1-2. Ngue mu ua muesa muzimbu ua muanetu Angelito, vika tua pande ku linga muntu ku muntu?

VUNO vali na ku mi lela ku visemi va pua Vakaleho va Yehova ni? Nga mukemuo, kati mu suve ngecize ku likuata vusamba na Yehova ka ve ku ci suana. Ambe nga visemi vetu ve ku pangela Yehova ni kuahi, yetu vavene tua pande ku likuata vusamba na Yehova.

² Aci halakanenu via solokelele muanetu Angelito. Visemi veni na vamuanaye vose va pua Vakaleho va Yehova. Vunoni ikeye tele kanike, kaha ka lemene cikuma via Njambi. Angelito ngueni: “Ange nja kele na ku pangela Yehova muomu nja tondele lika ku linga vi va kele na ku linga vakuetu vose ha ndzivo.” Vunoni mu nima ya ntsimbu, Angelito ua putukile ku vueza ku ntsimbu ya kele na ku tanda lizi lia Njambi na ku lihilula, kaha na ku vundila ku sua kumo. Vika viezilemo? Ivene ngueni: “Nja hetele ha ku ivuisisa ngecize njila imo lika i nji hasa ku likuatelamo vusamba na Tata ua muilu, Yehova, noho ange ivene nji lihakele kapandi ka ku mu tantekeya.” Muzimbu ua muanetu Angelito u katula vimo vihula via seho: Ku litepa cika ca kala ha ku tantekeya Yehova helu-helu lika na ku mu tantekeya vuino mpundu? Kaha vati tu hasa ku tantekeya vuino Yehova?

3. Ku litepa cika ca kala ha ku tantekeya helu-helu Yehova na ku mu tantekeya vuino?

³ Ku tantekeya helu-helu Yehova, ca lomboloka ku tantekeya  lizina lieni na ku tantekeya vimo via handeka na ku linga, kunahu. Vunoni ku tantekeya vuino Yehova, ca tondeka vikuavo naua. Tua pande ku kala na ntsimbu ya ku lilongesa via vingi hali ikeye na vifua vieni via cili. Amba vuose tu ka hasa ku ivuisisa vika vie ku mu lingisa ku handeka vie ku handeka, ni ku linga vie ku linga. Kaha ku tantekeya evi, ci ka tu kuasa ku nongonona nga matumbe etu, vihangula vietu na vilinga vietu vie ku mu ya ku mutima ni kuahi. Kaha mu nima ya ku tantekeya cizango ca Yehova, tua pande ku linga cose tu yoye muaya cizango ceni.

4. Vati ku hilula malungano a mu Mbimbiliya ci hasa ku tu kuasa?

⁴ Vamo vantu va hasa ku tu ku tsopa omo lia ku tonda ku pangela Yehova, kaha va hasa vene na ku putuka ku tu luisa nga tu putuka ku kunguluka. Vunoni nga tu kulahela muli Yehova, ka ka tu seza. Kaha tu ka likuata vusamba neni mu muono uetu uose. Vuno citava vene ku tantekeya vuino Yehova ni? Eyo, citava. Malungano a vantu va ku hona ku tantuluka ngeci mua Mosesa na Muangana Ndaviti, a muesa ngecize citava. Omo tu hilula mizimbu yavo, tu kumbulula vihula vivali: Vati va hetele ha ku tantekeya Yehova? Kaha vika tu hasa ku lilongesa ku malungano avo?

5. Vika Mosesa ua hanguile ku linga?

⁵ Mosesa ua pangesele vize via lilongesele. Mua puisile miaka 40, Mosesa ua hanguile ku likata na vantu va Njambi, vaHevelu, ku hiana “va mu tumbule muana ua muana Falao.” (VaHe. 11:24) Mosesa ua sile lutsimo ku nima. Kaha mua hanguile ku kala ku mutamba ua vaHevelu, ua tantekeyele ngecize Falao a ka niengua cikuma. Falao ua puile muangana ua ngolo kaha vantu va mu puisile ngue njambi. Mua vusunga, Mosesa ua muesele lutsilielo lua kama! Mosesa ua tsilielele mpundu muli Yehova, kaha lutsilielo lukeluo lua puile luvula lua vusamba vueni na Yehova.​—Visi. 3:5.

6. Vika tu hasa ku lilongesa ku lungano lua Mosesa?

⁶ Vika tu lilongesaho? Ngeci mua Mosesa, kua kala cimo cihangula ci tua pande ku linga muntu ku muntu. Cihangula cika? Ku pangela Yehova na ku likuatasana na vangamba veni. Mua vusunga, ku pangela Njambi ce ku tondeka ku lihakela kapandi ka kama, kaha naua vaze ka va mu tantekeya va hasa ku tu luisa. Vunoni nga tu tsiliela muli Tatetu ua muilu Yehova, a ka tu kuasa ku vula nkala cisoti!

7-8. Vika Mosesa ua tualeleho ku lilongesa?

⁷ Mosesa ua tualeleho ku lilongesa vifua via Yehova na ku linga cizango Ceni. Ca ku muenako, omo Yehova ua lekele Mosesa ngueni a ka mu tuma ku Ingito a ka patule vaIsaleli ku vundungo, Mosesa ua lekele Yehova vintsimbu via vingi ngueni, ka ka hasa ku linga cipanga caco. Vunoni Yehova ua mu kumbuluile na ngozi na ku muesa ngecize uevuisisile cifua ca kele na ku livuilamo, kaha a ka mu kuasa. (Ezu. 4:10-16) Vika viezilemo? Mosesa ua hasele ku linga cizango ca Yehova mu ku ambulula mizimbu ya vihiso kuli Falao. Kaha naua Mosesa ua limuenene na meso eni ngolo ya ku komouesa ya Yehova, omo Yehova uovuele vaIsaleli na ku nongesa Falao, mu Cisali ca ku Tila, hamo lika na masualale veni.​—Ezu. 14:26-31; Visa. 136:15.

⁸ Mu nima ya vaIsaleli ku patuka ku vundungo, va putukile ku linienieta vintsimbu via vingi. Vunoni Yehova kasi ua tualeleho ku va muesa lukakatela, kaha Mosesa ua mueneko. (Visa. 78:40-43) Mosesa ua muene naua ku likehesa ca kama ca Yehova. Mu njila ika? Imo ntsimbu, Mosesa ua vundilile Yehova a alulule vutumbe vueni, kaha Yehova ua tavele ku lingamo.​—Ezu. 32:9-14.

9. Kuliya na VaHevelu 11:27, vati vua fuile vusamba vua Yehova na Mosesa?

 ⁹ Mu nima ya ku tuhuka mu Ingito, vusamba vua Mosesa na Yehova vua kaniamene cikuma, kaha ca puile vene ngue Mosesa ua kele na ku mona Ise ua muilu. (Tandenu VaHevelu 11:27.) Mbimbiliya ya muesa vukama vua vusamba vua Yehova na Mosesa, nguayo: “Yehova ua handekele na Mosesa cihanga ku cihanga, ngue omo muntu a handeka na kavusamba keni.”​—Ezu. 33:11.

10. Linga tu tantekeye vuino Yehova, vika tua pande ku linga?

¹⁰ Vika tu lilongesaho? Ku tantekeya vuino Yehova, ka ca puile ku tantekeya lika vifua vieni houe, vunoni na ku linga cizango ceni. Kaha lelo lino cizango ca Yehova ca pua linga “vantu vose vovoke, va hete ha ku tantekeya vusunga.” (1 Tim. 2:3, 4) Ngeci mukemuo, njila imo i tu hasa ku lingilamo cizango ca Yehova, ya pua ku longesa vakuetu va tantekeye vusunga ku tuala hali Ikeye.

11. Vati ku longesa vakuetu via Yehova, ce ku tu kuasa netu vavene ku mu tantekeya vuino?

¹¹ Ku handeka vusunga, mu tue ku kuasa vakuetu ku tantekeya Yehova, tue ku likuasa naua etu vavene ku mu tantekeya vuino. Ca ku muenako, nga tuli na ku ambulula tue ku mona mpundu ngozi ya Yehova, mue ku tu tuamenena kuli vakua mitima ya cili. (Yoa. 6:44; Vili. 13:48) Kaha tue ku mona ngolo ya Lizi lia Njambi, omo vaze va tue ku lilongesa navo ve ku putuka ku alulula cifua ca muono uavo, na ku likela vilinga via ku vihia na ku zala vuntu vua vuha. (Kolo. 3:9, 10) Kaha naua tue ku mona lukakatela lua Yehova, mu ku hana vukovelelo ku vantu va muimbo lietu, mangana navo va tantekeye vusunga linga va ka ovoke.​—Loma 10:13-15.

12. Ngue mu ya muesa Ezundu 33:13, vika Mosesa ua vundilile, kaha omo lia vika?

¹² Mosesa ua hakele seho ya kama ku vusamba vueni na Yehova. Vutuhu Mosesa ua lingile vikomoueso via kama mu lizina lia Yehova, vunoni na kasingimiko kose ua vundilile Yehova, linga a mu kuase ku mu tantekeya vuino. (Tandenu Ezundu 33:13.) Mosesa ua lingile eci civundilo tele na tuvakana laza miaka 80. Vunoni, ua limuene ngecize kasi kua kele via vingi via pandele ku lilongesa ku tuala hali Ise ua muilu.

13. Njila ika ya kama i tu hasa ku muesa ngecize tua haka seho ku vusamba vuetu na Yehova?

¹³ Vika tu lilongesaho? Ambe nga tuli na ku pangela Yehova mu miaka ya yingi, tua pande ku tualelelaho ku haka seho ku vusamba vuetu na Yehova. Kaha imo ya vinjila via kama vi tu hasa ku mueselamo ngecize tua haka seho ku vusamba vuetu na Yehova, ya pua ku handeka neni ku hitila mu vivundilo.

14. Omo lia vika ku vundila ca pua lihungu lia kama mu ku tantekeya Njambi?

¹⁴ Ku simutuila cikeco ca pua lihungu lia nkala vusamba vua cili. Ngeci mukemuo, puenu na ku handeka na Yehova ku sua kumo ku hitila mu vivundilo, kaha kati mu ivue liova lia ku mu leka viose vili ku mutima. (Efe. 6:18) Krista, umo ndumbuetu ua ku Turkiya, ngueni: “Mu ku linga nje ku lekako Yehova visinganieka viange ntsimbu yose mu nje ku vundila, cilemo cange na lutsilielo luange kuli Yehova vili na ku kola. Kaha ku mona cifua ce ku kumbuluilamo Yehova vivundilo viange, ca nji kuasa ku mu puisa Tata na Kavusamba kange.”

15. Vati Yehova ua tumbuile Ndaviti?

¹⁵ Muangana Ndaviti ua semukilile mu cifuti ca kundamene kuli Yehova Njambi. Vunoni Ndaviti ka kavele vulombelo vua visemi veni ku ndzimba. Neni ua lihakelele kapandi ka ku likuata  vusamba vua lika lieni na Yehova, ngeci Yehova ua mu lemene cikuma. Ua hetele na ha ku tumbula Ndaviti ngueni “yala ua ku mutima uange.” (Vili. 13:22) Vati Ndaviti ua hasele ku likuata vusamba vua kama muze na Yehova?

16. Vika Ndaviti ua lilongesele hali Yehova ku viuma via ku tanga?

¹⁶ Ndaviti ua lilongesele via Yehova ku viuma via-ku-tanga. Mua puile mukuendze, ua kele na ku kala ntsimbu ya kama mu musenge, mu ku niunga vampanga va ise. Halumo, ha vintsimbu viaco, hakeho ha kele na ku hiluila viuma via tanga Yehova. Ca ku muenako, omo Ndaviti ua kele na ku tala muilu ua muene makulukazi na makulukazi a vintangantanga. Vunoni ka muene lika vintangantanga, ua nongonuene vifua via Uze ua tangele viuma viaco. Ngeci ua sonekele ku Visamo, ngueni: “Melu ambulula vumpahu vua Njambi; Na lilu li solola vipanga via mavoko eni.” (Visa. 19:1, 2) Omo Ndaviti ua kele na ku tala vantu, ua muene vukama vua mana a Yehova ha ku tanga muntu. (Visa. 139:14) Cili vene, omo Ndaviti ua kele na ku singanieka ha viuma via-ku-tanga, ua muene vundende vueni ku meso a Yehova.​—Visa. 139:6.

17. Nga tu pua na ku tala via-ku-tanga, vika tu hasa ku lilongesa?

¹⁷ Vika tu lilongesaho? Tu Puenu na ku tuala mana ku viuma via-ku-tanga. Kati mu liputuise viuma via-ku-tanga via kala mu mavu ano a ku vuaha ngeci! Puenu na ku uana ntsimbu ya ku vi tala na ku vi hilula. Tangua na tangua puenu na ku hilula viuma via-ku-tanga vi mue ku mona, ngeci mua vintemo, tusitu na vantu. Na ku mona vika mu hasa ku lilongesaho ku tuala hali Yehova. Nga mu lingamo, nkala litangua mu ka lilongesa viuma vieka via vihia ku tuala hali Isuenu ua muilu Yehova. (Loma 1:20) Kaha na cilemo cenu kuli Ikeye ci ka livuezelela cikuma-cikuma.

18. Ngue mu ya muesa Visamo 18, vika ua litavelele Ndaviti?

¹⁸ Ndaviti ua litavelele ngecize Yehova ua kele na ku mu kuasa. Ca ku muenako, omo Ndaviti uohielele vampanga va ise ku ndumba na urso, Ndaviti ua litavelele ngecize Yehova ikeye ua mu kuasele ku vula vaze vikasama. Kaha mua vulile ngungu ya masualale Ngoliata, Ndaviti ua muene ngecize Yehova ikeye ua kele a ku mu tuamenena. (1 Sam. 17:37) Cikuavo naua mua tinine kuli Muangana ua cipululu Saulu, Ndaviti ua litavelele ngecize Yehova ikeye ua mu ovuele. (Mezi a helu lia Visa. 18) Nga Ndaviti ua puile mukua ku lihalesa, nga ngueni ‘Yange ivene nja liohielele.’ Vunoni Ndaviti ua puile ua ku lihekesa, ngeci ua hasele ku nongonona livoko lia Yehova mu muono ueni.​—Visa. 138:6.

19. Vika tu hasa ku lilongesa ku lungano lua Ndaviti?

¹⁹ Vika tu lilongesaho? Ka tua pande lika ku vundila vukuasi vua Yehova. Tua pandele naua ku nongonona ntsimbu ika na vati ue ku tu hana vukuasi vu tue ku tu mu vundila. Nga tu likehesa, tu kevuisisa ngecize ka tu hasa ku linga viuma viose lika lietu, kaha Yehova ue ku tu kuasa ku vize ka tu hasa ku linga ku ndzili yetu. Muanetu Isaac ua ku Fiji, ali na ku pangela Yehova mu miaka ya yingi, ua mona ovu vusunga vuaco. Ivene ngueni: “Mu nje ku hilula ha muono uange, nje ku mona vati Yehova ua nji kuasa tunde ha nja putukilile ku lilongesa Mbimbiliya na ka lelo. Ngeci Yehova ua pua ua vusunga kuli yange.”

20. Vika tu hasa ku lilongesa ku vusamba vua likuatele Ndaviti na Njambi?

²⁰ Ndaviti ua tambuluisile vifua via Yehova. Yehova ua tu tanga na vuhasi vua ku tambuluisa vifua vieni. (Njen. 1:26) Mu tue ku lilongesa via vingi ku tuala ha vifua via Yehova, ce ku tu puila naua ca casi ku mu tambuluisa. Ndaviti ua tantekeyele vuino Ise ua muilu, ngeci ua kele na ku tambuluisa vifua vieni mu ku yoya  na vakuavo. Tu talenu lumo lungano. Imo ntsimbu, vutuhu Ndaviti ua vulumuine ku meso a Yehova mu ku linga vupangala na mpuevo ya mbala Mbateseva kaha ua tsihisile yalieni, vunoni Yehova ua mu ecelele. (2Sam. 11:1-4, 15) Yehova ua mu ecelele, muomu Ndaviti ua tambuluisile Yehova mu ku ecela vakuavo. Mu ku linga Ndaviti ua likuatele vusamba vua kama na Yehova, vaIsaleli va mu lemene cikuma, kaha Yehova ua kele na ku mu pangesa ngue cisetekeso ca vamiangana mu Isaleli.​—1 Vam. 15:11; 2 Vam. 14:1-3.

21. Kuliya na Efeso 4:24 na 5:1, vika vie ku iza mu ku pua “vakua ku tambuluisa Njambi”?

²¹ Vika tu lilongesaho? Tua tondeka ku pua “vakua ku tambuluisa Njambi.” Nga tu lingamo, ka tu uana lika vivezikiso vunoni ci ka tu kuasa naua ku mu tantekeya vuino. Mu tue ku lihakela kapandi ka ku tambuluisa vifua via Yehova, tue ku muesa ngecize tua pua mpundu tu vana veni.—Tandenu Efeso 4:24; 5:1.

22-23. Nga tu pua na ku pangesa vi tue ku lilongesa hali Yehova, vika vi kezamo?

²² Ngue mu tua mono, Yehova ue ku lisolola kuli yetu ku hitila mu viuma via-ku-tanga na mu Lizi lieni Mbimbiliya. Eli livulu lia ku lifuila lia tumbula vantu vavengi vononokele Njambi, va tu hasa ku tambuluisa, ngeci mua Mosesa na Ndaviti. Yehova ua lingako laza mutamba ueni. Yetu honi tua pande ku lingako mutamba uetu, mu ku fukula meso, matuitui na mutima uetu ku vilongesa vieni.

²³ Ku lilongesa via Yehova ka ca kele na ntsongo. (Ekel. 3:11) Ngeci mukemuo, ca seho ya kama kati ku lana ca viuma vi tu tantekeya ku tuala hali Yehova, ca seho ku vi pangesa. Nga tu pua na ku pangesa vi tue ku lilongesa hali Tatetu ua muilu na ku mu tambuluisa, a ka tualelelaho ku pua Kavusamba ketu ua kama. (Tia. 4:8) Ku hitila mu Lizi lieni, Yehova ue ku tu kaniamesa ngecize na limo litangua liahi a ka mbila kuti vaze ve ku mu lengeya.