1. Vati vangamba va Yehova va puisilemo cipanga ca kuambulula ku sekulu ya ku livanga?

 YEHOVA mue ku hana vipanga ku vangamba veni, ue ku tonda va vi puisemo vuino. (1 Kol. 14:33) Ca ku muenako, Njambi a tonda tuambulule muzimbu ua cili mu mavu ose. (Mat. 24:14) Ngeci Yehova ua hangula Yesu a tuamenene cipanga ca kuambula. Kaha Yesu ue ku linga cose mangana cipanga caco tu ci puisemo vuino. Ku sekulu ya ku livanga, mu va tumbikile vikungulukilo ku vihela via ku liseza-seza, va hanguile vakuluntu linga va tuamenene vikungulukilo. (Vili. 14:23) Kaha mu Yelusalema mua kele civunga ca vakuluntu. Mu civunga caco mua kele vapostolo na vakuluntu va lingile vihangula vi va pandele kuononoka vikungulukilo. (Vili. 15:2; 16:4) Ngeci vikungulukilo via ‘kolele mu lutsilielo, kaha via lanene,’ muomu viononokele vimamuna vi va tambuile.—Vili. 16:5.

2. Tunde mu 1919, vati Yehova ali na ku tuamenena vangamba vendi na ku va hana via kulia via mu lutsilielo?

² Lelo lino, Yehova kasi ue ku tuamenena vangamba vendi. Tunde mu 1919, na ku tuamenena ca Yehova, Yesu ali na ku pangesa civunga ca vamala va ku vuavesa. Kaha ku hitila mu civunga caco, ue ku hana vandongesi veni via kulia via mu lutsilielo ha ntsimbu i ve ku tondeka. a (Luka 12:42) Cili vene, tue  ku limuena vusunga ngecize Yehova ali na ku vezikisa vipanga viavo.—Isaya 60:22; 65:​13, 14.

3-4. (a) Tumbulenu cimueso ca muesa seho ya ku tu tuamenena. (b) Vika tu simutuila mu cilongesa cino?

³ Nga ku tu tuamenena kuahi, nga ka tue ku hasa ku puisamo cipanga ca tu hana Yesu. (Mat. 28:​19, 20) Ca ku muenako, nga vamuanetu ka ve ku hangula vihela vi tua pande kuambuluila, nga vose ve kuambuluila ku vihela vi va tonda vakevo vavene. Omo liaco, tu hasa ku hilukila-hilukila kuambuluila ku vihela vimo lika, kaha vimo co kuahi. Aci singaniekenu ha vivezikiso vikuavo vi tu hasa ku tambula, omo lia ku tu tuamenena.

⁴ Yesu mua kele ha mavu ua tuamenene vandongesi vendi, kaha na lelo lino ue ku tuamenena vangamba va Njambi. Mu cilongesa cino, tu hilula lungano lua Yesu na vati lukungulukilo luetu lue ku kava lungano luendi. Cikuavo naua, tu simutuila vati tu hasa ku muesa lutsilielo luetu mu lukungulukilo lua Yehova.

LUKUNGULUKILO LUETU LUE KU KAVA LUNGANO LUA YESU

5. Vati tu hasa ku kava lungano lua Yesu? (Yoano 8:28)

⁵ Yesu ua lilongesele kuli Ise via pandele ku linga na ku handeka. Lukungulukilo luetu lue ku kava lungano lua Yesu mu ku pangesa Lizi lia Njambi, mu ku tu kuasa ku tantekeya vika via cili na via vipi, kaha na ku tu tuamenena. (Tandenu Yoano 8:28; 2 Tim. 3:​16, 17) Ngeci ntsimbu yose, ve ku tu mamuna ku tanda Lizi lia Njambi na kuononoka vi tue ku tanda. Vivezikiso vika tue ku tambula mu kuononoka cimamuna caco?

6. Vukuasi vuka tue ku tambula mu ku lilongesa Mbimbiliya?

⁶ Mu tue ku lilongesa Mbimbiliya mu ku pangesa mikanda yetu, tue ku tambula vukuasi vua vuingi. Ca ku muenako, tu hasa ku setekesa vilongesa via Mbimbiliya na vimamuna vi tue ku tambula mu lukungulukilo. Kaha mu tue mona nguetu vimamuna viaco via fuma mu Mbimbiliya, lutsilielo luetu mu lukungulukilo lua Yehova lue ku kaniama.—Loma 12:2.

7. Muzimbu uka uambuluile Yesu, kaha vati lukungulukilo lua Yehova lue ku kava lungano luendi?

⁷ Yesu uambuluile “zimpande zia cili zia vuangana vua Njambi.” (Luka 4:​43, 44) Cikuavo naua, Yesu ua tumine vandongesi vendi kuambulula via Vuangana. (Luka 9:​1, 2; 10:​8, 9) Vose va lipandakana na lukungulukilo lua Yehova, ve kuambulula muzimbu ua Vuangana kuose-oko ku va kala, ambe nga va kala na viteli via vingi mu lukungulukilo.

8. Civezikiso cika tua kala naco?

⁸ Kuli yetu ca pua ku vezika ca kama, kuambuluila vakuetu via Vuangana vua Njambi. Vunoni kati vose va kala na civezikiso caco. Ca ku muenako, Yesu mua kele ha mavu ka tavesele vandemone va hane vukaleho ku tuala hali ikeye. (Luka 4:41) Na lelo lino, ntsimbu kanda muntu a putuke kuambulula, na pande ku yoya mu cifua ce kuya Yehova ku mutima. Kaha tue ku muesa ngecize tua haka seho ku civezikiso ca kuambulula, mu tue ku lekako vakuetu via Vuangana vua Njambi kuose-oko ku tua kala ni mu nkala vukovelelo vu tue ku uana. Ngeci mua Yesu, tue ku lihakela kapandi ka kuambulula na ku longesa vakuetu vusunga.—Mat. 13:​3, 23; 1 Kol. 3:6.

9. Vati lukungulukilo lue ku kuasa vantu va tantekeye lizina lia Njambi?

⁹ Yesu ua tsimanesele lizina lia Njambi. Mua vundilile kuli Ise, ua handekele ngueni: “Nji na va tantekeyesa lizina liove.” (Yoa. 17:26) Lukungulukilo lua Yehova lue ku kava lungano lua Yesu, mu ku kuasa vantu va tantekeye lizina lia Njambi. Kaha lukungulukilo lue ku  lingamo ku hitila mu Mbimbiliya ya Tradução do Novo Mundo da Bíblia Sagrada. Va i tuhula ya mutuntu ni mitamba yayo mu malimi a tuvakana 270. Ku Apêndice A4 na A5 ya Mbimbiliya yaco, mu ka tantekeya omo lia vika kaha na vati lizina lia Njambi va lihiluisile mu Mbimbiliya. Kaha mu Bíblia de Estudo (Study Bible) ku Apêndice C, kua kala vukaleho vua muesa ngecize lizina lia Njambi lia pande ku soloka mu Visoneka via ciNgelengu lua kupua 237.

10. Vika mua lilongesa ku mezi a handekele umo mpuevo ua ku Mianmar?

¹⁰ Ngeci mua Yesu, tu tonda ku kuasa vantu vavengi va tantekeye lizina lia Njambi. Umo mpuevo ua ku Mianmar ua miaka 67, mua tantekeyele nguendi Njambi ua kala na lizina, ua putukile ku lila na ku handeka nguendi: “Olu lua katete mu muono uange ku tantekeya nguange Njambi ua kala na lizina. . . . Mua nji longesa cuma ca seho ya kama!” Ou muzimbu ua muesa ngecize, nga vantu va lilongesa lizina lia Njambi, ci hasa kualulula miono yavo.

TUALELENUHO KU HAKA SEHO KU LUKUNGULUKILO LUETU

11. Vati vakuluntu va hasa ku muesa ngecize va haka seho ku lukungulukilo lua Yehova? (Talenu naua cikupulo.)

¹¹ Vati vakuluntu mu cikungulukilo va hasa ku muesa ngecize va haka seho ku lukungulukilo lua Njambi? Mu ve ku tambula vimamuna, vakuluntu va pande ku vi tanda vuino na ku viononoka. Ca ku muenako, ve ku tambula vimamuna via muesa vati va pande ku linga mitamba ku viuano, ku vundila mu cikungulukilo, kaha na ku niunga vampanga va Kilistu. Vakuluntu mu ve kuononoka vimamuna vi ve ku tambula mu lukungulukilo, vamuanetu ve ku limuena ngecize Yehova ua va lema kaha ue ku va niunga.

12. (a) Omo lia vika tua pande kuononoka vakua ku tu tuamenena? (VaHevelu 13:​7, 17) (b) Omo lia vika tua pande ku tuala mana ku vifua via cili via vakua ku tu tuamenena?

¹² Nga vakuluntu va tu hana vimamuna, tua pande ku viononoka na mutima uose. Mu tue ku lingamo, tue kuasiuisa cipanga cavo. Ngeci Mbimbiliya ya tu lungula kuononoka vakua ku tu tuamenena. (Tandenu VaHevelu 13:​7, 17.) Vintsimbu vimo, ce ku kaluua ku vononoka. Omo lia vika? Muomu vakuluntu ka va tantulukile. Vunoni, nga tu tuala mana ku vifua viavo via ku vihia na ku hona ku tuala mana ku vifua viavo via cili, tu ka kuasa vitozi vetu. Mu njila ika? Vitozi vetu va tonda tu kale na vimpata nga cili vene Njambi ali na ku pangesa lukungulukilo lueni mu ku tu tuamenena. Ngeci mukemuo, nga tu singanieka via ku vihia ku tuala ha vakuluntu, tu hasa naua ku putuka ku singanieka via ku vihia ku tuala ha lukungulukilo, na ku likela ku lu kulahela. Vika tu hasa ku linga tu nongonone makuli a vitozi vetu na ku a viana?

KATI MU TAVESE VAKUENU VA ZEYESE LUTSILIELO LUENU MU LUKUNGULUKILO LUA NJAMBI

13. Vati vitozi va Njambi ve ku seteka ku kuita mazilo ku lukungulukilo luendi?

¹³ Vitozi va Njambi, ve ku seteka ku tu lingisa ku mona viuma vi lue ku linga lukungulukilo mu cifua ca ku vihia. Ca ku muenako, Yehova a tonda tu lelese mivila yetu, tu kale na vilinga via ku lela, kaha na ku mu lemesa mu cifua ce ku muya ku mutima. Ngeci mukemuo, Yehova nguendi uose ue ku tualelelaho ku linga via ku vihia kaha ka tondo kualuluka, va pande ku mu fumisa mu cikungulukilo. (1 Kol. 5:​11-13; 6:​9, 10) Mu ku linga tue kuononoka lisiko liaco, ngeci vitozi va Njambi ve ku handeka nguavo, ka tua lemene vakuetu kaha tue ku va hisa na ku hona ku va muesa lukakatela.

14. Iya mpundu ue ku sambeya mizimbu ya makuli ku tuala ha lukungulukilo?

 ¹⁴ Nongononenu iya mpundu ue ku luisa lukungulukilo. Satana Ndiavu, ue ku sambeya mizimbu ya makuli ku tuala ha lukungulukilo, muomu ua pua “mukua makuli na ise yao.” (Yoa. 8:44; Njen. 3:​1-5) Ngeci mukemuo, Satana ue ku pangesa vitozi vetu, linga a sambeye mizimbu ya makuli ku tuala ha lukungulukilo lua Yehova. Kaha vikevio mpundu via solokelele Yesu na Vakua Kilistu va ku livanga.

15. Vika va lingile vakuluntu va malombelo kuli Yesu na vandongesi vendi?

¹⁵ Vutuhu Yesu, Muana Njambi, ua puile ua ku tantuluka kaha ua lingile vikomoueso, Satana ua pangesele vamo vantu mu ku sanduola makuli ku tuala hali Yesu. Ca ku muenako, vakuluntu va malombelo va lekele vantu nguavo, ngolo ya pangesele Yesu mu ku tundisa vandemone ya fumine kuli “muangana ua vandemone.” (Mako 3:22) Kaha ha ntsimbu ya ku sompesa, vakuluntu va malombelo va vangeyele Yesu nguavo ua pua mukua ku sahula Njambi. Ngeci va lingisile vantu va mu tsihe. (Mat. 27:20) Mu nima ya ntsimbu, omo vandongesi va Kilistu va kele na kuambulula muzimbu ua cili, vakua ku va luisa va “sangumuine mitima ya vakua vifuti” linga va luise Vakua Kilistu. (Vili. 14:​2, 19) Kaha Vutala vua 1 ya Dezembro ya 1998, vua lumbununa Vilinga 14:​2, nguavuo: “Vaze va hakuilile Satana ka va vianene lika muzimbu u vambuluilile Vakua Kilistu, vunoni va handekele viuma via ku pihia ku tuala hali vakevo, linga vantu va va zinde na ku hona ku va halakana.”

16. Vika tua pande ku vuluka nga tuivua mizimbu ya makuli?

¹⁶ Na lelo lino, Satana ue ku tualelaho ku sanduola mizimbu ya makuli. Kaha kasi ue “ku  onga mavu ose.” (Ku-So. 12:9) Ngeci mukemuo, nga muivua mizimbu ya makuli ku tuala ha lukungulukilo ni ku tuala ha vamuanetu ve ku tu tuamenena, vulukenu vi va lingile vitozi va Njambi kuli Yesu na vandongesi vendi. Yesu ua handekele nguendi, vantu va ka luisa vakua ku lemesa Yehova na ku va vangeya. (Mat. 5:​11, 12) Kaha ku vuluka iya mpundu ue ku sambeya makuli, vi ka tu kuasa ku hona ku a tsiliela na ku linga cose tu liniunge. Vati tu hasa ku liniunga ku makuli aco?

17. Vati tu hasa ku viana mizimbu ya makauli? (2 Timoteo 1:13) (Talenu naua cikasa “ Vi mua Pande ku Linga nga Muivua Mizimbu ya Makuli”)

¹⁷ Vianenu mizimbu ya makuli. Kaposotolo Paulu ua tu mamuine vi tua pande ku linga nga tuivua mizimbu ya makuli. Ngeci ua lekele Timoteo ngueni: ‘sika vamosi kati . . . va halakane ku visimo’ kaha na ku “viana visimo [via ngoco].” (1 Tim. 1:​3, 4; 4:7) Aci singaniekenu hali evi, kanike a hasa ku nona viuma via mazilo na ku vi haka mu kanua, vunoni mukuluntu ke ku lingamo muomu a tantekeya nguendi vi mu kokela vuvezi. Na vuno vene, tue ku viana mizimbu ya makuli, muomu tu tantekeya mpundu ku ye ku tunda. Vunoni tue ku halakana lika ku “mezi a ku sungama.”—Tandenu 2 Timoteo 1:13.

18. Vati tu hasa ku muesa nguetu tua tsiliela mu lukungulukilo lua Yehova?

¹⁸ Mu cilongesa cino, tua lilongesa vinjila vitatu via muesa vati lukungulukilo lua Njambi lue ku tambuluisa Yesu. Omo mu pua na ku lilongesa Mbimbiliya, setekenu ku nongonona vinjila vikuavo via muesa vati lukungulukilo lue ku kava lungano lua Yesu. Kaha kuasenu vakuenu mu cikungulukilo, va kaniamese lutsilielo luavo mu lukungulukilo. Tualelenuho ku lemesa Yehova na ku kaniamesa lutsilielo luenu mu lukungulukilo, lue ku pangesa mu ku puisamo cizango cendi. (Visa. 37:28) Tu tualelenuho ku haka seho ku civezikiso ca ku likata na vamuanetu ve kuononoka Yehova.