1-2. (a) Vati Yehova ue ku muenamo vakua ku linga vupi ka ve kualuluka? (b) Vika Yehova ua lavelela ku vakua ku linga vupi?

 YEHOVA ke ku lela zendululu. (Visa. 5:​4-6) Ua lavelela tuononoke masiko endi a kala mu Mbimbiliya. Vutuhu ngoco, ke ku lavelela vutantuluke muli yetu. (Visa. 130:​3, 4) Vunoni naua ke kuecelela ‘vakua ku lema vupi va mone kavumbi keni kupua vukovelelo vua ku linga vuhenge.’ (Yun. 4) Ngeci mukemuo, Mbimbiliya ya muesa ngecize “vantu vakua ku sahula Njambi” va ka nonga mu ndzita ya Alemangendo.—2 Pet. 3:7; Ku-So. 16:16.

² Vunoni, Yehova ka tondo na umo uahi a ka nonge. Ngue mu tua simutuila mu vilongesa vino via ku likava, Njambi a tonda “vose va hete ku ku-aluluka.” (2 Pet. 3:9) Kaha vakuluntu ve ku tambuluisa eci cizango ca Yehova mu ku kuasa na ntsintsa vakua ku vulumuna linga valuluke na ku sungamesa vusamba vuavo na Yehova. Vunoni, vamo vakua ku vulumuna ka ve ku tava vukuasi vuaco. (Isaya 6:9) Ve ku tualelelaho ku linga vupi, vutuhu vakuluntu ve ku lihakela kapandi ka ku va kuasa. Nga via cifua eci via soloka, vati va pande ku linga vakuluntu?

“FUMISENU MUKUA VUPI”

3. (a) Vika ya handeka Mbimbiliya ku tuala ha vakua vupi ka ve kualuluka? (b) Vika tu hasa ku handekela nguetu muntu ikeye vavenia ue ku tonda ku mu tundisa mu cikungulukilo?

³ Nga muntu na lingi vupi kesi na kualuluka, kaha mueka  muahi, vakuluntu va pande ku kava lisiko lia ku 1 Kolintu 5:13 lia ku ‘tundisa mukua vupi mu cikungulukilo.’ Uose u ve ku tundisa mu cikungulukilo, ikeye vavenia ue ku likokelavio. (Ngal. 6:7) Omo lia vika? Muomu muntu ve ku mu tundisa lika mu cikungulukilo, nga a viana vukuasi vua vakuluntu. (2 Vam. 17:​12-15) Vilinga viendi vie ku muesa ngecize, ka tondo naua ku kava vitume via Yehova.—Ndeu. 30:​19, 20.

4. Omo lia vika ve ku linga mutambi nga umo muntu va na mu tundisa mu cikungulukilo?

⁴ Nga muntu va mu tundisa mu cikungulukilo, ve ku linga mutambi mu ku lekesa cikungulukilo ngecize, muntu uaco kati naua Mukaleho ua Yehova. a Vutumbe vua mutambi uaco kati ku saula muntu. Vunoni ku kuasa cikungulukilo linga ci kave cilungula ca ku 1 Kolintu 5:​9-11, ca ku likela ‘ku liendela’ cipue “ku lia” na muntu uaco. Cilungula caco capua ca seho ya kama, muomu Mbimbiliya nguayo: “Cimbaluila ca cindende ci hasa ku futunuisa mukamo uose.” (1 Kol. 5:6) Ni nguetu, kuecelela mukua vupi ke kualuluka a tualeleho mu cikungulukilo, ci hasa ku zeyesa kapandi ka vakuavo ka ku yoya muaya masiko a Yehova.—Visi. 13:20; 1 Kol. 15:33.

5. Vati tua pande ku muenamo muntu na tundu mu cikungulukilo, kaha omo lia vika?

⁵ Vati honi tua pande ku muenamo vaze va ve ku tundisa mu cikungulukilo? Vutuhu ka tua pandele ku likata navo, vunoni ka ca lombolokele ngecize ka vesi na lulavelo. Tua pande ku va mona ngue vampanga va ku zimbala. Muomu mpanga nga na zimbala, a hasa ku hiluka. Kaha vulukenu nguenu, mpanga uaco nendi ua lihanene kuli Yehova. Vusonde vuliho lika muomu kesi naua na ku yoya muaya ku lihana cendi. (Ezek. 18:31) Vunoni nga Yehova kasi a tualelelaho ku muesa ntsintsa ku tuala ha ku kotola mavu, citava tu lavelele nguetu, muntu uaco a ka hiluka. Vati vakuluntu ve ku muesa lulavelelo luaco ku tuala ha muntu ua tunda mu cikungulukilo?

VAKULUNTU VE KU KUASA VAZE VA TUNDA MU CIKUNGULUKILO

6. Vika vakuluntu ve ku linga mu ku kuasa muntu u va na tundisa mu cikungulukilo?

⁶ Nga muntu va na mu tundisa mu cikungulukilo, ve ku mu mbila kuti ni? Vuno ve ku muecelela noho ha ka uanena vavenia njila ya ku hiluka kuli Yehova ni? Houe! Mpunga ya vakuluntu mu ye ku tundisa muntu mu cikungulukilo, ve ku mu lomboluela via na pande ku linga mangana a hiluke. Vunoni kati ovio lika, ve ku mu leka naua nguavo, va tonda ku ka likungulula nendi naua munima ya vimo vingonde, linga va mone nga naluluka ku mutima. Nga na tava ku likungulula navo, mu ce ku heta ciuano caco, vakuluntu ve ku mu kaniamesa aluluke na ku hiluka. Kaha ambe nga muntu uaco hanga kesi na kualuluka, vakuluntu ve ku tualelaho ku tonda mavukovelelo akuavo a ku likungulula-kungulula nendi linga a hiluke.

7. Vati vakuluntu ve ku tambuluisa cikeketima ca Yehova nga muntu na tundu mu cikungulukilo? (Yelemiya 3:12)

⁷ Vakuluntu ve ku lihakela kapandi ka ku tambuluisa cikeketima ca Yehova mu ve ku kuasa muntu na tundu mu cikungulukilo. Ca ku muenako, Yehova ka lavelele vaIsaleli va ci lingeko mumo amba a va hiluise. Vunoni  Yehova ikeye ua livangele ku va tonda, tele kanda va muese citantekeyeso na cimo cahi nguavo va tonda ku hiluka kuli ikeye. Ngue mu ci na muesele cilongesa ca mu civali, ca vilongesa vino via ku likava, Yehova ua muesele cikeketima mu ku leka kapolofeto Hoziya a lihambe na mpueyendi, vutuhu mpueyendi tele kasi ali na ku muenda vungungu. (Hoz. 3:1; Mal. 3:7) Mu ku tambuluisa Yehova, vakuluntu ve ku tonda mua kama muntu na lingi vupi a hiluke, kaha ka ve ku kaluuisa viuma.—Tandenu Yelemiya 3:12.

8. Vati cisimo ca muana ua zimbalele, ca tu kuasa kuivuisisa vikuavo naua ku tuala ha cikeketima na kuecela ca Yehova? (Luka 15:7)

⁸ Vulukenu cisimo ca muana ua zimbalele, ci tua simutuila mu cilongesa ca mu civali ca vilongesa vino via ku likava. Ise mua muene munendi ali na kuiza, “ua tuntile ua ka mu vumbatelele naku mu tsemba.” (Luka 15:20) Mu muzimbu uaco, Ise ka lavelele muana a ci mu pinge kuecela. Vunoni ua mu tuntilile, ngeci mue ku linga nkala Ise ua cilemo. Vakuluntu navo ve ku lihakela kapandi ka ku linga viuma viaco ku vampanga va ku zimbala. Ve ku tonda vampanga “va hiluke ku ndzivo.” (Luka 15:​22-24, 32) Muilu mue ku kala ndzolela nga mukua vupi a hiluka, kaha na ha mavu naho he ku kala ndzolela!—Tandenu Luka 15:7.

9. Vika Yehova a tonda ku tuala hali vaze va linga vupi?

⁹ Kuliya na mizimbu i tua simutuila, tua limuena nguetu Yehova ke ku lela zendululu. Vunoni naua, ke ku mbila kuti vakua vupi, vunoni a tonda va hilulke. Cifua ce ku livuilamo Yehova ku tuala ha vakua ku linga vupi vaze ve kualuluka, va ci lombolola ku Hoziya 14:​4, Mbimbiliya nguayo: “Nji ka kanguisa ku-tanguka cavo, nji ka va lema na mutima, muomu vutenu vuange vu na [va] fumu.” Ku tantekeya evi, ce ku vuisa vakuluntu cizango ca kama, ca ku lingako mumo hose ha va muena kacitantekeyeso ka kualuluka ku muntu. Kaha ca pande naua ku vuisa vaze va tunda mu cikungulukilo cizango ca kama ca ku hiluka vuasi.

10-11. Kapandi kaka ve ku lihakela vakuluntu mu ku kuasa vaze va tundile laza mu cikungulukilo?

¹⁰ Ambaco vaze va tundile mu cikungulukilo miaka ya yingi kunima? Vantu vaco halumo va likela laza vupi vua va tundisisile mu cikungulukilo. Kaha vamoco ka ve ku vuluka omo lia vika va va tundisile mu cikungulukilo. Vakuluntu va pande ku tonda vantu vaco na ku vendela. Mu mangendzi aco, vakuluntu ve ku lihana ku vundila na muntu na ku mu kaniamesa na cilemo linga a hiluke mu cikungulukilo. Nga muntu va mu tundisile laza mu cikungulukilo, ue ku zeya mua kama mu lutsilielo. Ngeci mukemuo, nga a muesa cizango ca ku hiluka, vakuluntu va hasa ku mu tondela muntu a muendesele cilongesa ca Mbimbiliya, vutuhu kanda a hiluke. Kaha vakuluntu lika va pande ku linga vutumbe vuaco na ku hangula muntu a pua na kuendesa cilongesa caco.

¹¹ Vakuluntu ve ku tambuluisa cikeketima ca Yehova, mu ku lengeya vose va tunda mu cikungulukilo na ku va lekesa ngecize mbelo ya sokoloka linga va hiluke. Nga mukua vupi aluluka na ku likela vupi vuendi, a tondeka ku mu hiluisa ca ku hona ku hitisamo ntsimbu ya kama.—2 Kol. 2:​6-8.

12. (a) Ha vintsimbu vika vakuluntu va pande ku muesa liano cikuma-kuma? (b) Omo lia vika ka tua pandele ku singanieka nguetu vamo vakua vupi na limo litangua liahi Yehova a ka vecela? (Talenu naua litota.)

¹² Vintsimbu vimo, vakuluntu va pande ku muesa cikuma-kuma liano ntsimbu kanda  va hiluise muntu mu cikungulukilo. Ca ku muenako, nga muntu ua limuene na kanike, ualulukilile vusunga, ni ua tondele njila ya ku tsihilamo vulo, vakuluntu va pande ku kala na vusunga nguavo naluluka mpundu. (Mal. 2:14; 2 Tim. 3:6) Muomu va pande ku niunga cikungulukilo. Vunoni naua, tua pande ku tantekeya nguetu Yehova ue ku tava uose-ouo ku hiluka, ca kama lika nga aluluka mu vusunga na ku likela vupi. Ngeci mukemuo, vutuhu vakuluntu ve ku muesa cikuma-kuma liano ku tuala hali vaze va lingile via ku vihia, vunoni ka va pandele ku heta ha ku handeka nguavo vamo vakua vupi Yehova na limo litangua liahi a ka va muesa cikeketima. b—1 Pet. 2:10.

 VI VA HASA KU LINGA VOSE MU CIKUNGULUKILO

13. Ku litepa cika ca kala ha muntu u va na sungamesa na muntu u va na tundisa mu cikungulukilo?

¹³ Ngue mu tua muene mu cilongesa ci na hiti, vintsimbu vimo tue kuivua mutambi nguavo ngandi va na mu sungamesa. Nga via soloka, citava tu tualelelaho ku likata nendi, muomu tua tantekeya nguetu na liveye na ku mbila kuti vupi vuendi. (1 Tim. 5:20) Cikuavo naua, kasi napu mutamba ua cikungulukilo kaha a tondeka ku mu kaniamesa ku vamuanaye linga a tualeleho ku linga via cili. (VaHe. 10:​24, 25) Vunoni, ha kala cimo ku litepa nga muntu va na mu tundisa mu cikungulukilo. Muomu muntu uaco, tue ku likela ‘ku liendela nendi’ cipue vene “ku lia” nendi.—1 Kol. 5:11.

14. Vati Vakua Kilistu ve ku muenamo vaze va va tundisa mu cikungukilo? (Talenu naua cikupulo.)

¹⁴ Vuno vi tua lilongesa via lomboloka ngecize ka tua pandele ku sungula cipue kamandende, muntu u va na tundisa mu cikungulukilo ni? Houe. Vutuhu tue ku likela ku likata nendi. Vunoni tu hasa ku pangesa vi tue ku lilongesa mu Mbimbiliya mu ku hangula nga tu lania muntu u va tundisa mu cikungulukilo aye mu ku kunguluka. Muntu uaco a hasa kupua kavusoko ketu, ni muntu ueka u tua likatele mua kama tele kanda va mu tundise mu cikungulukilo. Nga co neza mu ku kunguluka? Laza ka tua kele na ku meneka vantu va va na tundisa mu cikungulukilo. Vunoni hano honi, nkala Mukua Kilistu na pande ku pangesa vie ku lilongesa mu Mbimbiliya nga a lihanguila ku meneka vantu vaco ni kuahi. Vamo ve ku livua ku zituka ku va meneka ni ku va tambula. Vunoni, tua pande ku va meneka lika, kati ku simutuila ni ku likata navo.

15. Citume ca ku 2 Yoano 9-11 ca handeka via vakua ku linga vupi vuka? (Talenu naua cikasa “ Vuno Yoano na Paulu va Handekele via Vupi Vumo Ni?”)

¹⁵ Vunoni vamo ve ku lihula nguavo: ‘Kati Mbimbiliya nguayo Mukua Killistu a meneka muntu ua tunda mu cikungulukilo, a lipandakana nendi ku vilinga viendi via ku vihia?’ (Tandenu 2 Yoano 9-11.) Nga mu tanda muzimbu uose, mu mona nguenu citume caco ca handeka via vakua kualulukila  vusunga na vakua ku sambeya vupi. (Ku-So. 2:20) Ngeci mukemuo, nga muntu ue ku sambeya vilongesa via kualulukila vusunga, ni ku sambeya vupi vueka, vakuluntu ka ve ku muendela. Vutuhu ngoco, kasi tue ku lavelela nguetu tangua a kaluluka. Vunoni ntsimbu kanda aluluke, ka tue ku mu meneka ni ku mu lania ku viuano.

TAMBULUISENU CIKEKETIMA NA KUECELA CA YEHOVA

16-17. (a) Yehova a tonda vakua vupi va linge vika? (Ezekiele 18:32) (b) Vati vakuluntu va hasa ku muesa nguavo ve ku pangela hamo na Yehova nga muntu na lingi vupi vua kama?

¹⁶ Vika tua lilongesa mu vilongesa vitanu via ku likava? Yehova ka tondo na umo uahi a ka nonge! (Tandenu Ezekiele 18:32.) A tonda vakua vupi va lihambe nendi. (2 Kol. 5:20) Ngeci mukemuo, tunde ku laza Yehova ue ku kaniamesa vakua vupi valuluke na ku hiluka kuli ikeye. Kaha vakuluntu mu cikungulukilo va kala na civezikiso ca ku pangela hamo na Yehova mu ku kuasa vakua ku linga vupi valuluke.—Loma 2:4; 1 Kol. 3:9.

¹⁷ Aci singaniekenu ndzolela ye ku kala muilu nga vakua vupi valuluka! Yehova Tatetu ua muilu, nendi ue kuivua ndzolela yaco, mue ku mona umo mpanga yendi ua zimbalele a hiluka mu cikungulukilo. Cilemo cetu kuli Yehova ce ku tualelelaho ku livuezelela mu tue ku singanieka ha cikeketima, kuecela na kavumbi kendi kuli yetu.—Luka 1:78.