Vutumbe vua muzimbu ua ku Ndeutelonomi 22:25-27, kati ku muesa ngecize yala ua lingile mulonga, houe, muomu kuliya na muzimbu uaco, via lingile yala via mu hisile laza. Vutumbe vua puile ku sambuesa mpuevo. Omo lia vika? Tu hilulenu vuino muzimbu uaco.

Ntsimbu kanda tu hete ha vinimbu via handeka ha muzimbu ou, Mbimbiliya ya handeka via umo yala ua limuene na mpuevo i va handekeya “muimbo.” Yala uaco, va mu tuikile mulonga ua vupangala, muomu mpuevo nga va na mu handekeya ca puile vene ngue na somboka laza. Vatico va lingile mpuevo? Neni va mu tuikile mulonga “muomu ka tambekele, omo ua kele hembo.” Nga ua tambekele nga vantu va vuileko na ku mu ohiela. Ngeci mukemuo, vose vavali va va tuikile mulonga.​—Ndeu. 22:25-27.

Mu nima yaco, Masiko a handekele via cimpande cikuavo, nguao: “Nga va uana yala a kosa na mpuevo ua ku somboka kuli yala, kaha vose vavali va ka tsa, yala uze ua kosele na mpuevo, na mpuevo: ngecize u ka fumisa vupi ku Isaleli. Vunoni nga yala na mu uana ku musenge muanampuevo ua ku lama, kaha yala a mu huisa na ku kosa neni; kaha yala uze lika ua kosele neni a ka tsa: vunoni na muanampuevo na vimo u ka linga neni viahi; ka vuesi mu muanampuevo vupi vumo vua pande ku tsa: Muomu lizi eli li na lifu ngue omo yala a katukila mukuavo na ku mu tsiha; muomu ua mu uanene ku musenge, muanampuevo ua ku lama ua tambekele, vunoni ka kua kele umosi mukua ku mu ohiela.”​—Ndeu. 22:25-27.

Mu cimpande eci vangazi va hakuilile mpuevo. Mu njila ika? Muomu va kulahelele nguavo mpuevo uaco “ua tambekele, vunoni ka kua kele umosi mukua ku mu ohiela.” Ngeci mukemuo ka vi lingile ku cizango ceni. Vunoni yala va mu tuikile mulonga ua vupangala na ku kuata ku ndzili mpuevo i va handekeya, omo lia ku “mu uisa na ku kosa neni.”

Vutuhu vutumbe vueli lisiko vua puile ku sambuesa mpuevo, vunoni muzimbu uaco ua muesele naua ngecize yala ali na mulonga ua vupangala na ku kuata mpuevo ku ndzili. Ngeci mukemuo, tu kalenu na vusunga ngecize vangazi va kele “na ku konka vuino” cimpande caco na ku ci sompa muaya vitume via va hele Njambi ku hilukila na ku hilukila.​—Deut. 13:14; 17:4; Ex. 20:14.