VAMO vahumbe vavali va kele na kuenda hamo mu mbonge ya Baguio mu Filipinas. Va muene kamo kantsandia ketu ka mikanda vunoni ka va sueneneko. Umo ndumbuetu ua kele ku mukulo ua kantsandia kaco, ua va muesele cihanga ca ndzolela ya kama. Vaze vampuevo va tualeleho kuenda, vunoni ndzolela ya ndumbuetu Helen ya va ile cikuma ku mutima. Kaha mu nima ya ntsimbu, vaze vampuevo va hilukile ku ndzivo mu autocarro.

Kaha va muene citantekeyeso ca kama ca jw.org ha Ndzivo ya Vuangana. Ngeci va vulukile ngecize aze masona aco akeo a va muene ha kantsandia hemanene Helen. Ngeci vose va sulukile mu likalu na kuya ha Ndzivo ya Vuangana yaco na ku tala programa ya viuano ya kele ha mbelo.

Kaha ciuano ca hateleko, vose vavali vezile mu ku kunguluka. Mu tantekeya iya va muene mu va kovelele mu Ndzivo ya Vuangana ni? Ikeye vene ndumbuetu Helen. Kaha va mu nongonuene vuasi-vuasi nguavo uze muntu uetu ua ndzolela. Ndumbuetu Helen ngueni: “Mu va kele na kuiza kuli ange nja putukile ku lisosomua nguange halumo kuli vimo vi nja va vihisilile.” Vunoni vaze vampuevo va lomboluelele kuli ndumbuetu Helen ngecize va mu muene ku kamo kantsandia ka mikanda.

Vaze vahumbe va lemene viuano na ku likata na vamuanetu, kaha va livuile ku zituka ngue laza vasua ku kunguluka. Kaha mu nima ya ciuano mu va muene vakuavo va komba mu Ndzivo ya Vuangana, navo va vundilile nga citava va kuase. Umo ua vaze vampuevo ua tundile mu Filipinas, vunoni mukuavo ue ku tualelelaho ku kunguluka kaha ua putuka ku lilongesa Mbimbiliya. Viose evi, omo lia cihanga ca Ndzolela ci va va muesele!