1-2. Vika vie ku lingisa Yehova a tave ku lemesa cetu?

 VIKA mue ku singanieka nga mu ivua lizi “ku lemesa”? Halumo mue ku singanieka hali umo muanetu ua ku likehesa na tsikama mu ku vundila ntsimbu kanda kose. Ni mue ku singanieka hali vumo vusoko vua ndzolela, vuli na ku lilongesa Mbimbiliya na civando.

² Cipue uze muanetu ni vuze vusoko vali na ku lemesa. Vunoni tu hasa ku lihula nguetu: ‘Vuno Yehova a ka tava ku lemesa cavo ni? Eyo, a ka tava nga ku lemesa cavo ca litombola na cizango ceni kaha vali na ku lingamo na cilemo kaha na kasingimiko kuli ikeye. Tua lema cikuma Yehova. Tu tantekeya nguetu, ua fuila ku mu lemesa, vunoni tua tonda ku lemesa cetu ci pue ca cili cikuma ci tu hasa ku mu hana.

3. Vika tu simutuila mu cilongesa cino?

³ Mu cilongesa cino, tu hilula cifua ca ku lemesa ca tavele Yehova ku laza kaha naua tu mona viuma 8 vie ku lingisa Yehova a tave ku lemesa cetu lelo lino. Omo tu lingamo, tu hilulenu muntu ku muntu vati tu hasa ku vueza ku vucili vua ku lemesa cetu. Tu hilula naua omo lia vika ku lemesa ca vusunga ce ku tu vuisa ndzolela.

4. Vati vantu va lemesele Yehova tele Yesu kanda eze hano ha mavu, va muesele kasingimiko na cilemo kuli Yehova?

⁴ Ku miaka ya ku nima, tele Yesu kanda eze hano ha mavu, vamala va lutsilielo ngeci mua Avele, Noa, Avilahama na Yombi, va muesele kasingimiko na cilemo kuli Yehova. Mu njila  ika? Mu ku muesa kasingimiko, ku ononoka na ku tava ku seza vimo ku nima omo lia Yehova. Mbimbiliya ka ya tandangele viose vi va pandele ku linga mu ku lemesa cavo. Vunoni va lingile cose mu ku muesa kasingimiko kuli Yehova kaha ua tavele ku lemesa cavo. Mu nima yaco, amba vuose Yehova ua hele masiko ku mbuto ya Avilahama ku hitila muli Mosesa. Ha kati ka masiko aco, ha kele amo a muesele mpundu vati Yehova ua tondele ku mu lemesa mu njila ya muya ku mutima.

5. Viuma vika via alulukile ku tuala ku ku lemesa ca vusunga mu nima ya ku-tsa na ku sanguka ca Yesu?

⁵ Mu nima ya ku-tsa na ku sanguka ca Yesu, Yehova ka kakateyele naua vangamba veni ku ononoka masiko a Mosesa. (Loma 10:4) Muomu kua kele masiko a aha a va pandele ku kava Vakua Kilistu a va lukile nguavo, “mezi a lisiko a Kilistu.” (Ngal. 6:2) Aa mezi aco a lisiko, ka a puile mukana ua laha ua viuma via ku soneka vi va pandele ku patekeya na ku ononoka, vunoni a puile ku tambuluisa lungano lua Yesu na ku kava vilongesa vieni. Na lelo lino, ve ku linga cose mu ku kava Kilistu linga va hase kuya Yehova ku mutima na ku uana “ku huima ku miono yavo.”—Mat. 11:29.

6. Vati tu hasa ku uana vukuasi mu cilongesa cino?

⁶ Omo tu hilula nkala mutamba ua ku lemesa cetu, lihulenu nguenu: ‘Haka nje endela ku tuala hali evi? Omo mu lingamo, viukililenu na vize vi mu hasa ku puisamo, vunoni tualenu naua mana kuli haze ha mu tonda ku pangela na ku kundika cimpande caco mu vivundilo.

7. Vati Yehova ue ku mona vivundilo vietu via ku tunda ku mutima?

⁷ Ku vundila capua ku lemesa Yehova. Visoneka via ku lela, via setekesa vivundilo vietu via ku viukisa vuino na insensu i va kele na ku hana ku tavenakulu na ku tembele. (Visa. 141:2) Insensu yaco, mu va kele na ku i tsimika kua kele na ku tunda vueko vua cili vua kele na kuya Njambi ku mutima. Na vuno vene, vivundilo vietu via ku tundilila ku mutima vie ku mu vuisa ndzolela ku mutima ambe nga via vihi. (Visi. 15:8; Ndeu. 33:10) Tuli na vusunga vuose vua ku tsiliela ngecize Yehova ua lema ku tu halakana, omo tue ku vundila kuli ikeye mu ku mu santsela na ku mu muesa cilemo cetu. Kaha ua tonda tu pue na ku mu lekako viuma vie ku tu umisa mutima, viuma vi tua lavelela ku puisamo na vizango vietu. Ngeci mukemuo, ca pua ca cili ntsimbu kanda tu ci vundile kuli Yehova, tu ci hilule vuino hali vize vi tu tonda ku mu leka. Nga mu lingamo kaha mu ka hana insensu ya cili cikuma kuli Isuenu ua muilu.

8. Vukovelelo vuka tua kala navuo mu ku sangaziala Njambi?

⁸ Ku sangala Yehova capua ku mu lemesa. (Visa. 34:1) Tue ku sangala Yehova mu ku halesa vifua vieni via ku komouesa na vipanga vieni ku vakuetu. Ku kala na mutima ua ku santsela ce ku tu lingisa ku sangaziala Yehova. Ku uana-uana ntsimbu ya ku hilula ha vucili vua Yehova na ha viuma via cili via tu lingila, ci tu kuasa ku kala na vusunga vua vuingi vua ku mu santsela. Cipanga ca ku ambulula ce ku tu hana vukovelelo vua ku lifuila, vua ku hana Yehova “cikombelo ca ku sangala Njambi ntsimbu yose, cikeco, mihako ya milungu ya ku tava ku lizina lieni.” (VaHe. 13:15) Nga tu tonda ku vundila kuli Yehova, tue ku lihakela kapandi ka ku hilula vuino vika tu tonda ku handeka. Na vuno vene, tua pande ku lihakela kapandi ka ku hangula vuino mezi etu nga tuli mu cipanga ca ku ambulula. Tue ku tonda vikombelo vietu via ku sangala vi pue via cili  cikuma. Ku lingamo ce ku tu kuasa ku ambulula na ndzolela.

9. Ngeci mua vaIsaleli, vati ku likungulula ce ku tu kuasa? Handekenu vukuasi vu mu uanamo yenu mpundu.

⁹ Ku kunguluka capua ku lemesa Yehova. Ku laza, vaIsaleli va va lekele nguavo: “Lutatu ku muaka vamala vove vose va ka soloka ku meso a Yehova Njambi yove mu muhela uze u a li ka hangula.” (Ndeu. 16:16) Va pandele ku seza vindzivo na mehia avo ca ku hona na umo uahi a ku vi niunga. Yehova ua va kulahesele ngueni: “Muntu na umo uahi a ka sunguiya cifuti cove omo u kanduka mu ku soloka ku meso a Yehova Njambi yove.” (Ezu. 34:24) Vaze vaIsaleli, va kulahelele na mutima uose muli Yehova, ngeci va kele na kuya ku viuano viaco nkala muaka. Kaha va tambuile vilunguiso via vingi. Vevuisisile vuino Lizi lia Njambi kaha va hiluile ha vucili vua Yehova na ku likata na vamuanaye mu lutsilielo. (Ndeu. 16:15) Netu tue ku tambula vilunguiso ngeci muevi, mu tue ku lihakela kapandi ka ku kunguluka ntsimbu yose. Kaha singaniekenu ha ndzolela ye ku ivua Yehova, mue ku tu mona tu neza ku viuano oku tua liviukisila mu ku hana vikumbululo via ku viukisa vuino kaha via vihi.

10. Omo lia vika kuimba ca pua mutamba vua seho ua ku lemesa?

¹⁰ Kuimba capua ku lemesa Yehova. (Visa. 28:7) Kuimba ca puile mutamba ua seho ya kama mu ku lemesa ca vaIsaleli. (1 Miz. 25:1, 6-8) Ca ku muenako, muangana Ndaviti ua hanguile vaLevi 288 va pue vakua kuimba ku tembele. (1 Miz. 25:1, 6-8) Na lelo lino, tue ku muesa cilemo cetu kuli Njambi mu kuimba miaso ya ku sangaziala. Kaha ka ca tondekele tu pue vatongue mu kuimba amba tu lingemo. Aci singaniekenu hali evi: Mu tue ku handeka ‘tue ku sevuka vintsimbu via vingi,’ vuno tue ku likela ku handeka cipue ku Ndzivo ya Vuangana ni mu ku ambulula omo liaco ni? Houe. (Tia. 3:2) Na vuno vene, ka tua pandele ku tavesa mahenga etu a tu vindike ku imbila Yehova.

11. Kuliya na Visamo 48:13, omo lia vika tua pande ku hangula ntsimbu ya ku lilongesa Mbimbiliya mu vusoko?

¹¹ Ku lilongesa Lizi lia Njambi na ku longesa vana capua ku lemesa Yehova. Lisiko lia Sapalalo, lia kele na ku hana vukovelelo lia ku lembuka vipanga lia tangua na tangua linga va tuale mana ku vusamba vuavo na Yehova. (Ezu. 31:16, 17) Vaze va kele na vana, va kele na ku pangesa vukovelelo vuaco mu ku va longesa via Yehova na vucili vueni. Netu tua pande ku hangula ntsimbu ya ku pua na ku tanda na ku lilongesa Lizi lia Njambi. Ku lingamo ca pua ku lemesa Yehova kaha ce ku tu kuasa ku mu suena mu hiehi. (Visa. 73:28) Kaha ku lilongesa Lizi lia Njambi mu vusoko ce ku hana ku visemi vukovelelo vua ku longesa vana vavo via Yehova linga va hase ku likuata vusamba vua lika liavo neni.—Tandenu Visamo 48:13.

12. Vika tu lilongesa ku cifua ca muenenemo Yehova, vipanga via vaze va pangele vitenga via mu tavenakulu?

¹² Ku tunga vindzivo via ku lemesela na ku vi niunga capua ku lemesa Yehova. Mbimbiliya nguayo, ku tunga tavenakulu na ku panga vitenga viayo via puile “vipanga via ku lela.” (Ezu. 36:1, 4) Na lelo lino, Yehova ue ku mona cipanga ca ku tunga Vindzivo via Vuangana na vindzivo vikuavo via lukungulukilo ku pua ca ku lela. Vamo vamuanetu na vandumbuetu ve ku pangesa ntsimbu ya kama mu ku panga cipanga caco. Mua vusunga, tue ku santsela cikuma ku vipanga via seho vi ve ku linga mu ku tuameka Vuangana. Vunoni navo ve ku ambulula. Vamo halumo ve ku tonda vene ku pua vapioneiro. Kaha vakuluntu mu cikungulukilo, va hasa ku muesa ngecize ve ku kuasa evi vipanga via ku tunga mu ku  hangula ava vandumbuetu na vamuanetu ku pua vapioneiro nga vana puisamo via tondeka. Ambe nga tua kala na vutongue vua ku tunga ni kuahi, tu vose tu hasa ku lihakela kapandi ka ku niunga vindzivo via lukungulukilo linga vi pue via cili ntsimbu yose.

13. Vati tua pande ku muenamo milambu i tue ku hana mu ku kuasa vipanga via Vuangana?

¹³ Ku hana milambu ku cipanga cetu mu mavu ose ca pua ku lemesa Yehova. Vaisaleli ka pandele ku ka lisolola ku meso a Yehova mavoko-voko. (Ndeu. 16:16) Va pandele ku neha milambu kuliya na vuhasi vuavo. Ku hana milambu yaco, ca puile ku muesa ngecize va na santsela cikuma ku viose via va viukisile Yehova mu ku va kaniamesa mu lutsilielo. Vati tu hasa ku muesa cilemo cetu kuli Yehova na ku santsela ku vukuasi vua mu lutsilielo vu tue ku tambula? Imo njila ya pua, ku hana milambu mu cikungulukilo cetu kaha na ku cipanga cetu mu mavu ose kuliya na vuhasi vuetu. Kapostolo Paulu ua handekele ngueni: “Nga ku li laza cizango, ca tava ngue omo muntu kesi naco.” (2 Kol. 8:4, 12) Yehova ua haka seho ku nkala mulambu u tu hana cipue nga ua u ndende cikuma.—Mako 12:42-44; 2 Kol. 9:7.

14. Kuliya na Visimo 19:17, Vati Yehova ue ku mona vukuasi vu tue ku hana ku vamuanetu va ku kalekeya?

¹⁴ Ku kuasa vamuanetu va ku kalekeya capua ku lemesa Yehova. Yehova ua kulahesele ku lunguisa vaIsaleli va kuasele vakua ku kalekeya. (Ndeu. 15:7, 10) Cili vene, nkala ntsimbu i tue ku kuasa umo muanetu na kalekeya, Yehova ue ku mona ngue tuli na ku hana vuana kuli Ikeye. (Tandenu Visimo 19:17.) Ca ku muenako, omo Vakua Kilistu va ku Filipu va tumine vuana kuli Paulu tele ali mu kamenga, Paulu ua muene vuana vuaco ku pua “cikombelo ca ku viuka, ca mu ya Njambi ku mutima.” (Filp. 4:18) Ngeci mukemuo, puenu na ku tala mu cikungulukilo cenu na ku lihula nguenu: Vuno muli umo u nji hasa ku kuasa ni? Yehova ue ku ivua ndzolela ya kama, mue ku mona tu pangesa ndzili yetu, vutongue vuetu na vikuata vietu mu ku kuasa vakua ku kalekeya. Ngeci ua vi puisa ku pua mutamba ua ku lemesa cetu kuli ikeye.—Tia. 1:27.

15. Vutuhu ku lemesa ca vusunga ca tondeka ntsimbu na ku lihakela kapandi, omo lia vika ka ca puile citeli?

¹⁵ Ku lemesa mu vusunga, ca tondeka ntsimbu na ku lihakela kapandi ka kama. Vunoni ka ca puile citeli. (1 Yoa. 5:3) Omo lia vika? Muomu tue ku lemesa Yehova omo lia ku mu lema. Ci na pu ngue kanike a tonda ku hana vumo vuana kuli ise. Ca ku muenako, nga a mu hana cimo cikupulo ca ku sona, kanike ke ku liveya ntsimbu ya na pangesa mu ci linga. Vunoni ue ku hana vuana vuaco na ndzolela, muomu ua lema ise. Na vuno vene, omo lia cilemo cetu kuli Yehova, tue ku ivua ndzolela na ku lihakela kapandi na ku pangesa ntsimbu yetu mu ku mu lemesa.

16. Kuliya na VaHevelu 6:10, vati Yehova ue ku mona kapandi ka tue ku lihakela muntu ku muntu mu ku mu ya ku mutima?

¹⁶ Visemi va cilemo ka ve ku lavelela vuana vua cifua cimo lika ku vana vavo vose. Va tantekeya ngecize muana ku muana ua lifuila. Na vuno vene, Tatetu ua muilu a tantekeya ngecize tua lifuila muntu ku muntu. Ca ku muenako, halumo tua kala na vuhasi vua ku linga via vingi ku hiana vakuetu va tu tantekeya ni va tua lema. Ni halumo, ka tue ku hasa ku linga via vingi mu lukungulukilo omo lia citso cetu, cihindu, ni viteli via mu vusoko. Nga mukemuo, kati tu uile mu vusiua. (Ngal. 6:4) Yehova kaka suvu vipanga vieni. Ca kama lika, nga muli na ku lihakela kapandi kaha na ku  mu pangela na vutumbe vua cili, a ka viukilila. (Tandenu VaHevelu 6:10.) Yehova ue ku mona cipue vene matumbe a mu mutima uenu. Ua tonda mu yoye mu ndzolela kaha ue ku viukilila na ku lemesa ci mue ku mu hana.

17. (a) Nga kuli umo mutamba ua ku lemesa cetu ue ku tu kaluuila, vika tu hasa ku linga? (b) Vukuasi vuka mua uana ku tuala hali umo mutamba ua ku lemesa cetu u va muesa mu cikasa “ Vuezenu ku Ndzolela Yenu”?

¹⁷ Vika tu hasa ku linga nga umo mutamba ua ku lemesa cetu ngeci mua ku lilongesa mu vulika ni ku ambulula, ue ku tu kaluuila? Nga tu lihakela kapandi ka ku linga-linga vipanga viaco ku sua kumo, vika tu izilila na ku tu ya ku mutima. Evi tu hasa ku vi setekesa na viuma ngeci mua ku lilongesa ku lihondolola muvila, ni ku sika cisandzi. Nga tu pua na ku lilongesa noho-noho, halumo ku tu ci kuata vuasi. Vunoni nga tu lihakela kapandi ka ku linga-lingamo tangua na tangua, cipue mu kantsimbu ka kandende lika kaha tuya na ku vueza kamandende-kamandende, tu ka mona ngecize tuli na ku ci hasa, kaha tu ka lema ntsimbu i tue ku ci linga. Mua mono vati tu hasa ku pangesa eci cimueso ku ku lemesa cetu ni?

18. Vati tue ku puisamo vutumbe vua tu tangelele Njambi kaha vika vie ku izamo?

¹⁸ Tue ku puisamo vutumbe vua tu tangelele Njambi mu ku mu lemesa na mutima uose. Kaha evi vie ku vueza ku ndzolela yetu mu muono na ku tu hana lulavelelo lua ku ka lemesa Yehova ku miaka yose ya ya-ye. (Visi. 10:22) Cikuavo naua, cipue mu ntsimbu ino vene ka tue ku lisosomua cikuma, muomu tua tantekeya ngecize Yehova ue ku kuasa vakua ku mu lemesa nga vali mu visoti. (Isaya 41:9, 10) Cili vene, tua kala na vusunga vua vuingi vua pande ku tu lingisa ku pua vantu va ndzolela, muomu tue ku lemesa Tatetu ua cilemo uze ua fuila “Ku tambula ku-sangaziala na kasingimiko na ngolo” ku viuma viose via tangele!—Ku-So. 4:11.