1-2. (a) Vika via pua vupi, kaha vati tu hasa ku vu vula? (Talenu naua “Lizi li va Lombolola.”) (b) Vika tu simutuila mu cilongesa cino na mu vilongesa vikuavo via mu Vutala vuno? (Talenu naua cimpande “Kuli Vakua ku Tanda” mu Vutala vuno.)

 MU TONDA ku tantekeya vukama vua cilemo ca Yehova Njambi kuli yenu ni? Mu hasa ku uana cikumbululo mu ku lilongesa via lingile mu ku tuovola ku vupi na ku kutsa. Vupi a vua pua citozi ua kama, ngeci mukemuo ka mu hasa ku vu vula ku ndzili yenu. Tue ku vulumuna tangua na tangua kaha tue kutsa omo lia vupi. (Loma 5:12) Vunoni Yehova ua tu kulahesa ku tuovola ku vupi na ku kutsa.

² Mu miaka kampe 6.000, Yehova Njambi ali na ku kuasa vantu ku mu pangela, vutuhu vapua vakua vupi. Omo lia vika? Muomu ua lema vantu. Fume ku vuputukilo Yehova ua lema vantu, ngeci ue ku va kuasa ku vula vupi. Njambi a tantekeya nguendi vupi vue ku tu kokela kutsa kaha ka tondo tu tse. A tonda tu yoye miaka yose. (Loma 6:23) Mu cilongesa cino, tu simutuila ha vihula vitatu: (1) Lulavelelo luka Yehova ua hana ku vantu? (2) Vika va lingile vantu va va tumbula mu Mbimbiliya linga vaye Yehova ku mutima? (3) Vika ua lingile Yesu linga ovole vantu ku vupi?

 LULAVELELO LUKA YEHOVA UA HANA KU VANTU?

3. Vika via lingisile Andama na Eva ku vulumuna?

³ Yehova mua tangele Andama na Eva, ua tondele va yoye mu ndzolela. Ua va hanene cihela ca ku vuaha cikuma, vuana vua ku liambata, kaha na vipanga via cili. Ua va sikile ku sulisa mavu ose na vana vavo na ku a puisa citungu, ngeci mua citungu ca Endene. Ua va vindikile lika vimo viuma via vindende. Ua va lunguile nguendi nga va muesa lisino, vupi vuavo vue ku va kokelele kutsa. Tu tantekeya vika via solokele. Umo kangelo ka lemene Njambi, ua hungumuine Andama na Eva, va lingile via tondele kangelo uaco. Va likelele ku kulahela Isiavo ua cilemo ngeci va vulumuine. Ngeci mu tu tantekeya, mezi a Yehova a lipuisilemo. Omo lia ku muesa lisino va hitile mu visoti mu muono uavo uose. Va putukile ku kulupa kaha munima yaco va tsile.—Njen. 1:​28, 29; 2:​8, 9, 16-18; 3:​1-6, 17-19, 24; 5:5.

4. Omo lia vika Yehova ua zinda vupi na ku tu kuasa ku vu vula? (Loma 8:​20, 21)

⁴ Yehova ua tavesa ou muzimbu u kale mu Mbimbiliya mu ku tu kuasa kuivuisisa omo lia vika ua zinda cikuma vupi. Muomu vupi vue ku tsiha vusamba vuetu na Yehova kaha na ku tu kokela kutsa. (Isaya 59:2) Satana ka lemene Yehova na vantu, ngeci ua hungumuine Andama na Eva linga va vulumune. Kaha ali na ku tualelelaho ku lingamo na lelo lino. Satana mua lingisile Andama na Eva ku vulumuna, halumo ua singaniekele nguendi ua hasele ku tanganesa vutumbe vua Yehova ku tuala ha vantu. Vunoni ua lisinine ngoco, muomu ka tantekeyele vukama vua cilemo ca Yehova ku vantu. Njambi kaluluile vutumbe vuendi, kaha ua lema cikuma vantu, ngeci vuasi-vuasi ua va hele lulavelelo. (Tandenu Loma 8:​20, 21.) Yehova ua tantekeyele nguendi, vamo ve ku mu lemene na ku muononoka. Yehova ua va hele vukovelelo vua ku likuata vusamba nendi na ku va patula ku vupi na ku kutsa. Vika ua lingile Yehova mangana viose vi lipuisimo?

5. Ntsimbu ika Yehova ua hele lulavelelo ku vantu? Lombololenu. (Njenisisi 3:15)

⁵ Tandenu Njenisisi 3:15. Yehova ua hele vantu lulavelelo mua handekele nguendi a ka nongesa Satana. Njambi ua polofetele nguendi kue ku kele “mbuto” ye kuovuele vantu. Munima yaco, mbuto ye ku nongesele Satana na ku manusula tuyando tua kokele mu citungu ca Endene. (1 Yoa. 3:8) Vunoni ha katete, Satana ue ku ‘sumine’ mbuto yaco, ni nguetu ku i tsiha. Evi vie ku vavalesele cikuma Yehova, vunoni ua tavesele “mbuto” i yande linga ovole vantu ku vupi na kutsa.

VI VA LINGILE VANTU VA VA TUMBULA MU MBIMBILIYA VAYE YEHOVA KU MUTIMA

6. Vika va lingile vakua lutsilielo, ngeci mua Avele na Noa linga va likuate vusamba na Yehova?

⁶ Munima ya vihita via miaka, Yehova ua sololuele kavundende-kavundende vi va pandele ku linga vantu mangana va muye ku mutima. Munima ya Andama na Eva ku muesa lisino, Avele ikeye muntu ua ku livanga ku muesa lutsilielo muli Yehova. Omo lia cilemo cendi kuli Yehova, Avele ua hele cikombelo kuli Njambi. Ua puile kaniungi ka vampanga, ngeci ua nonene vamo vana vampanga na ku va kombeleya. Vika Yehova ua lingile? Ua “tavele Avele na cikombelo ceni.” (Njen. 4:4) Cikuavo naua, Yehova ua tavele vikombelo vi va mu hele vangamba vendi vakuavo, ngeci mua Noa. (Njen.  8:​20, 21) Ku lingamo, Yehova ua muesele nguendi vakua vupi va hasa ku likuata vusamba Nendi. b

7. Vika tu lilongesa ku vukatuisi vua Avilahama mua tondele ku kombeleya munendi?

⁷ Yehova ua tumine Avilahama yala mukua lutsilielo a kombeleye munendi Isake. Ca kaluuilile cikuma Avilahama, vutuhu ngoco uononokele Yehova. Kaha mua tondele ku kombeleya munendi, Njambi ua mu vindikile ku lingamo. Muzimbu ua Avilahama u tu longesa ngecize, Yehova ue ku hele Muanendi ya lema kupua nkombelo, muomu ua lema cikuma vantu.—Njen. 22:​1-18.

8. Vika viemanenene vikombelo vi va kele na ku hana vaIsaleli? (Levitiku 4:​27-29; 17:11)

⁸ Ku hitila mu Lisiko lia hele vaIsaleli, Yehova ua va lekele va pue na ku kombeleya tusitu linga a vecele ku vipi. (Tandenu Levitiku 4:​27-29; 17:11.) Vikombelo viaco viemanenene cikombelo ca ku hiana ce ku hanene Yehova mu ku patula vantu ku vupi. Ngeci ua huiminine vapolofeto vendi linga va soneke ku tuala ha mbuto, ni nguetu Muanendi i ve ku yandesele na ku mu tsiha. Ue ku puile ngue mpanga ya cikombelo. (Isaya 53:​1-12) Aci singaniekenu, Yehova ua kulahesele ku hana Muanendi ya lema linga a patule vantu ku vupi na ku kutsa. Mua vusunga, via pua viuma via cili cikuma via mi lingila Yehova.

VIKA UA LINGILE YESU LINGA OVOLE VANTU KU VUPI?

9. Yoano Mukua ku Mbatiza ua handekele vika ku tuala hali Yesu? (VaHevelu 9:22; 10:​1-4, 12)

⁹ Mu muaka ua 29 T.K.N, Yoano Mukua ku Mbatiza mua muene Yesu Kilistu, ua handekele nguendi: “Talenu Muana mpanga ua Njambi, mukua ku ambata vupi vua vakua mavu!” (Yoa. 1:29) Aa mezi a muesa ngecize, Yesu ua puile mbuto ya kulahesele Njambi. Kaha ue ku hanene muono uendi. Ngeci mukemuo, mbuto yaco ye kuovuele vantu mu vutuntu.—Tandenu VaHevelu 9:22; 10:​1-4, 12.

10. Vati Yesu ua muesele nguendi ‘uezile mu ku sana’ vakua vupi?

¹⁰ Yesu ua tualele cikuma mana mu ku kuasa vaze va zeyele omo lia vupi vuavo kaha ua va laniene va pue vandongesi vendi. Ua tantekeyele nguendi vantu ve ku yanda omo lia vupi. Ngeci ua lihakelele kapandi ka ku kuasa vamala na vampuevo va yandele omo lia vipi viavo. Ku hitila mu cimueso, ua lomboluele nguendi: “Vakangule ka va hianga [mukua ku va saka], vunoni vakua ku vavala.” Kaha naua nguendi: “Ange ka njezile mu ku sana vakua vuviuke, vunoni vakua vipi.” (Mat. 9:​12, 13) Yesu ua puisilemo via handekele. Ua handekele na ngozi na kuecela vipi via mpuevo uze ua tanesele viliato viendi na masozi. (Luka 7:​37-50) Cikuavo naua, ua longesele umo mpuevo mukua Samaliya vusunga vua seho, vutuhu ua tantekeyele nguendi mpuevo uaco ua kele na ku linga vupangala. (Yoa. 4:​7, 17-19, 25, 26) Vantu ve kutsa omo lia vupi, vunoni Njambi ua hele Yesu ngolo ya ku va sangula.—Mat. 11:5.

11. Omo lia vika vantu va kele na ku livua ku zituka mu ku kala na Yesu?

¹¹ Vantu va kele na ku livua ku zituka ku kala na Yesu, muomu ua kele na ku vevuisisa na ku va muesa ngozi. Ngeci va kele na ku livua ku zituka mu ku handeka nendi. (Luka 15:​1, 2) Yesu ua va sangalele na ku va lunguisa omo lia ku muesa lutsilielo muli ikeye. (Luka 19:​1-10) Kaha Yesu ua muesele cikeketima  ca Yehova mu cifua ca yoyelelemo navo. (Yoa. 14:9) Evi vi tu kuasa ku mona ngecize, Yehova ua pua mukua cikeketima, ua lema vantu kaha a tonda ku va kuasa. Cikuavo naua, Yesu ua kuasele vantu kualulula miono yavo linga va mu kave.—Luka 5:​27, 28.

12. Vika Yesu ua lekele vandongesi vendi ku tuala ha kutsa cendi?

¹² Yesu ua tantekeyele via mu lavelelele. Kaha ua lekele vandongesi vendi vintsimbu via vingi nguendi ve ku muendele vungungu na ku mu tsiha. (Mat. 17:22; 20:​18, 19) Ngue mua handekele Yoano Mukua ku Mbatiza na vapolofeto, Yesu ua tantekeyele nguendi, nkombelo yendi ye ku fumisile vipi via vantu. Ua handekele naua nguendi, munima ya ku mu sukika ue ku ‘kokele’ vantu va ku miyati yose kuli ikeye. (Yoa. 12:32) Vantu ve kuya Yehova ku mutima mu ku tsiliela Yesu na ku lihakela kapandi ka ku mu tambuluisa. Omo liaco, ve ku ‘vovuele ku vupi.’ (Loma 6:​14, 18, 22; Yoa. 8:32) Ngeci mukemuo, na ku simpa cose Yesu ua lihanene linga a tu tsile mu ku tuovola.—Yoa. 10:​17, 18.

13. Vati Yesu ua tsile, kaha vika tu lilongesaho ku tuala hali Yehova? (Talenu naua cikupulo.)

¹³ Kavusamba ka Yesu ua muendele vungungu. Ngeci vitozi vendi va mu kuatele, ku mutuka na ku mu vangeya viuma ka lingile. Kaha munima yaco, va mu tualele na ku ka mu sukika. Yesu ua kolesele mu va kele na ku mu yandesa. Yehova ua vuile ku vavala cikuma ku mutima mua muene Muanendi vali na  ku mu yandesa mu vukenia. Aci singaniekenu, vutuhu Yehova ua kele na ngolo ya ku patula Muanendi ya lema, vunoni ua tavesele va mu tsihe. Omo lia vika? Muomu ua tu lema. Yesu nguendi: “Njambi ua lemene vakua mavu cikuma, ngecize ua hele Muaneni umo lika, linga uose a mu tsiliela kati a ka nonge, vunoni a kale na muono ka ue ku hua ua ya-ye.”—Yoa. 3:16.

14. Nkombelo ya Yesu ya solola vika?

¹⁴ Nkombelo ya Yesu ya solola vukama vua cilemo ca Yehova ku vana va Andama na Eva. Cili vene ua tu lema cikuma. Vutuhu ca mu vavalele cikuma ku mutima, vunoni ua hele Muanendi kupua nkombelo linga a tu patule ku vupi na ku kutsa. (1 Yoa. 4:​9, 10) Mua vusunga, Yehova a tonda ku tu kuasa linga tu mu lemese vutuhu tua pua vakua vupi. Kaha ua tu kulahesa ku ka fumisa vupi vuose.

15. Linga Njambi a tuecele ku hitila mu nkombelo ya Yesu, vika tua pande ku linga?

¹⁵ Njambi ue ku tuecela ku vipi, ku hitila mu nkombelo ya Muanendi umo lika. Vunoni tua pande ku lingako mumo linga Njambi a tuecele. Vika tua pande ku linga? Yoano Mukua ku Mbatiza na Yesu Kilistu, va handekele nguavo: “Aluluisenu mitima; muomu vu li mu hiehi vuangana vua muilu.” (Mat. 3:​1, 2; 4:17) Ngeci mukemuo, tua pande kualuluka nga tu tonda ku tualelelaho ku lemesa Yehova na ku likuata vusamba Nendi. Vika ca lomboloka kualuluka? Vati ku lingamo ce ku tu kuasa kuya Yehova ku mutima vutuhu tua pua vakua vupi? Tu ka tantekeya vikumbululo via vihula viaco mu cilongesa ci na hatako.