1. Vusunga vuka vu tu lingisa ku tava ngecize tuli na ku yoyela ku “matangua a ku kotokela”?

NGA MUA semukile ha nima ya muaka ua 1914, cilekesa ngecize mua putukile ku yoya ku matangua a ku kotokela. (2 Tim. 3:1) Yesu ua polofetele viuma vi ka soloka ku matangua ano a ku kotokela. Viuma viaco via pua vindzita, ndzala, misongo ya ku litambuisa, mandunduma a mavu kueka na kueka, ku likulisa ca vupi na ku luisa ca vangamba va Yehova. (Mat. 24:3, 7-9, 12; Luka 21:10-12) Kaha tue ku mona naua vantu va vifua via handekele Paulu. (Talenu cikasa “ Cifua ca Vantu Lelo Lino.”) Etu Vakaleho va Yehova, tuli na vusunga vuose ngecize tuli na ku yoyela ku tsongo ya “matangua a ku kotokela.”​—Mika 4:1.

2. Vikumbululo via vihula vika tua lavelela?

² Mu ku linga mua hiti miaka ya ingi tunde mu muaka ua 1914, mua vusunga tuli na ku yoyela ku ntsongo ya “matangua a ku kotokela.” Mu ku linga ku kotoka cili mu hiehi-hiehi, ca pua ca seho ku tantekeya vikumbulula via vimo vihula via seho: Viuma vika vi ka soloka ku ntsongo ya “matangua a ku kotokela”? Ntsimbu tua lavelela viuma viaco, Yehova a tonda tu linge vika?

3. Kuliya na vupolofeto vua ku 1 Tesalonika 5:1-3, mutambi uka va ka linga vakua vifuti?

³ Tandenu 1 Tesalonika 5:1-3. Paulu ua handeka via ‘litangua lia Yehova.’ Mu visoneka evi, ‘litangua lia Yehova’ lika putuka na ku nongesa ca “Mbambilone ya Kama,” ni nguetu civunga ca malombelo ose a makuli na ku lengela ha Alemangendo. (Ku-So. 16: 14, 16; 17:5) Vunoni ntsimbu kanda litangua li hete, vakua vifuti va ka tambeka nguavo “kua holo tu novoka!” Vamiangana va mavu vintsimbu vimo ve ku handeka nguavo kua holo nga hali cimo ciyulo ha kati ka vifuti. * Vutuhu ngoco, ou mutambi ua “kua holo tu novoka” u ka pua ua ku lifuila. Omo lia vika? Muomu evi mu vi ka soloka vantu va ka singanieka nguavo vamiangana va ha mavu va na hasa ku alulula ano mavu ku pua cihela ca cili ca ku yoyela. Vunoni “ku nonga ca vuasi-vuasi” ci keza omo “lamba ya kama” i ka putuka.​—Mat. 24:21.

4. (a) Viuma vika ka tu tantekeya ku tuala ha mutambi “kua holo tu novoka”? (b) Vunoni vika tua tantekeya ku tuala ha mutambi uaco?

⁴ Tua tantekeya vimo ku tuala ha ku tambeka ca mezi “kua holo tu novoka.” Vunoni kuli vimo ka tu tantekeya. Ka tu tantekeya vati vi ka putuka ni vati va ka hana mutambi uaco. Kaha ka tu tantekeya naua nga u ka pua mutambi umo ni ya yingi. Vunoni muose-omuo mu vi ka lipuisilamo, ka tua pandele ku ka singanieka nguetu vamiangana va mavu va ka hasa ku neha ciyulo na ku lembama. Muomu Mbimbiliya ya tu lungula laza via ku soloka ca mutambi uaco. U ka pua citantekeyeso ca ku putuka ca ‘litangua lia Yehova’!

5. Vati 1 Tesalonika 5:4-6 u hasa ku tu kuasa ku liviukisila via ‘litangua lia Yehova’?

⁵ Tandenu 1 Tesalonika 5:4-6. Cimamuna ca Paulu ca muesa vika mpundu tua pande ku linga tu liviukisile via ku iza ca ‘litangua lia Yehova.’ Ka tua pandele ku kala mu tulo ngue mu ve ku linga vamo. Tua pande ku tona na ku tualelelaho ku vingila. Ca ku muenako tua pande ku zangama linga kati tu lihake mu via pulitika. Muomu nga tu lihakamo kaha tu ka pua “vakua mavu.” (Yoa. 15:19) Tua tantekeya ngecize Vuangana vua Njambi lika vukevuo vu ka neha ciyulo mu mavu ose.

6. Vika tua pande ku linga mu ku kuasa vakuetu, kaha omo lia vika?

⁶ Ka tua pandele lika ku tona, vunoni tua pande naua ku kuasa vakuetu linga navo va hinduke na ku va longesa vika Mbimbiliya ya handeka ku tuala ha viuma vi ka soloka ku lutue. Tu vulukenu ngecize, ha nima ya ku putuka ca lamba ya kama, ka ku ka kala naua ntsimbu linga va ka hangule ku pangela Yehova. Ngeci mukemuo cipanga cetu ca ku ambulula ca tondeka ku ci linga mu vuasi-vuasi! *

7. Vika Yehova ua lavelela kuli yetu mu ntsimbu ino?

⁷ Mu ku linga ku na lisupu kantsimbu ka kandende linga “litangua” lia Yehova’ li putuke, Yehova ua lavelela ngecize tu tuale mana ku cipanga ca ku ambulula. Tu vose tua pande ku lisala “ntsimbu yose na vipanga via Muangana.” (1 Kol. 15:58) Yesu ua handekele vika tua pande ku linga. Omo ua handekele ku tuala ha vika via lomboloka viuma vie ku solokele ku matangua a  ku kotokela, ua vuezeleko naua ngueni: “Na zimpande ezi zia cili mu na pande ku zi ambulula ha katete ku miyati yose.” (Mako 13:4, 8, 10; Mat. 24:14) Aci singaniekenu: Ntsimbu yose i mue kuya mu ku ambulula, muli na ku puisamo ovu vupolofeto vu ya handeka Mbimbiliya.

8. Vati cipanga ca ku ambulula muzimbu ua cili ua Vuangana ci li na ku livuezelela?

⁸ Vika tu handeka ku tuala ha ku livuezelela ca cipanga ca ku ambulula? Muaka ku muaka, vantu va vengi ve ku tava muzimbu ua cili ua Vuangana. Ca ku muenako, aci singaniekenu ha ku livuezelela ca vakua ku ambulula kuno ku matangua a ku kotokela. Mu 1914 vakua ku ambulula va puile 5.155 mu vifuti vi heta 43. Vunoni lelo lino, vakua ku ambulula va na hete ku 8,5 milhões mu vifuti vi heta 240! Ambe ngoco cipanga cetu kasi ci li na ku tualelelaho. Ngeci mukemuo tua pande ku tualelelaho ku ambuluila vantu muzimbu ua cili ua Vuangana vua Njambi muomu vukevuo lika vu ka manusula visoti via vantu vose.​—Visa. 145:11-13.

9. Omo lia vika tua pande ku tualelelaho ku ambulula muzimbu ua cili?

⁹ Tu ka tualelaho ku ambulula noho Yehova a ka handeka ngueni ku nahu. Kaha ntsimbu ingahi ya lisupilako linga vantu va tantekeye Yehova Njambi na Yesu? (Yoa. 17:3) Ka tu tantekeya mpundu nga ntsimbu ingahi i na lisupuko. Tu tantekeya lika ngecize, noho ha i ka putukila lamba ya kama, vose vali na cizango ca ku ka tambula “muono ka ue ku hua ua ya-ye” citava va ka tava ku va ambuluila. (Vili. 13:48) Vati tua pande ku kuasa vantu omo ku ci li ntsimbu?

10. Vukuasi vuka vue ku tu hana Yehova mu ku longesa vantu vusunga?

¹⁰ Lukungulukilo lua Yehova, lue ku tu hana viose vi tondeka linga tu longese vantu vusunga. Ca ku muenako, mu ku kunguluka ca mu kati ka simano ve ku tu longesa mua ku ambuluila. Muomu mu ku kunguluka tue ku lilongesa vati tu ka linga vungendzi vua katete, vua ku hilukila na vati tu hasa ku endesa cilongesa ca Mbimbiliya. Kaha naua lukungulukilo lua tu hana vikuata via mu cikasa cetu ca vikuata vi tue ku longesa navio. Vi kuata viaco vie ku tu kuasa . . .

•   ku putuka ku simutuila na vantu,

• ku sangumuna mpuila yavo,

• ku vuisa vantu cizango ca ku lilongesa vusunga,

• ku endesa cilongesa ca Mbimbiliya, kaha

• na ku lania vantu linga va kovele mu saiti yetu na ku ya ku viuano vietu.

Vunoni ka ci tondeka ku kala lika nevi vikuata. Tua pande ku vi pangesa. * Ca ku muenako, nga tua simutuila na muntu na muesa cizango, citava tu mu sezele tratadu ni mukanda, muomu ku lingamo ci ka tu puila ca casi ku ka hilukila neni ntsimbu ikuavo. Ca pua kapandi ketu ngonde ku ngonde ku tuala mana ku ku ambulula muzimbu ua cili.

11. Omo lia vika va tumbika vilongesa via Mbimbiliya ku hitila mu internete?

¹¹ Kaha njila ikuavo ye ku pangeselamo Yehova linga vantu va lilongese vusunga, ya pua ku hitila mu Curso da Bíblia On-line mu jw.org^® Kovelenu mu (ENSINOS BÍBLICOS > LIÇÕES ON-LINE.) Omo lia vika va tumbika evi vilongesa ku hitila mu internete? Muomu ngonde ku ngonde vantu va vengi mu mavu ose ve ku kovela mu internete linga va lilongese Mbimbiliya. Vilongesa via mu saiti yetu vi hasa ku kuasa vantu ku lilongesa vusunga ku tuala hali Njambi. Cikuavo naua, halumo mu hasa ku simutuila na muntu ke ku tava ku lilongesa Mbimbiliya ha ndzivo yeni, citava mu mu lekese evi vilongesa viaco via mu internete ni ku mu tuma link i mu tuala ha vilongesa viaco. *

12. Vika muntu a hasa ku lilongesa ku hitila mu Curso da Bíblia On-line?

¹² Mu Curso da Bíblia On-line mua kala vimpande: “A Bíblia e seu Autor”, “Os principais personagens da Bíblia” na “A mensagem da Bíblia sobre um futuro melhor”. Mu kati ka vimpande viaco, mua kala vilongesa ngeci mua . . .

• Vati Mbimbiliya i hasa ku kuasa muntu,

• Yehova, Yesu na tungelo va pua veya?

• Omo lia vika Njambi ua tangele vantu?

• Omo lia vika vupi na tuyando via lana ngeci?

Kaha vilongesa viaco via lombolola naua vati Yehova a ka . . .

• fumisako tuyando na ku-tsa,

• sangula vatsi

• tundisako mavuangana a vantu na ku hingisamo vuangana vua Njambi.

13. Vuno vilongesa via Mbimbiliya ku hitila mu internete via hingi mu ku lilongesa na vantu Mbimbiliya ni? Lombololenu.

¹³ Vuno vilongesa via Mbimbiliya via mu Internete via hingi mu cihela ku lilongesa Mbimbiliya na muntu mpundu ha ndzivo ni? Houe. Muomu cipanga ca ku puisa vantu vandongesi Yesu ua ci hanene mpundu kuli yetu. Vutumbe vua vilongesa via Mbimbiliya via mu internete vua pua ku sangumuna cizango ca vantu ku via Mbimbiliya. Nga va lema vilongesa viaco halumo va ka tonda ku lilongesa Mbimbiliya. Ngeci ku ntsongo ya nkala cilongesa, mukua ku tanda ve ku lania a vundile mulongisi a ku lilongese neni Mbimbiliya. Nkala litangua mu mavu ose vantu va tuvakana 230 ve ku lomba ku lilongesa Mbimbiliya ku hitila saiti yetu! Ngeci mukemuo ca tondeka cikuma muntu ku muntu ku mu longesa Mbimbiliya ha lika lieni!

14. Kuliya na lisiko lia Yesu ku Mateo 28:19, 20 tua pande ku lihakela kapandi ka ku linga vika? Kaha omo lika?

¹⁴ Tandenu Mateo 28:19, 20. Mu ku endesa cilongesa, tua pande ku linga cose tu puise vantu vandongesi . . . , “na ku va longesa ku niunga viuma viose [via tu sikile Yesu].” Tua pande naua ku va kuasa linga vevuisise seho ya kala ha ku hangula ku pangela Yehova na ku hakuila Vuangana vueni. Eci ci lomboloka ngecize tua pande ku sambeya cizango cavo ca ku niunga viose vi va lilongesa, na ku lihana kuli Yehova va tu mbatize. Ku lingamo va ka ovoka ku litangua lia Yehova.​—1Pe 3:21.

15. Ka tua pandele ku vihisa ntsimbu yetu mu ku linga vika, kaha omo lia vika?

 ¹⁵ Ngue mu tua lilongesa, ku nonga ca ano mavu a Satana ci li mu hiehi-hiehi. Ngeci mukemuo, ka tua pandele ku vihisa ntsimbu yetu mu ku endesa vilongesa via vantu vaze ka va tondo ku alulula muono uavo linga va pangele Yehova. (1 Kol. 9:26) Cipanga cetu ca vuasi-vuasi! Ntsimbu kanda litangua lia Yehova li hete, Ku ci li vantu va vengi kanda va ci ivue via muzimbu ua Vuangana.

16. Kuliya na Ku-Solola 18:2, 4, 5, 8 vika Vakua Kilistu va vusunga va pande ku linga? (Talenu ha litota.)

¹⁶ Tandenu Ku-Solola 18:2, 4, 5, 8. Evi vinimbu via muesa vika Yehova ua lavelela ku vangamba veni. Vakua Kilistu va vusunga vose va pande ku muesa ngecize ka ve ku likuatasana cipue ka vundende ku Mbambilone ya Kama. Ca ku muenako, ntsimbu kanda muntu a lilongese vusunga halumo ua kele mu vumo vulombelo vua makuli. Kaha ua kele na ku kunguluka ntsimbu yose na ku linga vimo vipanga via mu vulombelo vuaco. Ni halumo ua kele na ku hana vimbongo mu ku kuasa vimo vipanga via mu vulombelo. Vunoni ha nima ya ku lilongesa Mbimbiliya halumo a tonda ku pua mukua ku ambulula, kaha ntsimbu kanda, na pande ku likela vilika na vilinga via mu vulombelo vua makuli. Kaha vikuavo naua via na pande ku linga, ku soneka umo mukanda ua ku seza vulombelo vuaco ni vilinga vieni via pande ku muesa ngecize ka tondo naua ku kala na umo mutamba ua Mbimbilone ya Kama. *

17. Vipanga vika na pande ku viana Mukua Kilistu, kaha omo lia vika?

¹⁷ Vakua Kilistu va pande naua ku linga cose mangana vipanga viavo ka via likuatele na Mbambilone ya kama. (2 Kol 6:14-17) Ca ku muenako, Mukua Kilistu ka pandele ku lihaka mu vipanga via vakua vulombelo. Kaha cikuavo naua nga Mukua Kilistu ua pangela ku imo impreza, ka pandele ku tava ku linga vimo vipanga ku imo ndzivo ku ve ku lingila vimo vie ku sambeya ku lemesa ca makuli. Ambe vene nga umo Mukua Kilistu ue ku linga mingoso yeni, ka pandele ku tonda vipanga via likuata na Mbambilone ya Kama. Omo lia vika tua pande ku pua va ku kolesa nga tu hita mu vieseko ngeci muevi? Muomu vilinga vi ve ku sambeya vakua vulombelo vua makuli ka vie ku ya Njambi ku mutima, ngeci mukemuo ka tue ku tonda ku likuatasiana mu vilinga viaco.​—Isa. 52:11. *

18. Vati umo muanetu ua tavesele Mbimbiliya i mu tuamenene ha ku hangula cipanga?

 ¹⁸ Imo miaka ku nima, umo mukuluntu mu cikungulukilo ua pua kalupindelo kaha ue ku lisongela viuma vieni na ku lilandesela ikeye ivene, va mu laniene kuli umo mukua impreza, a ka linge cimo cipanga ca vukalupindelo ku imo tembele mu mbonge. Vunoni ou mukua impreza ua tantekeyele ngecize uze muanetu vintsimbu viose ue ku viana ku pangela ku malombelo eka. Vunoni mu ku linga uze muntu uaco ua kalekeyele cikuma, ua ile vene kuli muanetu. Vunoni muanetu kasi ua kakatelele ku vitume via mu Mbimbiliya kaha ua vianene cipanga caco. Mu simano ya hateleko, ha lipapelo lia mizimbu va lekeseleho kalupindelo ueka ali na ku haka cilandakano ku imo tembele. Nga muanetu ua tavele vize vipanga viaco, mua vusunga vene cikupulo ca muanetu nga va ci muesele ku muzimbu. Aci singaniekenu vati evi vie ku vihisile vusamba vueni na va muanetu mu cikungulukilo. Kaha cikuma-kuma vusamba vueni na Yehova!

19-20. (a) Viuma vika tua lilongesa? (b) Kaha vika naua tu ka lilongesa?

¹⁹ Mbimbiliya ya polofetele laza ngecize vuovuno vu lipuisamo vupolofeto ku tuala ha mutambi “kua holo tu novoka.” Vunoni Yehova ua tu longesa laza ngecize vamiangana va hamavu ka va ka hasa ku neha ciyulo na ku lembama. Vika tua pande ku linga ntsimbu kanda u putuke mutambi uaco kaha na ku nonga ca vuasi-vuasi? Yehova a tonda tu tuale mana mu cipanga cetu ca ku ambulula na ku puisa vantu vandongesi. Kaha naua tua pande ku viana mu vutuntu vulombelo vua makuli. Vi na ambatesela kumo na ku viana viuma viose via likuata na Mbambilone ya Kama ngeci mua ku tava cimo cipanga cayo.

²⁰ Kuli viuma vikuavo vi ka soloka ku ntsongo ya “matangua a ku kotokela.” Kaha kuli viuma vikuavo naua via tonda Yehova linga tu vi linge. Viuma vika? Kaha vika tua pande ku linga? Na vati tua pande ku livuahesela omo lia viuma vi ka soloka ku lutue? Tu ka lilongesa vio mu cilongesa ci na hatako.