1. Yehova a tonda vantu vose va linge vika?

 YEHOVA ua tangele vantu na vuana vua ku lihanguila viuma. Vuana vuaco tue ku vu pangesa kampe matangua ose, mu tue ku linga vihangula. Kaha ku lihana kuli Yehova na ku pua mutamba ua vusoko vuendi, cikeco capua cihangula ca kama ku muntu uose. Yehova a tonda vantu vose va likuate vusamba nendi. Omo lia vika? Muomu ua lema vantu kaha a tonda va yoye vuino ku miaka yose.—Ndeu. 30:​19, 20; Ngal. 6:​7, 8.

2. Vika Yehova ua lavelela ku vakua ku vulumuna ka va tondo ku liveya? (1 Yoano 2:1)

² Yehova ke ku kakateya na umo uahi ku mu pangela. Ua hana vantu vose mpoko ya ku lihanguila viuma. Vatico nga Mukua Kilistu na vulumuna? Nga ka liveye na kualuluka, ke kupua naua Mukaleho ua Yehova. (1 Kol. 5:13) Vutuhu ngoco, Yehova ue ku lavelela muntu uaco a hiluke kuli Ikeye. Vukevuo vusunga vua kama vua mu lingisile ku tuma Muanendi mu kupua nkombelo, linga ecele vaze ve ku liveya. (Tandenu 1 Yoano 2:1.) Njambi yetu ua cilemo ua lania vaze va linga vupi va aluluke.—Zak. 1:3; Loma 2:4; Tia. 4:8.

3. Vika tu lilongesa mu cilongesa cino?

 ³ Yehova a tonda tu tambuluise cifua ce ku muenamo vupi na muntu na vulumuna. Cino cilongesa ci tu muesa vati tu hasa ku mu tambuluisa. Omo mu tanda cino cilongesa, (1) talenu vati vakua Kolintu va lingile, omo umo Mukua Kilistu ua vulumuine, (2) vika kapostolo Paulu ua va tumine ku linga, omo muntu uaco ua alulukile, kaha (3) vika muzimbu uaco u tu longesa ku tuala ha cifua ce ku muenamo Yehova Mukua Kilistu na lingi vupi vua kama.

VATI VA KELE NA KU LINGA KU SEKULU YA KU LIVANGA NGA MUNTU NA VULUMUNA?

4. Citanga cika ca kele mu cikungulukilo ca ku Kolintu? (1 Kolintu 5:​1, 2)

⁴ Tandenu 1 Kolintu 5:​1, 2. Paulu mua kele mu vungendzi vua mu citatu mu vumisionaliu, ua vuile muzimbu ua vusiua ua cikungulukilo ca ciha mu Kolintu. Umo muanetu ua kele na ku linga vupangala na mpuevo ya ise. Vilinga viaco via puile via ntsoni kaha cipue ‘ha kati ka vakua mavu ka via keleho’! Kaha halumo cikungulukilo ka ca tavesele lika vupi vuaco, vunoni halumo ca vu lemene vene. Halumo vamo va muene nguavo ku muecelela ca puile ku muesa cikeketima ca kala naco Njambi ku vantu va ku hona ku tantuluka. Vunoni Yehova ke ku lela zendululu. Vilinga via yala uaco via kele na ku sauisa cikungulukilo. Cikuavo naua, vilinga viaco vie ku hungumuine vakuavo va kele na ku likata nendi. Vika Paulu ua sikile cikungulukilo ca ku Kolintu?

5. Vika Paulu ua lekele cikungulukilo ca ku Kolintu, kaha vika ua tondele ku handeka? (1 Kolintu 5:13) (Talenu naua cikupulo.)

⁵ Tandenu 1 Kolintu 5:13. Yehova ua huiminine Paulu a va sonekele mukanda mu ku va sika va tundise muntu uaco mu cikungulukilo. Kaha vati cikungulukilo ca pandele ku mu muenamo? Paulu ua va lekele ‘kati va liendele nendi’ kaha ‘cipue kulia kati va lie nendi.’ (1 Kol. 5:11) Nga tulia na muntu ce kupua ca casi ku simutuila ni halumo na ku likata nendi. Eci ca muesa ngecize, Yehova ka tondele Vakua Kilistu va likate na yala ua lingile vupangala. Ku lingamo ce ku lingisile vilinga vieni kati vi sambukile cikungulukilo. (1 Kol. 5:​5-7) Cikuavo naua, ku likela ku likata nendi, ce ku mu kuasele ku mona ngecize na sondoloka mua kama ku vitume via Yehova. Kaha na ku mu vuisa ntsoni linga evue cizango ca kualuluka.

6. (a) Vika ca lingile cikungulukilo mu ca tambuile mukanda ua Paulu? (b) Vati ua lingile yala ua vulumuine mu va tambuile mukanda ua Paulu?

 ⁶ Paulu munima ya ku sonekela vakua Kolintu mukanda, ua putukile ku lihula ku tuala ha vati cikungulukilo ci ka tambuilamo muzimbu uaco. Munima ya ntsimbu, Titu ua nehele muzimbu ua mu ile ku mutima: Cikungulukilo cononokele mukanda ua Paulu. (2 Kol. 7:​6, 7) Cikuavo naua, munima ya vimo vingonde, yala ua lingile vupi ualulukile! Ua aluluile vilinga vieni na cifua ca kele na ku muenamo viuma. Ngeci ua putukile kuononoka naua vitume via Yehova. (2 Kol. 7:​8-11) Vika Paulu ua lekele cikungulukilo munima yaco?

VATI CIKUNGULUKILO CA PANDELE KU MUENAMO MUNTU NALULUKA?

7. Vika viezilemo mu va tundisile yala ua lingile vupi mu cikungulukilo? (2 Kolintu 2:​5-8)

⁷ Tandenu 2 Kolintu 2:​5-8. Paulu ua handekele  nguendi ‘kayando ka va mu hisile nako vavengi, ka puilemo.’ Ni nguetu, ku sungamesa ci va mu hele ca puisilemo vutumbe vuaco. Vutumbe vuka? Ku mu kuasa ku liveya na kualuluka.—VaHe. 12:11.

8. Viuma vika vikuavo Paulu ua sikile vakua Kolintu?

⁸ Ngeci Paulu ua lekele cikungulukilo va ‘muecele ku mulonga na ku mu lembezieka’ kaha ‘na ku mu muesa cilemo.’ Paulu ua va lekele kati lika ku mu tambula naua mu cikungulukilo, vunoni na ku mu hana vusunga ngecize kasi va mu lema kaha va na muecela. Kaha va pandele ku lingamo ku hitila mu mezi na mu vilinga. Evi vie ku muesele ngecize va na viukilila na ku hiluka cendi.

9. Omo lia vika halumo vamo va likanuelele ku tambula uze muanetu ua liveyele?

⁹ Vuno vamo mu cikungulukilo va likanuelele ku tambula uze muanetu ni? Mbimbiliya ka ya vi handekele, vunoni halumo. Muomu vilinga viendi via kokelele cikungulukilo visoti, halumo na ku vuisa vamo vamuanetu na vandumbuetu ntsoni. Vamo halumo va livuile nguavo ka ca sungamene ku tambula muntu uaco na ndzolela, muomu va lihakelele kapandi ka ku ononoka masiko a Yehova, ikeye kuahi. (Setekesenu na Luka 15:​28-30.) Vunoni, omo lia vika ca puile ca seho ku muesa cilemo kuli uze muanetu ua liveyele?

10-11. Vika vie ku solokele nga vakuluntu va vianene ku konekela uze yala ua liveyele?

¹⁰ Aci singaniekenu vati vie ku fuile viuma, nga vakuluntu va vianene ku hiluisa uze muanetu mu cikungulukilo? Ni nga munima ya ku hiluka, cikungulukilo ka ca mu muesele cilemo? Nga ua liuile na ‘vusiua vua ku hiana.’ Cikuavo naua, nga ua singaniekele nguendi na limo litangua liahi a ka pua naua mutamba ua cikungulukilo. Visinganieka viaco, nga via mu lingisile ku likela ku lihakela kapandi ka ku sungamesa vusamba vuendi na Yehova.

¹¹ Helu lievi viose, nga vamuanaye mu cikungulukilo va vianene ku muecela, nga va hakele vusamba vuavo na Yehova mu vusonde. Omo lia vika? Muomu ku hona kuecela ka ca puile ku tambuluisa Yehova, vunoni ku tambuluisa Satana uze ka kele na cikeketima. Kaha ce ku hanene Satana vukovelelo vua ku va pangesa mu ku tsiha lutsilielo lua muntu uaco.—2 Kol. 2:​10, 11; Efe. 4:27.

12. Vati cikungulukilo ku Kolintu ce ku tambuluisile Yehova?

¹² Vati honi vakua Kolintu ve ku tambuluisile Yehova kati Satana? Mu ku tambuluisa viuma vie ku linga Yehova nga mukua vupi naluluka. Vika ue ku linga? Mbimbiliya nguayo, Yehova ali “na vuasi mu ku ecela milonga.” (Visa. 86:5) Ua pua “mukua ku ecela vipi.” (Mika 7:18) Kaha naua nguayo: “Mukua vipi a seze njila yeni, na mukua vuhenge visinganieka vieni; kaha a hiluke kuli Yehova, kaha ikeye a ka mu vuila cikeketima; na kuli Njambi yetu, muomu ikeye a ka mu ecela ku vipi cikumakuma.”—Isaya 55:7.

13. Omo lia vika ca tondekele ku hiluisa uze yala ua lingile vupi mu cikungulukilo? (Talenu cikasa “ Ha Ntsimbu ika uze Yala ua ku Kolintu va mu Hiluisile mu Cikungulukilo?”)

¹³ Mu ku tambuluisa Yehova, cikungulukilo ca pandele ku mu tambula na mavoko avali na ku mu hana vusunga ngecize kasi va mu lema. Ku linga evi ce ku muesele ngecize cikungulukilo ci “nononoka ku viose.” (2 Kol. 2:9) Vutuhu mua hitile vingonde via vindende lika, tunde ha ntsimbu i va mu tundisile mu cikungulukilo, vunoni ku sungamesa caco ca puisilemo vutumbe vua ku mu kuasa alululuke. Ngeci mukemuo, ka ca  tondekele ku simbula mua kama ku mu hiluisa mu cikungulukilo.

TAMBULUISENU VUOLOKE NA CIKEKETIMA CA YEHOVA

14-15. Vika tua lilongesa ku cifua ci viendelelemo viuma ku Kolintu omo umo yala ua vulumuine? (2 Petulu 3:9) (Talenu naua cikupulo.)

¹⁴ Muzimbu ua cifua ci viendelelemo viuma mu cikungulukilo ca ku Kolintu omo umo yala ua vulumuine, va u “sonekelele ku tu longesa.” (Loma 15:4) Ku muzimbu uaco tu lilongesako ngecize Yehova ke kuecelela mukua vupi uze ke kualuluka a tualeleho ku likata na cikungulukilo. Vutuhu ua pua mukua cikeketima, vunoni ke ku lela zendululu, ni ku tavesa vantu va linge viose-ovio vi va tonda, houe. (Yunda 4) Kaha ku lela zendululu ka ca puile ku muesa cikeketima, muomu ce ku yandesesako mbunga yose mu cikungulukilo.—Visi. 13:20; 1 Kol. 15:33.

¹⁵ Vunoni tua lilongesako naua ngecize, Yehova ka tondo na umo uahi a ka nonge. Ue ku tonda kuohiela vantu hose ha ci tavela ku lingamo. Ngeci ue ku muesa cikeketima ku vantu ve kualuluka ku mutima na ku lihakela kapandi ka ku sungamesa vusamba vuavo Nendi. (Ezek. 33:11; tandenu 2 Petulu 3:9.) Ngeci mukemuo, yala ua mu Kolintu mualulukile na ku likela vupi vuendi, Yehova ua pangesele Paulu a lomboluele cikungulukilo ngecize va na pande ku muecela na ku mu hiluisa mu cikungulukilo.

16. Vati ku tantekeya cifua cendeselelemo Yehova viuma ku Kolintu, ci li na ku mi vuisa ku tuala hali ikeye?

 ¹⁶ Ku hituluka mu muzimbu ua ku Kolintu, ca tu kuasa ku limuena mpundu vati Yehova ue ku muesa cilemo, vuviuke na vuoloke vuendi. (Visa. 33:5) Mua vusunga, muzimbu uaco ua vueza ku cizango cenu ca ku sangaziala Njambi yetu, ni vati? Muomu tu vose tu vakua vupi, kaha tue ku tondeka ku tuecela kuli Njambi. Ngeci tue ku santsela ku vuana vua nkombelo vuze vua tavesa ku tuecelela ku vipi vietu. Mua vusunga, ce ku tu lembezieka na ku tu kaniamesa mua kama, ku tantekeya ngecize Yehova ua tu lema kaha a tonda tu yoye vuino.

17. Vika tu ka lilongesa mu vilongesa vi na hatako?

¹⁷ Amba lelo lino co, vati via pande kuenda viuma nga umo a linga vupi vua kama? Vati vakuluntu va hasa ku tambuluisa cizango ca Yehova ca ku kuasa muntu aluluke? Vati tua pande ku muenamo viuma, nga vakuluntu va tundisa ni ku hiluisa umo muntu mu cikungulukilo? Tu ka mona vikumbululo via vihula viaco mu vilongesa vi na hatako.