Houe, cipue Mbimbiliya ni mavulu eka a mizimbu ka a muesele ngecize kua kele vantu va kele na ku lingamo.

Cifua ci va sonekelamo aa mezi mu viMbimbiliya via vingi, ca lingisa vamo ku singanieka nguavo, ku matangua a Paulu kua kele vantu va kele na ku li mbatiza mu ku imanena vatsi. Ca ku muenako, Mbimbiliya ya Lucazi nguayo: “Amba va ka linga vatindzo vaze va li na ku limbatiza omo vatsi?”​—The Lucazi BIBLE

Vunoni halakanenu vimo vi va handekele vamo valongisi vaMbimbiliya. Dr.  Gregory Lockwood ua handekele ngueni: “Muzimbu ua muesa ngecize laza kua kele vantu va va kele na ku mbatiza mu ku imanenako vatsi, ua pua muzimbu ka uesi na ntsongo na ntsina, ka va u hakuilile cipue ku mavulu eka a mizimbu ni ku Mbimbiliya mpundu.” Kaha co mulongisi Gordon D. Fee ua sonekele ngueni: “Ka kua kele livulu na limo liahi cipue lia Njambi ni lieka, lia muesa ngecize vimbatizimu viaco ku via kele. Testamentu ya iha, ka ya handekele na vimo viahi ku tuala ha cimpande caco, kaha ka kua kele na imo tembele yeka yahi ye ku linga evi, cipue ya Vakua Kilistu va ortodoxa ni ya veka mu sekulu ya hateleko.”

Mbimbiliya ya handeka nguayo, vandongesi va Yesu va pandele ‘ku puisa vantu vose vandongesi na ku va mbatiza, na ku va longesa ku niunga viose via sikile Yesu.’ (Mateo 28:19, 20) Ntsimbu muntu kanda va mu mbatize mu ku pua ndongesi, na pande ku lilongesa via Yehova na Muaneni Yesu, ku va tsiliela kaha na ku vononoka. Evi ka citava ku vi puisamo kuli muntu na tsi ni ka citava va mu lingilevio kuli muntu ueka ali na muono.​—Ekel. 9:5, 10; Yoa. 4:1; 1 Kol. 1:14-16.

Amba vika honi a lomboloka aa mezi a Paulu?

Ku ntsimbu ize, vamo Vakua Kilistu va kele na ku viana nguavo vatsi ka va ka sanguka. (1 Kol. 15:12) Ngeci Paulu ua kele na ku va viana. Vati ua lingilemo? Mu ku handeka ngueni: ‘Ku litangua ku litangua, yange nje ku-tsa.’ Vunoni ngue mu tua tantekeya Paulu kasi ua kele na muono. Kaha vutuhu ua kele na ku hita mu vusonde ua kulahelele ngecize, mu nima ya ku-tsa kasi va ka mu sangula na muvila ua sipilitu ua ngolo, ngeci muze mua sangukile Yesu.​—1 Kol. 15:30-32, 42-44.

Vakua Kolintu, va tondekele ku tantekeya ngecize, mu ku pua Vakua Kilistu, ve ku hitile mu vusonde na vieseko via kama tangua na tangua, kaha na kutsa ntsimbu kanda va vasangule. Kaha ku va mbatiza muli Kilistu Yesu, ca ambateselele kumo na ku va mbatiza naua mu ku-tsa ceni. (Loma 6:3) Eci ca lombolokele ngecize, ngeci mua Yesu navo va pandele ku hita mu vieseko kaha na ku-tsa, amba vuose ve ku vasanguile na kuya muilu.

Yesu ua lekele vandongesi veni vavali mu mua hitile miaka ivali tunde ha mbatizimu yeni ngueni: “Na ku-mbatiza cize nji na limbatiza naco, va ka mi mbatiza naco enu.” (Mako 10:38, 39) Yesu ua tantekeyele ngecize, ku pua mukua vuoloke kuli Njambi ce ku mu kokelele ku-tsa. Paulu ua sonekele ngueni, Vakua Kilistu va ku vuavesa, va pandele ku “yanda hamo neni [Kilistu] linga va ka mone vumpahu hamo neni naua.” (Loma 8:16, 17; 2 Kol. 4:17) Ngeci mukemuo, navo va pandele ku-tsa linga va vasangule na ku ka yoyela muilu.

Ngeci mukemuo, njila ya cili ya pande ku languluilamo mezi a Paulu eyi: “Kati ngoco, va ka linga vatindzo vaze va vali na ku mbatiza linga va ka pue vatsi? Nga vatsi ka va ka sanguka naua, vika co vamo vali na ku va mbatizila nga mu nima yaco va ka pua vatsi?”