1. Vika ua handekele Ndaviti ku tuala ha ku likehesa ca Yehova?

VUNO citava vene tu handeke nguetu Yehova ua pua ua ku likehesa ni? Eyo, citava. Ndaviti ua handekele ngueni: “U na nji hie naua ntelo ya vuovole vuove; Na ku-suvuluka cove ni [ku likehesa] ci na nji hie vukama.” (2Sam. 22:36; Visa. 8:35) Ndaviti mua sonekele aa mezi, citava halumo ua singaniekele ha litangua liezile kapolofeto Samuele ku ndzivo ya va ise, mu ku mu vuavesa ku pua muangana ua Isaleli ua ku lutue. Vutuhu Ndaviti ua puile kasulasongo ha kati ka vana 8 va vamala, vunoni Yehova ua mu hanguile mu ku suana ha cihela ca Muangana Saulu.—1 Sam. 16:1, 10-13.

2. Vika tu simutuila mu cilongesa cino?

² Mua vusunga, Ndaviti ua tavele aa mezi a handekele umo mukua visamo ku tuala hali Yehova, ngueni: “A likehesa mu ku tala vi li muilu na ha mavu? A katula muhutu ku mpumputa, A zundula mukua ku zela, . . . linga a mu tumbike hamo na vamiata.” (Visa. 113:6-8) Mu cilongesa cino, ha katete tu hilula ha vimo viuma via seho ku tuala ha ku likehesa, ha vintsimbu via muesele Yehova cifua caco. Mu nima yaco, tu ka hilula ha vika tu hasa ku lilongesa kuli muangana Saulu, kapolofeto Ndaniele na Yesu ku tuala ha ku konkama.

3. Vati Yehova ue ku tu muenamo, kaha eci ca muesa vika ku tuala hali ikeye?

³ Yehova ue ku muesa ngecize ua pua mukua ku likehesa ku tuala ha cifua ce ku muenamo vantu va ku hona ku tantuluka ve ku mu lemesa. Ca ku muenako, Yehova ue ku tava ku lemesa cetu kaha kati ovio lika, ue ku tu mona naua ku pua vavusamba  veni. (Visa. 25:14) Linga tu hase ku likuata vusamba neni, Yehova ku cizango ceni ua hanguile ku tuma Muaneni, linga a ku tsile vipi vietu. Mua vusunga mu ku linga evi, Yehova ua tu muesa ngozi na cikeketima ka tu hasa ku ivuisisa!

4. Vika ua tu hana Yehova, kaha omo lia vika?

⁴ Tu hilulenu naua njila ikuavo ya mueselelemo Yehova ku likehesa. Mu ku pua Sakatanga uetu, Yehova nga ua tu tangele mu cifua ca ku linga ka tu hasa ku lihanguila etu vavene mua ku yoyela, vunoni ka lingilemo. Ua tu tangele mu cifua ceni kaha ua tu hele vuana vua ku lihanguila viuma etu vavene. Ua tonda etu vantu va ku hona ku tantuluka tu mu pangele omo lia ku mu lema na mutima uetu uose, kaha na ku mona ngecize ku mu ononoka ce ku tu vezikisa. (Ndeu. 10:12; Isaya 48:17, 18) Mua vusunga, tua pande ku santsela cikuma kuli Yehova mu cifua ca tu mueselamo ku likehesa!

5. Vati Yehova ue ku tu longesa ku likehesa? (Talenu cikupulo ca helu lia Vutala.)

⁵ Yehova ue ku tu longesa ku likehesa mu cifua ce ku tu muenamo. Yehova ikeye mukua ku hiana mana muilu na ha mavu. Vutuhu ngoco, ue ku tava zinguli via vantu na tungelo. Ca ku muenako, Yehova ua tavesele muaneni a mu kuase ku-tanga viuma viose. (Visi. 8:27-30; Kolo. 1:15, 16) Kaha vutuhu ua pua Mukua Ngolo Yose, Yehova ue ku hanako imo mpoko ku tungelo na vantu. Ca ku muenako, Ua hangula Yesu ku pua Muangana ua Vuangana vueni kaha naua ua hangula vamo vantu linga va ka sike hamo na Yesu muilu. (Luka 12:32) Yehova ua longesele Yesu ku pua Muangana na Sasendote ua Kama. (VaHe. 5:8, 9) Kaha ue ku longesa naua vaze va 144.000 va ka sika na Yesu, linga va ka puisemo vuino cipanga cavo. Yehova ke ku endesa nkala cuma ci ve ku linga mu ku puisamo cipanga cavo, vunoni ua kulahela ngecize va ka linga mu nayi cizango ceni.—Ku-So. 5:10.

6-7. Vika tu hasa ku lilongesa kuli Tatetu ua muilu, ku tuala ha ku kundika viteli?

 ⁶ Nga Tatetu ua muilu, uze ke ku tondeka vukuasi na vumo vuahi ue ku kundika viteli ku vantu na tungelo, amba etu co? Ca ku muenako, mua pua mutue ua vusoko ni mukuluntu mu cikungulukilo ni? Puenu na ka kava lungano lua Yehova lua ku kundika viteli ku vakuenu kaha na ku viana ntsindiye ya ku landula nkala koma ka va linga mu ku vi puisamo. Nga mu tambuluisa Yehova mu njila eyi, ka mu ka puisamo lika vize vi tondeka, vunoni mu ka longesa naua vakuenu mua ku vi lingila. Kaha na ku va lingisa va mone ngecize, nkuma navo va hasa ku lingako vimo. (Isa. 41:10) Vika vaze va kala na mpoko ha vakuavo va hasa ku lilongesa kuli Yehova?

⁷ Mbimbiliya ya muesa ngecize Yehova ue ku tuala mana ku vinguli via Tungelo. (1 Vam. 22:19-22) Visemi, vika mu hasa ku lilongesa ku lungano lua Yehova? Nga citava, puenu na ku hula vana venu ku tuala ha vati mua ku puisilamo cimo cipanga. Kaha nga nguli yavo ya litombola na cipanga, puenu na ku i kava.

8. Vati Yehova ua muesele lukakatela kuli Avilahama na Sala?

⁸ Yehova ue ku muesa naua ku likehesa ceni ku hitila mu lukakatela lueni. Ca ku muenako, Yehova ue ku muesa lukakatela nga vaze va mu pangela va takania vimo vihangula vieni. Ca ku muenako, Yehova ua halakanene ku lisosomua ca Avilahama ku tuala ha ku nongesa Sondoma na Ngomola. (Njen. 18:22-33) Kaha vulukenu naua via lingile Yehova kuli Sala, mpuevo ya Avilahama. Yehova ka nienguele cipue ku ivua matoto omo Sala ua zolele via cikulaheso ca ku mu imitisa ku vusinakazi. (Njen. 18:10-14) Vunoni, ua mu ivuisisile.

9. Vika visemi na vakuluntu mu cikungulukilo va hasa ku lilongesa ku lungano lua Yehova?

⁹ Vika enu visemi na vakuluntu mu cikungulukilo mu hasa ku lilongesa ku lungano lua Yehova? Puenu na ku hilula ha vati mue ku linga nga vaze va kala muintsi lienu va takania vimo vihangula vienu. Ca ku muenako, vuno cuma ca katete ci mue ku singanieka ku linga, ca pua ku va sungamesa ni? Ni mue ku lihakela kapandi ka ku seteka ku mona viuma mu cifua ci ve ku vi muenamo vakevo? Mua vusunga, vusoko ni cikungulukilo ve ku uana vukuasi vua kama nga vaze va kala na mpoko hali vakevo va tambuluisa Yehova. Na hano, tua simutuila ha vika tu hasa ku lilongesa ku ku likehesa ca Yehova. Tu talenu honi vika tu hasa ku lilongesa ku tuala ha ku konkama, ku malungano a va tumbula mu Lizi lia Njambi.

10. Vati Yehova ue ku pangesa malungano a vakuetu mu ku tu longesa?

¹⁰ Mu ku pua ‛Mulongisi uetu ua kama,ʼ Yehova ua tu hakela malungano a engi mu Mbimbiliya ku tu hasa ku lilongesela. (Isaya 30:20, 21) Tue ku lilongesa vifua via cili, ngeci mua ku konkama, ku mizimbu ya mu Mbimbiliya ya vantu vaze va muesele vifua via cili ku meso a Njambi. Kaha naua tue ku hilula ha vika via solokelele vaze ka va muesele vifua viaco.—Visa. 37:37; 1 Kol. 10:11.

11. Vika tu hasa ku lilongesa ku lungano lua ku vihia lua Saulu?

¹¹ Tu ci hilulenu ha lungano lua Muangana Saulu. Mua puile mukuendze Saulu ua puile ua ku konkama. Ha katete ua tantekeyele ha lengelele ngolo yeni, kaha ka tondele ku mu vuezelela viteli. (1 Sam. 9:21; 10:20-22) Vunoni mu nima ya ntsimbu Saulu ua lihakele ku vukama. Ua putukile ku muesa eci cifua ca vusitu mu nima ya ntsimbu ya indende tunde ha puililile muangana. Tangua limo ka muesele lukakatela mua kele na ku lavelela kapolofeto Samuele. Vutuhu vaIsaleli va kele mu vusonde, tele nga Saulu ua kulahelele ngecize Yehova ohiela vantu veni, vunoni houe. Ua lingile cikombelo vutuhu ka kele na mpoko ya ku lingamo. Omo lievi, Saulu ua zimbalesele  vusamba vueni na Yehova kaha mu nima ya ntsimbu ua zimbalesele na vuangana. (1 Sam. 13:8-14) Mua vusunga, tu ka muesa mana nga tu lilongesa ku lungano lua ku vihia lua Saulu na ku liniunga ku ku linga viuma ka tuesi na mpoko ya ku vi linga.

12. Vati Ndaniele ua muesele ku konkama?

¹² Tu talenu vati lungano lua cili lua kapolofeto Ndaniele, lua lisezele na lungano lua Saulu. Mu muono ueni uose Ndaniele ua tualeleleho ku pua ua ku likehesa na mukua ku konkama, kaha ntsimbu yose ua kavele ku tuamenena ca Yehova. Ca ku muenako, omo Yehova ua mu pangesele mu ku lombolola cilota ca muangana Nevukaneza, Ndaniele ka tondele va mu sangala ikeye omo lia ku lombolola cilota caco. Vunoni ua muesele ku konkama na ku hana vumpahu na ku sangaziala cose kuli Yehova. (Ndan. 2:26-28) Vika tu lilongesaho? Nga mue ku hana vimpande via cili, ni mue ku kuasa vantu va vengi mu lihia, kati mu pue na ku suva ku hana vumpahu kuli Yehova. Tu vose, tua pande ku litavela na ku konkama cose nguetu ka tue ku linga viuma viaco ku ndzili yetu, vunoni na vukuasi vua Yehova. (Filp. 4:13) Ku linga evi, ci ka pua naua ku tambuluisa lungano lua cili lua Yesu. Mu njila ika?

13. Vika tu lilongesa ku tuala ha ku konkama ku mezi a Yesu a ku Yoano 5:19, 30?

¹³ Vutuhu Yesu ua puile Muana ua ku tantuluka ua Njambi, vunoni ua hitukilile hali Njambi mu viose. (Tandenu Yoano 5:19, 30.) Ka setekele ku tambula mpoko ya kele nayo Ise na limo litangua liahi. Mukanda ua Filipu 2:6, ua tu leka nguao Yesu, “ka yonguele ku-pua mumo na Njambi.” Cili vene, Yesu ua tantekeyele ha lengela ngolo yeni, kaha ua singimikile mpoko ya kele nayo Ise.

14. Vati ua lingile Yesu mu va mu vundilile ku linga viuma via hianene mpoko ya kele nayo?

¹⁴ Tu hilulenu via lingile Yesu omo vandongesi veni Tiango na Yoano hamo lika na va naye vezile kuli ikeye, mu ku mu vundila cimo civezikiso ka ca kele ku ngolo yeni. Vuasi-vuasi, Yesu ua va kumbuluile ngueni Ise ua muilu ikeye lika ua kala na ngolo ya ku hangula iya a ka tumama ku cilio ni ku cimosue ca Yesu mu va ka sika mu Vuangana. (Mat. 20:20-23) Yesu ua muesele ngecize, ua tantekeyele ha lengela ngolo yeni. Ua puile ua ku konkama, kaha ka lingile cuma na cimo cahi cize ka mu tumine Ise Yehova. (Yoa. 12:49) Vati tu hasa ku tambuluisa lungano lua cili lua Yesu?

15-16. Vati tu hasa ku kava cimamuna ca ku 1 Kolintu 4:6?

 ¹⁵ Tue ku tambuluisa lungano lua Yesu lua ku konkama, mu ku kava cimamuna ca ku 1 Kolintu 4:6. Va sonekako nguavo: “Kati ku pulakana viuma vi va na soneka.” Ngeci mukemuo, nga va tu pinga cimo cimamuna ka tua pande ku kakateya vakuetu va kave cifua ci tue ku muenamo cimpande caco, ni ku va kumbulula ca ku hona ku singaniekaho vuino. Vunoni tua pande ku talekesa muntu ku vimamuna via mu Mbimbiliya ni mu mikanda yetu. Ku lingamo, ca pua ku muesa ku konkama. Na ku likehesa cose tue ku hana vumpahu kuli Mukua Ngolo Yose, omo lia ‘vilinga vieni via vuviuke.’—Ku-So. 15:3, 4.

¹⁶ Vutuhu ku muesa ku konkama ce ku hana vumpahu kuli Yehova, vunoni kuli vusunga vukuavo vua pande ku tu lingisa ku muesa eci cifua. Tu simutuila honi ha vati ku likehesa na ku konkama vi hasa ku tu nehela ndzolela na ku tu kuasa ku yoya mu ciyulo na vakuetu.

17. Omo lia vika vantu va ku likehesa na ku konkama va kala mu ndzolela?

¹⁷ Nga tu pua va ku likehesa na ku konkama, ci ka tu puila ca casi ku yoya mu ndzolela. Omo lia vika? Muomu nga tu ivuisisa ngecize kuli vimo ka tu hasa ku linga, tu ka pua na ku santsela ku nkala vukuasi vu tu ka tambula ku vakuetu. Ca ku muenako, aci singaniekenu ha muzimbu ua vakua mbumba 10. Mu nima ya ku va kanguisa kuli Yesu, umo lika ha kati kavo ikeye ua hilukile mu ku santsela Yesu. Ou yala ua ku likehesa na ku konkama, ua santselele ku vukuasi vua tambuile na ku zumbangeya Njambi. Muomu ua tantekeyele ngecize lika lieni nga ka hasele ku likanguisa.—Luka 17:11-19.

18. Vati ku likehesa na ku konkama ce ku tu kuasa ku yoya mu ciyulo na vakuetu? (Loma 12:10)

¹⁸ Vantu va ku likehesa na ku konkama ve ku hasa ku yoya mu ciyulo na nkala muntu, kaha naua ce ku va puila ca casi ku likuata vusamba  na vantu. Omo lia vika? Muomu ka va kele na citanga ca ku tava ngecize vakuavo navo va kala na vifua via cili, kaha ve ku kulahela mu vakuavo. Cikuavo naua, vantu va ku likehesa na ku konkama ve ku ivua ndzolela nga vakuavo va tambula viteli. Kaha va kala na vuasi mu ku sangala na ku santsela vantu vaco.—Tandenu Loma 12:10.

19. Tumbulenu vumo vusunga vua pande ku tu lingisa ku viana ku lihalesa?

¹⁹ Vunoni vakua ku lihalesa, ce ku va puila ca cikalu ku sangala vakuavo, muomu ve ku tonda lika va va sangale vakevo. Cikuavo naua, va lema ku lisetekesa na vakuavo kaha ve ku sambeya cimbembesi ca ku livula-vula. Ka va lemene ku longesa vakuavo mua ku lingila vimo vipanga, cipue vene ku va hana mpoko, muomu ve ku singanieka nguavo vakevo lika va zivuka vuino ku linga viuma. Vakua ku lihalesa va lema ku lihaka ku vukama, kaha va kala na cipululu. (Ngal. 5:26) Vantu vaco ka ve ku kala na vavusamba mu ntsimbu ya laha. Ngeci mukemuo, tua pande ku lihilula kaha nga tu tulukua kamo ka citoma ka ku lihalesa mu mutima uetu, tua pande ku vundila vukuasi vua Yehova linga tu ‘lialuluise na mitima ya iha.’ Kaha cifua caco, ka ci ka soko mizi mu mutima uetu.—Loma 12:2.

20. Omo lia vika tua pande ku pua va ku likehesa na ku konkama?

²⁰ Mua vusunga, tue ku santsela cikuma ku lungano lua ku tantuluka lua tu muesa Yehova. Tue ku mona ku likehesa ceni mu cifua ce ku pangelamo na vangamba veni, kaha netu tua tonda ku lihakela kapandi ka ku mu tambuluisa. Helu lievi naua, tua tonda ku lihakela kapandi ka ku tambuluisa malungano a cili a vantu va va tumbula mu Mbimbiliya, vaze va kele na civezikiso ca ku enda hamo na Njambi. Ngeci mukemuo, tu lihakelenu kapandi ka ku pua na ku hana kasingimiko na vumpahu vuose kuli Yehova, muomu Ikeye ua fuila ku vi tambula. (Ku-So. 4:11) Nga tu linga viose evi, netu tu ka kala na civezikiso ca ku enda hamo na Tatetu ua muilu, uze ua lema vantu va ku likehesa na ku konkama.