1. Vika Yehova ua tu vundila ku linga?

 VAZE va liambata, ve kuivua ndzolela ya kama nga muanavo a semuka na cihindu ca cili. Vutuhu visemi va lema muanavo, vunoni ka ve ku tonda a tualeleho kupua kakeke. Kaha ve ku lisosomua cikuma nga va mona ngecize kakeke kesi na ku kola. Na vuno vene, Yehova ue kuivua ndzolela mu tue ku putuka ku lilongesa viendi. Vutuhu ngoco, ka tondo tu lengele lika oho. (1 Kol. 3:1) Ngeci ua tu vundila ‘tu pue vakuluntu.’—1 Kol. 14:20.

2. Vika tu hilula mu cilongesa cino?

² Vika ca lomboloka kupua Mukua Kilistu ua kuhia? Vika tua pande ku linga tu pue Vakua Kilistu va kuhia? Vati ku lilongesa Mbimbiliya mu ku lova ci hasa ku kaniamesa vusamba vuetu na Yehova? Omo lia vika ka tua pandele ku likulahela cikuma etu vavene? Mu cilongesa cino, tu hilula ha vikumbululo via vihula viaco.

VIKA CA LOMBOLOKA KUPUA MUKUA KILISTU UA KUHIA?

3. Vika ca lomboloka kupua Mukua Kilistu ua kuhia?

³ Mu Mbimbiliya, mezi “ku kola” mu ciNgelengu a lomboloka naua “kuhia” na “ku tantuluka.” a (1 Kol. 2:6) Ngeci mua kakeke ue ku tualelelaho ku kola na kupua mukuluntu, na vuno vene tua pande ku tualelelaho ku kaniamesa vusamba vuetu na Yehova. Ku lingamo, tue kupua Vakua Kilistu va kuhia. Mua vusunga, ambe nga tua pua va kuhia, tua pande ku tualelelaho ku kola mu lutsilielo. (1 Tim. 4:15) Tu vose, cipue nga tu  vakuendze ni vahumbe, tu hasa kupua Vakua Kilistu va kuhia. Vunoni, vati tu hasa ku tantekeya nguetu tu nahi mu lutsilielo?

4. Vati tu hasa ku nongonona Mukua Kilistu ua kuhia?

⁴ Mukua Kilistu ua kuhia ua pua uze ue ku linga viose vie ku mu tuma Yehova. Kaha ke ku linga viuma kuliya na cizango cendi. Vunoni omo lia ku hona ku tantuluka, Mukua Kilistu a hasa ku sevuka. Vutuhu ngoco, matangua ose ue ku lihakela kapandi ka ku singanieka na ku linga viuma kuliya na cizango ca Yehova. Kaha ue ku lihakela kapandi ka ku tualelelaho ku singanieka ngue mue ku singanieka Yehova. (Efe. 4:22-24) Ke ku tondeka mukana ua masiko ua muesa via na pande ku linga. Muomu na lilongesa ku linga vihangula via mana mu ku singanieka ha masiko na vitume via Yehova. Mukua Kilistu ua kuhia ue ku fuitangana cikuma, linga a puisemo vutumbe vuendi.—1 Kol. 9:26, 27.

5. Vika vi hasa ku solokela Mukua Kilistu ua ku hona kuhia? (Tandenu Efeso 4:14, 15)

⁵ Cikuavo naua, nga Mukua Kilistu a tualelelaho ku kala ca ku hona kuhia mu lutsilielo, a hasa “ku hungumuka” na “ku pekumuka” na mizimbu ya makuli ya mu internet na ya vakua kualulukila vusunga. b (Tandenu Efeso 4:14, 15.) Kaha a hasa ku vuila vakuavo cipululu, ku hona ku litavasiana na vakuavo, na ku niengua vuasi. Cikuavo naua, a hasa ku linga via ku pihia nga a hita mu vieseko.—1 Kol. 3:3.

6. Vati ku kola mu lutsilielo ca lifua na ku kola ca kanike? (Talenu naua cikupulo.)

⁶ Ngue mu tua mono, Mbimbiliya ya setekesa ku kola mu lutsilielo na ku kola ca kanike. Vanike ka va tantekeya via vingi, ngeci ve ku tondeka vakuluntu va va niunge na ku va tuamenena. Ca ku muenako, cisemi a hasa ku leka munendi ua mundende a mu kuate ku livoko ha ku zomboka tapalo. Kaha omo muana aya na ku kola, cisemi a hasa ku muecela a zomboke tapalo lika liendi. Vunoni a mu leka a zangame na makalu ntsimbu kanda a zomboke tapalo. Kaha nga na kolo ue ku hasa ku liniunga ku vusonde vuaco ca ku hona ku mu leka. Vanike ve ku tondeka vukuasi linga va liniunge ku vusonde. Na vuno vene, Vakua Kilistu va ku hona kuhia ve ku tondeka vukuasi  vua Vakua Kilistu va kuhia linga va hase ku liniunga ku vusonde vu hasa ku tsiha vusamba vuavo na Yehova, kaha na ku linga vihangula via cili. Vunoni Vakua Kilistu va kuhia nga va linga vihangula, ve ku hilula vi ya handeka Mbimbiliya linga va tantekeye visinganieka via Yehova. Mu nima yaco, ve ku pangesa vi va na lilongesa.

7. Vuno Vakua Kilistu va kuhia ka ve ku tondeka vukuasi vua vakuavo ni?

⁷ Vuno Vakua Kilistu va kuhia ka ve ku tondeka vukuasi vua vakuavo ni? Houe. Vintsimbu vimo navo ve ku tondeka vukuasi. Mukua Kilistu ua ku hona kuhia mu lutsilielo, halumo a hasa ku tonda vakuavo va mu leke vihangula via na pande ku linga. Vunoni Mukua Kilistu ua kuhia nga a vundila vukuasi ku vamuanaye, a tantekeya ngueni ikeye ivene na pande ku lilingila vihangula kaha “a ka ambata citeli ceni.”—Ngal. 6:5.

8. Vati Vakua Kilistu va kuhia va liseza?

⁸ Vakuluntu ka ve ku soloka mu cifua cimo lika. Na vuno vene, Vakua Kilistu ka va kele na vifua vimo lika ngeci mua mana, ku simpa, vuhuanga, na ngozi. Ngeci mukemuo, nga va hita mu citanga cimo lika, va hasa ku linga vihangula via ku liseza, vunoni via litombola na Mbimbiliya. Evi vie ku soloka cikuma nga Mukua Kilistu na pande ku lihanguila viuma kuliya na mutima ueni. Omo liaco, ka ve ku lihisa umo na mukuavo nga va linga vihangula via ku liseza. Vunoni ve ku tualelelaho ku likuata kumo.—Loma 14:10; 1 Kol. 1:10.

VIKA TUA PANDE KU LINGA TUHIE MU LUTSILIELO?

9. Vuno tu hasa ku kola mu lutsilielo ambe nga ka tu lingiko mumo ni? Lombololenu.

⁹ Kanike ue ku kola mu ku hita ca ntsimbu. Vunoni uahi ue ku kola mu lutsilielo ca ku hona ku lingako mumo. Ca ku muenako, vamuanetu ku Kolintu va tavele muzimbu ua cili, va va mbatizile, va tambuile sipilitu santu, kaha va uanene vukuasi ku viuma via va longesele kapostolo Paulu. (Vili. 18:8-11) Vunoni mu nima ya miaka, vavengi kasi ka va puile va kuhia mu lutsilielo. (1 Kol. 3:2) Vati tua pande ku liniunga linga netu kati vi tu solokele?

10. Vika tua pande ku linga mangana tuhie mu lutsilielo? (Yunda 20)

¹⁰ Linga tuhie mu litsilielo, tua pande ku kala na cizango ca ku lingamo. Vaze va “lema vusiname,” kaha va tonda ku tualelelaho kupua ngue vanike mu lutsilielo, ka va ka hasa ku kola. (Visi. 1:22) Mua vusunga, ka tu tondo kupua ngeci mua mukuluntu ue ku tualelelaho ku hitukila ha visemi veni va mu lingile vihangula. Vunoni, tu tonda kuambata citeli cetu na ku linga cose mangana vusamba vuetu na Yehova vu tualeleho ku kaniama. (Tandenu Yunda 20.) Nga kasi mue ku lihakela kapandi linga muhie mu lutsilielo, vundilenu Yehova a mi hane ‘cizango na ngolo’ ya ku lingamo.—Filp. 2:13.

11. Vika ua tu hana Yehova mu ku tu kuasa kuhia mu lutsilielo? (Efeso 4:11-13)

¹¹ Yehova ke ku lavelela tu kole mu lutsilielo ku ndzili yetu vavene. Vaze va pua tuniungi na valongisi mu cikungulukilo va hasa ku tu kuasa ku kaniamesa vusamba vuetu na Yehova, linga “tu hete ku ciseteko ca citso ca ku-sula ca Kilistu.” (Tandenu Efeso 4:11-13.) Yehova ue ku tu hana naua sipilitu santu yeni mu ku tu kuasa tu kale na “visinganieka via Kilistu.” (1 Kol. 2:14-16) Cikuavo naua, mavulu auana a Muzimbu ua Cili ni nguetu, Mateo, Mako, Luka na Yoano a muesa vilinga via Yesu mua kele hano ha mavu. Kaha nga mu tambuluisa visinganieka na vilinga via Yesu, mu ka hasa kupua Mukua Kilistu ua kuhia.

 VUTUMBE VUA VIA KULIA VIA MU LUTSILIELO

12. Vika via pua vilongesa “via ku livanga via Kilistu”?

¹² Linga tu kole mu lutsilielo, ka tua pandele ku lengela lika ha vilongesa “via ku livanga via Kilistu.” Ca ku muenako, vilongesa viaco via pua ku tuala ha ku liveya, lutsilielo, mbatizimu, na cisangukilo. (VaHe. 6:1, 2) Kaha vilongesa viaco, Vakua Kilistu vose va vi tsiliela. Ngeci mukemuo, kapostolo Petulu muambuluilile vantu ku Pentekosta, ua handekele ha vilongesa viaco. (Vili. 2:32-35, 38) Kaha linga tu pue vandongesi va Kilistu, tua pande ku vi tava. Ca ku muenako, Paulu ua muesele ngecize nga ka tu tsiliela mu cisangukilo, ka tu hasa kupua vandongesi va Kilistu. (1 Kol. 15:12-14) Vunoni ambe ngoco, linga tu kole mu lutsilielo ka tua pandele ku lengela lika ha vilongesa via ku livanga.

13. Linga via kulia via ku kola via mu lutsilielo vi va tumbula ku VaHevelu 5:14 vi tu kuase, tua pande ku linga vika? (Talenu naua cikupulo.)

¹³ Via kulia via ku kola via mu lutsilielo ka via puile lika masiko a Yehova. Vunoni na vitume vieni, vie ku tu kuasa kuivusisa visinganieka vieni. Kaha linga via kulia viaco vi tu kuase, tua pande ku lilongesa Lizi lia Njambi, ku hilula, na ku lihakela kapandi ka ku pangesa vi tua lilongesa. Ku lingamo, ce ku tu kuasa ku linga vihangula vie ku vuisa Yehova ndzolela. c—Tandenu VaHevelu 5:14.

14. Vati Paulu ua kuasele Vakua Kolintu va kole mu lutsilielo?

¹⁴ Vakua Kilistu va ku hona kuhia mu lutsilielo, ce ku va kaluuila ku linga vihangula via cili, nga ka kuesi lisiko lia mu Mbimbiliya lia handeka ha cimpande caco. Omo liaco, vamo ve ku singanieka nguavo, va hasa ku linga viose vi va tonda. Vakuavo co ve ku tonda va va tumbikile masiko, mu cihela ca ku lisinganiekela vavene. Ca ku muenako, ci soloka ngue Vakua Kilistu ku Kolintu va tondele Paulu a va tumbikile lisiko ku tuala ha kulia via kulia vi va kombeleyele ku tumponia. Vunoni Paulu ka lingilemo, muomu ua tantekeyele ngueni muntu ku muntu ua kala na “mpoko” ya ku lihanguila viuma, kuliya na mutima ueni. Kaha ua tumbuile vimo vitume via mu Mbimbiliya  via va kuasele ku linga cihangula, ka ca va lingisile va kale na citaku-taku ni ku suntsuisa vakuavo. (1 Kol. 8:4, 7-9) Paulu ua longesele Vakua Kolintu va pangese Mbimbiliya mu ku linga vihangula, ca ku hona ku hitukila ha vakuavo ni ha masiko. Ku lingamo, ua va kuasele va kole mu lutsilielo.

15. Vati Paulu ua kuasele vaYundeya va kole mu lutsilielo?

¹⁵ Tua lilongesa naua cuma ca seho ku mezi a sonekelele Paulu ku vaHevelu. Vamo ka va tualeleleho ku kaniamesa vusamba vuavo na Yehova, na ku “himpuka vakua ku hianga mavele, kati via-ku-lia via ku kola.” (VaHe. 5:12) Ka va tavele viuma via viha via va longesele Yehova ku hitila mu cikungulukilo. (Visi. 4:18) Ca ku muenako, vaYundeya kasi va kele na ku kava Masiko a Mosesa vutuhu mu nima ya miaka 30, cikombelo ca Yesu ca a manusuileko. (Loma 10:4; Tito 1:10) Mua vusunga, vaYundeya va kele na ntsimbu ya kupuamo linga vevuisise ngecize ka va tondekele naua ku kava Masiko a Mosesa. Mukanda ua sonekele Paulu ku vaYundeya, ua va kuasele ku mona ngecize cifua ca ciha ca ku lemeselamo Yehova ku hitila muli Yesu ca hianene ca laza. Cikuavo naua, mukanda uaco ua va kuasele ku simpa linga va tualeleleho kuambulula vutuhu va va luisile.—VaHe. 10:19-23.

OMO LIA VIKA TUA PANDE KU TUALELELAHO KU KOLA MU LUTSILIELO?

16. Ambe nga tua kolo mu lutsilielo, vika tua pande ku tualelelaho ku linga?

¹⁶ Tua pande ku lihakela kapandi ka ku kola mu lutsilielo na ku tualelelaho ku lingamo. Ngeci mukemuo, ka tua pandele ku singanieka nguetu, tua kolo laza mu lutsilielo kaha ka tu tondeka naua ku kaniamesa vusamba vuetu na Yehova. (1 Kol. 10:12) Vunoni, tua pande ‘ku lieseka’ etu vavene na ku linga cose tu tualeleleho ku kola mu lutsilielo.—2 Kol. 13:5.

17. Vati mukanda ua sonekele Paulu ku Vakua Kolose ua muesa seho ya ku kola mu lutsilielo?

¹⁷ Mukanda ua sonekele Paulu ku Vakua Kolose, ua muesele naua ngecize tua pande ku tualelelaho ku kola mu lutsilielo. Kaha vutuhu Vakua Kilistu ku Kolose va puile va kuhia mu lutsilielo, vunoni Paulu ua va mamuine va liniunge ku visinganieka via vakua mavu. (Kolo. 2:6-10) Epafalase ua tantekeyele vuino vamuanaye mu cikungulukilo. Ngeci ua va kundikile  mu vivundilo linga va “mane na ku tantuluka,” ni nguetu, va kole mu lutsilielo. (Kolo. 4:12) Vika tu hasa ku lilongesaho? Linga tu tualeleho ku kola mu lutsilielo, tu tondeka vukuasi vua Njambi na ku lihakela kapandi ka ku kaniamesa vusamba vuetu na Yehova. Paulu na Epafalase va tondele Vakua Kolose va tualeleho ku kola mu lutsilielo vutuhu va hitile mu visoti.

18. Vika vi hasa ku solokela Mukua Kilistu ua kuhia? (Talenu naua cikupulo.)

¹⁸ Paulu ua lunguile vaHevelu nguendi, Mukua Kilistu ua kuhia a hasa ku tsiha vusamba vuendi na Yehova. Kaha nga a viana kuononoka, Yehova ka muecela. Vunoni, vaHevelu ka va lingilemo. (VaHe. 6:4-9) Amba co vaze ve ku zeya mu lutsilielo ni ku va uisa mu cikungulukilo, kaha mu nima yaco va liveya? Nga va liveya na kualuluka, ve ku muesa ngecize ka va fuile ngeci mua vaze ve ku viana kuononoka na ku tsiha vusamba vuavo na Yehova. Vunoni, mu ve ku hiluka kuli Yehova, ve ku tondeka vukuasi. (Ezek. 34:15, 16) Vakuluntu mu cikungulukilo va hasa ku hangula umo muanetu ni ndumbuetu ua kuhia, linga a va kuase ku kaniamesa lueka vusamba vuavo na Yehova.

19. Kapandi kaka tua pande ku lihakela?

¹⁹ Nga mu tualelelaho ku lihakela kapandi ka ku kola mu lutsilielo, mu ka hasa ku vi puisamo. Ngeci mukemuo, tualelenuho ku lilongesa vusunga vua ku lova vua mu Mbimbiliya, na ku singanieka ngue mue ku singaniekelamo Yehova. Nga mua pua va kuhia mu lutsilielo, tualelenuho ku lingamo.