1. Vati vamo vamuanetu ve ku livua ku tuala ha ku handeka na vakuavo mu kuambulula? (Talenu naua cikupulo.)

 ETU VANGAMBA va Yehova, tue kuambuluila vakuetu muomu tua lema Tatetu, kaha tu tonda ku kuasa vakuetu va mu tantekeye. Vakua kuambulula vavengi ve kuivua ndzolela mu cipanga ca kuambulula, vunoni vamo co ce ku va kaluuila. Omo lia vika? Vamo ve kuivua ntsoni kaha na ku livua nguavo ka ve ku longesa vuino. Vamo ka ve ku livua ku zituka kuya ku vindzivo via vantu ca ku hona ku va lania. Vakuavo co ve kuivua liova nguavo vantu va ka niengua navo. Kaha vakuavo co va va longesele ngecize, ka va pandele ku nienguesa vakuavo. Vamuanetu na vandumbuetu vaco va lema Yehova, vunoni ce ku va kaluuila kuambuluila vantu ka va tantekeya. Vutuhu ngoco, va tantekeya nguavo cipanga ca kuambulula ca kala na seho ya kama. Ngeci mukemuo, ve kuambulula kusua kumo. Mua vusunga, ve ku vuisa Yehova ndzolela!

2. Nga vintsimbu vimo ka mue kuivua ndzolela mu kuambulula, omo lia vika ka mua pandele ku hilukila mu nima?

² Vuno vintsimbu vimo ce ku mi kaluuila kuivua ndzolela mu kuambulula omo lia cifua ci mue ku livuilamo ni? Nga mukemuo, kati mu hilukile mu nima. Ku hona ku likulahela ca muesa ngecize, mua pua va ku likehesa. Ca muesa naua ngecize, ka mu tondo ku lihoya na vantu. Mua vusunga, uahi ua tonda ku vuisa vakuavo matoto, cikumakuma nga a va lingila viuma via cili. Isuenu ua muilu a tantekeya vuino vati  mue ku livua, ngeci a tonda ku mi kuasa. (Isaya 41:13) Mu cilongesa cino, tu simutuila viuma vitanu vi tu kuasa kulua na visoti viaco kaha na kuivua ndzolela mu cipanga ca kuambulula.

TAVESENU LIZI LIA NJAMBI LI MI KANIAMESE

3. Vika via kuasele kapolofeto Yelemiya kuambuluila vakuavo?

³ Fume ku laza, muzimbu ua Njambi ua kaniamesele vangamba vendi mu va tambuile cipanga ca cikalu. Ca ku muenako, tu simutuilenu via Yelemiya. Ua vuile liova omo Yehova ua mu kundikile cipanga ca kuambulula. Yelemiya ua handekele nguendi: “Ka nji tantekeya ku handeka; muomu ange nji kanike.” (Yele. 1:6) Vika via mu kuasele ku simpa linga ambulule? Via mu lekele Yehova via mu kaniamesele. Ngeci Yelemiya ua handekele nguendi: “[Via puile] ngue tuhia va ku suama va ku soka mu vintsiha viange, kaha nji katala na ku livindika, kaha ka nji hasa ku likela.” (Yele. 20:​8, 9) Vutuhu kuambulula ca kaluuilile Yelemiya, vunoni muzimbu uambuluile ua mu kaniamesele linga a puisemo cipanga caco.

4. Vika vie ku soloka nga tu tanda na ku hilula Lizi lia Njambi? (Kolose 1:​9, 10)

⁴ Mbimbiliya ye ku kaniamesa Vakua Kilistu. Kapostolo Paulu, mua sonekelele vakua Kolose ua handekele nguendi, ku lilongesa vusunga ce ku kuasele vamuanaye ‘vende muaya cizango ca Yehova’ kaha na kuima “mihako ku vipanga viose via cili.” (Tandenu Kolose 1:​9, 10.) Vipanga via cili viambatesela kumo na kuambulula muzimbu ua cili. Ngeci mukemuo, mu tue ku tanda na ku hilula Lizi lia Njambi, tue ku kaniamesa lutsilielo luetu muli Yehova. Kaha tue kuivuisisa vuino seho ya kuambulula muzimbu ua Vuangana.

5. Vati tu hasa ku uana vukuasi vua vuingi mu ku tanda na ku lilongesa Mbimbiliya?

⁵ Linga tu uane vukuasi mu Lizi lia Njambi, ka tua pandele ku tanda, ku lilongesa ni ku hilula vuasi-vuasi. Nga mu tanda mikanda ya mu Mbimbiliya kaha ka muesi na kuivuisisa, kati mu i tumbuke. Vunoni lingenuko mumo, tondesesenu vinimbu viaco mu Índice das publicações ni mu Guia de Pesquisas. Nga mu lilongesa na civando, mu ka vueza ku vusunga vu mua kala navuo ngecize, vi ya handeka Mbimbiliya via pua vusunga. (1 Tes. 5:21)  Kaha ku kala na vusunga vuaco, ci ka mi kuasa ku lekako vakuenu vi mua lilongesa.

LIVIUKISILENU VUINO NGA MUYA MU KUAMBULULA

6. Omo lia vika tua pande ku liviukisila ntsimbu kanda tuye mu kuambulula?

⁶ Nga mu liviukisila vuino ntsimbu kanda muye mu kuambulula, mu kevua ku zituka mu ku handeka na vantu. Yesu ua kuasele vandongesi veni va liviukisile ntsimbu kanda a va tume kuya na kuambulula. (Luka 10:​1-11) Kaha mu ku linga va lingile via va longesele Yesu, ngeci va puisilemo via vingi kaha ca va vuisile ndzolela ya kama.—Luka 10:17.

7. Vati tu hasa ku liviukisila ntsimbu kanda tuye mu kuambulula? (Talenu naua cikupulo.)

⁷ Vati tu hasa ku liviukisila ntsimbu kanda tuye mu kuambulula? Tua pande ku singanieka vi tu tonda ku handeka, kaha na ku lingamo mu cindambo mu ku pangesa mezi etu vavene. Cikuavo naua, capua ca seho ku singanieka vika va ka linga vantu mu va kevua muzimbu uetu, na vati tu ka kumbulula. Mu nima yaco, nga tu handeka na vantu mu kuambulula tua pande ku livua ku zituka, ku handeka na ndzolela, kaha na kasingimiko.

8. Mu njila ika Vakua Kilistu va pua ngue vindoho via vuma via tumbuile kapostolo Paulu?

⁸ Kapostolo Paulu, ua lekele vamuanaye nguendi: “Tu li [na vupite] mu zindoho zia vuma.” (2 Kol. 4:7) Vupite vuaco vua pua vika? Vua pua cipanga ca kuambulula muzimbu ua Vuangana na kuovola miono. (2 Kol. 4:1) Kaha vindoho via vuma via pua vika? Viemanena vangamba va Njambi ve kuambuluila vakuavo muzimbu ua cili. Ku matangua a Paulu, vakua ku landesa va kele na kuambatela via kulia, viniu, na vimbongo mu vindoho via vuma, ni nguetu vinjava. Na vuno vene, Yehova ua tu kundika cipanga ca kuambulula muzimbu ua cili. Kaha na vukuasi vuendi, tu hasa ku kala na ndzili i tua tondeka linga tu tualeleho kuambulula.

VUNDILENU YEHOVA A MI KUASE KU SIMPA

9. Vati tu hasa ku vula liova lia vantu? (Talenu naua cikupulo.)

⁹ Vintsimbu vimo, tue ku vuila vantu liova. Vunoni vati tu hasa ku vula liova liaco? Tu ci hilulenu vi va lingile vapostolo mu va va vindikile kuambulula. Ka va vuile liova, vunoni va vundilile Yehova a va kuase “ku handeka  lizi [lieni] na ku-simpa cose.” Ngeci vuasi-vuasi, Yehova ua kumbuluile civundilo cavo. (Vili. 4:​18, 29, 31) Netu vene, nga tuivua liova lia kuambulula, tua pande ku vundila Yehova a tu kuase. Ngeci mukemuo, vundilenu Yehova a mi kuase ku kaniamesa cilemo cenu ku vantu, linga kati muivue liova lia ku vambuluila muzimbu ua cili.

10. Vati Yehova ue ku tu kuasa kuambulula? (Isaya 43:​10-12)

¹⁰ Yehova ua tu hangula kupua Vakaleho vendi, kaha ua kulahesa ku tu kuasa ku simpa. (Tandenu Isaya 43:​10-12.) Tu hilulenu vati ue ku lingamo. Ca katete, Yesu ue ku kala netu ntsimbu yose i tue kuambulula muzimbu ua cili. (Mat. 28:​18-20) Ca mu civali, Yehova ue ku pangesa tungelo mu ku tu kuasa. (Ku-So. 14:6) Ca mu citatu, Yehova ue ku tu hana sipilitu santu i tu kuasa ku vuluka vi tue ku lilongesa. (Yoa. 14:​25, 26) Kaha ca mu ciuana, Yehova ua tu hana vamuanetu linga tuambulule navo. Ngeci mukemuo, na vukuasi vua Yehova na vamuanetu, tua kala na viose vi tondeka linga tu simpe na ku tualelelaho kuambulula.

LITOMBUESENU KU VANTU NA KU VA MONA MU NJILA YA CILI

11. Vati mu hasa ku uana vantu vavengi mu kuambulula? (Talenu naua cikupulo.)

¹¹ Vuno mue kuivua vusiua mu mue ku uana vantu vavandende hembo ni? Nga mukemuo, lihulenu nguenu: ‘Kuiko vali vantu mu ntsimbu ino?’ (Vili. 16:13) ‘Vuno vali ku vipanga ni mu ku landa-landa?’ Mu hasa ku uana vantu vavengi mu vitapalo na ku vambuluila. Muanetu Joshua nguendi: “Nja uanene vukovelelo vua kuambuluila ku mbunga na ku vihela vikuavo kue ku kala vantu vavengi.” Nendi na mpueyendi Bridget, ve ku uana naua vantu hembo ku cinguezi kaha na Calumingu ku mutana.—Efe. 5:​15, 16.

12. Vati tu hasa ku tantekeya vi va tsiliela vantu, na vika ve ku lisosomua navio?

¹² Nga vantu ka ve ku haka seho ku muzimbu u mue kuambulula, nongononenu vi va tsiliela, kaha na vika ve ku lisosomua navio. Muanetu Joshua na mpueyendi Bridget, ve ku pangesa cihula ca kala ha tratadu mu ku putuka ku simutuila. Ca ku muenako, mu ku pangesa tratadu Mbimbiliya ya pua Vika Kuli  Yove? ve ku handeka nguavo: “Vamo nguavo Mbimbiliya ya pua Lizi lia Njambi, vakuavo co kuahi. Amba enuco?” Ku lingamo, ve ku hasa ku simutuila.

13. Omo lia vika tue ku puisamo vutumbe vuetu vua kuambulula, ambe nga vantu ka ve ku tu halakana? (Visimo 27:11)

¹³ Ambe nga vantu ka ve ku tu halakana mu tue ku vambuluila, kasi tue ku puisamo vutumbe vuetu. Omo lia vika? Muomu tue ku lingako mutamba uetu mu cipanga ca kuambulula, kaha vikevio via tonda Yehova na Munendi. (Vili. 10:42) Ambe vene nga ka tua uanene muntu ua ku handeka nendi ni nga va viana ku tu halakana, kasi tue kuivua ndzolela mu cipanga ca kuambulula. Muomu tua tantekeya nguetu tuli na ku vuisa Tatetu ndzolela.—Tandenu Visimo 27:11.

14. Omo lia vika tue kuivua ndzolela nga umo muanetu ni ndumbuetu na uana muntu a tonda ku lilongesa Mbimbiliya?

¹⁴ Tu hasa kuivua ndzolela nga mukua kuambulula mukuavo, na uana muntu a tonda ku lilongesa Mbimbiliya. Vutala vua Kaniungi vua setekesa cipanga ca kuambulula, ku cipanga ca ku tonda kanike na zimbala. Muomu vavengi ve ku lihana mu ku mu tonda ku vihela via ku liseza-seza. Ngeci mukemuo nga na soloka, vose ve kuivua ndzolela, kati lika uze na mu uana. Na vuno vene, vose mu cikungulukilo ve ku kuasa ku puisa vantu vandongesi. Kaha ve ku tondeka linga tu hase kuambuluila vantu vose. Ngeci mukemuo, vose ve kuiva ndzolela, nga umo ndongesi a putuka ku kunguluka.

TUALENU MANA KU KU LEMA YEHOVA NA VAKUENU

15. Vati kuononoka vi ya handeka Mateo 22:​37-39 ce ku tu kuasa ku vueza ku ndzolela yetu mu cipanga ca kuambulula? (Talenu naua ca helu.)

¹⁵ Tu hasa ku vueza ku ndzolela yetu mu cipanga ca kuambulula, mu ku tuala mana ku ku lema Yehova na vakuetu. (Tandenu Mateo 22:​37-39.) Aci singaniekenu ndzolela ye kuivua Yehova mue ku mona tuli na ku linga cipanga ca kuambulula, kaha na ndzolela i ve kuivua vantu mu ve ku lilongesa Mbimbiliya! Cikuavo naua, vose ve ku halakana muzimbu uetu na ku lemesa Yehova, va ka hasa ku yoya muono ua ya-ye.—Yoa. 6:40; 1 Tim. 4:16.

16. Vati tu hasa ku vueza ku ndzolela yetu nga ka tuesi na ku tuhuka hembo? Hanenu vimueso.

¹⁶ Vuno kuli vimo via mi lingisa ku hona ku  tuhuka hembo ni? Nga mukemuo, tualenu mana ku viuma vi mu hasa ku linga mu muese cilemo kuli Yehova na vakuenu. Mu ku hita ca musungo ua COVID-19, muanetu Samuel na mpueyendi Dania va kele hembo ca ku hona ku tuhuka. Mu ntsimbu yaco ya ikalu, va kele na kuambulula ku telefone, ku soneka mikanda, na kuendesa vilongesa via Mbimbiliya mu Zoom. Muanetu Samuel uambuluilile vantu ku sipitali mu va kele na ku mu saka vuvezi vua câncer. Ivene nguendi: “Nga tu hita mu visoti, tu hasa kuma mutima na ku zeya, kaha lutsilielo luetu lu hasa ku hita mu ceseko. Ngeci mukemuo, tua pande ku lihakela kapandi ka kuivua ndzolela mu cipanga ca Yehova.” Ha ntsimbu yaco, ndumbuetu Dania ua uile, ngeci ua kele ha muhela vingonde vitatu. Kaha ua kele mu cituamo ca ku sindumuna, mu vingonde vitanu na imo. Ivene nguendi: “Nja lihakelele kapandi ka ku linga vi nja hasele. Njambuluilile umo mukua ku niunga vavezi na vantu vakuavo va kele na ku tu nehela viuma vi tua tondekele. Cikuavo naua, njambuluilile umo mpuevo ku telefone.” Muanetu Samuel na mpueyendi Dania ka va hasele naua kuambulula cikuma ngue mu va lingile laza. Vutuhu ngoco va lihakelele kapandi ka ku linga vi va hasele, kaha ca va vuisile ndzolela.

17. Vati mu hasa ku uana vukuasi vua vuingi ku vinguli vi va na tumbula mu cilongesa cino?

¹⁷ Lihakelenu kapandi ka ku pangesa vinguli vitanu vi va na tumbula mu cilongesa cino. Vinguli viaco, via pua ngue viose vie ku tovalesa mbelela. Na vuno vene, nga tu kava vinguli viaco, ci ka tu kuasa kulua na visinganieka via ku vihia kaha na ku vueza ku ndzolela yetu mu cipanga ca kuambulula.