Halumo kuahi. Satana ka lekele Eva ngueni nga a lia ku vusuka vua vindikile Njambi, a ka soloka lika ngue natsi vunoni cimo cuma ka tu hasa ku mona, (ci ve ku tumbula vavengi nguavo cimbembesi) ci ka tunda mu kati keni, na ku tualelelaho ku yoyela ku cihela ceka, houe. Mua handekele na Eva ku hitila mu linoka, Satana ua mu lekele ngueni nga a lia ku vusuka vua muti uze ‘ka ka tsi cili vene.’ Na mezi aa, Satana ua tondele ku muesa ngecize Eva ue ku tualeleleho ku yoyela vene ha mavu, vunoni mu muono ua cili, ca ku hona ku hitukila hali Njambi.​—Njen. 2:17; 3:3-5.

Eci cilongesa ca makuli ca muono ka ue ku-tsa, ka ca putukilile mu citungu ca Endene. Amba ntsimbu ika honi ca putukile? Ka tu i tantekeya mpundu. Vunoni tu tantekeya ngecize nkala vilongesa via makuli via ku nima, via nongele hamo na vantu vaco ku Livazi lia Noa. Na cimo cilongesa ca makuli covokele ku Livazi cahi, muomu Noa na vusoko vueni vakevo lika vovokele. Kaha ngue mu tua tantekeya, Noa na vusoko vueni va puile vakua ku lemesa Njambi mu vusunga.

Ngeci mukemuo, ku tsiha mpanga, cilongesa ca muono ka ue ku tsa, ca putukile mu nima ya Livazi. Omo Njambi ua tanganesele malimi ku Mbambele kaha vantu va lisanduokele “hose ha mavu,” mua vusunga, mukemuo mu va putukile cilongesa ca muono ka ue ku tsa, kaha va lisanduoka naco. (Njen. 11:8, 9) Vutuhu ka tu tantekeya muaka u ca putukile eci cilongesa, vunoni tuli na vusunga ngecize “Ise ya makuli” Satana, ikeye ua ci sambeyele kaha ua vuile ndzolela ku mona cilongesa caco ci lisanduoka muaya mavu.​—Yoa. 8:44.