1. Civezikiso cika tua kala naco?

TU VOSE tua kala na civezikiso ca kama, ca ku pua mutamba ua cikungulukilo ca Yehova. Tua kala mu citungu ca mu lutsilielo, cize ca sula na vantu va ciyulo kaha va ndzolela. Cihela cika mua kala naco mu cikungulukilo?

2. Cimueso cika ua pangesele kapostolo Paulu mu cingi ca mikanda yeni?

² Tu hasa ku lilongesa via vingi ku tuala ha cihela ci tua kala naco mu cikungulukilo, mu ku hilula ha cimueso ca pangesele kapostolo Paulu mu cingi ca mikanda ya sonekele. Mu mikanda yaco, Paulu ua setekele cikungulukilo na muvila ua muntu. Kaha naua ua setekesele vantu va kala mu vikungulukilo viaco na vilio via muvila.—Loma 12:4-8; 1 Kol. 12:12-27; Efe. 4:16.

3. Viuma vika vitatu tu lilongesa mu cilongesa cino?

³ Mu cilongesa cino, tu hilula ha viuma vitatu via seho vi tu hasa ku lilongesa ku cimueso ca pangesele kapostolo Paulu. Ha katete, tu lilongesa ngecize nkala Mukua Kilistu ua kala na cihela * mu cikungulukilo ca Yehova. Ca mu civali, tu simutuila ha vika tu hasa ku linga nga ci li na ku tu kaluuila ku tantekeya cihela cetu mu cikungulukilo. Kaha ca mu citatu, tu ka simutuila omo lia vika tua pande ku lihakela kapandi ka ku fuitangana mu ku puisamo mutamba uetu mu cikungulukilo ca Njambi.

4. Vika tu lilongesa ku Loma 12:4, 5?

⁴ Cuma ca katete ci tu lilongesa ku cimueso ca Paulu eci: Nkala Mukua Kilistu ua kala na cihela ca seho mu vusoko vua Yehova. Paulu ua putuka cimueso caco ngueni: “Muomu ngue omo tu li na vilio via vingi mu muvila umo lika, na vilio viauo ka viesi na vipanga vimo lika: netu naua ngoco vene, tu va vengi tu na pu muvila umo lika muli Kilistu tu na pu vilio vimo lika umo na mukuavo.” (Loma 12:4, 5) Vika a lomboloka aa mezi a Paulu? Tu vose muntu ku muntu tua kala na vipanga via ku liseza-seza mu cikungulukilo, cikuavo naua muntu ku muntu ua kala na seho.

5. Vuana vuka Yehova ua hana cikungulukilo?

⁵ Halumo mu mue ku singanieka hali vaze va kala na cihela mu cikungulukilo, cuma ca katete ce ku mi iza mu visinganieka, vamuanetu ve ku tuamenena. (1 Tes. 5:12; VaHe. 13:17) Cili vene, ku hitila muli Kilistu, Yehova ua hana “vuana kuli vantu” ku cikungulukilo. (Efe. 4:8) Vuana vuaco vua pua, Vakua Civunga ca Vantuamena na Vakuasi vavo, Vakuluntu va Mbetele, tuniungi va ku zinguluka, valongisi va ku visikola vietu, vakuluntu mu cikungulukilo na vakua ku kuasa vipanga. Ava vamuanetu vose, sipilitu santu ya va hangula linga va niunge vampanga va seho va Yehova Njambi na ku puisamo vize via tondeka mu lukungulukilo.—1 Pet. 5:2, 3.

6. Kuliya na 1 Tesalonika 2:6-8, kapandi ka ka ve ku lihakela vamuanetu va ye ku hangula sipilitu santu?

⁶ Sipilitu santu ye ku hangula vamuanetu va vamala, linga va puisemo viteli via ku liseza-seza. Ca ku muenako, muvila ua kala na vilio via ku liseza-seza ngeci mua mavoko na mikono, kaha evi vie ku panga mu ku kuasa muvila uose. Na vuno vene, vamuanetu va ye ku hangula sipilitu santu ve ku fuitangana mu ku kuasa cikungulukilo cose. Kaha ka ve ku vi lingila omo lia ku tonda vumpahu vuavo vavene. Vunoni ve ku lihakela kapandi ka ku kolesa na ku kaniamesa vamuanetu na vandumbuetu mu cikungulukilo. (Tandenu 1 Tesalonika 2:6-8.) Tue ku santsela cikuma kuli Yehova omo lia ku tu hana ava vamuanetu ve ku haka vizango viavo ku mukulo, mu ku tuameka vizango vietu!

7. Vivezikiso vika ve ku tambula vaze va kala mu cipanga ca ntsimbu yose?

⁷ Vamo mu cikungulukilo va hasa ku va tava ku pua vamisionaliu, vapioneiro va ku lifuila ni vapioneiro va ntsimbu yose. Cili vene, vamuanetu va mu vifuti viose va puisa cipanga ca ku ambulula na ku puisa vantu vandongesi ku pua cipanga cavo ca ntsimbu yose. Mu ku lingamo ve ku kuasa vantu vavengi ku pua vandongesi va Yesu Kilistu. Vutuhu ava vakua ku ambulula va ntsimbu yose ka va kele na vupite, vunoni Yehova ue ku sulisa muono uavo na vivezikiso. (Mako 10:29, 30) Ava vamuanetu na vandumbuetu tua va lema cikuma, kaha tue ku santsela cikuma ku kala navo mu vikungulukilo.

8. Omo lia vika nkala mukua ku ambulula ua pua ua seho kuli Yehova?

⁸ Vuno eci ca lomboloka ngecize vamuanetu va ku hangula na vaze va kala mu cipanga ca ntsimbu yose, vakevo lika va pua mutamba ua cikungulukilo ni? Na limo litangua liahi! Nkala mukua ku ambulula ua pua ua seho kuli Njambi na ku cikungulukilo. (Loma 10:15; 1 Kol. 3:6-9) Muomu vutumbe vua kama vua cikungulukilo, vua pua ku puisamo cipanga ca ku puisa vantu vandongesi va Muangana uetu Yesu. (Mat. 28:19, 20; 1 Tim. 2:4) Kaha vakua ku ambulula vose, cipue va ku mbatiza ni kuahi, ve ku lihakela kapandi ka ku tuameka eci cipanga.—Mat. 24:14.

9. Omo lia vika tua haka seho ya kama ku vandumbuetu mu cikungulukilo?

⁹ Yehova ua haka seho ya kama ku vandumbuetu mu cikungulukilo. Ua haka seho ya kama ku vampuevo va ku somboka, visemi va  vampuevo, vantuluue na vampuevo va vazike ve ku mu pangela na lukakatela. Vintsimbu via vingi, Mbimbiliya ya handeka via vampuevo vavengi va muesele lutsilielo lua ku komouesa. Kaha va va sangala omo lia lungano luavo lua cili mu mana, lutsilielo, ntuima, ku simpa, vuhuanga na vipanga via cili. (Luka 8:2, 3; Vili. 16:14, 15; Loma 16:3, 6; Filp. 4:3; VaHe. 11:11, 31, 35) Mua vusunga, lelo lino tue ku santsela cikuma kuli Yehova omo lia ku kala na vandumbuetu mu vikungulukilo ve ku muesa evi vifua via cili.

10. Vika tua hakela seho ya kama ku vakulupe?

¹⁰ Tua kala naua na civezikiso cikuavo ca ku kala na vakulupe va vengi mu vikungulukilo. Mu vikungulukilo vimo, ava vamuanetu na vandumbuetu va vakulupe va pangesa miono yavo yose mu cipanga ca Yehova. Kaha vakuavo co vuovuno va na lilongesa vusunga. Vutuhu ngoco, ava vamuanetu va vakulupe ve ku pinda na visoti via cihindu via ku liseza-seza omo lia vusinakazi. Kaha evi visoti viaco, vie ku tepulula viuma vi va hasa ku linga mu cikungulukilo na mu cipanga ca ku ambulula. Vunoni ava vamuanetu va vakulupe, ve ku linga cose mu ku ambulula kaha naua ve ku pangesa ndzili yavo yose, mu ku kaniamesa na ku longesa vakuavo. Kaha tue ku lilongesa via vingi kuli vakevo. Mua vusunga, va kala na seho ya kama kuli Yehova na kuli yetu.—Visi. 16:31.

11-12. Ku kaniama cika mua uana ku vakuendze na vahumbe mu cikungulukilo?

¹¹ Singaniekenu naua ha vakuendze na vahumbe vetu. Vakuendze na vahumbe, ve ku pinda na vitanga via vingi omo lia ku kolela mu mavu eku tuamenena Satana Ndiavu na vilongesa vieni via ku vihia. (1 Yoa. 5:19) Vunoni ku va mona va hana vikumbululo ku viuano, va tuhuka mu lihia, kaha va hakuila vi va tsiliela na ku simpa cose, ce ku tu kaniamesa cikuma. Cili vene, enu vakuendze na vahumbe mua kala na cihela ca seho mu cikungulukilo ca Yehova.—Visa. 8:2.

¹² Vunoni vamo vamuanetu na vandumbuetu ce ku va kaluuila cikuma ku tava ngecize navo va pua mutamba ua seho ua cikungulukilo. Vika vi hasa ku tu kuasa muntu ku muntu ku ivua ngecize, netu tua pua mutamba ua seho ua cikungulukilo? Tu ci vi hilulenu.

13-14. Omo lia vika vamo ve ku livua ngecize ka va kele na seho mu cikungulukilo?

¹³ Tu talenu cuma ca mu civali ci tu hasa ku lilongesa ku cimueso ca Paulu. Paulu ua handeka via cimo cisoti ci ve ku pinda naco vamuanetu vavengi lelo lino. Cisoti cika? Ku tava ngecize navo va pua mutamba ua seho ua cikungulukilo. Paulu ua sonekele ngueni: “Nga ciliato ci ka handeka, nguaco, Muomu kati yange livoko, kati yange mukua muvila; nga ngoco cikeco cili vene kati ca ku muvila, ni? Na lituitui nga li ka handeka, ngualio, Muomu kati yange liso, kati yange mukua muvila; nga ngoco likelio cili vene kati lia ku muvila, ni?” (1 Kol. 12:15, 16) Evi vihula via Paulu via lomboloka vika?

¹⁴ Nga mu pua na ku lisetekesa ku vakuenu, ka mu ka hasa ku mona seho i mua kala nayo mu cikungulukilo. Vamo vamuanetu va kala na vuana vua ku longesa, vua ku sungamesa viuma, ni vua ku kaniamesa na ku lembezieka vakuavo. Kaha halumo mu hasa ku livua ngecize enu ka mu hasa ku puisamo evi, ngue mu ve ku vi puisamo vakevo. Nga mukemuo mu mue ku livua, eci ca muesa ngecize mua pua mu vakua ku likehesa na ku konkama. (Filp. 2:3) Vunoni zangamenu. Omo lia vika? Muomu nga mu tualelelaho ku lisetekesa na vaze va kala na vutongue vua ku lifuila, mu ka putuka ku livua vungoco. Halumo mu ka heta na ha ku livua vene ngue muze mua handekele Paulu ngueni, ka mua kele na cimo cihela cahi mu cikungulukilo. Vika vi hasa ku mi kuasa ku vula eci cisinganieka caco?

15. Kuliya na 1 Kolintu 12:4-11, vika tua pande ku nongonona ku tuala ha nkala vuana vu tua kala navuo?

¹⁵ Mu ntsimbu ya ku nima, Yehova Njambi ua hele vamo Vakua Kilistu vuana vua ku lifuila ku hitila mu sipilitu santu, vunoni ka vu hele kuli Vakua Kilistu vose. (Tandenu 1 Kolintu 12:4-11.) Yehova ua va hele vuana na vutongue vua ku liseza-seza, vunoni nkala muntu ua puile ua seho kuli Ikeye. Lelo lino, ka tue ku tambula vuana vua ku liseza-seza ku hitila mu sipilitu santu. Vunoni kasi tu hasa ku lilongesaho cuma ca seho. Vutuhu tu vose ka tua kele na vuana vumo lika, vunoni tu vose muntu ku muntu tua pua tu va seho kuli Yehova.

16. Cimamuna cika ca kapostolo Paulu tua pande ku kava?

 ¹⁶ Ka tua pandele ku lisetekesa na vakuetu Vakua Kilistu. Vunoni tua pande ku niunga cimamuna ca kapostolo Paulu, mua handekele ngueni: “Muntu uose a hilule vilinga vieni, kaha a ka lipambe nevi via ivene, kati nevi via mukuavo.”—Ngal. 6:4.

17. Vukuasi vuka tu ka uana nga tu niunga cimamuna ca Paulu?

¹⁷ Nga tu niunga eci cimamuna ca Paulu na ku hilula vilinga vietu vavene, tu ka hasa ku nongonona ngecize netu tua kalako na vumo vuana vua ku lifuila. Ca ku muenako, umo mukuluntu mu cikungulukilo halumo ka kele na vutongue vua ku longesa ha mutula, vunoni ue ku hasa ku kuasa vavengi va pue vandongesi va Yesu. Ni halumo ka kele na vutongue vua ku endesa viuma ngeci mua vakuavo mu cikungulukilo. Vunoni ua pua kaniungi ua cilemo, kaha vakua ku ambulula vavengi ve ku livua ku zituka ku simutuila neni na ku tambula vimamuna via mu Mbimbiliya. Ni halumo ua tsimana mu ku pua cihuanga. (VaHe. 13:2, 16) Mua vusunga, nga tu mona ha toma vuana na vutongue vuetu, cili vene, tu ka livua ngecize netu tua kala na mutamba ua seho, ua tondeka mu cikungulukilo. Kaha ci ka pua ca cikalu ku vuila vakuetu cipululu omo lia vutongue ni vuana vuavo.

18. Vati tu hasa ku kolesa nkala vutongue vu tua kala navuo?

¹⁸ Mu ku pua mutamba ua cikungulukilo, tu vose tua pande ku kala na cizango ca ku vueza ku vutongue vuetu. Kaha mu ku tu kuasa ku vueza ku vutongue vuetu, Yehova ua tu viukisila visikola via vingi mu lukungulukilo. Ca ku muenako, ku viuano vuetu via mu kati ka simano tue ku tambula vimamuna via vati tu hasa ku pua vakua vutongue mu ku ambulula. Vuno mue ku lihakela kapandi ka ku lilongesa via vingi ku viuano viaco ni?

19. Vati mu hasa ku puisamo cizango ca ku ka hita ku Sikola ya Vakua ku Ambulula Vuangana?

¹⁹ Sikola ikuavo ya ku tovala ya tu viukisila Yehova, ya pua Sikola ya Vakua ku Ambulula Vuangana. Sikola yaco, va i pangela vamuanetu na vandumbuetu vaze va kala mu cipanga ca ntsimbu yose, kaha vali na miaka i putukila ha 23 ku tuala 65. Halumo mu hasa ku singanieka nguenu na limo litangua liahi mu ka puisamo cizango ca ku hita ku sikola yaco. Vutuhu ngoco kati mu soneke mukana ua viuma vi hasa ku mi vindika ku hita mu sikola yaco, vunoni sonekenu mukana ua viuma vi mu tonda ku hitila ku sikola yaco. Cikuavo naua, lingenu vumo vutumbe vu hasa ku mi kuasa ku puisamo via tondeka mu ku hita mu sikola yaco. Kaha omo lia kapandi kenu vavene na vukuasi vua Yehova, vize via solokele ngue ka vi tava, mu hasa ku vi puisamo.

20. Vika tu lilongesa ku Loma 12:6-8?

²⁰ Cilongesa ca mu citatu ci tu uana ku cimueso ca Paulu, ca kala ku Loma 12:6-8. (Tandenu.) Ku vinimbu evi, Paulu ua muesa lukuavo naua ngecize, nkala Mukua Kilistu ua kala na vuana vua ku lifuila mu cikungulukilo. Vunoni ua tsindika naua ngecize, tua pande ku pangesa nkala vuana vu tua kala navuo mu ku kolesa na ku kaniamesa cikungulukilo.

21-22. Vika tu lilongesa ku lungano lua vamuanetu Robert na Felice?

²¹ Tu hilulenu lungano lua muanetu Robert. Mu nima ya ku ka pangela ku cifuti ceka, ua ka pangelele ha Mbetele ya mu cifuti ceni. Vutuhu muanetu Robert ua tantekeyele ngecize ka va mu aluluile cipanga omo lia ku honoua vutongue, vunoni ivene ngueni: “Cifua ca ku vihia ci nja kele na ku limuenamo ange ivene, ca ku livua vungoco ca nji yandesele mu vingonde ya yingi. Vintsimbu vimo, nja vuile vene cizango ca ku likela ku pangela ha Mbetele.” Vika honi  via mu kuasele ku hiluisa ndzolela yeni? Umo mukuluntu ua mu vuluisile ngecize, Yehova ue ku tu longesa mu cipanga cetu ca katete linga tu hase ku puisamo vuino cipanga ci tuli na ku linga mu ntsimbu ino. Muanetu Robert ua nongonuene ngecize ua pandele ku likela ku singanieka via ku nima, na ku putuka ku tuala mana ku cipanga ceni ca ku ntsimbu ino.

²² Muanetu Felice Episcopo, neni ua hitile mu cisoti ngeci mueci. Neni na mpueyeni va hitile ku sikola ya Ngileande mu 1956 kaha va ka lingile cipanga ca vuniungi vua ku zinguluka ku Bolívia. Vunoni mu 1964 va kele na muana. Muanetu Felice ngueni: “Ku seza cize cipanga ca tu kaluuilile cikuma. Kaha nja pande ku litavela ngecize, nja vuile vusiua mu muaka ua mutuntu. Vunoni na vukuasi vua Yehova, nja aluluile cifua ci nja kele na ku limuenamo ange ivene, kaha nja tavele na mutima uose citeli cange ca ciha, ni nguetu, ku pua cisemi.” Nenu mue ku livua ngeci mua vamuanetu Robert na Felice ni? Mue ku livua vusiua muomu ntsimbu ino ka muesi na viteli vi mua kele navio laza ni? Nga mukemuo, mu ka yoya mu ndzolela nga mu alulula cifua ci mue ku limuenamo na ku tuala mana ku viuma vi mu hasa ku linga mu Ntsimbu ino mu ku pangela Yehova na vamuanoko. Puenu vakua ku fuitangana, pangesenu vuana vuenu na vutongue vuenu mu ku kuasa vakuenu, kaha mu ka kala na ndzolela mu ku kolesa cikungulukilo.

23. Tua pande ku uana ntsimbu ya ku linga vika, kaha vika tu ka lilongesa mu cilongesa ci na hatako?

²³ Tu vose muntu ku muntu tua kala na seho ya kama kuli Yehova. Kaha ua tonda tu pue mutamba ua vusoko vueni. Ngeci mukemuo, nga tu uana ntsimbu ya ku pua na ku hilula ha vika tu hasa ku linga mu ku kolesa vamuanetu na vandumbuetu, kaha na ku fuitangana mu ku puisamo cipanga caco, ci ka pua ca cikalu ku livua ngecize ka tua kele na seho mu cikungulukilo. Vatico ku tuala ha cifua ci tue ku muenamo vakuetu? Vati tu hasa ku muesa ngecize tua va haka seho ya kama? Cilongesa ci na hatako, ci ka handeka hali eci cimpande ca seho.