Kapostolo Paulu ua sonekelele Vakua Kilistu ku Tesalonika nguendi: “Nga umosi ka tava ku lizi lietu lia mukanda uno, talenu muntu [uaco].” (2 Tes. 3:14) Laza, tua handekele nguetu vakuluntu vakevo lika va pande ku lingamo. Cikuavo naua, vakuluntu va kele na ku hana vimpande mu ku lungula cikungulukilo nga kuli umo ali na ku tualelelaho ku sembulula vitume via mu Mbimbiliya. Kaha vakua kuambulula ka va pandele ku likata na muntu uaco, kuvanga mu ku kunguluka ni mu kuambulula lika.

Vunoni, kuli cimo kualuluka. Paulu mua hele cimamuna caco, ua kele na ku handeka via cihangula ci va pande ku linga Vakua Kilistu. Ngeci mukemuo, vakuluntu ka va tondeka ku hana cimpande mu ku mamuna. Omo lia vika tunalulula cifua ci tue kuivuisisilamo mukanda 2 Tesalonika 3:14? Tu hilulenu vika ua kele na ku handeka Paulu mua hele cimamuna caco.

Paulu ua muene nguendi mu cikungulukilo mua kele vamo va kele na “ku linga-linga via ngoco.” Va kele na ku sembulula vimamuna via mu Mbimbiliya. Ngeci mukemuo, Paulu mua va menekele ua va mamuine nguendi: “Nga umosi ka hianga ku panga, [kaha] kati a lie.” Vunoni, vamo va vianene ku panga linga va hase ku lisuka vutuhu va kele na vuhasi vua ku lingamo. Cikuavo naua, va kele na ku likambeka mu vimpande via mbala. Vati Vakua Kilistu va pandele ku yoya na vantu vaco?—2 Tes. 3:​6, 10-12.

Paulu ua mamuine nguendi: “Talenu muntu [uaco],” ni nguetu, ku mu talesesa. Lizi lia ciNgelengu lia lomboloka ngecize, tua pande ku nongonona muntu uaco na ku zangama nendi linga kati a tu hungumune. Paulu ua hele cimamuna caco ku vose mu cikungulukilo, kati ku vakuluntu lika. (2 Tes. 1:1; 3:6) Ngeci mukemuo, Vakua Kilistu mu va kele na ku mona vamuanaye vaze va kele na ku viana kuononoka vimamuna via mu Lizi lia Njambi, va kele na ku likela ‘likata navo.’

Vuno ca lomboloka ngecize vantu vaco va pandele ku va mona ngue va kuua mu cikungulukilo ni? Houe, muomu Paulu ua handekele naua nguendi: “Mu mamunienu ngue muanokuenu.” Ngeci mukemuo, Vakua Kilistu va kele na ku kala hamo lika na muntu ka kele na kuononoka vimamuna ku viuano na mu kuambulula. Vunoni ka va kele na ku sikama ni ku kala hamo nendi ku vueho. Omo lia vika? Paulu ua handekele nguendi: “Linga ntsoni i ci mu kole.” Ku lingamo, ca kele na ku kuasa Vakua Kilistu vevue ntsoni ya vilinga viavo kaha na kualuluka.—2 Tes. 3:​14, 15.

Vati Vakua Kilistu lelo lino va hasa kuononoka cimamuna caco? Ha katete, tua pande ku kala na vusunga nga vilinga via muntu via pua mpundu “via ngoco” ngue mua handekele Paulu. Kapostolo Paulu ka kele na ku handeka via vihangula vi tue ku linga na mutima ni vizango vietu ka vie ku liluisa na Mbimbiliya. Cikuavo naua, ka kele na ku tumbula via vaze va tu vavalesa ku mutima. Vunoni, Paulu ua kele na ku handeka via vaze ka ve kuononoka vimamuna via mu Lizi lia Njambi.

Nga tua nongonona nguetu umo muanetu ni ndumbuetu ke kuononoka vimamuna via mu Mbimbiliya, a tu ka hangula ku likela ku kala nendi ku vueho ni ku sikama nendi. Cikuavo naua, mu ku linga capua cihangula ca muntu ku muntu, ka tua pandele ku vi simutuila na vantu ka va puile vavusoko vetu va ha hiehi. Kaha kasi tu hasa ku likata na muntu uaco ku viuano ni mu kuambulula. Vunoni, nga muntu naluluka tu hasa ku likata nendi lueka naua mu vintsimbu viose.