▪ Vamo ve ku tanda ou muzimbu mu vuasi-vuasi, ve ku kala neci cihula. Vunoni ha muzimbu uaco va tumbulamo vamala vavali va puile mihoni. Ni nguetu va kele na lizina limo lika. Kaha tu hasa ku lilongesaho via vingi mu ku hilula muzimbu uaco.

Saulu muangana ua Isaleli, ua kele na vana vatanu na vavali va vamala kaha na vana vavali va vampuevo. Ndala yeni ua puile Yonatase. Vunoni mu nima ya ntsimbu muangana Saulu, ua semene muana na mpueyeni mukuavo Lizepa kaha ua mu lukile Mefimbosete. Kaha ndala yeni Yonatase, neni ua kele na muana ya lukile Mefimbosete. Ngeci mukemuo, muangana Saulu ua kele na muana ua lizina Mefimbosete kaha na mutekulu ua lizina olio vene.

Ntsimbu imo, Muangana Saulu, ua alulukile vakua Ngiveone vaze va kele ha kati ka vaIsaleli na ku seteka ku va nongesa mu vutuntu. Vunoni cize ca puile cisevuka ca kama. Omo lia vika? Muomu ku matangua a Yehosua, vamiata vaIsaleli va lingile litavasiano lia ciyulo na vakua Ngiveone.—Yeho. 9:3-27.

Kaha litavasiano liaco, kasi lia kele na ku panga ku matangua a Muangana Saulu. Vunoni muangana ua sembuluile litavasiano liaco na ku seteka ku nongesa vakua Ngiveone vose. Cisevuka caco, ca nehele mulonga ua maninga “ha mutue ua Saulu na ha ndzivo yeni.” (2 Sam. 21:1) Mu nima ya ntsimbu Ndaviti ua hingile Saulu ha vuangana. Kaha vakua Ngiveone, vaze vovokele ku ku tsiha ca Saulu, va lekele Ndaviti ya indzi yaco. Vunoni Ndaviti ua vehuile vati va hasa ku zima uze mulonga ua maninga ua nehele Saulu mu cifuti linga Yehova a putuke naua ku va vezikisa. Vakua Ngiveone ka va vundilile vimbongo, vunoni va vundilile ngecize vana vatanu na vavali ua uze yala ua lengeyele ku va tsiha va va hanevuo linga va va tsihe. (Num. 35:30, 31) Kaha Ndaviti ua lingile vi va mu vundilile.—2 Sam. 21:2-6.

Ha ntsimbu ize, Saulu na Yonatase tele va tsa laza ku ndzita, vunoni Mefimbosete muana Yonatase tele a cili na muono. Mefimbosete ua hitile mu mponde ku vunike na ku tundisaho vulema. Kaha ka lihakele mu vutumbe vua ise vua ku nongesa vakua Ngiveone. Ndaviti ua lingile litavasiano lia vusamba na Yonatase kaha litavasiano liaco lia kuatele na ku vana vavo. Kaha evi via kuasele Mefimbosete muana Yonatase. (1 Sam. 18:1; 20:42) Muzimbu uaco nguao: “Muangana uohielele Mefimbosete, muana Yonatase muana Saulu, omo cisingo ca Yehova ca kele ha kati kavo.”—2 Sam. 21:7.

Vutuhu ngoco, Ndaviti ua lingilile vi va mu vundililile kuli vakua Ngiveone. Ua va hanene vana vavali va vamala va Saulu, umo uavo Mefimbosete kaha na vatekulueni vatanu va vamala. (2 Sam. 21:8, 9) Evi via lingile Ndaviti, via manusuile mulonga ua maninga ua kele mu cifuti.

Evi ka via puile muzimbu ua ngoco. Muomu masiko a Njambi a muesele ha toma nguao: “Kati va tsihe vana omo vaise.” (Ndeu. 24:16) Ngeci mukemuo, nga vaze vana vavali va Saulu na vatekulieni ka va kele na mulonga na umo uahi Yehova nga ka tavesele ku va tsiha. Lisiko liaco lia vuezeleko naua ngualio: “Muntu uose va ka mu tsiha omo vupi vueni ivene.” Eci ca muesa ngecize vaze vantu vatanu va ku vusoko vua Saulu va va tsihile, navo va keleko na mulonga ku ku-tsa ca vakua Ngiveone. Ngeci mukemuo, va tsilile vupi vuavo vavene.

Ou muzimbu ua muesa ngecize muntu ka hasa ku linga via ku viha na ku likuisa ngueni na kala na ku kava vitume, houe. Cimo cisimo ca mana ca handeka nguaco: “Lambesa njila ya viliato viove, kaha zinjila ziove ziose zi ka sungama.”—Visi. 4:24-27, NWT; Efe. 5:15.