MASIKO a Mosesa, a tavesele vantu ku lisinga na mezi ngeci mua, “Nji lisinga kuli ove mu lizina lia Njambi” ni “Nja lisingi mu lizina lia Yehova.” Vunoni ku matangua a Yesu, ku lisinga ca lanene cikuma, kaha ca tepulukile seho muomu vantu va kele na ku lisinga mu kampe viose vi va kele na ku handeka. Va kele na ku lingamo linga vakuavo va tsiliele vi va kele na ku handeka, vunoni eci cifua ca ku lisinga Yesu ua ci vindikile luvali. Kaha ua longesele vantu ngueni: “Vihandeka vienu vi pue ngecize, Eua, eua; Houe, houe.”​—Mateo 5:33-37; 23:16-22.

Limo livulu ngualio, Talmude (Livulu lia masiko na vilongesa via vaYundeya) lia tu kuasa ku mona vati ku lisinga, ni ku likunkula ca lanene ha kati ka vaYundeya mu ku muesa vusunga vua vihandeka viavo. Muomu Talmude ya lombolola mu vutuntu ku lisinga cika ca puile ca seho kaha na cika ci va pandele ku sembulula vantu.​—Theological Dictionary of the New Testament.

Kati Yesu lika ua payele mana a ku lisinga-singa ngoco. Ca ku muenako, mukua ku soneka mizimbu ya vaYundeya, Flaviu Josefu ua sonekele via vumo vulombelo vua vaYundeya vua kele na ku viana ku likunkula. Vakua civunga caco va tsilielele ngecize ku lisinga ca puile vupi vua kama ku hiana makuli. Kuli vakevo nga muntu ha ku linga vakuavo va tave via handeka noho a lisinge, kaha ua pua mukua visaki. Limo livulu li va vuezelele vaYundeya mu Mbimbiliya li ve ku sana nguavo Mana a Sirake, ni nguetu Ekelesiastiku, (23:11) nalio ngualio: “Muntu ue ku lisinga-singa ngoco ue ku tsiha masiko ose mu vutuntu.” Yesu ua vindikile ku lisingila viuma ka viesi na seho. Nga tue ku handeka vusunga ntsimbu yose, ka ci ka tondeka ku lisinga linga vantu va tave vi tu handeka.