Broadcasting ya alulula muono uange mu vutuntu.” Nenu mue ku pangesa vuino ovu vuana vua tu hana Yehova ni? Mu ku vuezelela ku programa ya JW Broadcasting ya nkala ngonde, mua kala naua via ku halakana, vivideo kaha na miaso ya cili ye ku tu kaniamesa cikuma.

16-17. Omo lia vika tua pande ku hilula ntsimbu i tue ku linga vueho? Vati tu hasa ku lingamo?

¹⁶ Ka tua pandele lika ku tuala mana ku cifua ca vueho vu tue ku hangula, vunoni na ku ntsimbu ingahi i tue ku linga vueho vuaco. Muomu nga ka tu lingimo, tu hasa ku pihisila ntsimbu ya kama ku vueho, ku hiana ku pangela Yehova. Vunoni vamo ce ku va kaluuila ku hangula ntsimbu ingahi va linga vueho. Ca ku muenako, umo ndumbuetu ua miaka 18 ua lizina Abigail, ua handekele ngueni: “Ku tala Televizau ce ku nji kuasa cikuma nga nji na katala. Vunoni vintsimbu vimo, nje ku nongonona ngecize nji na vihisa ntsimbu ya kama mu ka tala Televizau.” Kaha umo muanetu ua mukuendze, Samuel, ua handekele ngueni: “Nja kele na ku tala tuvivideo tua tundende tua tuingi mu internete. Mu nja kele na ku putuka, nji tala kamo, kaha mu nima yaco, nji tala kakuavo, nji ka linge hei, nji na vihisa viola vitatu ni viuana, mu ku tala tuvivideo tuaco.”

¹⁷ Vati mu hasa ku hangula ntsimbu ya ku puamo ya ku linga vueho? Cinanga ca katete, ku tantekeya ntsimbu ingahi mue ku tuala ku vueho.  Setekenu ku soneka ntsimbu i mue ku linga vueho mu simano. Ngeci mua ku tala Televizau, ku kovela mu Internete na vueho vu mue ku linga mu telefone. Nga mu mona ngecize mue ku vihisilako ntsimbu ya yingi cikuma, setekenu ku soneka imo programa. Mu programa yaco, livangenu ku hangula ntsimbu i mu pua na ku linga viuma via seho ya kama, amba vuose mu tale via ntsimbu ya ku linga vueho. Mu nima yaco vundilenu kuli Yehova a mi kuase ku kava programa yaco. Nga mu lingamo, mu ka kala na ntsimbu ya ku lilongesa Mbimbiliya mu vulika, ku lemesa mu vusoko, ku ya ku viuano na ku ambulula. Nga mu linga evi, mu ka hasa ku linga vueho na mutima umo lika, muomu mu na tuameka Yehova.

18-19. Vati tu hasa ku muesa ngecize tue ku lemesa lika Yehova?

¹⁸ Kapostolo Petulu ua sonekele via ku nonga ca mavu a Satana na via ku iza ca mavu a aha. Mu nima yaco, ua handekele ngueni: “Vakua cilemo cange, omo mu li na ku lavelela viuma evi, litakamesienu linga va mi uane na ciyulo, na citoma cahi na ha ku mi payesela hahi ku meso eni.” (2 Pet. 3:14) Nga tu ononoka eci cimamuna, na ku tualelelaho ku lihakela kapandi ka ku pua va ku lela mu vilinga na mu lutsilielo, kaha tu ka muesa ngecize tu vakua ku lemesa lika Yehova.

¹⁹ Satana na mavu eni va ka tualelelaho ku linga cose mu ku tanganesa linga tu hake Yehova ku nima na ku tuameka viuma vieka. (Luka 4:13) Vunoni ambe nga tu hita mu vitanga via kama, ka tu ka tavesa cipue muntu ni viuma vieka ku sintsa ha cihela ca kala naco Yehova mu mutima uetu. Tua lihakela kapandi ka ku lemesa lika Yehova, muomu ka kuesi ueka ua fuila ku mu lemesa noho Yehova lika!