1. Omo lia vika vamo vantu va fuila ku va singimika, kaha vika tu ka lilongesa mu cilongesa eci?

VATI tue ku hana vantu kasingimiko? Tue ku lingamo mu ku va haka seho ya kama na ku va singimika. Hahengi, tue ku singimika vamo va linga vimo viuma vi va pande ku tambuila kasingimiko ni vamo ve ku linga cipanga ca seho ya kama. Mu cilongesa cino tu ka lilongesa veya tua pande ku singimika kaha omo lia vika.

2, 3. (a) Omo lia vika Yehova ikeye ua fuila cikumakuma ku tambula vumpahu? (Talenu cikupulo ca ku vuputukilo.) (b) Iya Muana mpanga u va tumbula ku Ku-Solola 5:13, kaha omo lia vika tua pande ku mu hana vumpahu?

² Ku-Solola 5:13 nguayo “Uze ua tumama ku citumamo ca vuangana” na “Muana mpanga” va fuila vumpahu. “Uze na tumama ku citumamo ca vuangana” ikeye Yehova. Ku Ku-Solola kapitulu 4, tungelo va tu muesa vumo vusunga vua lingisa Yehova, “uze a yoya ku miaka na miaka ya ya-ye,” ua fuila ku tambula kasingimiko. Va handeka nguavo: “Yove ua viuka,  [Yehova] Muangana uetu na Njambi yetu, ku tambula ku-sangaziala na kasingimiko na ngolo: muomu yove ua tangele viuma viose, nomo cizango cove via puile, va vi tangele.”—Ku-Solola 4:9-11.

³ “Muana mpanga” u va tumbula ku Ku-Solola 5:13 ua pua Yesu Kilistu. Vati tua tantekeyamo? Muomu Yesu mua kele ha mavu, va kele na ku mu sana “Muana mpanga ua Njambi, mukua ku ambata vupi vua vakua mavu.” (Yoano 1:29) Vuno kua kala muangana ueka ua lihanaho laza ku cizango va mu tsihe linga ovole vantu veni ni? Uahi, ikeye lika! Ovu vua pua vumo vusunga vua kama vu tua pande ku mu singimikila. Ngeci Yesu na fuila ku tambula vumpahu muomu “Muangana ua vamiangana, Sukulu ya vasukulu.” (1 Timoteo 6:14-16) Nenu mu hasa ku livua ngue mu ve ku ivua tungelo muilu ve ku imba nguavo: “Muana mpanga uze ua ku tsiha ikeye ua viuka ku tambula ngolo, na vufuko, na mangana, na vukama, na kasingimiko, na vumpahu, na ku sangaziala.”—Ku-Solola 5:12.

4. Omo lia vika tu ka muesa ngecize tu vakua mangana nga tu hana vumpahu kuli Yehova na Kilistu?

⁴ Yoano 5:22, 23 nguayo Yehova na puisa Kilistu ngazi ya vantu vose. Ovu vua pua vusunga vua kama vua pande ku tu lingisa ku hana Yesu vumpahu. Kaha ku lingamo ce ku hana naua vumpahu kuli Yehova. Nga tu hangula ku hana vumpahu kuli Yesu na Ise, tu hasa ku ka tambula muono ka ue ku hua.—Tandenu Visamo 2:11, 12.

5. Omo lia vika vantu vose va fuila ku tambula vumo vumpahu na kasingimiko?

⁵ Vantu va va tangele mu “ciseteko ca Njambi” (Njenisisi 1:27) Eci ca muesa ngecize vantu va kala ha vuhasi vua ku muesa vifua ngue via Njambi. Ca ku muenako, vantu va hasa ku muesa cilemo, ngozi, na cikeketima. Vantu va va tangele naua na mutima ni nguetu ngazi ua muntima ue ku va kuasa ku tepesa via cili ku via vipi, na via vusunga ni kuahi. (Loma 2:14, 15) Cingi ca vantu va lema viuma via cili via ku lela, kaha va lema naua ku kala mu ciyulo na vakuavo. Eci ka ce ku tu komouesa, muomu Yehova ua pua Njambi ua ciyulo. Mua vusunga vantu vose va kala na vuhasi vua ku tambuluisa Yehova mu vifua via ku liseza-seza. Ngeci mukemuo tua pande ku va singimika.—Visamo 8:5.

6, 7. Ku litepa cika ca kala ha kati ka Vakaleho va Yehova na vantu vavengi nga va va muesa kasingimiko?

⁶ Tua tantekeya nguetu tua pande ku singimika vakuetu vantu, vunoni halumo ci hasa ku tu kaluuila ku tantekeya kasingimiko kaka tua pande ku va muesa na haka tua pande ku lengela. Omo lia vika? Muomu omo lia ku hona ku tantuluka cingi ca vantu ve ku va tuamenena ku cimbembesi ca mavu ano a Satana. Vavengi ve ku mona vamo vamala ni vampuevo ku pua vanjambi vavo. Vantu tele nga ve ku muesa vumpahu na kasingimiko ku vakuavo mu cifua ca tonda Yehova, vunoni vakevo ve ku hianesamo kasingimiko kaco, ngeci ve ku va puisa ngue vanjambi. Vamo ve ku temunuina zalesi, kakesi, na vilinga via vakua pulitika, vantuamena va malombelo, vakua ku asa mbola, vakua ku tsimana mu vifilme, na vantu vakuavo va lutsimo.

⁷ Vakua Kilistu va vusunga va tantekeya ngecize ka ca puile ca cili ku singimika vantu  mu cifua eci. Ha kati ka vantu vose va keleko ni va liko lelo lino, Yesu lika ua tu sila lungano lua cili lu tua pande ku temunuina. (1 Petulu 2:21) Tua pande ku vuluka nguetu, “vose va na lingi vupi, va na simina [honoua ku puisamo] ku vumpahu vua Njambi.” (Loma 3:23) Ka kuesi muntu na fuila ku mu lemesa. Tu ka vuisa Yehova vusiua nga tu hianesamo ku hana vantu kasingimiko.

8, 9. (a) Vati Vakaleho va Yehova ve ku muenamo vakua nguvulu? (b) Mu vika ka tue ku tava ku ononoka vanguvulu?

⁸ Kua kala vantu va tua pande ku haka seho na ku va singimika omo lia cipanga cavo. Ca ku muenako, aci singaniekenu ha vakuluntu va nguvulu na viuma vi ve ku mi pangela. Ve ku niunga vantu mu membo na ku hana viuma vi tondeka ku vantu va mu cifuti cavo. Vipanga viavo vie kua kuasa vavengi. Kapostolo Paulu ua handekele ngueni tua pande ku mona ava vanguvulu vaco ngue “vakua ku suana.” Ua handekele naua ngueni tua pande ku ononoka masiko avo: “Hanenu kuli vose eci ca va pande: mulambu kuli uze na pande mulambu” kaha “kasingimiko kuli uze na pande kasingimiko.”—Loma 13:1, 7.

⁹ Etu Vakaleho va Yehova, tue ku lihakela kapandi ka ku muesa kasingimiko ku vakua nguvulu. Tua tantekeya nguetu nkala cifuti ca kala na cisemua caco, ngeci vi ve ku tonda vanguvulu kuli yetu via liseza-seza mu nkala cifuti. Vunoni, kasi tue ku ononoka vanguvulu vaco mu ve ku linga vipanga viavo. Vutuhu ngoco, nga vanguvulu va tu tuma ku linga vimo vi tu lingisa ku muesa lisino kuli Yehova, ka tue ku tava. Evi viaco mu vie ku soloka, tue ku hangula ku ononoka Yehova ku hiana vantu.—Tandenu 1 Petulu 2:13-17.

10. Vati vangamba va Yehova va ku laza va tu sila lungano lua cili lelo lino?

¹⁰ Tu hasa ku lilongesa ku vangamba va Yehova va ku laza, va muesele kasingimiko ku vakua nguvulu. Yosefe na Maliya va tu sila lungano lua cili. Omo vakua Loma va tondele ku tantekeya vantu vangahi va kele mu cifuti, Yosefe na Maliya va ile vungendzi ku Mbetelema mu ku ka lisonekesa vutuhu Maliya tele a li mu hiehi na ku kuata muana. (Luka 2:1-5) Kapostolo Paulu neni ua tu sila lungano lua cili lua ku singimika vanguvulu. Mu va mu vangeyele nguavo na lingi vimo via ku pihia, ua ka lihakuilile mu kasingimiko kuli Muangana Helonde Angilipa na kuli Festu, nguvulu ua Loma ku muhato ua Yundeya.—Vilinga 25:1-12; 26:1-3.

11, 12. (a) Omo lia vika ka tue ku hana kasingimiko ka ku lifuila ku vakuluntu va malombelo? (b) Vika viezilemo omo Mukaleho ua ku Austria ua muesele kasingimiko kuli umo mukua pulitika?

¹¹ Amba vakuluntu va malombelo co? Vuno navo tua pande ku va hana kasingimiko ka ku lifuila ni? Houe. Tue ku va singimika vene ngeci mua nkala muntu. Vuno ci ka pua vuhenge ku va hana kasingimiko ka ku lifuila ni? Eyo. Omo lia vika? Muomu vakuluntu va malombelo ka ve ku longesa vusunga ku tuala hali Njambi na Lizi lieni Mbimbiliya. Yesu ua payele vakuluntu va malombelo a makuli, na ku va tumbula ngueni vakua civembulu na vantuamena va vapi. (Mateo 23:23, 24) Vunoni kati vuhenge ku muesa kasingimiko ka ku lifuila ku vakuluntu vanguvulu. Kaha vintsimbu vimo va tu kuasaho laza omo lia ku va singimika.

¹² Umo ua vanguvulu vaco ua puile  Dr. Heinrich Gleissner, mukua pulitika ua ku Austria. Mu ntsimbu ya Ndzita ya Mavu Ose ya mu Civali, va mu kuatele ku vakua Nazi. Mu va mu hakele mu kumboyo ya ku ya ku vipanga via kayando, ua liuanene na Leopold Engleitner, Mukaleho ua ntsintsa ya ku ambulula ua ku Austria. Muanetu Leopold ua lombololuele via tsiliela na kasingimiko kuli Dr. Heinrich, kaha ua mu halakanene vuino. Kaha mu ya huile ndzita, Heinrich ua kele na ku pangesa mpoko yeni mu nguvulu mu ku hakuila Vakaleho va Yehova ku Austria. Halumo mua tantekeya amo malungano a viuma via cili via lingikile kuli Vakua Kilistu omo lia ku singimika vakua nguvulu.

13. Veya va na fuila cikuma-kuma ku tambula kasingimiko ketu, kaha omo lia vika?

¹³ Tua pande ku haka seho ku vamuanetu na ku va singimika. Eci ca tondeka cikuma-kuma kuli vamuanetu va vamala ve ku tu tuamenena, ngeci mua vakuluntu, tuniungi va ku zinguluka, vakuluntu va Mbetele, na vakua Civunga ca Vantuamena. (Tandenu 1 Timoteo 5:17.) Ava vamala vaco, vose ve ku niunga vantu va Njambi, kaha Mbimbiliya ya va tumbula nguayo “vuana kuli vantu.” (Efeso 4:8) Mua vusunga va tondeka ku va haka seho na ku va singimika, ca ku hona ku tala ku va tunda, vi va lilongesa, vukama, nga va kala na vimbongo ni kuahi. Vakua Kilistu va katete va tu sila lungano lua cili. Va kele na ku singimika vamala va kele na ku tuamenena kaha netu tue ku lingamo lelo. Vunoni mu tue ku kala nava vamuanetu, ka tue ku va mona ngue tungelo, ni vantu va hiana seho cikuma. Kasi tue ku va singimika na ku va haka seho ya kama omo lia cipanga cavo na ku likehesa  cavo.—Tandenu 2 Kolintu 1:24; Ku-Solola 19:10.

14, 15. Haka va litepela Vakuluntu va Vakua Kilistu na vakuluntu va malombelo?

¹⁴ Ava vakuluntu vaco va pua ngue tuniungi va ku likehesa. Ka ve ku tonda ku va mona ngue vakua lutsimo. Ngeci ka va lifuile cipue kavundende na cingi ca vakuluntu va malombelo va ntsimbu ino na vaze va ku matangua Yesu. Ikeye ua tumbuile vakuluntu vaco ngueni: “Va lema vitumamo via vukama ku viuano via ku-lia, na vitumamo via vukama mu visinangonga, na ku vitanda.”—Mateo 23:6, 7.

¹⁵ Vakuluntu mu vikungulukilo ve ku ononoka mezi a Yesu ngueni: “Vunoni enu kati va mi tumbule Lambi: muomu umo lika na pu Mulongisi uenu, kaha enu vose mu vana va naye. Kati mu ka tumbule umo ua hano ha mavu Isuenu: muomu umo lika Isuenu, ikeye uze u li muilu. Cipue kati va mi tumbule vakua ku tuamena, muomu umo lika mukua ku tuamena, ikeye Kilistu. Vunoni ou na pu ua kama ha kati kenu, ikeye a ka pua ngamba yenu. Kaha uose a ka lihaka ku vukama, va ka mu kehesa; nou a ka likehesa, va ka mu haka ku vukama.” (Mateo 23:8-12) Nga vakuluntu va vikungulukilo mu mavu ose va likehesa na ku ononoka mezi a Yesu, vamuaneye va ka va haka seho, ku va lema na ku va singimika.

16. Omo lia vika tua pande ku lihakela kapandi ka ku muesa kasingimiko?

¹⁶ Mu ka hita ntsimbu linga tu lilongese ku singimika vakuetu ngue mu ca pande. Na Vakua Kilistu va katete navo va hitilemo. (Vilinga 10:22-26; 3 Yoano 9, 10) Vunoni kapandi ketu ka kayi mu ngoco. Nga tu singimika vakuetu mu njila ya ya Yehova ku mutima, tu ka uana ku vezika ca kama.

17. Ku vezika cika ce ku iza mu ku singimika vaze vali na mpoko?

¹⁷ Nga tu haka seho na ku singimika vaze va kala na mpoko mu membo etu, navo va ka muesa cizango ca ku hakuila cipanga cetu ca ku ambulula. Va hasa ku putuka ku sangala cipanga cetu ca ku ambulula. Evi vikevio via lingikile mu miaka ya hiti ngeci ku Alemanha. Umo muanetu ua mpuevo ua lizina Birgit mua ile ku ku lisoneka ca ku manusula ca sikola ca muneni ua mpuevo. Valongesi va lekele va Birgit nguavo va lemene cikuma ku kala na vana va Vakaleho ha sikola. Nguavo vanike vaco va puile vakua vilinga via cili ha sikola. Kaha Birgit ua va lekele ngueni, “Vana vetu tue ku va longesa ku niunga vitume via Njambi kaha vilongesa viaco via ambatesela kumo na ku singimika valongesi na ku va haka seho.” Umo mulongesi ua handekele ngueni nga vanike vose va puile ngeci mua Vakaleho va Yehova, nga ca pua ca casi ku va longesa. Cifua ca Vakaleho ca va ile cikuma ku mutima, ngeci mu  nima ya vimo visimano, umo ua valongesi ua ile ku ciuano ca muhato.

18, 19. Vika ka tua pandele ku suva omo tu muesa kasingimiko ku vakuluntu?

¹⁸ Vitume via mu Mbimbiliya vi hasa ku tu kuasa ku ivuisisa vati tua pande ku ononoka vakuluntu va vikungulukilo. (Tandenu VaHevelu 13:7, 17.) Tua pande ku va sangala omo lia cipanga cavo. Mbimbiliya nguayo tua pande naua ku tambuluisa ku tsiliela cavo. Vunoni eci ka ca lombolokele ngecize tua pande ku temunuina mpundu cifua ci ve ku zalelamo vakuluntu, ku handeka, na ku longesa. Nga tu lingamo tu ka muesa ngecize tuli na ku kavangeya vantu kati Kilistu. Ka tua pandele ku suva ngecize vakuluntu navo ka va tantulukile ngeci muetu.

¹⁹ Tua pande ku singimika na ku haka seho ku vakuluntu, kati ku va puisa ngue vakua lutsimo. Ku lingamo ci ka va kuasa. Mu njila ika? Ci ka pua ca casi kuli vakevo ku likehesa na ku likela ku singanieka ngue va seho ku hiana vakuavo ni vakevo ka ve ku sevuka.

20. Ku vezika cika tu hasa ku uana mu ku singimika vakuetu?

²⁰ Ku singimika vakuetu ce ku tu niunga ku ku lihalesa na ku tualelaho ku likehesa nga vakuetu va tu muesa seho ya kama. Ce ku tu niunga naua linga kati tu suntsuke nga umo u tua singimika a linga vimo vi tu pihisa ku mutima. Civezikiso cikuavo ci tu hasa ku uanamo ca pua ku pangela hamo na lukungulukilo lua Yehova. Lukungulukilo ka lue ku hana kasingimiko ka kama cikuma ku muntu, cipue nga mukua ku tsiliela ni kuahi.

21. Ku vezika cika ca seho ya kama tu hasa ku uana mu ku singimika vakuetu?

²¹ Nga tu singimika vakuetu, tu ka uana ku vezika muomu tu ka ya Njambi ku mutima. Tu ka linga vize via tonda Njambi kaha tu ka pua vakua vusunga kuli ikeye. Yehova a ka hasa ku kumbulula kuli Satana, ua handekele ngueni uahi a hasa ku mu ononoka. (Visimo 27:11) Cingi ca vantu mu mavu ano ka va tantekeya vati ve ku hana kasingimiko ku muntu mu njila ya cili. Tua vezika cikuma mu ku tantekeya vati tua pande ku muesa kasingimiko ngue mua tondela Yehova!