MUKUA KU VINGILA vimpuendza nga a mona mpuendza ya kama ili na ku iza, ue ku linga cose mu ku lungula vantu. Muomu ua haka seho ku miono yavo kaha ue ku tonda ku va lungula ntsimbu mpuendza kanda i putuke.

Na vuno vene, mu ntsimbu ino Yehova ali na ku lungula vantu vose ngecize kuli na ku iza “mpuendza” ya vusonde vua kama ku tuvakana vimpuendza viose vi va hasa ku tu lekesa vakua ku vingila vimpuendza. Vati Yehova ali na ku lingamo? Vuno ali na ku hana vantu ntsimbu ya ku puamo mu ku ononoka vilungula vieni ni? Vikumbululo tu vi uana mu ku hilula vilungula via hele vantu ku nima.

Ku ntsimbu ya ku nima, Yehova ua lunguile vantu ku “vimpuendza” via ku liseza-seza ni nguetu vihiso vie ku hanene kuli vakua lisino. (Visi. 10:25; Yele. 30:23) Mu nkala cihiso, Yehova ua lunguile vantu tele kua lisupu ntsimbu ya kama na ku va leka vi va pandele ku linga mangana kati va nonge. (2 Vam. 17:12-15; Neh. 9:29, 30) Kaha naua linga a kuase vantu va aluluke, ua kele na ku tuma vangamba veni linga va ka ambulule ku-iza ca vihiso vieni, na ku va muesa ngecize ka va pandele ku kala na malanga.​—Amose 3:7.

Umo ua vangamba va pangesele Yehova mu ku lungula vantu ua puile Noa. Mu miaka ya yingi, Noa ua lunguile vantu vakua vukenia na vupangala, via ku iza ca Livazi. (Njen. 6:9-13, 17) Ua va lekele naua vi va pandele ku linga mangana va kovoke. Noa ua lihakelele kapandi ka kama ka ku ambulula, ngeci ua tsimanene mu ku pua “mukua ku ambulula vuviuke.”​—2 Pet. 2:5.

Vutuhu Noa ua lingile cose mu ku lungula vantu, vunoni va sembuluile vilungula viaco. Ka va muesele lutsilielo. Ngeci “livazi liezile, kaha lia va nongesele vose.” (Mat. 24:39; VaHe. 11:7) Mu cezile ku nonga, ka va hasele ku lihola malambi nguavo Njambi ka va lunguile houe.

Ha vintsimbu vikuavo, Yehova ua lunguile vantu mu kua lisupile lika ntsimbu ya indende ku ku-iza ca “mpuendza” ya cihiso ceni. Vutuhu ngoco, ua lingile cose linga vaze va yezilile mpuendza yaco, va kale na ntsimbu ya ku puamo ya ku lingako mumo. Ca ku muenako, Yehova ua tumine Mosesa na Alone va ka lungule Falao na vantu veni via ku-iza ca cipupu 7 ce ku pihisile viuma via vingi. Cipupu caco ca puile niondzi ya civue. Mu ku linga niondzi yaco ye ku nokele lia mukuavo, halumo tu hasa ku lihula nguetu, ‘Vuno Njambi ua va hele ntsimbu ya ku puamo ya ku tonda kua ku vandela ni? Mbimbiliya ya kumbulula nguayo: “Uze ua kele na vuoma vua lizi lia Yehova ha kati ka vangamba va Falao ua tinisile vangamba veni na vimuna veni mu zindzivo: kaha uze ka halakanene ku lizi lia Yehova ua sile vangamba veni na vimuna veni ku musenge.” (Ezu. 9:18-21) Ngue mu tua limuena, Yehova ua hanene cilungula na ntsimbu ya ku puamo, ngeci vose vaze va kele na vukatuisi va hasele ku liohiela ku civue.

Falao na vangamba veni va va lunguile naua via ku-iza ca cipupu 10. Vunoni va muesele vuheve na ku sembulula cilungula. (Ezu. 4:22, 23) Ngeci vana vavo va ndala vose va tsile. Ku nonga ca vaze vanike ce ku vuisa vusiua vua kama! (Ezu. 11:4-10; 12:29) Muomu va kele na ntsimbu ya ku ononoka cilungula caco! Vati tua tantekeyamo? Eci cilungula caco Mosesa ua ci hele naua kuli vaIsaleli, kaha navo ua va lekele vati va hasa ku ohiela vandala vavo. (Ezu. 12:21-28) Vangahi vononokele ku vilungula via Mosesa? Citava vantu 3 milhões vononokele kaha va hasele ku tuhuka mu Ingito na muono. Ca puile “civunga ca vantu veka  na veka,” vamo vaIsaleli, vakuavo kati vaIsaleli kaha na vamo Vakua Ingito.​—Ezu. 12:38.

Ngue mu i na muesa eyi mizimbu, Yehova ua lingile cose linga vantu va kale na ntsimbu ya ku puamo ya ku ononoka ku vilungula vieni. (Ndeu. 32:4) Vika honi Yehova ua kele na ku lingilamo? Kapostolo Petulu ua vi lomboluele ngueni, Yehova “ka hianga ngecize umosi a ka nonge, vunoni ngecize vose va hete ku ku-aluluka.” (2 Pet. 3:9) Cili vene, Yehova ua hakele seho ku vantu. Ua tondele va aluluke na ku ononoka masiko eni ntsimbu kanda cihiso ci hete.​—Isaya 48:17, 18; Loma 2:4.

Na lelo lino, vantu vose va na pande ku kala na vukatuisi vua ku ononoka cilungula ca vuasi-vuasi, cali na ku hitisa Yehova mu mavu ose. Omo Yesu ua kele ha mavu, ua lunguile vantu ngueni vakua mavu tangua va ka nonga mu ntsimbu ya “lamba ya kama.” (Mat. 24:21) Ku tuala ha cihiso caco, Yesu ua tumbuile vumo vupolofeto vua lomboluele viuma vi va ka mona na ku lihita navio vandongesi veni mu ntsimbu yaco. Mu vupolofeto vuaco Yesu ua tandangele viuma via kama vi tue ku mona matangua ano.​—Mat. 24:3-12; Luka 21:10-13.

Kuliya na vupolofeto vuaco, Yehova ali na ku mamuna vantu va mu pangele na ku mu ononoka. Ua tonda ngecize vantu va ku ononoka va kale na muono ua cili mu ntsimbu ino vene na ku lavelela vivezikiso vikuavo mu mavu a aha. (2 Pet. 3:13) Linga a kuase vantu ku tsiliela mu vikulaheso vieni, Yehova ue ku va hana umo muzimbu u kovola miono yavo. Muzimbu uaco ua pua ‘muzimbu ua cili ua Vuangana,’ uze ua tumbuile Yesu ngueni va ka u “ambulula ku vifuti viose” linga u ka pue “vukaleho vua kuli vakua vifuti viose.” (Mat. 24:14) Ngeci Njambi ua viukisa vakua ku mu lemesa mu vusunga va ambulule ovu “vukaleho,” ni nguetu muzimbu ueni, kaha vali na ku u ambulula mu vifuti vi tuvakana 240. Cili vene, Yehova a tonda vantu vose vakua mitima ya cili vononoke cilungula ceni linga va kovoke ku “mpuendza” ya cihiso ceni ca vuviuke ku lutue.​—Zef. 1:14, 15; 2:2, 3.

Ngeci mukemuo, cihula ca seho kati ku tonda ku tantekeya nga Yehova ue ku lungula vantu na ntsimbu ya ku puamo houe. Muomu tua limuena nguetu ue ku lingamo ntsimbu yose. Vunoni cihula ca seho ya kama eci: Vuno vantu va kononoka ku vilungula via Njambi omo ku ci li ntsimbu ni? Ngeci mukemuo, etu vakua ku ambulula muzimbu ua Njambi tu tualelenuho ku lihakela kapandi ka ku lungula vantu vose va tu hasa, linga va kovoke ku ku nonga.